འདི་ལོའི་སྟོན་འགོ་ཚུགས་པ་ནས་བཟུང་རྒྱ་ནག་གཞུང་གིས་མི་རིགས་རྒྱ་སྒྱུར་སྲིད་ཇུས་ལག་བསྟར་འོག་ཏུ། བོད་ཡིག་སློབ་གྲྭ་ཁག་གི་ཡིག་ཆ་ཚད་ལྡན་མིན་པར་ཁ་གཡར་ནས། སྔ་རྗེས་སུ་བོད་སྐད་ཡིག་སློབ་གསོ་གཙོ་གཉེར་བྱེད་པའི་སློབ་གྲྭ་ཆུང་འབྲིང་གསུམ་གྱི་སྒོ་བརྒྱབ་འདུག སློབ་གྲྭ་གསུམ་པོ་མགོ་ལོག་རྨ་ཆེན་རྫོང་གི་ཁོངས་སུ་ཡོད་པ་རེད།
སློབ་གྲྭ་དང་པོ།
གངས་ལྗོངས་རྩྭ་ཐང་བུ་མོའི་སློབ་གྲྭ།
རྒྱ་ནག་གཞུང་གི་བཙན་དབང་འོག་ཏུ། ཕྱི་ལོ་༢༠༢༦ ཟླ་ ༨ ཚེས་ ༢༨ ཉིན་གངས་ལྗོངས་རྩྭ་ཐང་བུ་མོའི་སློབ་གྲྭ་སྒོ་རྒྱག་དགོས་བྱུང་འདུག་ལ། རྒྱུས་ལོན་བྱུང་བ་ལྟར་ན། གངས་ལྗོངས་རྩྭ་ཐང་བུ་མོའི་སློབ་གྲྭ་ནི་བོད་ཀྱི་སློབ་གསོ་བ་གྲགས་ཅན་མགོ་ལོག་འཇིགས་མེད་རྒྱལ་མཚན་ལགས་ཀྱིས། ཕྱི་ལོ་ ༢༠༠༥ ཟླ་ ༡༠ ཚེས་ ༡༥ གསར་འཛུགས་གནང་བ་ནས་ཕྱི་ལོ་ ༢༠༢༦ ཟླ་ ༨ ཚེས་ ༢༨ ད་བར་ཏེ། མི་ལོ་ ༢༠ ལྷག་ཕྱིན་པའི་རིང་ལ་བོད་ཁུལ་གྱི་སློབ་ཕྲུག་བུ་མོ་སྟོང་ཕྲག་མང་པོར་གནའ་དེང་ཟུང་འབྲེལ་གྱི་ཤེས་ཡོན་སྤྲད་ཡོད་འདུག
འདི་ལོར་སློབ་གྲྭ་དེར་སློབ་ཕྲུག་བུ་མོ་ ༤༤༨ ཡས་མས་དང་། འབྲིང་རིམ་ཆེད་གཉེར་གྱི་དགེ་རྒན་ ༤༤ ། དགེ་ལས་ ༦༣ ། སློབ་ཆུང་ནང་འཛིན་གྲྭ་ ༦ ཡོད་པ་དང་། སློབ་ཡུན་ལོ་ ༦ དང་། སློབ་འབྲིང་ནང་འཛིན་གྲྭ་ ༦ དང་སློབ་ཡུན་ལོ་ ༣ བཅས་ཁྱོན་ལོ་དགུའི་འོས་འགན་སློབ་གསོའི་སྒྲིག་ཁོངས་སུ་ཡོད་འདུག
གངས་ལྗོངས་རྩྭ་ཐང་བུ་མོའི་སློབ་གྲྭ་ནི་རྭ་རྒྱ་གྲོང་རྡལ་ནས་བར་ཐག་སྤྱི་ལེ་ ༢༠ ཡས་མས་མཚམས་ཀྱི་གནས་རི་ཨ་མྱེས་ཀེ་ཐོ་ཡི་རི་གཤམ་དུ་ཆགས་ཡོད། སློབ་གྲྭ་འདི་ནས་སློབ་འབྲིང་མཐར་ཕྱིན་པའི་སློབ་ཕྲུག་མང་པོ་ནུབ་བྱང་མི་རིགས་སློབ་ཆེན་(Northwest