ཨ་རིས་ཝི་ནེ་རྫོ་ལར་དྲག་རྒོལ་བྱས་ཏེ་ཝི་ནེ་རྫོ་ལའི་སྣུམ་གྱི་ཐོན་ཁུངས་ལ་སྟངས་འཛིན་བྱ་རྒྱུ་ཡིན་པ་དང་། གནད་དོན་འདི་ནི་ཨ་རིའི་རྒྱལ་ཁ་དང་རྒྱ་ནག་གི་ཕམ་ཁ་ཞིག་ཏུ་རྩི་ཡི་འདུག
ཟླ་འདིའི་ཕྱི་ཚེས་ ༣ ཉིན་ཨ་རིའི་སྲིད་འཛིན་ཌོ་ནལ་ཊོམ་ཕུའི་བཀོད་ཁྱབ་འོག་ཨ་རིའི་དམག་གིས་བྱང་ཨ་རིའི་རྒྱལ་ཁབ་ཝི་ནེ་རྫོ་ལར་དྲག་རྒོལ་བྱས་ཏེ། ཝི་ནེ་རྫོ་ལའི་སྲིད་འཛིན་ནེ་ཁོ་ལཱ་མཱ་ཌོ་རོ་དང་ལྕམ་དང་པོ་སི་ལི་ཡ་ཧྥི་ལོ་རོ་སི་གཉིས་ཨ་རིར་འཛིན་བཟུང་བཙན་ཁྲིད་བྱས་ཡོད་པ་རེད་ལ། ཨ་རིའི་དྲག་རྒོལ་དེའི་ཁྲོད་མི་མང་དང་དམག་མི་སོགས་ཉུང་མཐར་མི་གྲངས་ ༤༠ རྐྱེན་འདས་སུ་བཏང་འདུག
ཁ་སང་ཕྱི་ཚེས་ ༤ ཉིན་ཨ་རིའི་རྒྱལ་སྲིད་དྲུང་ཆེ་མེག་རོའུ་བྷི་ཡོ་ལགས་ཀྱིས། ཨ་རིས་ཝི་ནེ་རྫོང་ལའི་འཛིན་སྐྱོང་ལ་སྐབས་དོན་རིང་ཐད་ཀར་མིན་པའི་ལམ་ནས་སྟངས་འཛིན་བཀོད་སྒྲིག་བྱ་རྒྱུ་ཡིན་པ་དང་། བཀོད་སྒྲིག་དེའི་འོག་ནས་ཝི་ནེ་རྫོ་ལའི་སྣུམ་གྱི་ཐོན་ཁུངས་ལ་ཚོད་འཛིན་བྱས་ཏེ་ཡུལ་དེའི་ཆབ་སྲིད་ཀྱི་ཁ་ཕྱོགས་ལ་འགྱུར་བ་གཏོང་རྒྱུ་ཡིན་སྐོར་བརྗོད་འདུག་པ་དང་། ཝི་ནེ་རྫོ་ལའི་སྲིད་འཛིན་དང་བཟའ་ཟླ་གཉིས་ལ་སྨྱོས་རྫས་བགོ་འགྲེམས་དང་དྲག་སྤྱོད་པར་ངན་འབྲེལ་བྱས་པའི་ནག་ཉེས་ཕོག་གི་ཡོད་ཚུལ་བརྗོད་འདུག
ཨ་རིས་ཝི་ནེ་རྫོ་ལར་དྲག་རྒོལ་བྱས་མ་ཐག་འཛམ་གླིང་རྒྱལ་ཁབ་མང་པོས་ཨ་རིའི་བྱ་སྤྱོད་དེའི་ཐད་རྣམ་འགྱུར་འདྲ་མིན་བསྟན་ཡོད་ཅིང་། དབྱིན་ཇི་དང་ཧྥ་རན་སི་སོགས་ཡུ་རོབ་མཉམ་འབྲེལ་མཐུན་ཚོགས་ཀྱི་ཚོགས་མི་རྒྱལ་ཁབ་ཁག་གིས། ད་ལྟའི་ཝི་ནེ་རྫོ་ལའི་གཞུང་འདི་ཕྱི་ལོ་ ༢༠༢༤ ལོའི་འོས་བསྡུའི་གྲུབ་འབྲས་ལ་བརྩི་འཇོག་མ་བྱས་པར་བཙུགས་པའི་ཚུལ་ལྡན་གྱི་གཞུང་ཞིག་མིན་པ་དང་། ཨ་རིའི་ངོས་ནས་ཀྱང་རྒྱལ་སྤྱིའི་སྒྲིག་ཁྲིམས་ཁག་ལ་བརྩི་སྲུང་བྱ་དགོས་སྐོར་བརྗོད་འདུག་ལ། ལྷོ་ཨ་མེ་རི་ཁའི་རྒྱལ་ཁབ་བྷིར་ཛལ་དང་ཁོ་ལམ་བྷི་ཡ། ཆིས་ལི། ཁེའུ་བྷ། ད་དུང་ཨུ་རུ་སུ་དང་རྒྱ་ནག་སོགས་ཀྱིས་ཨ་རིའི་དྲག་རྒོལ་དེ་ནི་ངོས་ལེན་བྱེད་ཐབས་བྲལ་བའི་བྱ་སྤྱོད་ཅིག་ཡིན་ཁར་རྒྱལ་སྤྱིའི་ཁྲིམས་སྒྲིག་ཁག་དང་འགལ་ཡོད་པ་དང་། དེས་འཛམ་གླིང་ནང་ཟིང་འཁྲུག་དང་དམག་འཁྲུག་སློང་གི་ཡོད་སྟབས། གང་མགྱོགས་ཞི་འགྲིག་བྱ་དགོས་པའི་སྐུལ་མ་བྱས་འདུག
