ང་ཡི་སེམས་ངོར་འཆར་བའི་ནང་ཆོས།

རྩོམ་པ་པོ། རྔ་བ་བློ་བརྟན།
རྩོམ་ཁུངས། བོད་ཀྱི་དུས་བབ།

རྫུན་པ་འབུམ་གྱི་སྤྲིན་རིམ་ལས་བྱོན་པའི།།
བདེན་པའི་ཉི་མ་དོན་དམ་འོད་པོ་ཆེ།།
གྲང་འཁྱག་ཀློང་ལ་འཁྱུག་ཙམ་ཕོག་པའི་མཐུས།།
བདག་སེམས་དྲོས་པའི་ཁ་བརྡ་འདི་ན་ལུད།།

བོད་པ་མང་བོ་ཞིག་གི་བསམ་བློར་སངས་རྒྱས་བཅོམ་ལྡན་འདས་ཟེར་ཡོང་དུས་སྨོན་ཡུལ་ཞིག་དང་། རང་དང་ཁ་ཐག་ཆེས་རིང་བའི་ལྷ་འམ་སྐྱབས་གནས་ཤིག་ལ་སེམས་ཀྱིན་ཡོད། སངས་རྒྱས་ནི་མི་ལས་སྟོབས་དང་ནུས་པ་ཆེ་ཞིང་དེ་ལ་གསོལ་བ་བཏབ་ན། རང་ལ་མགོན་སྐྱབས་གནང་སྟེ་བར་ཆད་སེལ་ཞིང་། སངས་རྒྱས་ཀྱི་འཁོར་དུ་སྐྱེ་ཐུབ་སོང་ན། དེར་ཟས་གོས་རང་གྲུབ་ཀྱི་བདེ་སྐྱིད་ཀྱི་ཞིང་ཁམས་ཤིག་སེམས་ལ་འཁོར་བཞིན་ཡོད། ཞིང་དེར་སྐྱེ་ཐུབ་པ་འམ་རང་གི་མི་ཚེ་དང་ནང་མི་སོགས་ལ་ཚེ་འདིར་བར་ཆད་མེད་པ་དང་། བསམ་དོན་འགྲུབ་ཕྱིར་སངས་རྒྱས་ཀྱི་སྐུ་གསུང་ཐུགས་རྟེན་ལ་མཆོད་འབུལ་སོགས་དགེ་བའི་ལས་སྣ་ཚོགས་ལ་འབད་མུས་ཡིན། དེ་ལྟར་བྱེད་མཁན་ཚོས་རང་ཉིད་ནང་པ་ཡིན་བསམ་པ་དང་། རང་ཉིད་ནས་ཀྱང་ནང་ཆོས་ཉམས་ལེན་བྱེད་བཞིན་ཡོད་པར་འདོད།

ཐོག་མར་ཤེས་དགོས་པ་ཞིག་ལ། སྤྱིར་བཏང་བྱས་ན། སངས་རྒྱས་བཅོམ་ལྡན་འདས་ནི་ལོ་་༢༦༠༠ སྔོན་འཁྲུངས་པའི་མི་ཞིག་རེད། ཁོང་ནི་མི་རིགས་རྒྱ་གར་ཡིན་ཞིང་རྒྱལ་བོའི་ཟས་གཙང་གི་སྲས་སུ་འཁྲུངས། འཁྲུངས་ས་དེ་དེང་སང་གི་དབང་བྱས་ན་བལ་ཡུལ་གྱི་ལུམ་བྷའི་གནས་རེད། ཆུང་དུས་ནས་ལོ་ངེས་ཅན་རིང་མི་བཏང་གི་འཚོ་བ་རོལ་ཏེ། རྒྱལ་སྲིད་བཟུང་ཞིང་བཙུན་མོ་བླངས་ཏེ་བུ་གུ་ཡང་སྐྱེས། བུ་གུའི་མིང་ལ་དགྲ་གཅན་འཛིན་ཟེར། རེད་དེ། ཁོང