གཞོན་ནུ་ལྷན་ཚོགས་ཀྱིས་རྒྱ་ནག་གི་འཁྱོག་བརྗོད་ལ་གདོང་ལེན་དང་ཡོ་བསྲང་བྱ་རྒྱུ་ཡིན་འདུག

ཨ་རིའི་གནས་བཞུགས་བོད་མི་སྒྱུ་རྩལ་བ་དང་ལོ་རྒྱུས་མཁས་པ་སོགས་ཀྱིས་གཞོན་ནུ་ལྷན་ཚོགས་ཀྱི་ལས་འགུལ་ནང་མཉམ་ཞུགས་བྱས་ཏེ། རྒྱ་ནག་གིས་རང་བཙན་བློ་དགའ་ལགས་ཀྱི་རང་ལུས་མེ་སྲེག་དང་བོད་ཀྱི་འཐབ་རྩོད་སྤྱིའི་ཁ་ཕྱོགས་བསྒྱུར་ཐབས་བྱེད་བཞིན་པར་གདོང་ལེན་གནང་དགོས་པའི་འབོད་སྐུལ་ཞུས་སོང་།

དེ་རིང་བོད་ཀྱི་གཞོན་ནུ་ལྷན་ཚོགས་ཀྱིས་གསར་འགོད་ལྷན་ཚོགས་ཤིག་བསྐངས་ཏེ། རྒྱ་ནག་གཞུང་གིས་རང་བཙན་བློ་དགའ་ལགས་ཀྱི་རང་ལུས་མེ་སྲེག་གི་ཁ་ཕྱོགས་བསྒྱུར་ཏེ་འཁྱོག་བརྗོད་བྱེད་བཞིན་པར་ཁ་གཏད་གཅོག་ཐབས་སུ་ནེའུ་ཡོག་ཏུ་ལས་ཁུངས་ཤིག་བཙུགས་ཏེ། རྒྱ་ནག་གི་འཁྱོག་བརྗོད་ལ་གདོང་ལེན་བྱ་རྒྱུ་ཡིན་སྟབས། བོད་པའི་ལོ་རྒྱུས་མཁས་པ་དང་སྒྱུ་རྩལ་བ་སོགས་ཀྱིས་ལས་འགུལ་དེའི་ནང་མཉམ་ཞུགས་གནང་བའི་རེ་སྐུལ་ཞུས་སོང་།

གནད་དོན་དེའི་ཐད་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསྟན་འཛིན་བློ་བཟང་ལགས་ཀྱིས། རྒྱ་ནག་གཞུང་གིས་རང་བཙན་བློ་དགའ་ལགས་ཀྱི་རང་ལུས་མེ་སྲེག་གི་ཁ་ཕྱོགས་བསྒྱུར་ཐབས་དང་འཁྱོག་བརྗོད་བྱེད་ཐབས་འདྲ་མིན་བྱེད་བཞིན་འདུག་པས། གཞོན་ནུ་ལྷན་ཚོགས་ཀྱིས་ནེའུ་ཡོག་ཏུ་ལས་ཁུངས་ཤིག་བཙུགས་ཏེ་རྒྱ་ནག་གཞུང་གིས་རང་བཙན་བློ་དགའ་ལགས་ཀྱི་རང་ལུས་མེ་སྲེག་དང་རྒྱ་ཆེ་ས་ནས་བོད་ཀྱི་འཐབ་རྩོད་ལ་ཁ་བསྒྱུར་ཐབས་བྱེད་བཞིན་པར་གདོང་ལེན་དང་ཁ་གཏད་གཅོག་ཐབས་བྱ་རྒྱུ་ཡིན། ཨ་རིར་གནས་བཞུགས་མཁས་དབང་དང་སྒྱུ་རྩལ་བ། སློབ་ཕྲུག་སོགས་ཤེས་འཇོན་ནུས་ལྡན་གྱི་བོད་མི་གང་མང་གིས་ལས་འགུལ་དེར་མཉམ་ཞུགས་གནང་བའི་འབོད་སྐུལ་ཞུ་བཞིན་ཡོད། ཅེས་བརྗོད་བྱུང་།

ད་ལྟའི་ཆར་དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་འཛམ་གླིང་རྒྱལ་ཁབ་ ༡༤ དང་རྒྱ་གར་གྱི་ས་ཁུལ་མི་འདྲ་བ་ ༤༣ ནང་རྣམ་པ་འདྲ་མིན་གྱི་ཐོག་ནས་རང་བཙན་བློ་དགའ་ལགས་སུ་གདུང་སེམས་མཉམ་དང་ཁོང་གི་ཁ་ཆེམས་རྗེས་སྐྱོང་གི་ཆེད་དུ་བོད་དོན་ལས་འགུལ་སྤེལ་མུས་ཡིན་ཞིང་། དེ་རིང་རྒྱ་གར་ལྷོ་ཕྱོགས་སྦེལ་ཀོབ་ས་གནས་གཞོན་ནུའི་གོ་སྒྲིག་འོག་ས་གནས་སུ་ལས་འགུལ་སྤེལ་ཡོད་འདུག