University for Nationalities)གཙོ་བྱས་པའི་བོད་ནང་གི་སློབ་ཆེན་ཁག་དང་། དེ་མིན་རྒྱ་ནག་གི་གྲོང་ཁྱེར་ཆེ་ཁག་གི་སློབ་ཆེན་རེ་ཟུང་འགྲིམས་ནས། ད་ལྟ་བོད་ནང་གི་སྤྱི་ཚོགས་ལས་རིགས་སྣ་ཚོགས་ལ་འཇུག་མུས་ཡིན་པ་ལྟར། རྩྭ་ཐང་བུ་མོའི་སློབ་གླིང་གི་བོད་སྐད་ཡིག་སློབ་གསོའི་མཛད་རྗེས་ལ་བོད་ཀྱི་སྤྱི་ཚོགས་སྟེང་བསྔགས་བརྗོད་དང་གདེང་འཇོག་མཐོན་པོ་གནང་མུས་རེད།
ཡིན་ནའང་། རྒྱ་ནག་གཞུང་གི་བཙན་དབང་གི་འོག་ཏུ་གངས་ལྗོངས་རྩྭ་ཐང་བུ་མོའི་སློབ་གྲྭ་གློ་བུར་སྒོ་རྒྱག་དགོས་བྱུང་བའི་གནས་སྟངས་ཐད་ལ། བོད་ཕྱི་ནང་གི་དགེ་སློབ་གསར་རྙིང་དང་མི་མང་གིས་བློ་ཕམ་དང་། གདུང་འབོད་ཀྱི་རྣམ་འགྱུར་སྣ་ཚོགས་སྟོན་བཞིན་པ་ནི་རྩྭ་ཐང་བུ་མོའི་སློབ་གྲྭ་བཙུགས་ནས་མི་ལོ་ ༢༡ འཁོར་བའི་རྗེས་དྲན་དུས་ཆེན་དང་འབྲེལ་ནས། སྤྱི་ཚོགས་དྲ་རྒྱའི་བརྒྱུད་ལམ་ཁག་ཏུ་མཐོང་རྒྱུ་འདུག་སྟེ། “དེ་རིང་ནི་མ་ཡུམ་སློབ་གྲྭ་སྟེ་གངས་ལྗོངས་རྩྭ་ཐང་བུ་མོའི་སློབ་གྲྭའི་འཁྲུངས་སྐར་ཡིན་ལ། སློབ་གྲྭ་འདི་བཙུགས་ནས་མི་ལོ་ ༢༡ འགོར་ཡོད་ཅིང་། མི་ལོ་ ༢༡ དུས་ཡུན་འདི་ངེད་དགེ་སློབ་ཚོས་མཉམ་དུ་རོལ་བ་ཡིན། ཡིན་ཡང་ད་ལོ་ནས་མཉམ་རོལ་གྱི་སྐལ་བ་འདི་ཡོད་པ་མ་རེད། འོན་ཀྱང་ང་ཚོས་དུས་ནམ་ཡང་གངས་ལྗོངས་རྩྭ་ཐང་བུ་མོའི་སློབ་གྲྭ་མི་བརྗེད་ལ་དགེ་རྒན་རྣམ་པའི་དྲིན་ལན་དེ་བས་ཀྱང་མི་བརྗེད།” ཅེས་དང་། “ཕ་སྐད་མ་ཡིག་གི་གསེར་མདོག་གི་ཉི་འོད་འཚེར་ས་ཞིག་ནུབ་སོང་།” “ངའི་སྲོག་ཤིང་ཁྱེད་གཏན་དུ་ནུབ་སོང་།” “གངས་ཅན་བོད་ལ་བཀའ་དྲིན་ཆེན་པོ་ཅན།” “གངས་ལ་སྐུ་དྲིན་མཐོ་བའི་སློབ་དཔོན་འཇིགས་མེད་རྒྱལ་མཚན་མཆོག” “ཁྱེད་ཡོད་པས་ང་ཚོར་སྲོག་ཤིང་ཡོད།” སོགས་བྲིས་ནས་རང་སེམས་ཀྱི་བློ་ཕམ་དང་རེ་ཆད་ཀྱི་གདུང་བ་མཚོན་ཐབས་བྱེད་ཀྱིན་འདུག