་གིས་རྒྱལ་སྲིད་བཟུང་སྟེ་ལོ་གང་འཚམ་ཕྱིན་རྗེས། རྒྱལ་སྲིད་བཟུང་བའི་རིང་ཕན་ཚུན་འགྲན་སེམས་ཁོན་སེམས་དང་། ང་རྒྱལ་ཕྲག་དོག་གིས་དུས་འདའ་བ་ཞིག་ཡིན་ཞིང་། ཕོ་བྲང་གི་ཕྱི་ལོག་ན་ཟས་གོས་གནས་མལ་གྱིས་འཕོངས་པའི་དཀའ་ངལ་དང་། སྐྱེ་རྒ་ན་འཆི་སྡུག་བསྔལ་སོགས་མི་མཐོ་དམན་ཚང་མའི་ཐོག་ལ་ཡོང་ངེས་ཡིན་པས། དེ་དག་ལས་ཐར་བ་ཐོབ་ཕྱིར་མུ་མཐུད་དུ་རྒྱལ་སྲིད་འཛིན་འདོད་མེད་པར་གྱུར་ཏེ་རབ་ཏུ་བྱུང་ཞིང་། དེ་ནས་དཀའ་བྱེད་སྡུག་རུས་ཀྱི་ལོ་མང་རིང་སྒོམ་ཉམས་ལེན་གྱིས་ཉོན་མོངས་ལ་ཁ་གཏད་དང་། སེམས་ཀྱི་གནས་ལུགས་ངོ་མ་ཅི་ཡིན། ཉོན་མོངས་ཀྱི་རྩ་བ་གང་ལ་ཐུག་པ་དང་། དེ་རྩ་བ་ནས་སྤང་ཐུབ་པ་ཡོད་མེད། མཐར་ཐུག་གི་བདེ་བ་ཁྱད་པ་ཞིག་སྐྱེ་རྒྱུ་ཡོད་མེད་ལ་རྟོགས་པ་འཁྲུངས་ཏེ། གཞི་ནས་ཉོན་མོངས་རྩ་བ་ནས་སྤང་རྒྱུ་ཡོད་པ་མ་ཟད། མཐར་ཐུག་གི་བདེ་བ་ཁྱད་པ་ཞིག་གམ་སེམས་ཀྱི་གནས་ལུགས་གང་ཡིན་པ་མངོན་དུ་འགྱུར་རྒྱུ་ཡོད་པ་རྟོགས་པ་དང་། སེམས་ཀྱི་གནས་ལུགས་དེ་མངོན་དུ་གྱུར་ཞིང་། དེའི་བདེ་བ་ལ་རོལ་བ་ནི་སངས་རྒྱས་པའོ། དེ་ལྟར་ན། སངས་རྒྱས་ཟེར་བའི་དོན་ཡང་སེམས་ཀྱི་གནས་ལུགས་མངོན་དུ་འགྱུར་བའི་དོན་ལས་མ་འདས་སོ།།

སེམས་ཀྱི་གནས་ལུགས་མངོན་དུ་ཇི་ལྟར་གྱུར་བའི་རིམ་པ་དང་། གོ་རིམ། ཁྱད་ཆོས། ཉམས་ལེན་བྱེད་སྟངས་སོགས་གསུང་བ་དེ་ལ་སངས་རྒྱས་ཀྱི་གསུང་ངམ་ནང་ཆོས་ཟེར། སངས་རྒྱས་ཀྱིས་སློབ་མ་རྣམས་ལ་ཡོངས་གྲགས་སམ་རྒྱ་ཆེ་ས་ནས་ནང་ཆོས་ཐེངས་གསུམ་གསུང་པ་དེ་ལ་ཆོས་ཀྱི་འཁོར་ལོ་རིམ་པ་གསུམ་བསྐོར་ཟེར། ཆོས་ཀྱི་འཁོར་ལོ་རིམ་པ་གསུམ་བསྐོར་བའི་ནང་དུ་ཧ་ཅང་རྒྱ་ཆེ་ཞིང་གཏིང་ཟབ་པའི་ནང་པའི་མདོ་ཕྱོགས་ཀྱི་ཆོས་ཐམས་ཅད་འདུས་ཤིང་། གཞི་དངོས་པོའི་གནས་ལུགས་ནས་ལམ་བགྲོད་པའི་རིམ་པ། འབྲས་བུ་སངས་རྒྱས་ཀྱི་གོ་འཕངས་བར་དུ་ཞིབ་ཚགས་ཀྱིས་དབྲལ་ཏེ་གཏན་ལ་ཕབ་ཅིང་། གོ་རིམ་དེའི་ཁྲོད་དུ་སྐྱེ་བ་སྔ་ཕྱི་དང་། ལས་འབྲས། དགེ་སྡུག་གི་རྣམ་གཞག་སོགས་བཤད་དེ། མི་རྣམས་ལ་བླང་དོར་གྱི་གནས་མང་པོ་བསྟན་ནས། རང་གི་ལུས་ངག་ཡིད་གསུམ་ལ་སྟངས་འཛིན་བྱེད་བཞིན་ཡོད། ཁམས་གསུམ་འཁོར་བའི་གནས་གང་དུ་སྐྱེས་ཀྱང་འཁོར་བ་ནི་སྙིང་བོ་མེད་པར་འགྲེལ་ལ། ཐ་ན་རང་ཉིད་ཀྱང་སྐྱེ་རྒ་ན་འཆིའི་བདག་ཉིད་ལས་མ་འདས་པས། འཁོར་བའི་གནས་ལས་ཐར་ཏེ་གཏན་གྱི་བདེ་བ་འཐོབ་པར་སྐུལ་མ་གཏོང་གི་ཡོད། དེར་བརྟེན་ནང་ཆོས་ཀྱིས་ནམ་ཡང་འཇིག་རྟེན་འདི་འམ་འཁོར་བ་འདི་ནས་དགྲ་འདུལ་གཉེན་སྐྱོང་དང་། འཇིག་རྟེན་འཕེལ་རྒྱས་ཀྱི་བྱ་སྤྱོད་ཚང་མ་དོར་བྱ་རེད། ནང་ཆོས་ཀྱིས་འཇིག་རྟེན་གྱི་འཁོར་ཕྱོགས་ལ་ཁ་གཏད་བཅག་སྟེ། དེ་ལས་ལྷག་པའི་སེམས་ཀྱི་བདེ་བའམ་གནས་ཁྱད་པ་ཞིག་ལ་སྙེག་བཞིན་ཡོད།

རང་རེས་བོད་གངས་ཅན་ལྗོངས་ལ། ནང་ཆོས་དུས་རབས་བདུན་པ་ནས་དར་འགོ་ཚུགས་ཏེ་ད་བར་ལོ་ངོ་༡༣༠༠ ཡས་མས་འགྲོ་བཞིན་ཡོད། དེའི་རིང་དུ་ནང་ཆོས་བོད་དུ་ས་ཁྱབ་རྡོ་ཁྱབ་བྱུང་སྟེ། ཆོས་བརྒྱུད་མི་འདྲ་ལྔ་ཡིས་རང་རང་ས་ནས་ནང་ཆོས་དར་སྤེལ་བྱས་ཡོད། བོད་དུ་གྲྭ་བ་དང་བཙུན་མ་ཁྲི་ཕྲག་བརྒལ་བ་བྱུང་བ་མ་ཟད། ཤེས་ཚོད་ལ་བོད་ཁམས་ཡོངས་སུ་དགོན་པ་དྲུག་སྟོང་ལས་བརྒལ་བ། གཙུག་ལག་ཁང་བརྒྱ་ཕྲག་བཞེངས་སྐྲུན་བྱས་ཡོད། དགོན་པ་དང་གྲྭ་བཙུན་དེ་དག་ལ་བོད་རྒྱ་ཆེའི་མི་མང་གིས་བསྙེན་བཀུར་ཞབས་ཏོག་བསྒྲུབས་ཏེ། ཉིན་རེའི་འཚོ་བའི་ཁྲོད་