རྒྱ་ནག་གཞུང་གི་གནོན་ཤུགས་འོག་ཨུ་རུ་སུའི་ཁལ་མིག་ནང་འཚོགས་པའི་རྒྱལ་སྤྱིའི་ནང་པའི་གླེང་སྟེགས་སྟེང་བོད་ཀྱི་བླ་ཆེན་དང་མཁན་པོ་ཁག་ཅིག་ལ་ཐོངས་མཆན་དུས་ཐོག་ཕུལ་མི་འདུག
ཟླ་འདིའི་ཕྱི་ཚེས་ ༢༥ ནས་ཉིན་གྲངས་བཞིའི་རྒྱལ་སྤྱིའི་ནང་པའི་གླེང་སྟེགས་དེ་ཨུ་རུ་སུའི་ཁལ་མིག་(Kalmykia)གི་རྒྱལ་ས་ཨི་ལི་སི་ཊ་ (ELista) རུ་འཚོགས་ཡོད་ཅིང་། ཚོགས་ཆེན་དེའི་སྟེང་ཁལ་མིག་སྲིད་འཛིན་གྱི་སྐུ་ཚབ་དང་། ཕྱི་དྲིལ་བློན་ཆེན་གྱི་སྐུ་ཚབ། རིག་གཞུང་བློན་ཆེན། བྷི་རི་ཡ་དང་ཐུའུ་ཝ་ཡི་སྲིད་འཛིན་བྷ་ཏུ་(Buta Khasikov)མཆོག་དང་ཨེ་ལིག་སེ་ (Aleksey tsydenor)མཆོག་རྣམ་གཉིས་ཀྱི་དབུས་ནང་པའི་རྒྱལ་ཁབ་ ༥༠ ཡས་མས་ཀྱི་སྐུ་ཚབ་ཕེབས་ཡོད་འདུག བོད་པའི་སྐུ་ཚབ་སྒོ་མང་མཁན་རིན་པོ་ཆེ་འཇིགས་མེད་རྒྱ་མཚོ་མཆོག་དང་། སྒོ་མང་མཁན་ཟུར་བློ་བཟང་རྒྱལ་མཚན་རིན་པོ་ཆེ་མཆོག ཨུ་རུ་སུའི་ནང་གནས་སྡོད་སྨན་པ་འཇིགས་མེད་རྒྱ་མཚོ་ལགས་བཅས་ཕེབས་ཡོད་འདུག
གནད་དོན་དེའི་ཐད་ཨུ་རུ་སུར་གནས་སྡོད་སྨན་པ་འཇིགས་མེད་རྒྱལ་མཚན་ལགས་ཀྱིས་འདི་གའི་གསར་འགོད་པར། ནང་པའི་གླེང་སྟེགས་ཀྱི་ཉིན་གྲངས་བཞིའི་རིང་རྒྱ་ནག་དང་། ལྷོ་སོག སོག་པོ། ཝེ་ཐི་ནམ། ཁམ་བྷོ་ཌི་ཡ། ཐའེ་ལེན་ཌི། འབར་མ། སིངྒ་ལ། བལ་ཡུལ། རྒྱ་གར་གཙོས་འཛམ་གླིང་གི་ནང་པའི་རྒྱལ་ཁབ་ཕལ་མོ་ཆེའི་སྐུ་ཚབ་བསླེབས་འདུག་ལ། བོད་པའི་སྐུ་ཚབ་སྒོ་མང་མཁན་པོ་རིན་པོ་ཆེ་འཇིགས་མེད་རྒྱ་མཚོ་མཆོག་དང་། སྒོ་མང་མཁན་ཟུར་བློ་བཟང་རྒྱལ་མཚན་རིན་པོ་ཆེ་མཆོག་ལས་ཕེབས་ཐུབ་མི་འདུག གང་ཡིན་ཟེར་ན། སྤྱིར་གོ་སྒྲིག་ཚོགས་ཆུང་གིས་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་དང་། གླིང་རིན་པོ་ཆེ་མཆོག ས་སྐྱ་ཁྲི་འཛིན་རིན་པོ་ཆེ་མཆོག བྱང་རྩེ་ཆོས་རྗེ། རྒྱུད་སྟོད་ཀྱི་མཁན་པོ་སོགས་གདན་འདྲེན་ཞུས་ཏེ། རྒྱ་གར་གཞུང་གིས་རང་བསྲེལ་འཁུར་བྱེད་ཀྱི་དམག་མིའི་གནམ་གྲུ་སོགས་གྲ་སྒྲིག་གནང་ཟིན་ནའང་། རྒྱ་ནག་གཞུང་གིས་༸གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་ཡོང་ན་ཁོང་ཚོ་ཡོང་གི་མིན་ལབ་ནས་གནོན་ཤུགས་སྤྲད་རྐྱེན། ཐོངས་མཆན་བཀག་འགོག་བྱས་ཏེ། ཁ་སང་ཕྱི་ཚེས་ ༢༧ ཉིན་གཞི་ནས་ཐོངས་མཆན་སྤྲད་དེ་ཆེད་དུ་གླེང་སྟེགས་སྟེང་མཉམ་ཞུགས་བྱེད་པར་རྗེས་ལུས་ཐེབས་བཅུག་ཡོད་པ་རེད། ད་ལན་རྒྱ་ནག་གཞུང་གི་གནོན་ཤུགས་དེས་སེམས་མི་སྐྱིད་པ་ཞིག་བཟོས་སོང་ལ། གླེང་སྟེགས་དེའི་སྟེང་ཨུ་རུ་སུའི་རྒྱ་ནག་གཞུང་ཚབ་ཁང་གཙོས་རྒྱ་ནག་གི་འཐུས་མི་མི་གྲངས་ལྔ་བཅུ་ནས་དྲུག་ཅུ་བར་བསླེབས་འདུག ཅེས་བརྗོད་བྱུང་།
སྨན་པ་འཇིགས་མེད་རྒྱལ་མཚན་ལགས་ཀྱིས་གླེང་སྟེགས་ཐོག་གསུང་བཤད་གནང་འདུག་ལ། དེའི་སྐོར་ལ་ཁོང་གིས། ངས་ད་ལན་ནང་པའི་ཚད་པ་མ་རིག་པ་དང་བོད་ཀྱི་གསོ་བ་རིག་པའི་ཐོག་ལ་གཏམ་བཤད་བྱས་པ་ལས། གོ་སྒྲིག་པས་དེང་སྐབས་རྒྱ་ནག་དང་ཨུ་རུ་སུ་གཉིས་འབྲེལ་ལམ་ཡག་པོ་ཡོད་པས། ཆབ་སྲིད་ཀྱི་སྐད་ཆ་མ་བཤད་ན་ལབ་ཀྱི་འདུག་པས་ཆབ་སྲིད་ཀྱི་སྐད་ཆ་གཅིག་ཀྱང་བཤད་མེད། ངའི་ད་ལོའི་འབུམ་རམ་པའི་མཐར་ཕྱིན་དཔྱད་རྩོམ་ནང་པའི་ཚད་མ་རིག་པ་དང་བོད་ཀྱི་གསོ་བ་རིག་པ་ཞེས་པ་དང་འབྲེལ་ནས། ཚད་མ་རིག་པ་དང་གསོ་བ་རིག་པ་འདིས་འཛམ་གླིང་ལ་ཞབས་འདེགས་སྒྲུབ་མུས་ཡིན་པ་དང་། དེ་ཡར་རྒྱས་གཏོང་ཕྱོགས། དེས་མི་མང་ལ་ཕན་ཐོགས་གཏམ་བཤད་བྱས་པ་ཡིན། སྐུ་ཚབ་མང་པོ་ཐོན་ཡོད་ཀྱང་ཆབ་སྲིད་དང་འབྲེལ་བའི་སྐད་ཆ་གཅིག་ཀྱང་བཤད་ཐུབ་ཀྱི་མི་འདུག ཅེས་བརྗོད་བྱུང་།
འདི་ལོར་ཨུ་རུ་སུར་འཚོགས་པའི་རྒྱལ་སྤྱིའི་ནང་པའི་གླེང་སྟེགས་སྟེང་། ནང་ཆོས་ཀྱི་རིན་ཐང་དང་། ནང་པའི་རིག་གཞུང་། ནང་པའི་རྩོམ་རིག ནང་པའི་སྒྱུ་རྩལ། གསོ་རིག ཨེ་ཤ་ཡའི་རྒྱལ་ཁབ་ཁག་གི་ལོ་རྒྱུས་དང་འབྲེལ་ནས་ནང་ཆོས་ཀྱི་འཕེལ་འགྲིབ། དེང་རབས་ཉམས་ཞིབ་པའི་ཉམས་ཞིབ་ཁྲོད་ཀྱི་ནང་ཆོས། ནང་ཆོས་ཀྱིས་རྒྱལ་སྤྱིའི་ཡུལ་སྐོར་བའི་ཁྲོམ་རར་ཤུགས་རྐྱེན་གང་འདྲ་སྤྲོད་ཀྱི་་ཡོད་མེད། ནང་པའི་དགོན་སྡེ་དང་སློབ་གྲྭ་ཁག་ཇི་ལྟར་རྒྱ་སྐྱེད་དང་ཉར་ཚགས་དགོས་མིན་སོགས་ཀྱི་གནད་དོན་ཐད་གསུང་བཤད་དང་བགྲོ་གླེང་གནང་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