སློབ་ཆུང་ནས་དམའ་འབྲིང་བར་གྱི་ལོ་དགུའི་སློབ་སྦྱོང་ཁྲོད། མདོ་དབུས་ཁམས་གསུམ་གྱི་བུ་མོ་མང་པོས་བོད་ཡིག་དང་། རྒྱ་ཡིག དབྱིན་ཡིག་བཅས་ལས་གཞན་རྩིས་རིག ཚན་རིག གློག་ཀླད་རིག་པ། ས་ཁམས་རིག་པ། ལོ་རྒྱུས། ཆབ་སྲིད་རིག་པ་བཅས་སྦྱངས་ཡོད་པ་དང་། བོད་ཀྱི་བརྡ་སྤྲོད་དང་། དག་ཡིག སྙན་ངག་བཅས་ནི་སློབ་ཚན་གྱི་གཞི་རྩའི་ཆ་ཤས་གལ་ཆེན་ཞིག་ཡིན་པས། ས་ཁུལ་དེའི་སློབ་གྲྭ་གཞན་དག་ཏུ་དཀོན་པའི་རང་གི་སྐད་ཡིག་དང་རྩོམ་རིག་གི་གཞི་རྩ་བརྟན་པོ་ཞིག་བོད་ཀྱི་བུ་མོ་རྣམས་ལ་སྤྲད་ཡོད་འདུག
བུ་མོའི་སློབ་གྲྭ་འདི་ནི་བོད་ཀྱི་སློབ་གསོ་བ་ཆེན་པོ་རྭ་རྒྱ་འཇིགས་མེད་རྒྱལ་མཚན་མཆོག་གིས་སྒེར་བཙུགས་སློབ་གྲྭའི་ངོ་བོར་གསར་འཛུགས་གནང་བ་ཡིན་ནའང་། རྨ་ཆེན་རྫོང་གི་སློབ་གསོ་ཅུས་ཀྱི་ཁོངས་གཏོགས་སློབ་གྲྭ་ཆགས་རྗེས། ཁོང་ནི་མཚན་འཛིན་སློབ་གཙོ་ཡིན་འདུག ཁུངས་ལྡན་གནས་ཚུལ་འབྱོར་བ་ལྟར་ན། ད་ལྟའི་མགོ་ལོག་རྭ་རྒྱ་འཇིགས་མེད་རྒྱལ་མཚན་ལགས་མགོ་ལོག་ཁུལ་ནས་ཕྱི་ལོག་ལ་འགྲོ་འཇུག་གི་མེད་པ་དང་། ཕྱི་ལོ་ ༢༠༢༤ སྒོ་བརྒྱབ་པའི་རྭ་རྒྱ་གངས་ལྗོངས་ཤེས་རིག་ནོར་བའི་སློབ་གླིང་གི་དགེ་རྒན་བཛྲ་ཚུལ་ཁྲིམས་ལགས་དང་། གྱི་ལིང་འཇིགས་མེད་གཉིས་ལ་འདྲི་རྩད་བྱས་ཡོད་པའི་གནས་ཚུལ་ཡང་འདུག
གནས་ཚུལ་མཁོ་སྤྲོད་བྱེད་མཁན་དགེ་བཤེས་བློ་བཟང་དཔལ་ལྡན་ལྟར་ན། ད་བར་གངས་ལྗོངས་རྩྭ་ཐང་བུ་མོའི་སློབ་གྲྭ་ནས་སློབ་མཐར་ཕྱིན་པའི་སློབ་ཕྲུག་ཆིག་སྟོང་ལྷག་ཡོད་པ་དང་། སློབ་གྲྭ་སྒོ་རྒྱག་སྐབས་ཡིག་ཆ་ཚད་ལྡན་མེད་པར་ཁག་འདོགས་བྱས་འདུག་སྐོར་བརྗོད་བྱུང་།