ཀྱི་དཔལ་འབྱོར་གྱི་འགྲོ་སོང་ངེས་ཅན་ཞིག་ཆོས་ཕྱོགས་ལ་གཏོང་མུས་རེད། དེ་ནི་སངས་བསྟན་དར་སྤེལ་དང་རྒྱུན་འཛིན་ཁྲོད་དུ་འཁོར་ལོ་གསུམ་གྱི་རྣམ་གཞག་ལས། བྱ་བ་ལས་ཀྱི་འཁོར་ལོའི་ཁོངས་སུ་འདུ་ཞིང་། བྱ་བ་ལས་ཀྱི་འཁོར་ལོའི་དོན་ནི་ནང་ཆོས་ལ་ཐོས་བསམ་སྒོམ་གསུམ་བྱེད་མི་ཐུབ་པའི་མི་སྐྱ་ཚོས། མ་འོངས་པར་བྱེད་ཐུབ་པར་བག་ཆགས་འཇོག་ཕྱིར་རམ་ཚོགས་གསོག་སྒྲིབ་སྦྱོང་ཡིན་པར་འགྲེལ་གྱིན་ཡོད།

ངས་དཔག་ཚོད་ཀྱིས་བལྟས་ན། ནང་ཆོས་ནས་མང་པོ་མང་པོ་ཞིག་བཤད་ཡོང་དུས། རྩ་བ་ཐུག་ས་དེ་སྐྱེ་བ་སྔ་ཕྱི་ཡོད་མེད་དང་། ལས་འབྲས་ཡོད་མེད་ལ་ཐུག་འདུག གལ་ཏེ་སྐྱེ་བ་སྔ་ཕྱི་མེད་པ་དང་ལས་འབྲས་མེད་ན། ནང་ཆོས་ལས་མང་པོ་མང་པོ་ཅི་ཙམ་བཤད་ཀྱང་སྟོང་པ་རེད་འདོད། ནང་པའི་ཚན་མའི་གཞུང་ལས་ད་ལྟའི་ཤེས་པའི་རྒྱུ་ལ་ཤེས་པ་སྔ་མའི་རྒྱུན་བརྒྱུད་ནས་ཡོང་དགོས་པ་ལས། རྒྱུ་གཞན་གྱིས་ཚབ་བྱེད་མི་ཐུབ་པར་བརྗོད་དེ། ཕ་མའི་ཁུ་ཁྲག་འདུས་ཤིང་རྒྱུ་རྐྱེན་མང་པོ་ཞིག་འཛོམས་ཐོག རྣམ་ཤེས་ཀྱིས་སོས་བཏབ་ན་གཞི་ནས་སྐྱེ་བ་བླངས་ཏེ། མི་དང་དུད་འགྲོ་གང་ཡིན་གྱི་ལུས་རྟེན་ཐོབ་ཀྱི་ཡོད། ཤེས་པ་ལ་ཕྲ་རག་མང་པོ་ཞིག་སྐབས་དང་སྐབས་སུ་ཤོད་ཀྱིན་ཡོད་ཀྱང་། གཙོ་བོ་རྣམ་ཤེས་ཀྱི་རྒྱུ་ལ་ཤེས་པ་སྔ་མ་ཞིག་མེད་ན། ད་ལྟ་ཁྱོད་ཀྱི་ལུས་རྟེན་ལ་ཡོད་པའི་ཤེས་པ་དེ་ཡོང་ཐབས་མེད།  ཕ་མའི་ཁུ་ཁྲག་འདུས་ཙམ་གྱིས་སྐྱེ་བ་ལེན་པར་མི་འདོད་ལ། དེའི་ཁར་ཤེས་པ་སྔ་མ་ཞིག་གིས་སོས་བཏབ་དགོས་པ་དེ་ནང་པའི་འདོད་ཚུལ་རེད། ཤེས་པའི་རྒྱུ་ལ་ཤེས་པ་དགོས་པ་དེ་བྲོ་ཡི་རྒྱུ་ལ་བྲོ་དགོས་པ་དང་གཅིག་མཚུངས་ཡིན་ཞིང་། ཤེས་པ་ལ་ཐོག་མཐའ་མེད་ལ་འཛིན་རག་བྲལ་ཏེ། སངས་མ་རྒྱས་ཀྱི་བར་དུ་ཁམས་གསུམ་འཁོར་བར་འཁྱམ་ནས་འགྲོ་དགོས་པ་དེ་ནང་པའི་མི་ཚེའི་ལྟ་སྟངས་རེད། སྐྱེ་པ་སྔ་ཕྱི་དང་ལས་འབྲས་ཡོད་མེད་ཐད་ནས་བཤད་ན། ཤུན་ཏུ་ལྐོག་གྱུར་ཡིན་པས་མངོན་སུམ་དུ་ར་སྤྲོད་དཀའ་ཞིང་། ཡིད་ཆེས་དང་རྒྱུ་མཚན་གྱི་རྗེས་སུ་མི་འགྲོ་རང་འགྲོ་རེད། ཡང་ན་ནི་མ་མཐོང་ན་མེད་པར་འཛིན་རྒྱུ་དེ་རེད། སྐྱེ་བ་སྔ་ཕྱི་ཡོད་པར་སྒྲུབ་བྱེད་དང་རྒྱུ་མཚན་མང་ཞིང་། སྐྱེ་བ་སྔ་མ་དྲན་པའི་མི་ཡང་མང་པོ་བྱུང་མྱོང་ཡོད། བོད་མི་ཚོས་སྐྱེ་བ་སྔ་ཕྱི་ཡོད་ཤག་ཤག་བྱས་ནས་འགྲོ་བཞིན་ཡོད་ཀྱང་། དོན་ལ་ཡོད་ན་ཡོད་ཚུལ་ཇི་འདྲ་ཡིན་པ་དང་། མེད་ན་མེད་ཚུལ་ཇི་འདྲ་ཡིན་པ་ཤེས་མཁན་དཀོན།  གལ་ཏེ་རོབ་ཙམ་རེ་ཤེས་ཐུབ་ནའང་། རང་གི་ཉིན་རེའི་འཚོ་བའི་ཁྲོད་ཀྱི་ཆོས་བྱེད་ཀྱི་རྣམ་གཞག་གནད་དུ་འགྲོ་མིན་ལ་ཁྱད་པར་འགྲོ་ཞིང་། དེ་བཞིན་འཇིག་རྟེན་འདིར་མི་ལས་དགུ་ལས་བྱས་ན་ཡང་ལམ་འགྲོ་ཡོད་པ་དང་། བཟང་པོའི་ལས་རྐྱང་རྐྱང་བྱས་ནའང་དཀའ་ངལ་འཕྲད་འཕྲད་ལ་བསྡད་ཡོད་པ་མཐོང་ཆོས་ཡིན་དུས། དེ་དག་ལས་མི་མང་པོ་ཞིག་ལ་ལས་འབྲས་བདེན་མིན་གྱི་དོགས་པ་སྐྱེས་ཡོང་དུས། ལན་ནི་སྐྱེ་པ་སྔོན་མ་ལས་བཟང་ངན་གང་བསགས་ཀྱི་རྗེས་སུ་འགྲོ་ལྡོག་བྱེད་པ་ལས། ད་ལྟའི་མཐོང་ཆོས་ཙམ་མིན་པར་ལས་འབྲས་ནི་ནམ་ཡང་བསླུ་བ་མེད་པར་འདོད།  ལས་འབྲས་ཀྱི་རྣམ་གཞག་ཕྲ་ཞིང་ཕྲ་བ་ནི་སངས་རྒྱས་ཁོ་ནའི་སྤྱོད་ཡུལ་ཡིན་པ་ལས་ཕར་བའི་མིས་རྟོགས་མི་ནུས་པར་བཤད།

