དེ་རིང་རྒྱ་ནག་གཞུང་གིས་བཅད་བགོས་བྱས་པའི་སི་ཁྲོན་ཞིང་ཆེན་དཀར་མཛེས་ཁུལ་ཉག་རོང་རྫོང་ཁོངས་སུ་ཚད་རིམ་ ༥།༥ ཅན་གྱི་ས་ཡོམ་བྱུང་ཡོད་ཀྱང་མི་རྒྱུ་གཉིས་ལ་གནོད་སྐྱོན་ཐེབས་པའི་གནས་ཚུལ་གང་ཡང་ཐོན་མི་འདུག
དེ་རིང་བོད་ནང་གི་ཉིན་རྒྱབ་ཆུ་ཚོད་དང་པོ་དང་སྐར་མ་ ༡༧ ཙམ་ལ་བོད་དཀར་མཛེས་ཁུལ་ཉག་རོང་རྫོང་ཁོངས་སུ་ཚད་རིམ་ ༥།༤ ཅན་གྱི་ས་འགུལ་ཞིག་བྱུང་ཡོད་ཀྱང་། ད་ལྟའི་ཆར་ས་ཡོམ་ཁྲོད་མི་རྒྱུ་གཉིས་ལ་དོན་རྐྱེན་ཅི་བྱུང་སོགས་ཀྱི་གནས་ཚུལ་གང་ཡང་གསལ་གྱི་མི་འདུག
དེ་འབྲེལ་རྒྱ་ནག་གཞུང་འབྲེལ་གྱི་གནས་ཚུལ་ལྟར་ན། རྒྱ་ནག་གཞུང་གིས་ས་འགུལ་བྱུང་ཡུལ་ནི་བོད་དཀར་མཛེས་ཁུལ་ཉག་རོང་རྫོང་ཁོངས་ཡིན་པ་དང་ས་ཡོམ་གྱི་ཚད་རིམ་ ༥།༤ ཡིན་སྐོར་བསྒྲགས་འདུག་ཀྱང་། ཨ་རིའི་གཞུང་འབྲེལ་གྱི་ས་འགུལ་བརྟག་དཔྱད་སྡེ་ཁག་གིས། ས་འགུལ་བྱུང་ཡུལ་བོད་དཀར་མཛེས་ཁུལ་འདབ་པ་རྫོང་གི་ཉེ་འདབ་ཡིན་པ་དང་ས་ཡོམ་གྱི་ཚད་རིམ་ནི་ ༥།༥ ཡིན་པའི་གསལ་འདོན་བྱས་འདུག་ལ། ས་ཡོམ་གྱི་གཏིང་ཚད་སྤྱི་ལེ་ ༡༠ ཡིན་པ་རྒྱ་ནག་དང་ཨ་རི་གཉིས་ཀྱིས་བརྗོད་འདུག
རྒྱ་ནག་གི་ས་འགུལ་བརྟག་དཔྱད་ཁང་གི་གནས་ཚུལ་ལྟར་ན། འདས་པའི་ལོ་ལྔའི་ནང་དུ་ཉག་རོང་ཁུལ་དུ་ས་ཡོམ་ཐེངས་ ༢༣ བྱུང་ཡོད་ཅིང་། དེ་རིང་གི་ས་ཡོམ་འདི་ནི་ཚད་མཐོ་ཤོས་ཆགས་ཀྱི་ཡོད་པ་དང་། ས་འགུལ་བྱུང་ས་ལྟེ་བའི་སྤྱི་ལེ་ ༥ མཚམས་སུ་གྲོང་གསེབ་ཁག་ཅིག་ཡོད་ཀྱང་། ད་སྔ་བར་མི་དང་ཁང་པ་སོགས་ལ་གནོད་སྐྱོན་ཐེབས་པའི་གནས་ཚུལ་གང་ཡང་བྱུང་མེད་སྐོར་བརྗོད་འདུག
