ཟླ་འདིའི་ཚེས་ ༧ ཉིན་ཨ་རིའི་སྲིད་འཛིན་ཊོམ་ཕུ་གཞུང་གིས། མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཚོགས་སྡེ་ ༦༦ གིས་ཨ་རིའི་མངོན་འདོད་སྲུང་གི་མེད་པའི་ཁར། ཨ་རིའི་མངོན་འདོད་ཀྱི་འགལ་ཟླར་གྱུར་ཡོད་པའི་ངོས་འཛིན་འོག ཨ་རི་རྒྱལ་སྤྱིའི་ཚོགས་སྡེ་ཁག་དེ་དག་ལས་ཕྱིར་འཐེན་བྱ་རྒྱུ་ཡིན་པ་བསྒྲགས་འདུག
དེ་འབྲེལ་རོའུ་ཊར་གསར་ཁང་གིས་སྤེལ་བའི་གནས་ཚུལ་ལྟར་ན། ཨ་རིའི་ཐག་གཅོད་དེའི་ནང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་དང་ཆུ། རྒྱ་མཚོ། མི་འབོར་དང་བུད་མེད། མང་གཙོ། ཚོང་འབྲེལ། གནས་སྤོར་སོགས་དང་འབྲེལ་བའི་ཚོགས་སྡེ་ཁག་ ༣༡ དང་། དེ་བཞིན། རང་དབང་ཅན་གྱི་རྒྱལ་སྤྱིའི་ནུས་ཤུགས་གླེང་སྟེགས་དང་། རྒྱལ་སྤྱིའི་ཉི་གློག་གནའ་འབྲེལ། རྒྱལ་སྤྱིའི་རང་བྱུང་ཁོར་ཡུག་སྲུང་སྐྱོབ་མཐུན་ཚོགས། ཡོ་ཁུ་རེན་གྱི་ཚན་རིག་དང་འཕྲུལ་ཆས་ལྟེ་གནས་ཁང་། འཛམ་གླིང་འགྱུར་ལྡོག་ཞིབ་འཇུག་ལྟེ་གནས་ཁང་། མང་གཙོ་དང་འོས་བསྡུའི་རོགས་འདེགས་ལྟེ་ཁང་སོགས་ཚོགས་སྡེ་ཁག་ ༣༥ བཅས་ཁྱོན་ཚོགས་སྡེ་མི་འདྲ་བ་ ༦༦ འདུག་ལ། ཨ་རིས་ཚོགས་སྡེ་དེ་དག་ལ་རོགས་དངུལ་སྤྲོད་མཚམས་བཞག་སྟེ་མ་འོངས་པའི་ལས་དོན་ནང་མཉམ་ཞུགས་བྱ་རྒྱུ་མིན་པ་རེད།
ཨ་རིས་ཐེངས་འདིའི་ཐག་གཅོད་དེ་ནི་རྒྱལ་སྤྱིའི་གཞུང་དང་གཞུང་བར་འབྲེལ་བའི་ཚོགས་པ་ཁག་དང་ཚོགས་འདུ་ཁག དེ་བཞིན་གྲོས་མཐུན་སོགས་ལ་བསྐྱར་ཞིབ་བྱས་པའི་ཆ་ཤས་ཤིག་ཡིན་པ་དང་། ཚོགས་སྡེ་དེ་དག་ནས་གོ་ལའི་གནམ་གཤིས་ཚ་དྲོད་ཀྱི་སྲིད་ཇུས་དང་རྒྱལ་སྤྱིའི་ཁ་ཕྱོགས་སྟངས་འཛིན་བྱེད་སྟངས། ལྟ་གྲུབ་ཀྱི་ལས་རིམ་སོགས་སྤེལ་བཞིན་པ་དག་གིས་ཨ་རིའི་དཔལ་འབྱོར་གྱི་སྟོབས་ཤུགས་དང་བདག་དབང་རྒྱ་སྐྱེད་པར་ཕན་ཐོགས་ཀྱི་མེད་སྐོར་བརྗོད་འདུག