དེ་རིང་སླར་ཡང་རྒྱ་ནག་གཞུང་གིས། ཨ་རིས་ཝི་ནེ་རྫོ་ལར་དྲག་རྒོལ་བྱས་ཏེ་སྲིད་འཛིན་འཛིན་བཟུང་བཙན་ཁྲིད་བྱས་པ་ནི་མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་དང་རྒྱལ་སྤྱིའི་ཁྲིམས་ལུགས་ཁག་ལ་རྡོག་རོལ་བཏང་བ་ཞིག་ཡིན་པས། སྲིད་འཛིན་ནེ་ཁོ་ལཱ་མཱ་ཌོ་རོ་དང་བཟའ་ཟླ་གཉིས་བདེ་འཇགས་ངང་ཀློད་གྲོལ་གཏོང་དགོས། ཡུལ་གཉིས་བར་གྱི་རྩོད་རྙོག་གྲོས་མོལ་གྱི་ལམ་ནས་སེལ་རྒྱུ་གལ་ཆེན་ཡིན་སྐོར་བརྗོད་འདུག
ཡང་ཟླ་འདིའི་ཕྱི་ཚེས་ ༤ ཉིན་ནས་ཨ་རིའི་རྒྱལ་ཡོངས་ཀྱི་གྲོང་ཁྱེར་མང་པོའི་ནང་མང་ཚོགས་སྟོང་ཕྲག་མང་པོ་སྲང་ལམ་དུ་ཐོན་ནས་ཊོམ་ཕུའི་གཞུང་ལ་སྐྱོན་བརྗོད་ཀྱིས་ཞི་བའི་གོམ་བགྲོད་ཀྱི་ལས་འགུལ་སྤེལ་དང་སྤེལ་མུས་ཡིན་པ་མ་ཟད། ཨ་རིའི་གནད་ཡོད་མི་སྣ་ཁག་ཕན་ཚུན་བར་གནད་དོན་དེའི་ཐད་འགལ་ཟླ་ཤུགས་ཆེན་འབྱུང་གི་ཡོད་ལ། ཝི་ནེ་རྫོ་ལའི་མང་ཚོགས་ཀྱི་ཁྲོད་དུའང་གནད་དོན་དེའི་ཐད་དགའ་སྐྱོ་གཉིས་ཀྱི་སེམས་ཚོར་སྟོན་མཁན་མང་པོ་འབྱུང་མུས་ཡིན་པ་རེད།
ཨ་རིས་ཝི་ནེ་རྫོ་ལར་དྲག་རྒོལ་བྱེད་དོན་གྱི་རྒྱུ་མཚན་གསུམ་བགྲང་གི་ཡོད་པའི་ནང་། ཕྱི་ལོ་ ༢༠༡༣ ཙམ་ནས་ཝི་ནེ་རྫོ་ལའི་ཡུལ་མི་གནས་སྦོར་བ་སྟོང་ཕྲག་མང་པོ་ཨ་རིར་གནས་སྤོར་གྱིན་པ་མཚམས་འཇོག་བྱ་རྒྱུ་དང་། ཝི་ནེ་རྫོ་ལ་ནས་ཨ་རིར་ཁྲིམས་འགལ་ཐོག་སྐྱེལ་འདྲེན་གྱིས་ཉོ་ཚོང་བྱེད་བཞིན་པའི་སྨྱོས་རྫས་མཚམས་འཇོག དེ་བཞིན་ (FTOs) ཞེས་པའི་ཝི་ནེ་རྫོ་ལའི་རྒྱལ་སྤྱིའི་དྲག་སྤྱོད་ཚོགས་པ་གཉིས་རྩ་གཏོར་སོགས་ལ་དམིགས་ཡོད་སྐོར་བརྗོད་འདུག