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་བཀྲ་ཤིས་དར་རྒྱས་ལགས་ཀྱིས། དབུས་བོད་ཀྱི་གཞོན་ནུ་ལྷན་ཚོགས་ཀྱི་སྣེ་འཁྲིད་དང་གོ་སྒྲིག་འོག་འཛམ་གླིང་ཡུལ་གྲུ་གང་སར་བོད་དོན་ལས་འགུལ་སྤེལ་མུས་ཡིན་པའི་ཁྲོད། བཞུགས་སྒར་དུ་ཞག་ཞེ་དགུའི་རིང་ཟས་བཅད་ངོ་རྒོལ་ལས་འགུལ་སྤེལ་བཞིན་ཡོད་ཅིང་། དེ་རིང་ནི་ཟས་བཅད་ངོ་རྒོལ་ལས་འགུལ་སྤེལ་ནས་ཉིན་དགུ་པ་ཆགས་པ་མ་ཟད། འཛམ་གླིང་ཡུལ་གྲུ་གང་སར་རྣམ་པ་འདྲ་མིན་གྱི་ཐོག་ནས་རྒྱ་གཞུང་ལ་ངོ་རྒོལ་ལས་འགུལ་སྤེལ་མུས་ཡིན་ཡང་། དགོས་འདུན་དོན་ཚན་ལྔ་ཡོད་པ་རྣམས་གཅིག་མཚུངས་ཡིན་སྐོར་འགྲེལ་བརྗོད་གནང་བྱུང་།

བོད་ཀྱི་གཞོན་ནུ་ལྷན་ཚོགས་ཀྱི་དགོས་འདུན་དོན་ཚན་དང་བོ། རྒྱལ་སྤྱིའི་མཉམ་འབྲེལ་རྒྱལ་ཚོགས་ནས་དཔའ་བོ་རང་བཙན་བློ་དགའ་ལགས་ནས་བོད་རྒྱལ་ཁབ་དང་མི་རིགས་ཀྱི་དོན་དུ་རང་ལུར་མེར་སྲེག་གནང་བ་དེར་ངེས་པར་འགན་འཁུར་དགོས་པ་མ་ཟད། བྱ་སྤྱོད་ངོ་མའི་ཐོག་ནས་རྒྱལ་སྤྱིའི་ཐོག་ཡ་ལན་དོན་ལྡན་ཞིག་ངེས་པར་སྤྲད་དགོས་ཡོད།

གཉིས་པ། རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་མདུན་དུ་རང་ལུས་མེར་སྲེག་གནང་མཁན་རྒྱལ་གཅེས་དཔའ་བོ་རང་བཙན་བློ་དགའ་ལགས་གཙོ་བྱས་པའི་ད་བར་བོད་མི་རང་ལུས་མེར་སྲེག་གནང་མཁན་ཡོངས་ཀྱི་ཚེ་སྲོག་ལ་རྒྱ་དམར་སྲིད་གཞུང་ནས་འགན་འཁུར་དགོས།

གསུམ་པ། བོད་རང་དབང་རང་བཙན་ནི་ང་ཚོའི་ཐོབ་ཐང་ཡིན་པས་རྒྱལ་སྤྱིས་ངེས་པར་ངོས་འཛིན་དགོས་པ་དང་། ང་ཚོར་བོད་ནི་ལོ་རྒྱུས་ཐོག་རང་བཙན་རྒྱལ་ཁབ་ཅིག་ཡིན། བོད་ལ་རང་དབང་རང་བཙན་ཐོབ་དགོས་ཡོད།

བཞི་པ། རྒྱ་དམར་སྲིད་གཞུང་ནས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཅེས་པའི་མིང་དོན་མི་མཚུངས་པའི་ཁྲིམས་འགལ་གྱི་ཁྲིམས་ཡིག་དེར་ང་ཚོས་ངོས་ལེན་རྩ་བ་ནས་མེད་ལ། བོད་ནང་ལག་བསྟར་བྱེད་མཚམས་འཇོག་དགོས།

ལྔ་པ།་༧ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་འཛམ་གླིང་ནང་གི་བོད་པའི་ཆབ་སྲིད་བཙོན་པ་ཆུང་ཤོས་དང་། ཁོར་ཡུག་སྲུང་སྐྱོབ་པ། བོད་ཀྱི་སྒྱུ་རྩལ་བ། འགྲོ་བ་མིའི་ཐོབ་ཐང་སྲུང་སྐྱོབ་པ་རྣམས་དང་། ཆབ་སྲིད་བཙོན་པ་གཞན་ཚང་མ་ཆ་རྐྱེན་དང་འགོར་འགྱངས་མེད་པར་ཀློད་གྲོལ་གཏོང་དགོས།

གསར་འགོད་པ། སྐལ་བཟང་སྦྱིན་པ།