རྒྱལ་སྤྱིའི་བོད་དོན་ལས་འགུལ་ཁང་གིས་འདས་པའི་ཟླ་ ༩ ལྷག་ནང་༧གོང་ས་མཆོག་གི་མཛད་རྣམ་བདེ་སྐྱིད་ཀྱི་ཤེས་རབ་ཅེས་པའི་དངོས་བྱུང་གློག་བརྙན་དེ་ཡུ་རོབ་ཀྱི་རྒྱལ་ཁབ་ ༧ དང་། ཨ་རི། ཁེ་ན་ཌ་སོགས་ཡུལ་ལུང་མང་པོའི་ནང་གཟིགས་འབུལ་གནང་ཟིན་འདུག
ཕྱི་ལོ་ ༢༠༢༥ ཟླ་ ༧ ཚེས་ ༦ ནས་ཕྱི་ལོ་ ༢༠༢༦ ཟླ་ ༧ ཚེས་ ༦ བར་གྱི་མི་ལོ་ཧྲིལ་པོ་གཅིག་རིང་། བོད་མིའི་སྒྲིག་འཛུགས་ཀྱིས་དབུ་འཁྲིད་དེ་འཛམ་གླིང་ཡུལ་ཕྱོགས་གང་སར་༧སྐུའི་གོ་སྟོན་གྱི་ལོ་སྟེ་བྱམས་བརྩེའི་ལོ་སྲུང་གཙི་ཞུ་བཞིན་ཡོད་པ་ལྟར། ཨ་རིར་རྟེན་གཞི་བྱས་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ལོ་ཧྲིལ་པོ་འདིའི་ནང་༧གོང་ས་མཆོག་གི་འཇིག་རྟེན་ཀུན་ཕན་གྱི་དངོས་བྱུང་གློག་བརྙན་བདེ་སྐྱིད་ཀྱི་ཤེས་རབ་ (Wisdom and Happiness) ཅེས་པའི་གློག་བརྙན་དེ་འཛམ་གླིང་རྒྱལ་ཁབ་མང་པོའི་ནང་གཟིགས་འབུལ་སྐོར་སྐྱོད་གནང་འདུག་ལ། མ་འོངས་པར་ཨེ་ཤ་ཡའི་རྒྱལ་ཁབ་ཁག་དང་། སློབ་གྲྭ་ཁག དྲ་ཐོག་ནས་གློག་བརྙན་གཟིགས་འབུལ་ཞུ་རྒྱུ་ཡིན་འདུག
ཕྱི་ཟླ་ ༣ ཚེས་ ༢༦ དང་ ༢༧ རྒྱལ་སྤྱིའི་བོད་དོན་ལས་འགུལ་ཁང་གིས་ཕྱི་ལོ་ ༢༠༢༦ ལོའི་ཨ་རིའི་ཧ་ཝར་ཌི་གཙུག་ལག་སློབ་ཆེན་གྱི་གློག་བརྙན་དུས་སྟོན་ (Harvard Divinity School Film Festival) ཐོག བདེ་སྐྱིད་ཀྱི་ཤེས་ཅེས་པའི་གློག་བརྙན་འདི་གཟིགས་འབུལ་ཞུས་ཡོད་པ་དང་། སྐབས་དེར་གློག་བརྙན་དེ་ལ་ལྟད་མོ་བའི་གློག་བརྙན་རྩེ་ཕུད་ཀྱི་བྱ་དགའ་ཐོབ་ཡོད་འདུག
དེའི་སྐོར་ལ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་ཀྱིས། ལོ་ལྟར་ཨ་རིའི་ཧར་ཝར་ཌི་གཙུག་ལག་སློབ་ཆེན་གྱིས་གློག་བརྙན་དུས་སྟོན་ཚོགས་ཀྱི་ཡོད་པ་ལྟར། ཕྱི་ཟླ་ ༣ ཚེས་ ༢༦ དང ༢༧ ཉིན་གཉིས་རིང་ཕྱི་ལོ་ ༢༠༢༦ ལོའི་ཧར་ཝར་ཌི་གཙུག་ལག་སློབ་ཆེན་གྱི་གློག་བརྙན་དུས་སྟོན་ཐོག བདེ་སྐྱིད་ཀྱི་ཤེས་རབ་ཅེས་པའི་གློག་བརྙན་དང་། གློག་བརྙན་གཞན་ཁག་ཅིག་གཟིགས་འབུལ་ཞུས་ཡོད་འདུག སྐབས་དེར་ལྟད་མོ་བས་གློག་བརྙན་ཆ་ཚང་བལྟས་ཟིན་རྗེས་འོས་ཤོག་འཕེན་པ་བརྒྱུད། ༧གོང་ས་མཆོག་གི་མཛད་རྣམ་བདེ་སྐྱིད་ཀྱི་ཤེས་རབ་ཅེས་པའི་དངོས་བྱུང་ལ་འོས་གྲངས་མཐོ་ཤོས་འཐོབ་ནས་ལྟད་མོ་བའི་གློག་བརྙན་རྩེ་ཕུད་ཀྱི་གཟེངས་རྟགས་ཐོབ་པ་རེད། ཅེས་འགྲེལ་བརྗོད་གནང་བྱུང་།
འདས་ལོའི་ཕྱི་ཟླ་ ༡༠ པའི་ནང་རྒྱལ་སྤྱིའི་བོད་དོན་ལས་འགུལ་ཁང་གིས་དེ་འབྲེལ་ཡོངས་ཁྱབ་གསལ་བསྒྲགས་ཤིག་གནང་བའི་ནང་དུ། ༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་༸སྐུའི་གོ་སྟོན་དང་བྱམས་བརྩེའི་ལོ་སྲུང་གཙི་དང་བསྟུན། རྒྱལ་སྤྱིའི་བོད་དོན་ལས་འགུལ་ཁང་གིས་༸གོང་ས་མཆོག་གི་མཛད་རྣམ་བདེ་སྐྱིད་ཀྱི་ཤེས་རབ་ཅེས་པའི་དངོས་བྱུང་གློག་བརྙན་དེ་འཛམ་གླིང་ཁྱོན་ཡོངས་སུ་གཟིགས་འབུལ་ཞུ་རྒྱུ་ཡིན་སྐོར་འགྲེལ་བརྗོད་གནང་ཡོད་པ་ལྟར། ཡུ་རོབ་རྒྱལ་ཁབ་སུད་སི་དང་ཨི་ཊ་ལི་ཚུད་པའི་རྒྱལ་ཁབ་ ༧ དང་། ཨ་རི། ཁེ་ན་ཌ་སོགས་རྒྱལ་ཁབ་མང་པོའི་ནང་གློག་བརྙན་གཟིགས་འབུལ་ཞུས་ཡོད་འདུག ད་ལྟའི་ཆར་རྒྱ་གར་དང་། བལ་ཡུལ། སིངྒ་པོར། ཐའེ་ཝན་སོགས་ཨེ་ཤ་ཡའི་རྒྱལ་ཁབ་ཁག་ལ་གློག་བརྙན་གཟིགས་འབུལ་ཞུས་ཐུབ་མེད་པར་བརྟེན། མ་འོངས་པར་ཨེ་ཤ་ཡའི་རྒྱལ་ཁབ་ཁག་དང་། དྲ་ཐོག་ནས་གློག་བརྙན་གཟིགས་འབུལ་ཞུ་རྒྱུར་འབད་བརྩོན་གནང་མུས་ཡིན་པ་མ་ཟད། སློབ་མ་རྣམས་ལ་དམིགས་ཏེ་སློབ་གྲྭ་ཁག་ཏུ་གློག་བརྙན་གཟིགས་འབུལ་ཞུ་འཆར་འདུག