འོན་ཀྱང་དབྱེ་ཞིབ་པས། ཨ་རི་འགྱུར་འགྲོས་དེ་ནི་སྲིད་འཛིན་ཊོམ་ཕུར་ཕྱོགས་མང་རྩ་འཛུགས་ལ་སྡང་ཟུག་ཆེན་པོ་ཡོད་པ་དང་དམིགས་བསལ་གྱི་མཉམ་འབྲེལ་རྒྱལ་ཚོགས་ལ་དགའ་པོ་མེད་པའི་ལངས་ཕྱོགས་ལས་བྱུང་བར་ངོས་འཛིན་བྱེད་ཀྱི་འདུག་ལ། གལ་སྲིད་ཨ་རི་རྒྱལ་ཚོགས་ཀྱི་གལ་ཆེན་རིམ་པའི་གྲོས་ཁོངས་ (UNFCCC) ལས་ཕྱིར་འཐོན་པ་ཡིན་ན། མ་འོངས་པར་བསྐྱར་དུ་ཡར་འཛུལ་ཐུབ་མིན་རྟོགས་དཀའ་བ་ཞིག་ཡིན་འདུག
རྒྱལ་སྤྱིའི་རང་བྱུང་ཐོན་ཁུངས་འགན་སྲུང་ལྷན་ཚོགས་ཀྱི་ཚོགས་གཙོ་མཱ་ནི་ཤི་བྷབ་ན་ལགས་ཀྱིས། ཨ་རིའི་རྒྱལ་ཚོགས་ཀྱི་གོ་ལའི་གནམ་གཤིས་ཚ་དྲོད་ཀྱི་གྲོས་ཁོངས་ནས་ཕྱིར་ཐོན་པ་ནི་རང་མགོར་སྟ་རེ་གཞུས་པ་དང་འདྲ་ལ། དེས་ཨ་རིའི་རྒྱལ་སྤྱིའི་སྣེ་ཁྲིད་བྱེད་པའི་གོ་བབ་ལ་ཤུགས་རྐྱེན་ཐེབས་རྒྱུ་མ་ཟད། རྒྱ་ནག་ལ་འགྲན་རྩོད་བྱེད་པའི་ནུས་ཤུགས་ཀྱང་ཇེ་ཆུང་དུ་གཏོང་གི་ཡོད་ཅེས་བརྗོད་འདུག
ཊོམ་ཕུ་ཨ་རིའི་སྲིད་འཛིན་སྐབས་གཉིས་པར་བདམས་ཐོན་གྱིས་དམ་འབུལ་ཞུས་མ་ཐག་སྟེ། འདས་ལོའི་ཕྱི་ཟླ་ ༡ ཚེས་ ༢༠ ཉིན་སྲིད་འཛིན་ཊོམ་ཕུས་ཨ་རི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་འཛམ་གླིང་འཕྲོད་བསྟེན་སྒྲིག་འཛུགས། པར་རེ་སི་གོ་ལའི་གནམ་གཤིས་གྲོས་ཆོད་སོགས་ནས་ཕྱིར་འཐེན་བྱས་པའི་བཀའ་ཁྱབ་བཏང་ཡོད། སྐབས་དེར་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་དང་ཁོར་ཡུག་སྲུང་སྐྱོབ་པ། ལས་འགུལ་བ་སོགས་ཀྱིས་ཨ་རིར་སྐྱོན་བརྗོད་ཤུགས་ཆེན་བྱས་ཡོད་ལ། རྒྱལ་སྤྱིའི་བོད་དོན་ལས་འགུལ་ཁང་གིས་ཀྱང་སྐབས་དེར་ཨ་རིར་བློ་ཕམ་ཡོད་པའི་བསྒྲགས་གཏམ་སྤེལ་ཡོད།
གསར་འགོད་པ། སྐལ་བཟང་སྦྱིན་པ།
