རྒྱ་ནག་གཞུང་གིས་བོད་འབའ་ཐང་རྫོང་ཁོངས་སོགས་སུ་ཆུ་མཛོད་མང་པོ་བརྒྱབ་པ་དང་རྒྱག་མུས་ཡིན་པའི་རྐྱེན་གྱིས་རི་ཉིལ་བ་དང་གཞུང་ལམ་རྡིབ་སྐྱོན་བྱུང་བ་སོགས་ཀྱི་དཀའ་ངལ་འཕྲད།
ཟླ་འདིའི་ཕྱི་ཚེས་ ༢༦ ཉིན་རྒྱ་ནག་གིས་བཅད་བགོས་བྱས་པའི་སི་ཁྲོན་ཞིང་ཆེན་དཀར་མཛེས་ཁུལ་འབའ་ཐང་རྫོང་ཁོངས་ཀྱི་མོ་དོ་ཡུལ་ཚོའི་ཉེ་འགྲམ་དུ་རི་ཉིལ་དང་རྒྱལ་ལམ་ཨང་ (National Highway 215) རྡིབ་སྐྱོན་བྱུང་སྟེ། འབའ་ཐང་རྫོང་དང་སྨར་ཁམས་རྫོང་། བདེ་ཆེན་རྫོང་། དེ་བཞིན། སྡེ་རོང་རྫོང་བཅས་ཀྱི་འགྲུལ་ལམ་ཡོངས་སུ་འགག་འདུག
རྒྱ་ནག་གཞུང་གིས་ཐེངས་འདིའི་དོན་རྐྱེན་དེ་ནི་རང་བྱུང་ཁོར་ཡུག་གི་སྐྱོན་ཆག་ཡིན་སྐོར་བསྒྲགས་འདུག་ཀྱང་། འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས་དོན་རྐྱེན་དེ་ནི་རྒྱ་ནག་གཞུང་གིས་འབའ་ཐང་རྫོང་ཁོངས་གཙོས་འབྲི་ཆུའི་མགོ་སྟོད་དུ་ཆུ་གློག་ས་ཚིགས་མང་པོ་རྒྱག་བཞིན་པའི་རྐྱེན་གྱིས་བྱུང་བ་ཞིག་ཡིན་སྐོར་འགྲེལ་བརྗོད་གནང་བྱུང་།
འབྲེལ་ཡོད་བོད་མི་དེས། ད་ལྟའི་ཆར་འབྲི་ཆུའི་སྟོད་རྒྱུད་དུ་ཆགས་པའི་བོད་ཀྱི་ས་ཁུལ་མང་པོར་རི་ཉིལ་བ་དང་གཞུང་ལམ་བརྡིབ་པ་སོགས་ཀྱི་དཀའ་ངལ་མང་པོ་འཕྲད་བཞིན་ཡོད་པ་རེད། དེ་ནི་གཙོ་བོ་རྒྱ་ནག་གཞུང་གིས་འབྲི་ཆུའི་རྒྱུད་དུ་ཆུ་གློག་ཁང་མང་པོ་བཙུགས་དང་འཛུགས་མུས་ཡིན་པའི་རྐྱེན་གྱིས། ས་ཁུལ་དེ་དག་གི་རི་ལུང་གང་སར་ས་རྡོ་སྔོག་འདོན་དང་ཕུག་ལམ་གསར་བསྐྲུན་སོགས་ཀྱི་ལས་གཞི་མང་པོ་ཞིག་བརྩམས་ཏེ། ཁོར་ཡུག་ལ་གནོད་སྐྱོན་ཆེན་པོ་བཟོས་ཡོད་སྟབས། ཆར་ཞོད་དང་རླུང་འཚུབ་སོགས་གནམ་གཤིས་ལ་འགྱུར་ལྡོག་བྱུང་སྐབས། རི་ཉིལ་དང་ས་རུད། ཕུག་ལམ་རྡིབ་སྐྱོན་སོགས་འབྱུང་གི་འདུག ཅེས་བརྗོད་བྱུང་།
འདི་གའི་གསར་འགོད་པས་རྒྱུས་ལོན་བྱས་པ་ལྟར་ན། རྒྱ་ནག་གཞུང་གིས་འབྲི་ཆུའི་སྟོད་རྒྱུད་དུ་ཆུ་གློག་ས་ཚིགས་ ༢༧ གསར་འཛུགས་ཀྱི་ལས་གཞིའི་ཁྲོད། སི་ཁྲོན་གྱི་རྔ་བ་བོད་རིགས་ཆང་རིགས་རང་སྐྱོང་ཁུལ་དང་བདེ་ཆེན་བོད་རིགས་རང་སྐྱོང་ཁུལ། འབའ་ཐང་དང་སྨར་ཁམས་རྫོང་སོགས་སུ་བཞུར་གྱིན་པའི་འབྲི་ཆུའི་སྟོད་རྒྱུད་དུ་བཤོལ་བ་ལུང་ཆུ་ཤུགས་གློག་ཁང་( Suwalong Hydropower Station)དང་ཐང་ལ་ཆུ་གློག་ཁང་། ཞང་ཇཱ་པ་ཆུ་གློག་ཁང་(Xiangjiaba Hydropower Station)། དེ་བཞིན། ལེའུ་ཡན་ཆུ་གློག་ཁང་(Liyuan Hydropower) Station) སོགས་ཆུ་གློག་ས་ཚིགས་ ༡༤ བརྒྱབ་ཟིན་པ་དང་། ད་ལྟ་རྒྱ་ནག་གཞུང་གིས་འབའ་ཐང་རྫོང་ཁོངས་སུ་ལྷ་བ་ཆུ་གློག་ས་ཚིགས་(Lawa Hydropower Station) དང་འབའ་ཐང་གློང་ཁང་(Batang Hydropower Dam) གཉིས། འབའ་ཐང་རྫོང་དང་སྨར་ཁམས་རྫོང་གཉིས་ཀྱི་ས་མཚམས་འབྲི་ཆུའི་སྟོད་རྒྱུད་དུ་སོ་བ་ནང་ཆུ་གློག་ས་ཚིགས། དེ་བཞིན། བདེ་ཆེན་བོད་རིགས་རང་སྐྱོང་ཁུལ་གྱི་འཇོལ་རྫོང་ཁོངས་ཀྱི་ཀོང་རྩེད་ར་ཆུ་གློག་ས་ཚིགས་དང་། ཞུས་ལུང་ཆུ་ཤུགས་གློག་འདོན་ཁང་། ཁྲང་པོ་གློག་འདོན་ཁང་། དཔལ་ཡུལ་རྫོང་གི་ཡེར་པ་ཐང་ཆུ་ཤུགས་གློག་ཁང་སོགས་འབྲི་ཆུའི་སྟོད་རྒྱུད་དུ་ཆུ་གློག་ས་ཚིགས་ ༡༣ རྒྱག་མུས་ཡིན་འདུག
སྤྱིར་རྒྱ་ནག་གཞུང་གིས་ཆུ་གློག་ས་ཚིགས་འཛུགས་སྐྲུན་གྱི་ལས་གཞི་དེ་དག་ཕྱི་ལོ་ ༢༠༠༤ ཙམ་ནས་མགོ་འཛུགས་འཆར་བྱས་ནའང་། ས་གནས་མང་ཚོགས་ཀྱིས་མོས་མཐུན་མ་བྱས་པ་དང་འདོད་མོས་མེད་པའི་རྣམ་འགྱུར་ཤུགས་ཆེན་བསྟན་པར་བརྟེན་ཡུན་རིང་ལྷག་ཡོད་འདུག འབྲི་ཆུའི་སྟོད་རྒྱུད་ཀྱི་ཆུ་ཤུགས་གློག་འདོན་ས་ཚིགས་འཛུགས་སྐྲུན་སྤྱིའི་དུས་ཡུན་ཕྱི་ལོ་ ༢༠༡༢ ནས་ ༢༠༣༠ བར་ཡིན་འདུག
གསར་འགོད་པ། སྐལ་བཟང་སྦྱིན་པ།