སློབ་གྲྭ་གཉིས་པ། ཇ་སག་སྡེ་བའི་སློབ་ཆུང་།
ད་ལོའི་ཕྱི་ཟླ་ ༩ ནང་རྨ་ཆེན་རྫོང་སྲིད་གཞུང་གིས་རྭ་རྒྱ་གྲོང་རྡལ་ཇ་སག་སྡེ་བའི་སློབ་ཆུང་བཙན་གྱིས་སྒོ་བརྒྱབ་ཡོད་འདུག ཇ་སག་སློབ་ཆུང་ནི་ཕྱི་ལོ་ ༡༩༩༥ ལོར་བཙུགས་པ་ཡིན་ཞིང་། སྐབས་དེར་སྔར་གྱི་རྭ་རྒྱ་ཡུལ་ཚོ་ཇ་སག་འབྲོག་སྡེའི་ཨུ་ཡོན་ལྷན་ཁང་གི་འབྲོག་པ་རྣམས་ཀྱིས་མ་དངུལ་བསྡུ་རུབ་བྱས་ནས་གསར་འཛུགས་བྱས་པ་ཞིག་རེད་འདུག ཕྱི་ལོ་ ༢༠༠༤ ལོར་ཤེས་ཡོན་སྒྲིག་བཀོད་ཐེངས་དང་པོ་སྤེལ་ནས་རྫོང་ཡོངས་ཀྱི་འབྲོག་པའི་སློབ་ཆུང་ཚང་མ་ཟླ་སྒྲིལ་དང་མེད་པར་བཟོས་སྐབས། ས་གནས་མི་མང་གིས་རེ་སྐུལ་ནན་པོ་བཏོན་པས་སློབ་གྲྭ་འདི་ཟླ་སྒྲིལ་མ་བྱས་པར་ལྷག་ཡོད་འདུག ཕྱི་ལོ་ ༢༠༠༨ ཡིག་ཐོག་ནས་ “རྭ་རྒྱ་གྲོང་རྡལ་བཅའ་སྡོད་སློབ་གྲྭ་ཨང་གཉིས་པ” ཞེས་མིང་བསྒྱུར་ཞིང་། སྐབས་དེར་རྨ་ཆེན་རྫོང་ཡོངས་ཀྱི་འབྲོག་པའི་བཅའ་སྡོད་སློབ་ཆུང་གཅིག་པུ་དེ་ཡིན་སྐོར་སློབ་གྲྭའི་ལོ་རྒྱུས་ནང་དུ་བཀོད་འདུག
གནས་ཚུལ་མཁོ་སྤྲོད་པ་དགེ་བཤེས་བློ་བཟང་དཔལ་ལྡན་ལྟར་ན། ད་ལོ་ཇ་སག་སྡེ་བའི་སློབ་གྲྭ་ལ་སློབ་ཕྲུག་སུམ་བརྒྱ་ཙམ་དང་། དགེ་རྒན་ལས་བྱེད་ཉི་ཤུ་རྩ་གྲངས་ཡོད་འདུག་པ་དང་། ལོ་འདི་དག་གི་རིང་ལ་ས་གནས་ཀྱི་བོད་རིགས་ཚོའི་དཀའ་སྤྱད་སྡུག་རུས་ལ་བརྟེན་ནས་བོད་རིགས་གཞོན་སྐྱེས་ཚོས་བོད་ཡིག་གཙོས་རིག་གནས་སྣ་མང་སྦྱོང་བའི་ཁོར་ཡུག་སྐྲུན་ཐུབ་ཡོད་པར་མ་ཟད། ད་སྐབས་ཚོགས་ཁང་དང་། འཛིན་ཁང་སོགས་འཛུགས་སྐྲུན་ཀྱང་མི་དམན་པ་བྱས་ཡོད་འདུག སློབ་གཞི་ནི་བོད་རྒྱ་སྐད་གཉིས་ཀྱིས་སློབ་ཁྲིད་གནང་གི་ཡོད་འདུག སློབ་ཆུང་ལོ་རིམ་དང་པོ་ནས་དྲུག་པ་བར་ཡོད་པ་དང་། སློབ་མའི་ཡོང་ཁུངས་ནི། རྭ་རྒྱ་ཇ་སག་གི་སྡེ་པ་གསུམ་ཏེ། ཇ་སག་སྡེ་གཞུང་མ་དང་། ཡག་ཁྱ། ཐེའུ་བྱེས་བཅས་དང་། གཞན་ཡང་ཉེ་སྐོར་གྱི་ནགས་སྐོར་སྡེ་པས་ཀྱང་བྱིས་པ་གང་མང་སློབ་གྲྭ་འདིར་བཞག་ཡོད་འདུག
