རྡོ་རྗེ་བཀྲ་ཤིས་ལགས་ཀྱི་ཁྲིམས་རྩོད་པར་གྱོད་དོན་བསྐྱར་ཞིབ་བྱེད་པའི་ཐོབ་ཐང་དགོས་པ་དང་རྡོ་རྗེ་བཀྲ་ཤིས་ལགས་སུ་དྲང་བདེན་མིན་པའི་ཁྲིམས་ཐག་བཅད་པར་བསྐྱར་ཞིབ་ཁྲིམས་ར་འཚོག་དགོས་པའི་ལས་འགུལ་སྤེལ་འདུག
ཟླ་འདིའི་ཕྱི་ཚེས་ ༢༦ ཉིན་བོད་ཀྱི་ཆབ་སྲིད་བཙོན་པ་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་ཀྱིས་ཡང་བསྐྱར་བོད་རང་སྐྱོང་ལྗོངས་ཟེར་བའི་ཆེས་མཐོའི་མི་དམངས་ཁྲིམས་ཁང་གི་མདུན་དུ་རྡོ་རྗེ་བཀྲ་ཤིས་ལགས་སུ་དྲང་བདེན་མིན་པའི་ཁྲིམས་ཐག་བཅད་པར་བསྐྱར་ཞིབ་དགོས་པའི་ཞི་རྒོལ་ལས་འགུལ་སྤེལ་འདུག
མགོན་པོ་སྐྱིད་ལགས་ཀྱིས་ལག་ཏུ་དོན་ཚན་གཉིས་ལྡན་པའི་ཞུ་ཡིག་ཅིག་བཟུང་བའི་ནང་། གཅིག་རྡོ་རྗེ་བཀྲ་ཤིས་ལགས་ཀྱི་ཁྲིམས་རྩོད་པར་རྡོ་རྗེ་བཀྲ་ཤིས་ལགས་ཀྱི་གྱོད་དོན་བསྐྱར་ཞིབ་བྱེད་དུ་འཇུག་དགོས། གཉིས་པ་ཁྲིམས་ཁང་གིས་རྡོ་རྗེ་བཀྲ་ཤིས་ལགས་སུ་དྲང་བདེན་མིན་པའི་ཁྲིམས་ཐག་བཅད་པར་བསྐྱར་ཞིབ་བྱེད་པའི་ཁྲིམས་ར་འཚོག་དགོས་ཞེས་གསལ་འདུག་པ་མ་ཟད། དོན་ཚན་གཉིས་ཀྱི་མཇུག་ཏུ་རྡོ་རྗེ་བཀྲ་ཤིས་ཉེས་མེད་ཡིན་ཞེས་བྲིས་འདུག
མགོན་པོ་སྐྱིད་ལགས་དང་ལྷན་དུ་བཟའ་ཟླ་ཆོས་སྐྱོང་ལགས་ཀྱང་འདུག་ལ། ཁོང་གིས། དོན་ཚན་འདི་གཉིས་རྒྱལ་ཁབ་ཀྱི་རྩ་ཁྲིམས་ནང་ལྟར་འགྲོ་དགོས་ཡོད་ཀྱང་རྒྱལ་ཁབ་ཀྱི་རྩ་ཁྲིམས་ནང་བཞིན་འགྲོ་ཡི་མི་འདུག འདི་ཁྲིམས་ཁང་གི་ཁྲིམས་ལུགས་རྒྱལ་ཁབ་ཀྱི་རྩ་ཁྲིམས་ནང་ལྟར་འགྲོ་ཡི་མེད་པ་རེད། དེ་ལས་ལྡོག་སྟེ་གཉོག་རྡུང་དང་འདྲུད་པ་སོགས་བྱས་ཏེ་མོའི་ལག་པ་བཅག་པ་དང་རུས་པར་གནོད་སྐྱོན་བཟོས་པ། ཁོག་ཏུ་ཁྲག་ནག་བླུག་པ་སོགས་བྱས་འདུག ཅེས་བརྗོད་འདུག
