རྒྱ་ནག་གཞུང་ཚབ་ཁང་གིས་སྲིད་སྐྱོང་གི་སྐོར་སྐྱོད་ལ་ངོ་རྒོལ་བསྒྲགས་གཏམ་སྤེལ།

རྒྱ་ནག་གཞུང་ཚབ་ཁང་གིས་ནེ་རྡིར་ལན་ཌི་རྒྱལ་ཁབ་ཀྱི་ཕྱི་སྲིད་བློན་ཆེན་ལས་ཁུངས་ལ་ཤོག་ངོས་གསུམ་ཅན་གྱི་ངོ་རྒོལ་བསྒྲགས་གཏམ་ཞིག་སྤེལ་ནས་སྲིད་སྐྱོང་མཆོག་གི་ཕྱོགས་ཕེབས་ལ་ངོ་རྒོལ་དང་བོད་དོན་འཁྱོག་བཤད་བྱས།

ཟླ་འདིའི་ཕྱི་ཚེས་ ༡ ནས་ཕྱི་ཟླ་ ༡༢ ཚེས་ ༢༠ བར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་གྱི་རྒྱལ་ས་ལྡི་ལི་དང་། ཡུ་རོབ་ཀྱི་ནེ་རྡིར་ལན་ཌི་རྒྱལ་ཁབ་དང་། ཨ་རི། ཁེ་ན་ཌ། རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་སྦེལ་ཀོབ་གཞིས་ཆགས་སོགས་སུ་གཞུང་འབྲེལ་འཚམས་གཟིགས་གནང་གི་ཡོད་པ་ལྟར། ཟླ་འདིའི་ཕྱི་ཚེས་ ༣ ཉིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནེ་རྡིར་ལན་ཌི་རྒྱལ་ཁབ་ཕེབས་འབྱོར་བྱུང་ཡོད་སྟབས། རྒྱལ་ཁབ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་ནེ་རྡིར་ལན་ཌི་རྒྱལ་ཁབ་ཀྱི་ཕྱི་སྲིད་བློན་ཆེན་ལས་ཁུངས་ལ་ཤོག་ངོས་གསུམ་ཅན་གྱི་ངོ་རྒོལ་བསྒྲགས་གཏམ་ཞིག་སྤེལ་ནས། སྲིད་སྐྱོང་མཆོག་གི་ཕྱོགས་ཕེབས་ལ་ངོ་རྒོལ་བྱས་འདུག

རྒྱ་ནག་གཞུང་ཚབ་ཀྱི་ངོ་རྒོལ་ཡིག་ཆེ་དེའི་ནང་། བོད་ནི་གནའ་སྔ་མོ་ནས་བཟུང་རྒྱ་ནག་དང་ཁ་བྲལ་ཐབས་མེད་པའི་ཆ་ཤས་ཤིག་ཡིན་པ་དང་། རྒྱ་ནག་དབུས་གཞུང་གིས་དུས་ཡུན་རིང་པོར་བོད་མངའ་དབང་དུ་བསྡུས་ཡོད། ཕྱི་ལོ་ ༡༩༥༡ ལོར་ཞི་བའི་བཅིངས་འགྲོལ་བཏང་བ་དང་བསྟུན། བོད་ནང་དམངས་གཙོའི་བཅོས་སྒྱུར་བྱས་ཏེ་བོད་ཀྱི་ཞིང་བྲན་ལམ་ལུགས་མེད་པ་བཟོས་པ་དང་། ཞིང་བྲན་ས་ཡ་མང་པོ་བཅིངས་འགྲོལ་བཏང་སྟེ། བོད་ཀྱི་མི་རིགས་ཁག་གི་རྩ་བའི་ཁེ་ཕན་འགན་ལེན་བྱས་ཡོད། བོད་དང་འབྲེལ་བའི་གནད་དོན་ནི་རྒྱ་ནག་གི་ནང་སྲིད་ཁོ་ན་ཡིན། རྒྱ་ནག་གཞུང་དང་མི་དམངས་ཀྱིས་རྒྱལ་ཁབ་དང་ཚོགས་པ་གང་རུང་གིས་བོད་དོན་དང་འབྲེལ་བའི་གནད་དོན་ལ་བརྟེན་ནས། རྒྱ་ནག་གི་ནང་སྲིད་ལ་ཐེ་ཇུས་བྱེད་པར་བློ་སེམས་བརྟན་པོས་ངོ་རྒོལ་བྱེད་བཞིན་ཡོད། ཧོ་ལན་ཌི་ཚུད་པའི་འཛམ་གླིང་གི་རྒྱལ་ཁབ་ཁག་གིས་བོད་ནི་རྒྱ་ནག་གི་ཆ་ཤས་ཤིག་ཡིན་པར་ངོས་འཛིན་བྱེད་ཀྱི་ཡོད་པ་དང་། རྒྱལ་ཁབ་གཅིག་གིས་ཀྱང་བོད་རང་བཙན་ཟེར་བར་ངོས་འཛིན་བྱས་མྱོང་མེད། བོད་མིའི་སྒྲིག་འཛུགས་ཟེར་བ་ནི་བོད་རང་བཙན་འཐབ་རྩོད་བྱེད་པའི་ཁ་བྲལ་རིང་ལུགས་ཀྱི་ཆབ་སྲིད་ཚོགས་པ་ཞིག་ཡིན་ཞིང་། རྒྱ་ནག་གི་རྩ་ཁྲིམས་དང་ཁྲིམས་ལུགས་གཞན་ཡོངས་རྫོགས་དང་འགལ་བའི་སྒོ་ནས་ལས་དོན་སྤེལ་བཞིན་ཡོད་པས། རྒྱལ་ཁབ་གང་གིས་ཀྱང་ངོས་འཛིན་བྱས་མེད། ཅེས་གསལ་འདུག

ཡང་ཡིག་ཆ་དེའི་ནང་། ཕྱི་འབྲེལ་ལས་དོན་ཚོགས་ཆུང་གིས་རྒྱ་ནག་གི་མངའ་དབང་དང་རྒྱལ་ཁབ་ཀྱི་ཆིག་སྒྲིལ་ལ་བརྩི་བཀུར་ཆ་ཚང་གནང་སྟེ། “བོད་རང་བཙན་” ཤོག་ཁག་གིས་རྒྱ་ནག་ལ་ངོ་རྒོལ་གྱི་བྱེད་སྒོ་སྤེལ་སའི་སྡིངས་ཆ་མཁོ་སྤྲོད་བྱ་རྒྱུ་མཚམས་འཇོག་གནང་རྒྱུའི་རེ་བ་ཞུ་བཞིན་ཡོད། རྒྱ་ནག་དང་རྒྱ་ནག་གི་བོད་ཀྱི་དངོས་ཡོད་གནས་ཚུལ་དྲང་པོ་དང་། ཕྱོགས་ཡོངས་ནས་གསལ་པོ། འགལ་ཟླ་མེད་པ་བཅས་ཀྱི་གནས་ཚུལ་མཁོ་སྤྲོད་བྱ་ཆེད། རྒྱ་ནག་གཞུང་ཚབ་ཁང་གིས་གྲོས་ཚོགས་འོག་མའི་འཐུས་མི་ཡོངས་དང་མཉམ་དུ་བཟང་ཕྱོགས་ནས་གྲོས་མོལ་དང་བསམ་ཚུལ་བརྗེ་རེས་བྱེད་པར་གྲ་སྒྲིག་ཡོད། ཅེས་གསལ་འདུག

ཟླ་འདིའི་ཕྱི་ཚེས་ ༥ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་ནེ་རྡིར་ལན་ཌིའི་གྲོང་ཁྱེར་ཧེག་ (Hague) དུ་སྐོང་འཚོག་གནང་བའི་རྒྱ་ནག་ཐད་ཀྱི་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ (IPAC) ལོ་འཁོར་ལྷན་ཚོགས་ཐེངས་ ༦ པར་མཉམ་ཞུགས་གནང་ནས། གླིང་ཆེན་དྲུག་གི་རྒྱལ་ཁབ་ ༣༠ ཡི་གྲོས་ཚོགས་འཐུས་མི་ ༥༢ དང་ལྷན་རྒྱ་ནག་གཞུང་གིས་བཟོས་པའི་དཀའ་ངལ་དག་ལ་མཉམ་ལས་ཀྱི་གདོང་ལེན་བྱེད་ཕྱོགས་ཐད་གྲོས་བསྡུར་གནང་ཞིང་། བོད་ཀྱི་ས་ཁམས་ཀྱི་ཆགས་ཚུལ་དང་གནས་བབ། རྒྱ་ནག་གཞུང་གིས་མི་རིགས་མཉམ་བསྲེས་ཀྱི་སྲིད་བྱུས་ལས་བོད་ཀྱི་སྐད་དང་རིག་གཞུང་། ཆོས་ལུགས། ངོ་བོ་བཅས་གསོན་གནས་ལ་ཉེན་ཁ་བཟོ་བཞིན་པ་དང་། སྲིད་བྱུས་དེ་དག་གིས་རིག་གཞུང་རྩ་མེད་བཟོ་མུས་ཡིན་སྐོར་སོགས་གསལ་བཤད་གནང་འདུག