ཡང་སློབ་གྲྭ་སྒོ་རྒྱག་དགོས་དོན་གྱི་ཐད་ནས། ཁོང་གིས། སློབ་གྲྭ་གཉེར་ཆོག་པའི་ཁྲིམས་ཐོག་གི་ཡིག་ཆ་མི་ཚང་ཚུལ་གྱི་བསྙད་འདོགས་བྱས་ཏེ་སྒོ་བརྒྱབ་འདུག ཅེས་བརྗོད་བྱུང་། དེ་མིན་ཇ་སག་སློབ་ཆུང་ནས་ད་བར་དུ་ས་གནས་སློབ་ཕྲུག་ཅི་ཙམ་སློབ་སྐྱོང་གནང་ཡོད་མེད་དང་། སློབ་གྲྭ་དེ་སྒོ་བརྒྱབ་རྗེས་ཇ་སག་སྡེ་བའི་སློབ་མ་རྣམས་སློབ་གྲྭ་གང་དུ་སློབ་གཉེར་ལ་གཏོང་གི་ཡོད་མེད་སོགས་ཞིབ་ཕྲའི་གནས་ཚུལ་རྒྱུས་ལོན་མ་ཐུབ་པར་ལྷག་ཡོད།
སློབ་གྲྭ་གསུམ་པ།
མགོ་ལོག་རྟ་བྲག་དྭ་ཕྲུག་སློབ་གྲྭ།
རྒྱ་ནག་གཞུང་གི་བཙན་དབང་འོག་ཏུ། ཕྱི་ལོ་ ༢༠༢༦ ཟླ་ ༡༠ པའི་ཟླ་མགོར་མགོ་ལོག་རྨ་ཆེན་རྫོང་རྟ་བོ་གྲོང་རྡལ་དུ་ཆགས་པའི་མགོ་ལོག་རྟ་བྲག་དྭ་ཕྲུག་སློབ་གྲྭ་ (果洛道扎福利学校) སྒོ་རྒྱག་དགོས་བྱུང་འདུག རྒྱུས་ལོན་བྱུང་བ་ལྟར་ན། སློབ་གྲྭ་འདིས་ལོ་ ༢༠ ཙམ་རིང་ཕ་མ་མེད་པའི་བོད་ཀྱི་བྱིས་པ་རྣམས་ལ་ཟས་གོས་དང་། སྡོད་ཁང་། སྨན་བཅོས། ཤེས་ཡོན་བཅས་རིན་མེད་དུ་མཁོ་སྤྲོད་བྱས་ཡོད། སློབ་གྲྭའི་གནས་སྟངས་ལ་རྒྱུས་ཡོད་པའི་མི་སྣ་ཞིག་གིས་སློབ་གྲྭར་སྒོ་བརྒྱབ་པ་ཁུངས་སྐྱེལ་བྱས་ཡོད་ཀྱང་། གཞུང་ཕྱོགས་ནས་སློབ་གྲྭ་སྒོ་བརྒྱབ་པའི་རྒྱུ་མཚན་ཁྱབ་བསྒྲགས་བྱས་མེད་ལ། སློབ་ཕྲུག་རྣམས་ད་ལྟ་གང་དུ་ཡོད་མེད་ཀྱང་གསལ་པོ་མི་འདུག