ཉེན་རྟོག་པ་ཞིག་གིས་ཆོས་སྐྱོང་ལགས་སུ་བརྙན་ཕབ་ལེན་བྱེད་མི་ཆོག་ཅེས་བརྗོད་པར་ཆོས་སྐྱོང་ལགས་ཀྱིས། བརྙན་ཕབ་ལེན་བྱེད་ཆོག་གི་རེད། ཁྲིམས་ལུགས་འདི་རྩ་ཁྲིམས་ནང་ལྟར་འགྲོ་ཡི་མི་འདུག གལ་སྲིད་རྩ་ཁྲིམས་ནང་བཞིན་སོང་བ་ཡིན་ན། ང་ཚོས་བརྙན་ཕབ་ལེན་བྱེད་དགོས་དོན་མེད། སྨན་ཁང་ནང་གི་སྨན་པ་ཚང་མ་ཉོས་འདུག འདིའི་མཐའ་སྐོར་གྱི་མི་ཚང་མ་རྗེས་འདེད་གཏོང་མཁན་རེད། གནས་ཚུལ་འདི་ཟླ་བཅུ་བའི་ཚེས་ཉེར་དྲུག་ཉིན་རེད། དེ་རིང་ཡང་འཛིན་བཟུང་བྱེད་པར་གྲ་སྒྲིག་གིས་ཉེན་རྟོག་རླངས་འཁོར་འདིར་བསྐོར་ནས་སླེབས་འདུག ཅེས་བརྗོད་འདུག
འདི་ལོའི་ཕྱི་ཟླ་ ༨ པའི་ཟླ་མགོར་མགོན་པོ་སྐྱིད་ལགས་ཀྱིས་བོད་རང་སྐྱོང་ལྗོངས་ཟེར་བའི་ཆེས་མཐོའི་མི་དམངས་ཁྲིམས་ཁང་གི་མདུན་དུ། ཁྲིམས་རྩོད་པ་ཝང་ཧྥེ་རྡོ་རྗེ་བཀྲ་ཤིས་ལགས་སུ་ཐུག་གི་མ་བཅུག་པར་ངོ་རྒོལ་ལས་འགུལ་སྤེལ་ཡོད་པ་དང་། སྐབས་དེར་ཁྲིམས་ཁང་གིས་ཝང་ཧྥེ་ཡིས་དེ་སྔོན་བཙོན་ཁང་དུ་རྡོ་རྗེ་བཀྲ་ཤིས་ལ་ཉེས་རྡུང་བཏང་བའི་གནས་ཚུལ་ནང་མིར་བཤད་སྟབས་ཐུག་འཕྲད་བཀག་སྡོད་བྱས་ཚུལ་བཤད་ཡོད།
ཕྱི་ཟླ་ ༨ ཚེས་ ༡༢ ཉིན་གནས་ཚུལ་གསར་བ་ཞིག་ནི་བོད་རང་སྐྱོང་ལྗོངས་མི་དམངས་ཁྲིམས་ཁང་ཟེར་བས། རྡོ་རྗེ་བཀྲ་ཤིས་ལགས་སུ་རང་གི་ཁྲིམས་རྩོད་པར་ཐུག་འཕྲད་བྱེད་དུ་འཇུག་གི་མེད་ཁར། ཁོང་གི་གཅེན་མོ་མགོན་པོ་དང་རྡོ་རྗེ་ཚེ་བརྟན་གཉིས་ལ་ཐུག་གི་མ་བཅུག་ནས་ལོ་ངོ་དྲུག་འགོར་ཡོད་པ་དང་། བཟའ་ཟླ་དང་ཕྲུ་གུར་མ་ཐུག་པར་ལོ་གཉིས་ཕྱིན་ཡོད་པ་གསལ་བོ་ཆགས་ཡོད།