ནང་ཆོས་ནི་མི་སྒེར་གྱི་ཉམས་ལེན་བྱེད་རྒྱུ་ཞིག་རེད་ལ། ཐར་བ་དང་ཐམས་ཅད་མཁྱེན་པའི་གོ་འཕངས་ཀྱི་སྐད་ཆ་དང་ཉམས་ལེན་བཞག་ནས་བཤད་ན། ཁྱོད་ཤི་ང་གསོན་གྱི་་འཇིག་རྟེན་འདིར། མི་ཐམས་ཅད་བྲེལ་ཟིང་དང་འཕྲུལ་རིགས་ཀྱི་བཀོད་སྤྱོད་འོག་ཚུད་དེ། སེམས་ཁམས་རྒྱུན་ལྡན་ངང་གནས་མ་ཐུབ་པར་དཀའ་ངལ་སྣ་ཚོགས་འཕྲད་དང་འཕྲད་མུས་སྐབས་འདིར། དཀའ་ངལ་དེ་དག་ལས་རྒྱལ་བར་ནང་ཆོས་ལས་གསུང་བའི་སེམས་ཀྱི་བསླབ་བྱ་དག་ལག་ལེན་དུ་བསྟར་ཐུབ་ན། སེམས་ཀྱི་འཇིགས་སྣང་ཆུང་དུ་འགྲོ་ཞིང་། སེམས་ཁམས་ཟ་ངེ་ཟིང་ངེ་ལས་ལྡོག་སྟེ་ཞི་བདེ་བག་ཕེབས་ངང་གནས་པར་སྨན་ཡག་ཤོས་སུ་བཤད་ཅིང་། ནང་ཆོས་ཀྱིས་ཕྱི་དངོས་པོ་ལས་ནང་བསམ་བློ་དང་། རང་གཞན་གཉིས་ལས་རང་ལ་བརྟག་དཔྱད་དང་རང་སེམས་བཅོས་ཐབས་ཤིག་ཀྱང་རེད། རྐྱེན་དང་བར་ཆད། མ་འགྲིག་མ་འཐུས་པ་ཅི་ཞིག་བྱུང་ནའང་། ངན་ཁག་གཞན་ལ་དཀྲིལ་བ་ལས་རང་རྒྱུད་ཀྱི་ཉོན་མོངས་ལ་ཁ་གཏད་བཅག་ནས་སྒོ་གསུམ་བག་ཡོད་བསྟེན་ཏེ། རང་རྒྱུད་ནས་ཞི་བདེ་འགོ་བཙུགས་ཏེ་ཁྱིམ་ཚང་། དེ་ནས་གྲོང་སྡེ།  མཐར་སྤྱི་ཚོགས་ཧྲིལ་བོ་མཛའ་མཐུན་ལ་གནས་རྒྱུ་དེ་རེད། ད་དུང་གཅིག་བཤད་ན། ནང་པ་དང་དེ་ནང་ནས་ཐེག་ཆེན་པ་ཞིག་ལ་མཚོན་ན། ཁོའི་སེམས་ཁམས་ནི་དངོས་གནས་རྒྱ་ཆེ་ལ་གཏིང་ཟབ། ཕར་བའི་མིའི་སེམས་ལ་གཤོང་དཀའ་སྟེ། འགྲོ་བ་སེམས་ཅན་ཚང་མ་རང་གི་མ་རུ་བརྩི་ཞིང་། དེའི་ཆེད་ལུས་སྲོག་ལོངས་སྤྱོད་དང་བཅས་དོར་དགོས་ན། དགའ་བཞིན་སྤྲོ་བཞིན་དུ་འཇུག་ཐུབ་པའི་སེམས་ཁམས་ཁྱད་པར་བ་ཞིག་བཤད་ཀྱིན་ཡོད། དེ་འདྲ་ཡོང་མི་སྲིད་པ་ཞིག་ཀྱང་མིན་ལ། དོན་ལ་དེ་ལྟ་བུའི་སྐྱེས་བུ་སྙིང་སྟོབས་ཅན་མང་པོ་བོད་དུ་བྱོན་མྱོང་ཡོད།

