ཕྱི་ལོ་ ༢༠༢༡ ཟླ་༨ ཚེས་ ༥ ཉིན་བོད་ཀྱི་རྒྱལ་ས་ལྷ་ནས་རྒྱ་གཞུང་ཉེན་རྟོག་པས་འཛིན་བཟུང་བཙན་འཁྲིད་བྱས་པའི་དགེ་འདུན་པ་དར་རྒྱས་ལགས་སུ་གསང་བའི་ཐོག་ནས་ལོ་ངོ་བདུན་གྱི་བཙོན་འཇུག་ཁྲིམས་ཐག་བཅད་འདུག
འདི་གའི་གསར་འགོད་པར་གནས་ཚུལ་མཁོ་སྤྲོད་པས་ཉེ་ལམ་ཤེས་རྟོགས་བྱུང་བའི་གནས་ཚུལ་བརྗོད་པ་ལྟར་ན། རྒྱ་ནག་གཞུང་གིས་གྲྭ་དར་རྒྱས་ལགས་སུ་༸གོང་ས་རྒྱལ་བ་རིན་པོ་ཆེ་མཆོག་ལ་བསྔོ་རྟེན་དང་སྐྱབས་རྟེན་ཕུལ་བ་དང་། ཁོང་གིས་བོད་ཀྱི་དགེ་འདུན་པ་ཁ་ཤས་ཤིག་བོད་ནས་ཕྱིར་ཐོན་པར་རོགས་རམ་བྱས་ཡོད་པའི་ཉེས་འཛུགས་བྱས་ཡོད་འདུག རྒྱ་ནག་གཞུང་གིས་ཕྱི་ལོ་ ༢༠༢༡ ཟླ་ ༨ ཚེས་ ༥ ཉིན་བོད་ཀྱི་རྒྱལ་ས་ལྷ་ས་རུ་གྲྭ་དར་རྒྱས་ལགས་དང་། ཁོང་གི་སྤུན་མཆེད་ཚེ་རིང་ལགས་དང་བཙུན་མ་ཆོས་སྐྱིད་ལགས་བཅས་འཛིན་བཟུང་བཙན་འཁྲིད་བྱས་ཡོད། ཟླ་འགའི་རྗེས་ནས་ཚེ་རིང་ལགས་དང་བཙུན་མ་ཆོས་སྐྱིད་ལགས་གཉིས་ཀློད་གྲོལ་བཏང་ཡོད་ཀྱང་། གྲྭ་དར་རྒྱས་ལགས་སུ་ཅི་བྱུང་གང་ཡོད་སོགས་ཀྱི་གནས་སྟངས་ཤེས་རྟོགས་མ་ཐུབ་པར་ལྷག་ཡོད།
འདི་གའི་གསར་འགོད་པར་ཕྱི་ལོ་ ༢༠༢༥ ཟླ་ ༩ ཚེས་ ༡༦ ཉིན་གནས་ཚུལ་འབྱོར་བ་ལྟར་ན། སྐབས་དེར་ཡུལ་མི་ཚོས་ལྷ་སའི་ཉེན་རྟོག་པར་འབྲེལ་གཏུག་བྱས་ནས་དགེ་འདུན་པ་ཁོང་གར་ཡོད་ཅི་བྱས་ཀྱི་གནས་སྟངས་དྲིས་པར། ལྷ་སའི་ཉེན་རྟོག་པས་ཨ་ཁུ་དར་རྒྱས་མྱུར་དུ་ཀློད་གྲོལ་གཏོང་ངེས་ཡིན་རབས་དང་། ཁོང་ལ་དཀའ་ངལ་གང་ཡང་མེད་པར་ཁོང་བདེ་འཚམ་ཡིན་རབས་བཤད་ནས། འབྲེལ་ཡོད་ཡུལ་མི་ཚོ་རྒྱ་ནག་གཞུང་གི་མགོ་སྐོར་བསླུ་བྲིད་ཀྱི་སྐད་ཆར་ཡིད་ཆེས་དང་རེ་བ་བྱས་ནས། ཁོང་གི་ཛ་དྲག་གི་གནས་སྟངས་འདི་ད་བར་དུ་བོད་ཕྱི་ཕྱོགས་ཀྱི་སྤྱི་ཚོགས་བརྒྱུད་ལམ་ཁག་ཏུ་སྤེལ་མ་ཐུབ་པར་ལྷག་པ་རེད། འབྲེལ་ཡོད་བོད་མི་ཚོས་དགེ་འདུན་པ་