སློབ་གྲྭ་འདི་ནི་འདས་པོ་སྨན་པ་རྟའུ་བློ་བཟང་དཔལ་ལྡན་(༡༩༥༡-༢༠༡༩)དང་ཁོང་གི་བཟའ་ཟླ་ཆོས་ཉིད་ལྷ་མོ་གཉིས་ཀྱིས་ཕྱི་ལོ་ ༢༠༠༥ ལོར་གསར་འཛུགས་བྱས་པ་ཞིག་རེད་འདུག སྨན་པ་རྟའུ་བློ་བཟང་དཔལ་ལྡན་ནི་ཕྱི་ལོ་ ༡༩༥༡ ལོར་ཁམས་རྟའུ་རུ་འཁྲུངས་ཤིང་། ཆུང་དུས་ནས་བཙན་བྱོལ་དུ་ཕེབས་ཏེ་དགུང་ལོ་ ༡༢ ཐོག་འཇར་མན་དུ་ཕེབས། དེ་ནས་སྨན་པ་ཞིག་ཏུ་གྱུར་པ་དང་ཆབས་ཅིག “སྤྲིན་འཁོར” (Trinkhor) ཞེས་པའི་གླུ་གཞས་ཀྱི་སྒྲ་ཐག་ཁག་གཅིག་ཀྱང་བཏོན་ཡོད་པ་རེད།
ཁོང་གིས་ཕྱི་ལོ་ ༡༩༩༥ ལོར་འཇར་མན་དུ་ “རྟ་བྲག་ལས་གཞི” (Tadra Project) ཞེས་པ་གསར་འཛུགས་བྱས་ཤིང་། ལས་གཞི་དེ་ལ་བརྟེན་ནས་ཕྱི་ལོ་ ༡༩༩༧ ལོར་ཁོང་གི་ཕ་ཡུལ་ཁམས་རྟའུ་རུ་དྭ་ཕྲུག་གི་སློབ་གྲྭ་དང་པོ་བཙུགས། མགོ་ལོག་གི་སློབ་གྲྭ་འདི་ནི་ལས་གཞི་དེའི་ཆ་ཤས་གཉིས་པ་ཡིན་ཞིང་། ཕྱི་ལོ་ ༢༠༠༥ ལོར་བཙུགས་ནས་ ༢༠༠༦ ཟླ་ ༨ པར་དངོས་སུ་དབུ་འབྱེད་བྱས་ཡོད་འདུག འཇར་མན་དང་སུད་སིའི་རྟ་བྲག་ཐེབས་རྩ་ཁང་གཉིས་ཀྱིས་ད་བར་དཔལ་འབྱོར་གྱི་མཐུན་རྐྱེན་སྦྱར་ཡོད་པ་རེད། ཡིད་ཕངས་པ་ཞིག་ལ། སྨན་པ་རྟའུ་བློ་བཟང་དཔལ་ལྡན་ལགས་ཕྱི་ལོ་ ༢༠༡༩ ཟླ་ ༢ ཚེས་ ༤ ཉིན་འཇར་མན་གྱི་བ་ཝེ་རི་ཡར་སྐུ་གཤེགས་ཡོད་པ་རེད།
སློབ་གྲྭ་འདི་ནི་མགོ་ལོག་རྟ་བོ་གྲོང་རྡལ་དུ་ཆགས་ཡོད་ཅིང་། སློབ་གྲྭས་ཕྱི་ལོ་ ༢༠༡༨ ལོར་སྤེལ་བའི་སྙན་ཐོ་ལྟར་ན། སློབ་གྲྭ་འདི་ནི་མགོ་ལོག་ཁུལ་ཡོངས་ཀྱི་དྭ་ཕྲུག་ཆེད་དུ་ལོ་དགུའི་སློབ་གསོ་སྤྲོད་མཁན་གྱི་སྤྱི་ཕན་སློབ་གྲྭ་གཅིག་པུ་དེ་ཡིན། མགོ་ལོག་ཁུལ་གྱི་ཏང་ཨུ་ཡོན་ལྷན་ཁང་དང་མི་དམངས་སྲིད་གཞུང་། ཁུལ་གྱི་སློབ་གསོ་ཅུས། དམངས་སྲིད་ཅུས་བཅས་ཀྱིས་ཆོག་མཆན་སྤྲད་ནས་བཙུགས་པ་དང་། རྗེས་སུ་རྨ་ཆེན་རྫོང་གི་སློབ་གསོ་ཅུས་ཀྱི་ཁོངས་སུ་ཚུད་ཡོད། ཕྱི་ལོ་ ༢༠༡༨ ལོར་སློབ་གྲྭར་སློབ་ཕྲུག་ ༢༨༠ དང་། སྔོན་འགྲོའི་འཛིན་གྲྭ་ནས་ལས་རིགས་འཛིན་གྲྭའི་བར་འཛིན་གྲྭ་ ༡༡། དགེ་རྒན་དང་ལས་བྱེད་ ༢༨ ཡོད་པ་དང་། “ཁྱིམ་ཚང་ཨ་མ” ༨ ཀྱིས་སློབ་ཕྲུག་རྣམས་ཀྱི་འཚོ་བར་བལྟ་སྐྱོང་བྱེད་ཀྱི་ཡོད། སློབ་གྲྭ་དེས་མགོ་ལོག་ཁུལ་ཡོངས་ཀྱི་དྭ་ཕྲུག་རྣམས་ནང་འཛུལ་བྱས་པ་མ་ཟད། ཕྱི་ལོ་ ༢༠༡༠ ལོར་ཡུལ་ཤུལ་ས་ཡོམ་རྗེས་ཡུལ་ཤུལ་གྱི་དྭ་ཕྲུག་ ༣༠ ལྷག་ཀྱང་སློབ་འཇུག་བྱས་ཡོད་འདུག། དེ་བཞིན་སློབ་གྲྭ་འགྲིམས་མ་མྱོང་བའི་ལོ་ན་ཆེ་བའི་དྭ་ཕྲུག་རྣམས་ལ་འཚེམ་བཟོ་དང་། ཐང་ཀ་བྲིས་འབུར། བོད་གདན་འཐག་སྟངས་བཅས་ཀྱི་ལག་ཤེས་སློབ་སྦྱོང་སྤྲད་ཡོད་འདུག
སློབ་ཕྲུག་བསྡུ་ལེན་བྱེད་སྟངས་ཐད་ནས་ལོ་རེར་དྭ་ཕྲུག་ ༣༠ ལས་མི་ཉུང་བ་སློབ་འཇུག་བྱེད་ཀྱི་ཡོད་ལ། དེར་ཕོ་མོ་དང་། ལོ་ཚོད་བཅས་ཀྱི་ཚད་འཛིན་མེད་པ་རེད་འདུག སློབ་ཕྲུག་རྣམས་ཀྱི་འཚོ་བ་དང་། སློབ་སྦྱོང་། སྨན་བཅོས་ཀྱི་འགྲོ་སོང་ཚང་མ་སློབ་གྲྭས་ངོས་ནས་ཐབས་འཚོལ་བྱས་ཡོད་འདུག དེ་བཞིན་རྟ་བྲག་ཐེབས་རྩའི་སློབ་ཡོན་གྱི་ཁར་མཚོ་སྔོན་ཞིང་ཆེན་གྱི་སློབ་ཡོན་རོགས་དངུལ་དང་། གྲང་ངར་ལ་གདོང་ལེན་གྱི་རོགས་དངུལ། རྨ་ཆེན་རྫོང་གི་དམངས་སྲིད་ཅུས་ཟེར་བའི་ “དྭ་ཕྲུག་འཚོ་བའི་རོགས་དངུལ” སོགས་ཐོབ་པ་མ་ཟད། གཏོང་ཕོད་ཅན་གྱི་རྒྱ་རིགས་སྦྱིན་བདག་ཀྱང་ཡོད་སྐོར་བཀོད་འདུག
སློབ་གྲྭ་འདིར་ས་གནས་གཞུང་གིས་བསྔགས་བརྗོད་བྱས་ཏེ། ཕྱི་ལོ་ ༢༠༠༨ ལོའི་མགོ་ལོག་ཁུལ་གྱི་སློབ་གསོའི་ལས་དོན་ཚོགས་འདུའི་ཐོག་སློབ་གྲྭ་འདི་དཔེ་མཚོན་ཅན་དུ་ངོས་འཛིན་ཞུས་པ་དང་། སློབ་གཙོ་ཐུབ་བསྟན་ཉི་མ་ལགས་ལ་ “ཕུལ་བྱུང་སློབ་གཙོ་” ཞེས་པའི་གཟེངས་རྟགས་སྤྲད་པ། ཕྱི་ལོ་ ༢༠༡༥ ལོར་སློབ་གྲྭ་འདིའི་སློབ་ཕྲུག་རྣམས་ཀྱིས་མཐོ་འབྲིང་ཚུད་རྒྱུགས་ནང་མགོ་ལོག་ཁུལ་ཡོངས་ནས་ཨང་དང་པོ་བླངས་ཡོད་པའི་གནས་ཚུལ་ཡང་འདུག
