ཤར་ཏུར་ཀི་སི་ཐན་ནས་ཡིན་པའི་གསར་འགོད་པ་གྲགས་ཅན་གྷུ་ཆེ་ཧེ་ར་ཧོ་ཇ་ལགས་ཀྱིས་རྒྱ་ནག་གི་མི་རིགས་མཐུན་སྒྲིལ་ཡར་སྐུལ་གྱི་བཅའ་ཁྲིམས་ཀྱིས་གྲངས་ཉུང་མི་རིགས་ཀྱི་སྐད་ཡིག་དང་། རིག་གཞུང་། ཆོས་དད་བཅས་ལ་དོ་དམ་བྱེད་ཀྱིན་ཡོད་སྐོར་སོགས་བརྗོད།
ཟླ་འདིའི་ཕྱི་ཚེས་ ༥ ཉིན་ཨི་ཊ་ལི་ཡི་རྒྱལ་ས་རོམ་ཏུ་རྟེན་གཞི་བྱས་པའི་གསར་ཁང་དབར་གྱི་ཞབས་ཞུ་(Inter Press Service) ཡིས། ཤར་ཏུར་ཀི་སི་ཐན་ནས་ཡིན་པའི་ཨེ་ཤ་ཡ་རང་དབང་རླུང་འཕྲིན་ཁང་གི་ཡུ་གུར་སྡེ་ཚན་གྱི་གསར་འགོད་པ་དང་། ཕྱི་ལོ་ ༢༠༡༩ ལོར་མགྷ་ནི་སི་ཀིའི་འགྲོ་བ་མིའི་ཐོབ་ཐང་གི་བྱ་དགའ་ (Magnitsky Human Rights Award) འཐོབ་མཁན་གྷུ་ཆེ་ཧེ་ར་ཧོ་ཇ་(Gulchehra Hoja) ལགས་སུ། འདི་ལོའི་ཕྱི་ཟླ་ ༧ ཚེས་ ༡ ཉིན་ནས་ལག་བསྟར་བྱེད་འགོ་ཚུགས་པའི་མི་རིགས་མཐུན་སྒྲིལ་ཡར་ཐོན་ལ་སྐུལ་སྤེལ་གཏོང་ཕྱོགས་སྐོར་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བཅའ་ཁྲིམས་ཟེར་བའི་ཐད་བཅར་འདྲི་བྱེད་སྐབས། ཁོ་མོས་བཅའ་ཁྲིམས་གསར་པ་འདིས་རྒྱ་ནག་གི་མི་སེར་ཞིག་ཏུ་འཚོ་གནས་བྱེད་པར་ངོས་ལེན་ཡོད་པའི་ཐབས་ལམ་གཅིག་ཁོ་ན་མཚོན་གྱི་ཡོད་པ་དང་། རྒྱལ་ཁབ་ཙམ་མ་ཡིན་པར་སྤྱི་ཚོགས་ཀྱི་ཆ་ཤས་ཚང་མ་དེའི་ཕྱོགས་སུ་ཤར་སྐྱོད་བྱེད་དགོས་ཀྱི་ཡོད། རིག་གཞུང་དང་། ཆོས་ལུགས། སྐད་ཡིག་བཅས་ནི་སྲུང་སྐྱོབ་བྱ་རྒྱུའི་ཐོབ་ཐང་ལས་དོ་དམ་བྱ་ཡུལ་ཞིག་ཏུ་གྱུར་ཡོད། ཅེས་བཅའ་ཁྲིམས་གསར་པ་དེར་ངོ་རྒོལ་བྱས་འདུག
ཁོ་མོས། མི་རིགས་མཐུན་སྒྲིལ་གྱི་བཅའ་ཁྲིམས་ཞེས་པ་འདིས་དམར་ཤོག་ཚོགས་པའི་དབང་ཚད་སྲ་བརྟན་དུ་གཏོང་གིན་ཡོད་པ་ལས། གྲངས་ཉུང་མི་རིགས་ཀྱི་ཐོབ་ཐང་ཆེ་རུ་གཏོང་གི་མེད། གྲངས་ཉུང་མི་རིགས་རྣམས་ཀྱིས་དམར་ཤོག་ཚོགས་པར་ལྷག་བསམ་རྣམ་དག་བྱ་རྒྱུ་ནི་ཁོང་ཚོའི་ངོ་བོ་ལས་གལ་ཆེ་བ་དང་། ཐ་ན་ཆེས་སྤྱིར་བཏང་བའི་འཚོ་བའི་ཆ་ཤས་དག་ཀྱང་རྒྱལ་ཁབ་ཀྱི་སྟངས་འཛིན་འོག་ཏུ་ཡོད་པའི་ངོས་འཛིན་བྱེད་ཀྱིན་ཡོད་ལ། ཡུ་གུར་བ་ནི་ཁྲིམས་འདིའི་གནོད་འཚེ་ཕོག་མཁན་གཅིག་པུ་མིན་པར། ཧོང་ཀོང་གི་ལས་འགུལ་བ་དང་། ཆོས་ལུགས་ཚོགས་པ། ལྷོ་སོག བོད་པ། དེ་བཞིན་རྒྱ་ནག་དམར་ཤོག་ཚོགས་པའི་དམིགས་ཡུལ་དང་མི་མཐུན་པའི་ལྟ་སྤྱོད་ཅན་གྱི་རྒྱ་རིགས་དག་ལ་ཁྱབ་ཀྱི་ཡོད། དེ་བཞིན་ཁྲིམས་འདིའི་ཁྱབ་ཚད་རྒྱ་ནག་གི་རྒྱལ་མཚམས་ལས་བརྒལ་ཡོད་པས། ཁོང་ཚོ་ས་གནས་གང་དུ་ཡོད་མེད་ལ་མ་ལྟོས་པར་བཅའ་ཁྲིམས་འདིའི་ཤུགས་རྐྱེན་ཐེབས་ཀྱི་ཡོད། ཅེས་བཅའ་ཁྲིམས་འདིའི་ཁྱབ་ཚད་སྐོར་འགྲེལ་བརྗོད་བྱས།