དར་རྒྱས་ཀྱི་ཛ་དྲག་གི་གནས་སྟངས་འདི་ད་དུང་ཡང་ཤེས་རྟོགས་མ་ཐུབ་པའི་གནས་སྟངས་འདི་ལས། དོན་དངོས་སུ་རྒྱ་ནག་གཞུང་གིས་བོད་ནང་དུ་བོད་མི་ཚོར་གང་བྱུང་དྲག་གནོན་དང་བཀག་ཉར། ཐ་ན་གར་སོང་ཆ་མེད་དུ་གཏོང་བཞིན་པའི་གནས་སྟངས་ཇེ་སྡུག་ཏུ་འགྲོ་དང་འགྲོ་མུས་ཡིན་པའི་དངོས་ཡོད་གནས་སྟངས་ཤེས་ཐུབ་པ་ཞིག་རེད། ཅེས་བརྗོད་བྱུང་།
ད་ཆར་རང་ལོ་ ༦༣ ཡས་མས་ཤིག་ཡིན་པའི་དགེ་འདུན་པ་དར་རྒྱས་ཀྱི་ཕ་ཡུལ་མགོ་ལོག་དབལ་ཤུལ་གསེར་རྟ་ནས་ཡིན་པ་དང་། ཁོང་གི་ཕ་མིང་ལ་ཆོས་འཕེལ་དང་མ་མིང་ལ་ཆོས་ལྷ་ཞུ་ཞིང་། ཁོང་གསེར་རྟ་སེ་ར་དགོན་པའི་གྲྭ་བ་ཡིན་པ་དང་། འཛིན་བཟུང་མ་བྱས་པའི་ཡར་སྔོན་དུ་ཁོང་ལྷ་སར་བསྡད་ནས། བོད་ཀྱི་གནས་ཆེན་ཁག་ལ་གནས་སྐོར་དུ་བསྐྱོད་པ་དང་སྐུ་མཚམས་ལ་བཞུགས་པ། བོད་ཁུལ་གྱི་བླ་ཆེན་གང་མང་གི་མདུན་ནས་གསུང་ཆོས་ཞུ་བ། སྐུ་གསུང་ཐུགས་རྟེན་ལ་གཟུངས་གཞུག་འབུལ་མཁན་དགེ་འདུན་པ་ཚད་ལྡན་ཞིག་ཡིན་པར་མ་ཟད། མང་ཚོགས་ཀྱིས་ཡིད་ཆེས་བྱེད་སའི་ཕྱི་ཐག་རིང་བའི་མི་དྲང་བདེན་ཅན་ཞིག་ཡིན་འདུག དད་ལྡན་མང་ཚོགས་ཀྱི་རེ་འདུན་བསྐོང་ཐབས་སུ་བོད་ཀྱི་རྒྱལ་ས་ལྷ་སར་དགེ་འདུན་པ་ཁོང་ལ་སྐུ་གསུང་ཐུགས་རྟེན་ལ་གཟུངས་གཞུག་ཚད་ལྡན་མཁོ་སྒྲུབ་གནང་སའི་ཚོང་ཁང་ཆུང་ཆུང་ཞིག་ཀྱང་ཡོད་འདུག
དབལ་ཤུལ་གསེར་ཐར་གྱི་ལོ་རྒྱུས་གསར་བསྒྲིགས་བློ་ལྡན་མིག་གི་བདུད་རྩི་ལྟར་ན། སེ་ར་ཐེག་ཆེན་ཆོས་འཁོར་གླིང་དགོན་པ་འདི་ནི་གསེར་རྟ་རྫོང་གི་ནུབ་ཕྱོགས་ཀྱི་ཁེས་སྐོར་ཤང་གི་ས་གནས་སུ་ཆགས་ཡོད་པ་དང་། དགོན་པ་འདི་ནི་སྔོན་སྤྱི་ལོ་ ༡༧༣༦ ལོར་ཨ་བོས་བླ་མ་བློ་བཟང་དང་སང་སང་བད་མ་སྦྱིན་པ་གཉིས་ཀྱིས་ཕྱག་བཏབ་ཅིང་། དགོན་འདི་ནི་ཆོས་ལུགས་གསར་རྙིང་འདྲེས་མའི་དགོན་ཆེན་ཞིག་ཡིན་འདུག
གསར་འགོད་པ། སྐལ་བཟང་སྦྱིན་པ།