རོའུ་ཊར་གསར་ཁང་གིས་སྤེལ་བའི་གནས་ཚུལ་ལྟར་ན། ཨ་རིས་ཝི་ནེ་རྫོ་ལའི་འཛིན་སྐྱོང་ལ་སྟངས་འཛིན་བྱས་པ་དང་ལྷན་དུ། ཡུལ་དེའི་སྣུམ་ཕྱིར་ཚོང་གི་སྲིད་ཇུས་ལ་འགྱུར་བ་བཏང་སྟེ། ཨ་རི་ཝི་ནེ་རྫོ་ལའི་སྣུམ་ཉོ་ཚོང་བྱེད་མཁན་ཆེ་ཤོས་སུ་བསྒྱུར་རྒྱུ་ཡིན་པ་དང་། དེ་ལ་བརྟེན་ནས་ཝི་ནེ་རྫོ་ལས་རྒྱ་ནག་ལ་བཙོང་བཞིན་པའི་སྣུམ་གྱི་ཚོང་འབྲེལ་ཐད་ལ་ཤུགས་རྐྱེན་ཐེབས་ངེས་ཡིན་པས། གནད་དོན་འདི་ནི་ཨ་རིའི་རྒྱལ་ཁ་དང་རྒྱ་ནག་གི་ཕམ་ཁ་ཞིག་ཡིན་སྐོར་བརྗོད་འདུག་ལ། འདས་ལོའི་ཕྱི་ཟླ་ ༨ ནང་རྒྱ་ནག་གིས་ཝི་ནེ་རྫོ་ལ་དང་ལྷན་དུ་ལོ་ ༢༠ རིང་ཨ་སྒོར་ཐེར་འབུམ་ལྷག་གི་སྣུམ་ཚོང་ཕྱིར་འདྲེན་གྱི་གན་རྒྱ་བཞག་ཡོད་འདུག
གནད་དོན་དབྱེ་ཞིབ་པས། རྒྱ་ནག་གཞུང་གིས་ཝི་ནེ་རྫོ་ལའི་གནད་དོན་སྣང་མེད་དུ་བཞག་སྟེ་ཨ་སྒོར་ཐེར་འབུམ་ལྷག་གི་སྣུམ་ཚོང་གི་གྱོང་གུད་འཁུར་རྒྱུ་མིན་ཞིང་། གཅིག་བྱས་ན་རྡུལ་ཕྲན་མཚོན་ཆས་དམག་འཁྲུག་ཡང་རྒྱག་སྲིད་སྐོར་བརྗོད་འདུག་ལ། ཡང་ལྷོ་ཨ་མི་རི་ཁའི་ (EL PAIS) ཞེས་པའི་གསར་ཁང་གི་དྲ་ཚིགས་སྟེང་ཝི་ནེ་རྫོ་ལའི་སྲིད་འཛིན་ཕམ་ཉེས་བྱུང་བ་དེས་རྒྱ་ནག་དང་ཝི་ནེ་རྫོ་ལའི་འབྲེལ་ལམ་ལ་ཚོད་ལྟ་བྱེད་བཞིན་ཡོད་ཅེས་པའི་རྩོམ་ཡིག་ཅིག་སྤེལ་འདུག་པ་དང་། རྒྱ་ནག་དང་ཝི་ནེ་རྫོ་ལའི་བར་ཕྱི་ལོ་ ༢༠༢༣ ལོར་འབྲེལ་ལམ་གོང་མཐོར་བཏང་ཡོད་ཀྱང་། བདེ་སྲུང་འགན་ལེན་གྱི་ཐད་ནས་གྲོས་མཐུན་གང་ཡང་བཞག་མེད་ཅིང་། ལྷག་པར་དུ་རྒྱ་ནག་ལ་མཚོན་ན་ས་ཁམས་ཆབ་སྲིད་སོགས་ཕྱོགས་གང་ཅིའི་ཐད་ནས་ཝི་ནེ་རྫོ་ལ་ནི་ཚོང་རོགས་ཙམ་ལས། དམག་མི་མངགས་གཏོང་བྱས་ཏེ་ཨ་རིའི་གདོང་ལེན་བྱེད་དགོས་སའི་མཐུན་གྲོགས་ཤིག་ལ་བརྩི་ཡི་མེད་སྐོར་བརྗོད་འདུག
དབྱེ་ཞིབ་པ་ཚོས། ཨ་རིའི་དྲག་རྒོལ་དེ་ནི་ལྷོ་ཨ་མི་རི་ཁའི་རྒྱལ་ཁབ་ཁག་གི་སྣུམ་གྱི་ཐོན་ཁུངས་ལ་དམིགས་པའི་ཨ་རིའི་འབྱོར་ལྡན་གྲལ་རིམ་གྱི་འཐབ་རྩོད་ཅིག་ཡིན་པ་དང་། ཨ་རིའི་ངལ་རྩོལ་མི་མང་གི་གྱོང་གུད་ཆགས་ཡོད་སྟབས། ངལ་རྩོལ་མི་མང་གཉིད་ལས་སད་རྒྱུ་གལ་ཆེན་ཡིན་སྐོར་ཡང་བརྗོད་འདུག
གསར་འགོད་པ། སྐལ་བཟང་སྦྱིན་པ།