ཕྱི་ལོ་ ༢༠༢༤ ཟླ་ ༡༠ ཚེས་ ༣ ནས་ ༡༣ བར་ཉིན་གྲངས་ ༡༡ རིང་སུད་སི་གྲོང་ཁྱེར་ཛུ་རིག་ཏུ་ཕྱི་ལོ་ ༢༠༢༤ ལོའི་ཛུ་རིག་གློག་བརྙན་དུས་སྟོན་འཚོགས་ཡོད་ཅིང་། ཐེངས་འདིའི་གློག་བརྙན་དུས་སྟོན་ཐོག་འཛམ་གླིང་གི་རྒྱལ་ཁབ་འདྲ་མིན་གྱི་གློག་བརྙན་མི་འདྲ་བ་ ༡༠༠ ལྷག་མཉམ་ཞུགས་བྱས་པའི་ཁྲོད། ཕྱི་ཚེས་ ༨ ཉིན་བདེ་སྐྱིད་ཀྱི་ཤེས་རབ་ཅེས་པའི་༸གོང་ས་མཆོག་གི་མཛད་རྣམ་དངོས་བྱུང་གློག་བརྙན་དེ་ཐེངས་དང་པོ་གཟིགས་འབུལ་ཞུས་ཡོད་པ་རེད། དེ་ནས་ལོ་དེའི་ཕྱི་ཟླ་ ༡༡ ཚེས་ ༧ ནས་ ༡༠ བར་ཉིན་བཞིའི་རིང་དྷ་སྟེང་བོད་ཁྱིམ་སློབ་གྲྭ་རུ། ཕྱི་ལོ་ ༢༠༢༤ ལོའི་དྷ་ས་རྒྱལ་སྤྱིའི་གློག་བརྙན་དུས་སྟོན་ (DIFF) ཐེངས་ ༡༣ པའི་ཐོག་༸གོང་ས་མཆོག་གི་མཛད་རྣམ་དངོས་བྱུང་གློག་བརྙན་བདེ་སྐྱིད་ཀྱི་ཤེས་རབ་ཅེས་པའི་གློག་བརྙན་གཟིགས་འབུལ་ཞུས་ཡོད་འདུག དེ་ནས་རིམ་པས་ཨ་རི་ནང་དུ་གློག་བརྙན་འགྲེམས་སྤེལ་ཞུས་ཡོད་པ་རེད།
འཛམ་གླིང་གློག་བརྙན་དུས་སྟོན་སོགས་སུ་དགའ་མོས་ཆེན་པོ་ཐོབ་བཞིན་པའི་༧གོང་ས་མཆོག་གི་མཛད་རྣམ་དངོས་བྱུང་གློག་བརྙན་དེ་ནི། ཕྱི་ལོ་ ༢༠༢༤ ལོར་སུད་སིའི་གློག་བརྙན་འཁྲབ་ཁྲིད་པ་བྷར་བྷ་རཱ་མི་ལིར་ (Barbara Miller) ལགས་དང་། ཧྥི་ལི་ཕི་ཌེ་ལཱ་ཁི་སི་ (Philip Delaquis) ལགས་གཉིས་ཡིན་འདུག་ལ། གློག་བརྙན་དེའི་ནང་དུ་དགུང་གྲངས་ ༨༩ ལ་ཕེབས་པའི་༸གོང་ས་རྒྱལ་བ་རིན་པོ་ཆེ་མཆོག་གིས། འཛམ་གླིང་དམག་འཁྲུག་དང་གནམ་གཤིས་འགྱུར་ལྡོག་སོགས་ཀྱི་དཀའ་ངལ་ལ་གདོང་ལེན་བྱེད་ཕྱོགས་དང་། ཞི་བདེ་དང་བདེ་སྐྱིད་ལྡན་པའི་དུས་རབས་ ༢༡ པ་འཛུགས་བསྐྲུན་བྱེད་པར་འགྲོ་བ་མིའི་རིགས་ཀྱིས་སྔར་ལས་ནུས་པ་མཉམ་སྤུངས་གནང་གལ་ཆེ་བའི་སྐོར་དང་། ༸མགོན་པོ་གང་ཉིད་མཆོག་གིས་ལོ་ངོ་སྟོང་ཕྲག་གི་ལོ་རྒྱུས་ལྡན་པའི་རིན་ཐང་ཅན་གྱི་བོད་ཀྱི་ཆོས་དང་རིག་གཞུང་། གོ་ལ་གཅིག་གྱུར་ཀྱི་འདུ་ཤེས་དང་། འཇིག་རྟེན་ཀུན་ཁྱབ་ཀྱི་ལྟ་གྲུབ་བཅས་རླབས་ཆེན་གྱི་མཛད་པ་རྣམས་གསལ་བར་མཛད་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
