རྒྱ་ནག་གཞུང་གི་གནོན་ཤུགས་ཀྱི་དབང་གིས་ཨ་རིའི་ནེའུ་ཡོག་གྲོང་ཁྱེར་དུ་འཚོག་གཏན་ཁེལ་བའི་རྒྱ་ནག་གི་རང་དབང་གི་གློག་བརྙན་དུས་སྟོན་ཕྱིར་འཐེན་བྱས་འདུག
ཟླ་བ་འདིའི་ཕྱི་ཚེས་ ༨ ནས་ ༡༥ བར་ཉིན་གྲངས་བརྒྱད་རིང་ཨ་རིའི་ནེའུ་ཡོག་ཏུ་འཚོག་གཏན་འཁེལ་བའི་རང་དབང་གི་གློག་བརྙན་དུས་སྟོན་(independent film festival ) དེ། རྒྱ་ནག་གཞུང་གི་གནོན་ཤུགས་དང་དྲག་གནོན། ལྷག་པར་རྒྱ་ནག་གཞུང་གིས་རྒྱལ་མཚམས་ལས་བརྒལ་ནས་གློག་བརྙན་བཟོ་སྐྲུན་པ་ཁག་ཅིག་ལ་བརྙས་བཅོས་བྱས་པའི་དབང་གིས། གློག་བརྙན་དུས་སྟོན་དེ་ཕྱིར་འཐེན་བྱ་དགོས་ཁེལ་འདུག
གནད་དོན་དེའི་ཐད་རང་དབང་གི་གློག་བརྙན་དུས་སྟོན་གྱི་གོ་སྒྲིག་པ་སྐུ་ཞབས་ཀྲུ་རི་ཀུན་(Zhu Rikun) ལགས་ཀྱིས། ངས་ད་ལན་གློག་བརྙན་དུས་སྟོན་འདི་ཕྱིར་བསྡུ་མ་བྱེད་ཚེ། གློག་བརྙན་དུས་སྟོན་འདིར་ཞུགས་མཁན་གྱི་གློག་བརྙན་འཁྲབ་ཁྲིད་པ་དང་། གླེང་སྟེགས་སུ་མཉམ་ཞུགས་མཁན་དང་འབྲེལ་ཡོད་ལས་བྱེད། དེ་བཞིན་མང་ཚོགས་བཅས་སུ་བརྙས་བཅོས་དང་སུན་གཙེར་ཡོང་ཉེན་འདུག ཅེས་བརྗོད་འདུག
རྒྱ་ནག་གི་གནས་ཚུལ་ལྟ་ཞིབ་ཁང་གི་ཉམས་ཞིབ་པ་ཡུལ་ཀུན་(Yalkun Uluyol) ལགས་ཀྱིས། རྒྱ་ནག་གཞུང་གིས་གོ་ལ་ཧྲིལ་པོ་གཙོས་ཨ་རིའི་ནེའུ་ཡོག་ནང་གི་གློག་བརྙན་དུས་སྟོན་བཀག་སྡོམ་བྱ་རྒྱུའི་ཚད་ལ་སླེབས་པ་རེད། དེང་སྐབས་འཛམ་གླིང་ནང་གི་རྒྱལ་མཚམས་ལས་བརྒལ་ནས་དྲག་གནོན་ཆེས་གསར་ཤོས་ནི། འཛམ་གླིང་གི་སྒྲིག་འཛུགས་ཁག་གིས་གང་མཐོང་བ་དེར་མིག་དཔེར་ལེན་གྱི་ཡོད་ཀྱང་། དེར་ཚོད་འཛིན་དང་ལྡོག་ཟླར་ལང་གིན་ཡོད་འདོད་ཀྱིན་ཡོད་སྐོར་བཤད་འདུག
རང་དབང་གི་གློག་བརྙན་དུས་སྟོན་དེར་མཉམ་ཞུགས་བྱེད་མཁན་གྱི་རྒྱ་ནག་ནང་གི་གློག་བརྙན་འཁྲབ་འཁྲིད་པ་ཁག་ཅིག་ལ་ཆེད་དུ་རྒྱ་ནག་གཞུང་གིས་གནོན་ཤུགས་ཀྱི་དབང་གིས་གློག་བརྙན་དུས་སྟོན་ལས་ཕྱིར་འཐེན་བྱ་དགོས་བྱུང་ཡོད་པའི་མུར། ཁག་ཅིག་གི་རྒྱ་ནག་ཏུ་ཡོད་པའི་ནང་མི་དང་བུ་ཕྲུག་སོགས་ལ་གནོན་ཤུགས་དང་འཇིགས་སྐུལ་བྱས་ཏེ། ད་ཐེངས་ཀྱི་གློག་བརྙན་དུས་སྟོན་ལས་ཕྱིར་འཐེན་བྱས་བཅུག་འདུག་ལ། ད་ཐེངས་གློག་བརྙན་དུས་སྟོན་དེར་ལྟད་མོར་ཞུགས་མཁན་ཨ་རིའི་ནེའུ་ཡོག་ཏུ་ཡོད་པའི་རྒྱ་རིགས་སློབ་མའི་ཚོགས་སྡེ་ཞིག་ཀྱང་། རྒྱ་ནག་གཞུང་གིས་གནོན་ཤུགས་དང་ཕ་མ་སོགས་ལ་འཇིགས་སྐུལ་བྱས་པའི་དབང་གིས་ཕྱིར་འཐེན་བྱ་དགོས་ཁེལ་འདུག དེ་བཞིན་རྒྱ་ནག་གཞུང་གིས་རྒྱ་ནག་ཏུ་པེ་ཅིན་དུ་རྟེན་གཞི་བྱས་པའི་སྐུ་ཞབས་ཀྲུ་རི་ཀུན་ལགས་ཀྱི་གློག་བརྙན་བཟོ་སྐྲུན་ཁང་དུ་དམག་མི་ཡོང་ནས། ཁོང་གི་ལས་རོགས་གཅིག་བཙན་འཁྲིད་བྱས་ཏེ། སྐུ་ཞབས་ཀྲུ་རི་ཀུན་ལགས་ཀྱི་ལས་དོན་བྱེད་ཕྱོགས་དང་ལས་ཀ་སོགས་ཀྱི་སྐོར་ལ་འདྲི་བརྩད་བྱས་ཡོད་པ་མ་ཟད། སྐུ་ཞབས་ཀྲུ་རི་ཀུན་ལགས་དང་མཉམ་དུ་ལས་དོན་གཉེར་མི་ཆོག་པའི་འཇིགས་སྐུལ་དང་བཙན་བཀའ་བཏང་འདུག
རྒྱ་ནག་གི་རང་དབང་གི་གློག་བརྙན་དུས་སྟོན་ནི་ཕྱི་ལོ་ ༢༠༠༣ ལོར་རྒྱ་ནག་གི་ནན་ཅིང་གྲོང་ཁྱེར་ནང་ཐོག་མར་མགོ་བཙུགས་བྱས་ཏེ། དེ་ནི་གཙོ་བོ་རང་དབང་གི་ཐོག་ནས་བཟོ་སྐྲུན་བྱས་པའི་གློག་བརྙན་ཐད་སྲིང་བྱ་སའི་རང་དབང་གི་གླེང་སྟེགས་ཤིག་ཏུ་ངོས་འཛིན་བྱེད་ཀྱི་ཡོད་ཅིང་། དེར་རྒྱ་ནག་ནང་གི་རྩོམ་པ་པོ་དང་ཉམས་ཞིབ་པ། གློག་བརྙན་བཟོ་སྐྲུན་བྱེད་མཁན་མང་དག་གི་དགའ་བསུ་ཐོབ་སྟེ། ཕྱི་ལོ་ ༢༠༠༧ ལོར་གཟེངས་རྟགས་ཀྱང་ཐོབ། རྒྱ་ནག་ནང་གི་གློག་བརྙན་བཟོ་སྐྲུན་པ་མང་དག་ཅིག་གིས་གླེང་སྟེགས་དེ་ནི་ཚད་བཀག་དང་བཀག་སྡོམ་ཆེན་པོ་མེད་པའི་རྒྱ་ནག་ནང་གི་གློག་བརྙན་དུས་སྟོན་རྩེ་གྲས་ཤིག་ཏུ་ངོས་འཛིན་བྱེད་ཀྱིན་ཡོད་ཀྱང་། ཕྱི་ལོ་ ༢༠༡༤ ཡས་མས་ཤིག་ནས་རྒྱ་ནག་གཞུང་གིས་གློག་བརྙན་དུས་སྟོན་དེར་ཚོད་འཛིན་དང་དམ་དྲག་བྱེད་མགོ་བཙུགས་ཏེ། འདི་ལོའི་ཕྱི་ཟླ་ ༡ ནང་རྒྱ་ནག་གཞུང་གིས་ཕྱི་ལོ་ ༢༠༢༢ ལོར་སྐུ་ཞབས་ཁྲན་ཕིན་ལིན་(Chen Pinlin) ལགས་ཀྱིས་རྒྱ་ནག་གི་ཤོག་དཀར་གསར་བརྗེ་དང་འབྲེལ་བའི་དངོས་བྱུང་གློག་བརྙན་ཞིག་བཟོས་ཏེ་ཤར་གཏོང་བྱས་པའི་དབང་གིས་ལོ་གསུམ་དང་ཕྱེད་ཀའི་བཙོན་འཇུག་ཁྲིམས་ཐག་བཅད་ཡོད་འདུག
གསར་འགོད་པ། དཔལ་ལྡན།
