རྒྱ་ནག་གི་མེ་ཤུགས་འཕུར་མདའི་ཆག་རོ་ཡིན་པར་དོགས་པའི་དངོས་པོ་ཞིག་བོད་ཀྱི་འབྲོག་སྡེའི་ཉེ་འཁོར་དུ་ལྷུང་།
ཕྱི་ཟླ་ ༡༡ ཚེས་ ༣ ཉིན། བོད་ཀྱི་འབྲོག་སྡེ་ཞིག་གི་སླས་འདབས་ཉེ་འཁོར་དུ་མེ་ཤུགས་འཕུར་མདའི་ཆག་རོ་ཡིན་པར་དོགས་པའི་དངོས་པོ་ཞིག་མཁའ་ནས་ལྷུང་བཞིན་པ་དང་། ལྷུང་ཟིན་པ། དེ་བཞིན་ལམ་འགྲམ་སོགས་སུ་ལྷུང་ཡོད་པའི་བརྙན་དྲ་ལམ་དུ་ཁྱབ་ཡོད་ཅིང་། དེ་ནི་ཉིན་དེའི་ཞོགས་པ་རྒྱ་ནག་གིས་འཕེན་གཏོང་བྱས་པའི་མེ་ཤུགས་འཕུར་མདའ་ཞིག་དང་འབྲེལ་བ་ཡོད་སྲིད་འདུག
ཉིན་དེར་དྲ་ལམ་དུ་བརྙན་དེ་དང་འདྲ་བ་མང་པོ་ཁྱབ་ཡོད་ཅིང་། བརྙན་ཞིག་གི་འོག་མཆན་ནང་མི་མང་པོས་ས་གནས་གང་ཡིན་དྲིས་པར། དཀར་མཛེས་སེར་ཤུལ་ནས་ཡིན་ཞེས་ལན་གཉིས་བཀོད་འདུག དེ་བཞིན་བརྙན་གཞན་པ་ཞིག་གི་འོག་མཆན་དུ་ས་ཆ་གང་ཡིན་སྐོར་གྱི་དྲི་བ་ཤིན་ཏུ་མང་པོ་བྱུང་བར། དྲི་བ་རེ་རེའི་ལན་དུ་སྟག་དགོན་རེད་ཅེས་དང་ཁྲོ་ཤུལ་འགབ་མ་རེད་ཅེས་པའི་ལན་བཏབ་ཡོད་འདུག ཡིན་ནའང་། བརྙན་དེའི་ས་གནས་དང་དུས་ཚོད་ད་བར་རྩད་གཅོད་བྱེད་ཐུབ་མེད། བརྙན་ནང་དངོས་པོ་དེ་འབྲོག་སྡེའི་སླས་འདབས་དང་ཁ་ཐག་ཅུང་མི་རིང་སར་ལྷུང་ཡོད་པ་མཐོང་རྒྱུ་ཡོད་པས། གལ་ཏེ་མི་དང་སྒོ་ཕྱུགས་ཀྱི་སྒང་ལ་ཟགས་ཡོད་ན་སྲོག་གི་ཉེན་ཁའང་ཡོད་ཁོ་ཐག་རེད།
ཉིན་དེའི་ཞོགས་པ་པེ་ཅིན་གྱི་ཆུ་ཚོད་ ༨།༡༥ ཐོག རྒྱ་གཞུང་གིས་བྱང་ནུབ་ཏུ་ཡོད་པའི་ཏུང་ཧྤེང་མཁའ་དབྱིངས་ཚོང་དོན་གསར་གཏོད་ཚོད་ལྟ་ཁུལ་ནས་ལི་ཅིན་ཨང་ ༢ པའི་ 2Y2 ཞེས་པའི་སྐྱེལ་འདྲེན་མེ་ཤུགས་འཕུར་མདའ་འཕེན་གཏོང་བྱས་ཏེ། ཆན་ཧྥན་སྐར་ཚོམ་གྱི་ཕྱོགས་མཐའི་རྒྱུ་ལམ་སྡེ་ཚན་ ༢༡ པའི་འཕྲིན་གཏོང་འཁོར་སྐར་ ༡༨ གཏན་འབེབས་བྱས་པའི་རྒྱུ་ལམ་དུ་བསྐྱལ་འདུག མེ་ཤུགས་འཕུར་མདའི་རིམ་པ་དང་པོ་སོགས་ནི་ནམ་རྒྱུན་འཕེན་གཏོང་བྱས་རྗེས་སྐར་མ་འགའ་ཤས་ནང་ས་ལ་ལྷུང་གི་ཡོད་པས། བརྙན་དེ་ཉིན་མོར་བླངས་པ་ནི་དུས་ཚོད་ཐོག་མཐུན་གྱི་འདུག