ཡང་འདི་ལོའི་ཕྱི་ཟླ་ ༦ ཚེས་ ༧ ཉིན་མགོན་པོ་སྐྱིད་ལགས་ཀྱིས་ཆེས་མཐོའི་མི་དམངས་ཁྲིམས་ཁང་གི་མདུན་དུ་རྡོ་རྗེ་བཀྲ་ཤིས་ལགས་སུ་དྲང་བདེན་མིན་པའི་ཁྲིམས་ཐག་བཅད་པར་ངོ་རྒོལ་ཡོད་པའི་ལས་འགུལ་སྤེལ་ཞིང་། སྐབས་དེར་མོས་དཔོན་པོ་ཚོའི་མགོ་ཐོག་ན་ཁྲིམས་མི་འདུག དཀའ་ངལ་མང་ཚོགས་ཀྱིས་མྱང་དགོས་ཀྱི་འདུག དཔོན་པོ་ཚོའི་མགོ་ཐོག་ན་ཁྲིམས་ཡོད་ཚེ། མི་དཀར་པོའི་མགོར་ཞྭ་མོ་ནག་པོ་སྐོན་མཁན་གྱི་དཔོན་པོ་འདི་ཚོར་ཁྲིམས་ཀྱིས་ལས་དགོས་མོད། ཁྲིམས་དྲང་བདེན་གྱིས་སྐྱོང་གི་མི་འདུག དཔོན་པོ་ཚོས་རང་འགར་འདི་འདྲ་བའི་བྱ་བ་ལས་ནི་མ་རེད། སྒོར་མ་ཟས་པར་བརྟེན་རྒྱལ་ཁབ་ཀྱི་རྩ་ཁྲིམས་དང་མང་ཚོགས་རྩེད་སྤྱད་བྱས་ནས་བསྡད་ཡོད་ཅེས་བརྗོད་འདུག
རྡོ་རྗེ་བཀྲ་ཤིས་ལགས་ནི་ལྷ་སའི་གཡག་མགྲོན་ཁང་གི་སྦྱིན་བདག་ཡིན་ཞིང་། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོ་བྱུང་བའི་ཟླ་བ་འགའི་རྗེས་སུ་རྒྱ་ནག་གཞུང་གིས་ངོ་རྒོལ་བར་མཐུན་འགྱུར་བསྐྲུན་པ་དང་༧གོང་ས་རྒྱལ་བ་རིན་པོ་ཆེ་མཆོག་ལ་སྐྱབས་རྟེན་ཕུལ་ཡོད་ལུགས་སོགས་བརྗོད་དེ་འཛིན་བཟུང་བྱས་ནས་ཟླ་ ༨ ཙམ་རིང་གར་སོང་ཆ་མེད་དུ་གྱུར་ཡོད་པ་དང་། ཁོང་གི་ཕུ་བོ་རྡོ་རྗེ་ཚེ་བརྟན་ལགས་ཀྱང་འཛིན་བཟུང་བྱས་ནས་ལོ་གཉིས་ཙམ་རིང་བཀག་ཉར་བྱས་རྗེས། ཕྱི་ལོ་ ༢༠༡༠ ཟླ་ ༥ ཚེས་ ༡༧ ཉིན་ལྷ་ས་འབྲིང་རིམ་མི་མང་ཁྲིམས་ཁང་ཟེར་བ་དེས་ཁུངས་སྐྱེལ་ར་སྤྲོད་གང་ཡང་མེད་པར་གསང་བའི་ཐོག་ནས་རྒྱ་སྒོར་ཁྲི་ ༡༥༠ ཙམ་གྱི་དངུལ་བུན་གཡོ་ལེན་བྱས་ཚུལ་བརྗོད་དེ། རྡོ་རྗེ་བཀྲ་ཤིས་ལགས་ལ་ཚེ་བཙོན་དང་། ཁོང་གི་ཕུ་བོ་རྡོ་རྗེ་ཚེ་བརྟན་ལགས་ལ་ལོ་དྲུག་གི་ཁྲིམས་ཐག་བཅད་དེ། བོད་རང་སྐྱོང་ལྗོངས་ཟེར་བའི་བཙོན་ཁང་ཆེ་ཤོས་དང་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བ་ཟེར་བའི་ཉེས་མིང་ཕོག་པའི་བཙོན་པ་འཇུག་སའི་གྲྭ་བཞི་བཙོན་ཁང་དུ་བཅུག་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