རྟ་བྲག་ལས་གཞིའི་དྲ་ཚིགས་ནང་བཀོད་པའི་གནས་ཚུལ་ལྟར་ན། ལས་གཞི་དེས་མགོ་ལོག་དང་ཁམས་རྟའུ་གཉིས་ཀྱི་དྭ་ཕྲུག་སློབ་གྲྭ་གཉིས་སུ་དྭ་ཕྲུག་ ༧༠༠ ལྷག་ལ་བལྟ་སྐྱོང་བྱས་ཡོད་འདུག སུད་སིའི་རྟ་བྲག་ཐེབས་རྩའི་དྲ་ཚིགས་སུ་བཀོད་པ་ལྟར་ན། ཕྱི་ལོ་ ༢༠༢༥ ཟླ་ ༧ པའི་མཇུག་ཏུ་མགོ་ལོག་རྟ་བྲག་དྭ་ཕྲུག་སློབ་གྲྭ་ཚུགས་ནས་མི་ལོ་ ༢༠ འཁོར་བའི་རྗེས་དྲན་དུས་ཆེན་རྒྱ་ཆེན་པོ་ཞིག་འཚོགས་ཡོད་འདུག་ལ། དེ་ནི་སློབ་གྲྭ་སྒོ་མ་བརྒྱབ་པའི་ལོ་གཅིག་ཙམ་གྱི་སྔོན་རེད།
སློབ་གྲྭ་གསུམ་གྱི་གནས་ཚུལ་ཐད་ནས་བལྟས་ན། གཅིག་ནས་སློབ་གྲྭ་གསུམ་པོ་མགོ་ལོག་ཁུལ་རྨ་ཆེན་རྫོང་དུ་ཡོད་པ་དང་། གཉིས་ནས་ཐོག་མར་སྒེར་བཙུགས་ཡིན་པ་དང་ཕྱིས་སུ་ས་གནས་སློབ་གསོ་ཅུས་ཀྱི་སྟངས་འཛིན་འོག་ཏུ་བཅུག་པ། གསུམ་ནས་སློབ་གྲྭ་གསུམ་པོས་བོད་མི་རིགས་སྐད་ཡིག་གཙོས་པའི་བརྡ་དག་རྟགས་གསུམ། སྙན་ངག སྲོལ་རྒྱུན་ལག་ཤེས་སོགས་ཀྱི་ཐད་ནུས་པ་ཐོན་ཡོད་པ་ཞིག་རེད། འོ་ན། ཉེ་བའི་ལོ་ཤས་རིང་མགོ་ལོག་ས་ཁུལ་གྱི་སྒེར་བཙུགས་སློབ་གྲྭ་རྣམས་གཅིག་རྗེས་གཉིས་མཐུད་ཀྱིས་སྒོ་བརྒྱབ་པའི་གནས་ཚུལ་འབྱུང་དོན་ག་རེ་རེད་དམ། རྒྱ་ནག་དབུས་གཞུང་གི་སྲིད་ཇུས་གཞིར་བཞག་ཐོག་སྒོ་རྒྱག་གི་ཡོད་རེད་དམ། ཡང་ན་ས་གནས་སྲིད་གཞུང་གིས་རང་ཐག་རང་གཅོད་བྱས་ཏེ་སྒོ་བརྒྱབ་པ་རེད། དྲི་བ་འདི་དག་ལ་ལན་ཏག་ཏག་ཡོད་མ་རེད། གནད་དོན་འདི་དང་འབྲེལ་ནས་རྒྱ་ནག་གི་སློབ་གསོའི་སྲིད་ཇུས་དང་ཁྲིམས་ལུགས་སོགས་ལ་རྒྱུས་མངའ་ཆེ་བའི་ཆེད་མཁས་པ་གཉིས་ཀྱི་བསམ་ཚུལ་ལེན་ཐབས་བྱས་ཀྱང་། ད་བར་ལན་འབྱོར་མ་བྱུང་བས། ལན་འབྱོར་བ་ཡིན་ན་ཁ་སྣོན་བྱ་ཡི་ཡིན།
བོད་ཀྱི་དུས་བབ་ཀྱིས།