ཚོད་ལྟ་ཁུལ་དེ་ནས་སེར་ཤུལ་རྫོང་བར་ལྷོ་ཕྱོགས་སུ་དྲང་ཐིག་བར་ཐག་སྤྱི་ལེ་ ༩༢༧ ཙམ་ཡོད་ཅིང་། རླངས་འཁོར་དུ་ཆུ་ཚོད་ ༢༤ ལྷག་ཙམ་དགོས་པ་དང་རླངས་འཁོར་ལམ་ཐིག་ཏུ་སྤྱི་ལེ་ ༡༦༠༠ ནས་ ༡༨༠༠ བར་ཡོད་འདུག ས་ཁུལ་དེ་ནས་ཕྱོགས་མཐའི་རྒྱུ་ལམ་དུ་འཕེན་པའི་མེ་ཤུགས་འཕུར་མདའ་རྣམས་ནམ་རྒྱུན་ལྷོ་ཕྱོགས་སུ་འཕུར་གྱི་ཡོད། ཡིན་ནའང་། ཆག་རོ་དེ་མེ་ཤུགས་འཕུར་མདའ་དེ་ལས་ཆད་པ་ཡིན་མིན་ད་བར་ཐག་ཆོད་གསལ་པོ་མི་འདུག རྒྱ་གཞུང་གིས་འཕེན་གཏོང་སྔོན་དུ་ཆག་རོ་ལྷུང་ཡུལ་གྱི་བརྡ་ཁྱབ་སྤེལ་སྲོལ་ཡོད་ཀྱང་། ས་ཁུལ་དེ་བརྡ་ཁྱབ་ནང་ཚུད་ཡོད་མེད་དང་། ས་གནས་ཀྱི་འབྲོག་པ་ཚོར་སྔོན་བརྡ་བཏང་ཡོད་མེད་ད་བར་གསལ་པོ་མི་འདུག
ཟླ་བ་སྔོན་མར་གཏོང་ཐེངས་གཞན་ཁ་ཤས་ཀྱང་བྱུང་ཡོད་འདུག ཕྱི་ཟླ་ ༡༠ ཚེས་ ༡༤ ཉིན་ཨ་རིའི་མི་ནི་སོ་ཊ་མངའ་སྡེའི་ཞིང་པ་ཞིག་གིས་རང་གི་ཞིང་ཁའི་ནང་ཞེང་ཚད་མི་ཊར་ ༣།༣༥ ཙམ་ཡོད་པའི་ལྕགས་རིགས་དངོས་པོ་ཞིག་རྙེད་ཡོད་ཅིང་། དེ་ནི་ཕྱི་ཟླ་ ༩ ཚེས་ ༡༥ ཉིན་ཏུང་ཧྤེང་ཚོད་ལྟ་ཁུལ་དེ་ཉིད་ནས་ཆན་ཧྥན་འཁོར་སྐར་བསྐྱལ་བའི་ཀྲུའུ་ཆེ་ཨང་ ༢E མེ་ཤུགས་འཕུར་མདའི་རིམ་པ་གོང་མའི་ཆ་ཤས་ཡིན་སྲིད་པར་དོགས་པ་བྱས་ཡོད། ཡིན་ནའང་དེ་ད་བར་གཞུང་འབྲེལ་ཐོག་ནས་ངོས་འཛིན་བྱས་མེད།
མཁའ་དབྱིངས་ལས་ཁུངས་ཁག་གིས་མེ་ཤུགས་འཕུར་མདའི་ཆག་རོ་ལ་སྣུམ་རྫས་ཀྱི་དུག་ལྷག་ཡོད་སྲིད་པས། དེ་དག་ལ་ལག་པ་མི་འཆང་བ་དང་། ཉེ་འགྲམ་དུ་མི་འགྲོ་བ། ས་གནས་ཀྱི་འབྲེལ་ཡོད་དཔོན་རིགས་ལ་བརྡ་ལན་སྤྲོད་དགོས་པའི་ལམ་སྟོན་བྱེད་ཀྱི་ཡོད།