ཡང་སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། རྒྱ་ནག་གཞུང་གིས་དེང་སྐབས་འཛམ་གླིང་ས་ཕྱོགས་གང་སར་ལས་གཞི་འདྲ་མིན་སྤེལ་མུས་ཡིན་པ་དེ། རྒྱལ་མཚམས་ལས་བརྒལ་བའི་དམིགས་ཡུལ་ངེས་ཅན་ཞིག་བཟུང་ཡོད་པས། དེས་རྒྱལ་སྤྱིའི་སྤྱི་ཚོགས་ཀྱི་མང་གཙོ་དང་། བདེ་འཇགས། རང་དབང་། གོ་ལའི་སྒྲོམ་གཞི་བཅས་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་པའི་ཉེན་བརྡ་བཏང་བ་མ་ཟད། གྲོས་ཚོགས་འཐུས་མི་རྣམས་ནས་རྒྱ་ནག་གི་ལས་གཞི་དེ་དག་གི་དམིགས་ཡུལ་དང་མཇུག་འབྲས། དེ་བཞིན་རྒྱལ་སྤྱིའི་སྤྱི་ཚོགས་ལ་ཐེབས་པའི་ཤུགས་རྐྱེན་བཅས་ཀྱི་ཐོག་ཞིབ་འཇུག་བྱ་དགོས་པའི་འབོད་སྐུལ་གནང་བ་དང་སྦྲགས། བོད་མིའི་སྒྲིག་འཛུགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་བཞེད་བཞིན་གཉིས་སྨན་དབུ་མའི་ལམ་གྱི་སྲིད་བྱུས་ཐོག་ཤར་སྐྱོད་གནང་རྒྱུའི་ཆོད་སེམས་ཡོད་སྐོར་སོགས་གསུངས་འདུག

ཕྱི་ལོ་ ༢༠༢༥ ཚེས་ ༢ ནས་ ༤  བར་ཉིན་གྲངས་གསུམ་རིང་ཉི་ཧོང་གི་རྒྱལ་ས་ཊོག་ཡོ་རུ། བོད་མི་མང་སྤྱི་འཐུས་ལྷན་ཚོགས་དང་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པ་གཉིས་མཉམ་འབྲེལ་གྱི་གོ་སྒྲིག་འོག རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༩ པ་འཚོགས་ཡོད་པ་དང་། ཚོགས་འདུའི་སྟེང་འཛམ་གླིང་རྒྱལ་ཁབ་ ༢༩ ཀྱི་སྐུ་ཚབ་དང་གྲོས་ཚོགས་འཐུས་མི་ ༡༤༢ ཀྱིས་མཉམ་ཞུགས་གནང་སྐབས།  ཉི་ཧོང་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་བོད་མིའི་སྒྲིག་འཛུགས་ལ་སྐྱོན་བརྗོད་ཀྱི་བསྒྲགས་གཏམ་ཞིག་སྤེལ་ཡོད་པ་རེད།

ཕྱི་ལོ་ ༢༠༢༢ ཟླ་ ༡ ཚེས་ ༢༦ ཉིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྦལ་ཌིག་(Baltic States) རྒྱལ་ཁབ་གསུམ་དང་། ཧྥིན་ལེན་ཌི། དབྱིན་ཡུལ། བྷེལ་ཇམ་སོགས་སུ་གཞུང་འབྲེལ་སྐོར་སྐྱོད་གནང་སྐབས། ཨེ་སི་ཊོ་ནི་ཡར་ཡོད་པའི་རྒྱ་ནག་གཞུང་ཚབ་ཁང་གིས་བསྒྲགས་གཏམ་ཞིག་སྤེལ་ནས་ངོ་རྒོལ་བྱས་ཡོད་པ་སོགས། རྒྱ་ནག་གཞུང་གིས་རྒྱལ་མཚམས་ལས་བརྒལ་ནས་བཙན་བྱོལ་བོད་མིའི་མཛད་གཙོ་རྣམ་གྱི་ཕྱི་འབྲེལ་གྱི་ལྡ་དོན་ལ་བཀག་འགོག་དང་བར་ཆད་བཟོ་ཐབས་བྱེད་མུས་ཡིན་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།