སངས་རྒྱས་བཅོམ་ལྡན་འདས་སམ་རང་ཉིད་སངས་རྒྱས་ཀྱི་གོ་འཕངས་འཐོབ་དགོས་ན། སངས་རྒྱས་རང་གི་ཞལ་ནས། བདག་ཉིད་བདག་གི་མགོན་ཡིན་ཞེས་དང་། ངས་ནི་ཁྱོད་ལ་ཐར་བའི་ལམ་སྟོན་གྱི། ཐར་བ་རང་ལ་རེག་ལས་ཤེས་པར་བྱ་ཞེས་པས་བསྟན་དོན་ནི། ངས་ཁྱོད་ལ་ལམ་ཁ་གང་དང་གང་བརྒྱུད་ནས་ཐར་བ་དང་ཐམས་ཅད་མཁྱེན་པའི་གོ་སར་འགྲོ་དགོས་པ་དང་། སེམས་ལ་འགྱུར་བ་ག་འདྲ་གཏོང་དགོས་པ། བླང་བྱ་དང་དོར་བྱ་གང་ཡིན་བཤད་ཡོད། བཤད་པ་ལྟར་འགྲོ་ཐུབ་ན་ནི་ཐར་བ་དང་ཐམས་ཅད་མཁྱེན་པའི་གོ་འཕངས་འཐོབ་ཐུབ། ཐོབ་ཐུབ་མིན་ནི་ཁྱེད་ཉིད་ནས་ངས་བཤད་པ་ལྟར་འགྲོ་ཐུབ་མིན་ལ་རེག་ལས་པ་ཡིན་ཞིང་། དེ་མིན་སྐུ་གསུང་ཐུགས་རྟེན་ལ་ཕྱག་དང་སྐོར་བ། མཆོད་འབུལ་བྱས་པ་ཙམ་གྱིས་མི་ཡོང་སྟེ། སངས་རྒྱས་ཀྱིས། ཐུབ་རྣམས་སྡུག་པ་ཆུ་ཡིས་མི་ཁྲུ འགྲོ་བའི་སྡུག་བསྔལ་ཕྱག་གིས་མི་སེལ་ལ།། ཉིད་ཀྱི་རྟོགས་པ་གཞན་སྤོ་མིན་ཏེ། །ཆོས་ཉིད་བདེན་པ་བསྟན་འདིས་གྲོལ་བར་བྱ།། ཞེས་པ་ འདིས་ནི་སྡུག་པ་བཤགས་དགོས་ན་རེད། བདེ་བ་ཐོབ་དགོས་ན་རེད། ཚང་མ་རང་ཉིད་ཀྱིས་བྱེད་དགོས་པ་ལས་གཞན་ཞིག་སྟེ་ལྷ་འམ་དཀོན་མཆོག་གི་ལག་པ་བསྐྱངས་ནས་ཁྱོད་ཀྱི་སྡུག་བསྔལ་མེད་པར་བཟོ་བ་དང་། བདེ་བ་མེད་པ་དེ་སྐྱིད་པོ་བཟོ་བ་ནི་ཡོང་མི་སྲིད་ལ། དེ་ནི་ཆོས་ཉིད་དང་འགལ་ཞིང་། དངོས་ཡོད་ཀྱི་གནས་སྟངས་ལ་གཞིགས་ནའང་མི་མཐུན་པ་ཡིན་དུས། ཆོས་ཉིད་ལ་སུས་ཀྱང་ཁ་གཏད་གཅོག་མི་ནུས་པའི་དོན་དངོས་དེ་ཤེས་སུ་བཅུག་པ་མ་ཟད། རང་གིས་རང་ཉིད་བདག་བརྒྱབས་ཏེ་རང་མགོ་རང་གིས་མ་གཡོག་པར་མི་ཚེ་དོན་ལྡན་ལ་གཞོལ་དགོས་པ་དེ་བསྟན།

རྨོངས་པའི་མིག་གིས་མཐོང་བའི་སྣང་ཚུལ་འདི།།
གནས་ཚུལ་དངོས་ལ་རེག་པ་དཀའ་ནའང་།།
དོན་དམ་གང་ཡིན་ལིང་ལ་གཏོན་པའི་ཆེད།།
ཤེད་མེད་བུ་ཡིས་འཕག་འཚག་འདི་བྱས་སོ།།