ཁོ་མོས་མུ་མཐུད་དུ། བཅའ་ཁྲིམས་དེས་དམག་མི་དང་། ཉེན་རྟོག་པ། བདེ་འཇགས་ལས་ཁུངས། གཙུག་ལག་སློབ་གཉེར་ཁང་བཅས་ཀྱིས་མཉམ་ལས་བྱེད་པའི་རྨང་གཞི་བཏིངས་ཡོད་པས། སྤྱི་ཚོགས་ཀྱི་ཆ་ཤས་ཡོངས་རྫོགས་མི་སེར་ཚོའི་ངོ་བོར་ལྟ་རྟོག་དང་བསྐྱར་བཟོ་བྱེད་པའི་ལས་ལ་ཞུགས་ཀྱིན་ཡོད། དཔེར་ན། རྒྱ་ནག་གི་རྒྱལ་སྲུང་སློབ་གཉེར་ཁང་གི་སློབ་མ་ཚོ་ཤར་ཏུར་ཀི་སི་ཐན་ལ་མངགས་གཏོང་བྱས་ཏེ། སྲིད་གཞུང་གི་ལྟེ་གནས་དང་། གྲོང་སྡེའི་དྲ་མིག་དོ་དམ། ཉེན་རྟོག་ཁང་། ཡུ་གུར་བའི་ཐོན་སྐྱེད་དང་འཛུགས་སྐྲུན་དམག་སྡེ་བཅས་ལ་ཉམས་གསོག་བྱེད་དུ་བཅུག་ཡོད། ཡུ་གུར་བའི་ཐོན་སྐྱེད་དང་འཛུགས་སྐྲུན་དམག་སྡེ་ཞེས་པ་ནི་ཡུ་གུར་ས་ཁུལ་ཁྱོན་ཡོངས་སུ་གྲོང་ཁྱེར་དང་། ཁྲིམས་ཁང་། བཙོན་ཁང་བཅས་སྟངས་འཛིན་བྱེད་བཞིན་པའི་དམག་མིའི་སྡེ་ཚན་ཞིག་ཡིན། བྱེད་སྟངས་འདི་ནི་ཤེས་ཡོན་ལྟ་སྐོར་ཞིག་མིན་པར་མི་རྣམས་ལྟ་རྟོག་འོག་ཏུ་འཇུག་པའི་ཐབས་ལམ་ལ་སྦྱོང་བརྡར་བྱེད་དུ་འཇུག་པ་ཞིག་རེད། ཅེས་དང་། ཕྱི་རྒྱལ་ཡུལ་གྲུ་ཁག་ཏུ་གནས་སྡོད་བྱེད་མཁན་ཡུ་གུར་བ་རྣམས་དང་། ཡུ་གུར་གྱི་གནད་དོན་ཐོག་རྒྱབ་སྐྱོར་བྱེད་མཁན་ཚོ་ཡང་རྒྱ་ནག་གི་ཁྲིམས་ཡིག་འདིའི་ལྟ་རྟོག་ཀྱི་ཁྱབ་ཁོངས་འོག་ཏུ་ཚུད་ཡོད་པ་དང་། རྒྱལ་སྤྱིའི་སྤྱི་ཚོགས་ཀྱིས་བཅའ་ཁྲིམས་འདི་ལ་ཁྲིམས་ཡིག་ཅིག་གི་ངོ་བོ་ནས་མི་ལྟ་བར་དེའི་ཤུགས་རྐྱེན་ལ་ལྟ་རྒྱུ་གལ་ཆེན་ཡིན་སྐོར་སོགས་བརྗོད་འདུག
འདི་ལོའི་ཕྱི་ཟླ་༧ ཚེས ༡ ཉིན་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་སྐུལ་གྱི་བཅའ་ཁྲིམས་ལག་བསྟར་བྱེད་མགོ་བཙུགས་ཡོད། བཅའ་ཁྲིམས་འདིའི་ནང་རྒྱལ་ཁབ་ཀྱི་ལས་ཁུངས་དང་གཞི་རིམ་ཚོགས་སྡེ་ཁག་གིས་མི་རིགས་གཅིག་གྱུར་གྱི་ངོ་བོ་ཞིག་བཞེངས་སྐྲུན་བྱ་རྒྱུ་དང་། ཤེས་ཡོན་དང་གཞུང་དོན་ཁྲོད་རྒྱ་ཡིག་བཀོལ་སྤྱོད་གཙོར་འདོན་བྱེད་པ། དེ་བཞིན་མི་རིགས་མཐུན་སྒྲིལ་ལ་གནོད་སྐྱོན་གཏོང་བ་དང་ཁ་བྲལ་རིང་ལུགས་ལ་སྐུལ་སློང་བྱེད་མཁན་རྣམས་རྒྱ་ནག་གི་རྒྱལ་མཚམས་བརྒལ་བའི་ས་ཆ་གང་དུ་གནས་ཡོད་ཀྱང་བཅའ་ཁྲིམས་འདིའི་ལག་བསྟར་གྱི་ར་བའི་ནང་ཚུད་ཡོད་པ་གསལ་པོ་བཀོད་ཡོད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