ཆན་ཧྥན་སྐར་ཚོམ་ནི་ཕྱི་ལོ་ ༢༠༡༨ ལོར་བཙུགས་པའི་ཧྲང་ཧའེ་ཡོན་ཞིན་ཚོང་ལས་ཁང་གིས་གསར་སྐྲུན་སྐྲུན་བྱེད་བཞིན་པའི་རྒྱུ་ལམ་དམའ་བའི་དྲ་རྒྱའི་སྐར་ཚོམ་ཞིག་ཡིན་ཞིང་། ཕྱི་ལོ་ ༢༠༢༤ ཟླ་ ༨ པར་དྲ་རྒྱའི་འཁོར་སྐར་ཁག་དང་པོ་ ༡༨ འཕེན་གཏོང་བྱས་ཡོད། ཕྱི་ལོ་ ༢༠༣༠ ལོ་མཇུག་བར་འཁོར་སྐར་ཁྲི་ ༡༥ ལྷག་འཕེན་ནས་འཛམ་གླིང་ཡོངས་ལ་དྲ་རྒྱ་མཁོ་འདོན་བྱ་རྒྱུའི་འཆར་གཞི་ཡོད་ཅིང་། རྒྱ་གཞུང་གིས་འཕྲིན་གཏོང་ལས་རིགས་ཀྱི་ཁྱབ་ཁོངས་ནས་རང་ཚུགས་དང་རང་ཁ་རང་གསོ་བྱེད་ཆེད་ཡིན་ཞེས་བཤད་ཀྱི་ཡོད།
ཟླ་འདིའི་ཟླ་མགོ་ནས་རྒྱ་གཞུང་གིས་ཉིན་བདུན་ནང་མེ་ཤུགས་འཕུར་མདའ་ཐེངས་ ༤ འཕེན་གཏོང་བྱས་ཡོད། ཕྱི་ཚེས་ ༥ ཉིན་ཞི་ཁྲང་འཁོར་སྐར་འཕེན་གཏོང་ལྟེ་གནས་ནས་ཁྲང་ཀྲང་ཨང་ ༢C མེ་ཤུགས་འཕུར་མདའ་ཡིས་ཡའོ་གན་ཨང་ ༥༡ པའི་འཁོར་སྐར་ ༣ བཏང་ཡོད་ཅིང་། རྒྱ་གཞུང་གིས་དེ་དག་བར་སྣང་ཁོར་ཡུག་ཞིབ་འཇུག་ཆེད་ཡིན་ཞེས་བཤད་ཀྱང་། ཕྱི་རྒྱལ་གྱི་ཆེད་མཁས་པ་ཚོས་ཡའོ་གན་འཁོར་སྐར་རྣམས་དམག་དོན་ལྟ་ཞིབ་ཀྱི་འཁོར་སྐར་ཡིན་པར་ངོས་འཛིན་བྱེད་ཀྱི་ཡོད། ཕྱི་ཚེས་ ༧ ཉིན་ཅིའུ་ཆན་འཁོར་སྐར་འཕེན་གཏོང་ལྟེ་གནས་ནས་གོ་ཧྲིན་ཨང་ ༢ པའི་མེ་ཤུགས་འཕུར་མདའ་ཡིས་ཚོད་ལྟ་དང་ཞིབ་འཇུག་གི་འཁོར་སྐར་ ༤ དང་། ཕྱི་ཚེས་ ༩ ཉིན་ཧའེ་ནན་མཁའ་དབྱིངས་ཚོང་དོན་འཕེན་གཏོང་ས་ནས་ཁྲང་ཀྲང་ཨང་ ༡༢ པའི་མེ་ཤུགས་འཕུར་མདའ་ཡིས་རྒྱུ་ལམ་དམའ་བའི་དྲ་རྒྱའི་འཁོར་སྐར་སྡེ་ཚན་ ༢༩ པ་བཏང་འདུག ཕྱི་ཚེས་ ༩ ཉིན་བར་རྒྱ་གཞུང་གིས་ད་ལོ་ཁྱོན་མེ་ཤུགས་འཕུར་མདའ་ཐེངས་ ༨༠ འཕེན་གཏོང་བྱས་ཡོད་འདུག
བོད་ཀྱི་དུས་བབ་གསར་ཁང་གིས་སྤེལ།
