སྙན་ཐོ་གསར་པ་ཞིག་ལྟར་ན། རྒྱ་ནག་དང་འབྲེལ་བའི་ཚོགས་པ་ཁག་གིས་རྒྱལ་ཁབ་ ༩༡ ཙམ་གྱི་ནང་ཕྱི་སྡོད་རྒྱ་མི་རྣམས་ལ་མི་རེ་ངོ་རེ་བཞིན་ལྟ་ཞིབ་དང་དམ་དྲག་བྱེད་བཞིན་འདུག

དེ་རིང་ཕྱི་ཚེས་ ༡༧ ཉིན་ཨེ་ཕོག་དུས་བབ་ (The Epoch Times) ཀྱིས་སྤེལ་བའི་གསར་འགྱུར་ལྟར་ན། སི་པེན་ (Spain) དུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་གི་ཚོགས་པ་སྲུང་སྐྱོབ་བྱེད་མཁན་ (Safeguard Defenders) གྱིས་ཕྱི་ཟླ་ ༡༠ ཚེས་ ༢༧ ཉིན་ “དྲག་གནོན་གྱི་ཐབས་ལམ། རྒྱ་ནག་གི་འཛམ་གླིང་ཡོངས་ཁྱབ་ཀྱི་སྤྱི་ཚོགས་ཚོད་འཛིན་དྲ་རྒྱ” (A Formula for Repression: China’s Global Grid for Community Control) ཞེས་པའི་སྙན་ཐོ་ཞིག་སྤེལ་འདུག སྙན་ཐོ་དེ་ལྟར་ན། འཛམ་གླིང་ཡོངས་སུ་རྒྱ་ནག་དང་འབྲེལ་བའི་འབྲེལ་མཐུད་ས་ཚིགས་ ༡༢༤༧ ཡོད་པ་དང་། ས་ཚིགས་དེ་དག་དང་འབྲེལ་བའི་ཚོགས་པ་ཁག་རྒྱལ་ཁབ་ ༩༡ ལས་མི་ཉུང་བའི་ནང་ཡོད་ལ། ཁ་ན་ཌའི་ནང་ས་ཚིགས་ ༡༠ ལྷག་ཡོད་འདུག
སྙན་ཐོའི་ནང་གསལ་བའི་དཔེ་མཚོན་ཞིག་ལ། ཝུའུ་ཞི་ཕྱི་སྡོད་རྒྱ་རིགས་མཐུན་ཚོགས་ (Wuxi Overseas Chinese Federation) ཀྱིས་ཕྱི་ལོ་ ༢༠༢༢ ལོར་བསྒྲགས་པ་ལྟར། ཁ་ན་ཌའི་ཝན་ཁུ་ཝར་ (Vancouver) དུ་སློབ་སྦྱོང་བྱེད་བཞིན་པའི་རྒྱ་ནག་སློབ་མ་ཞིག་ཕ་མ་དང་མ་མཐུན་པ་བྱུང་སྟེ་བདུན་ཕྲག་གཅིག་རིང་ཁོང་ཚོར་འབྲེལ་བ་མ་བྱས་པས། རྒྱ་ནག་ཉེན་རྟོག་དང་འབྲེལ་བ་ཡོད་པའི་ཚོགས་པ་ཞིག་གི་ས་གནས་ལས་བྱེད་པ་ཞིག་གིས་སློབ་མ་དེར་འབྲེལ་བ་བྱས་ཏེ། ཁོ་ལ་ “བསམ་བློའི་ལས་དོན་” བྱེད་དགོས་ཞེས་བླང་བྱ་བཏོན་འདུག
ཝུའུ་ཞི་ཕྱི་སྡོད་རྒྱ་མིའི་མཐུན་ཚོགས་ཀྱིས་འཛམ་གླིང་ཡོངས་ཀྱི་གྲོང་ཁྱེར་ ༡༥༠ ལྷག་ཙམ་དུ་ “ཕ་ཡུལ་རོགས་རམ་” གྱི་ས་ཚིགས་བཙུགས་ཡོད་པ་དང་། འབྲེལ་མཐུད་པ་ ༣༠༠ ལྷག་ཡོད། རྒྱ་ནག་དམར་ཤོག་ཚོགས་པས་ཕྱི་རྒྱལ་གྱི་རྒྱ་མིའི་མཐུན་ཚོགས་རྣམས་ཕྱི་སྡོད་རྒྱ་མི་དང་འབྲེལ་བའི་ཟམ་པ་ཡིན་ཞེས་བརྗོད་ཀྱི་ཡོད་ཀྱང་། སྲུང་སྐྱོབ་བྱེད་མཁན་ (Safeguard Defenders) གྱིས་ཚོགས་པ་དེ་དག་ནི་རྒྱ་ནག་དམར་ཤོག་ཚོགས་པས་ཕྱི་རྒྱལ་དུ་ཤུགས་རྐྱེན་དང་ཚོད་འཛིན་རྒྱ་བསྐྱེད་གཏོང་བའི་བརྒྱུད་ལམ་དུ་གྱུར་ཡོད་ཅེས་བརྗོད་འདུག
སྙན་ཐོའི་ནང་དཔེ་མཚོན་གཞན་ཞིག་ཀྱང་གསལ་འདུག ཨི་ཊ་ལི་ (Italy) དུ་བཙན་བྱོལ་དུ་གནས་པའི་རྒྱ་མིའི་ལས་འགུལ་བ་ལི་ཡིང་ (Li Ying) ནི་ X སྟེང་ “ལི་དགེ་རྒན་ནི་ཁྱེད་ཀྱི་དགེ་རྒན་མིན་” (Teacher Li Is Not Your Teacher) ཞེས་པའི་སྤྱི་ཚོགས་དྲ་ལམ་གྱི་དྲ་བདག་ཡིན་ལ། ཕྱི་ལོ་ ༢༠༢༢ ལོའི་ “ཤོག་དཀར་” (White Paper) ངོ་རྒོལ་སྐབས་ཞིབ་བཤེར་མ་བྱས་པའི་གནས་ཚུལ་གྱི་ཡོང་ཁུངས་གལ་ཆེན་ཞིག་ཡིན། རྒྱ་ནག་གི་བདེ་འཇགས་ལས་བྱེད་ཚོས་ཨན་ཧུའེ་ (Anhui) ཞིང་ཆེན་དུ་ཡོད་པའི་ཁོའི་ཕ་མའི་ཁྱིམ་དུ་བདུན་ཕྲག་ཁ་ཤས་རིང་ཉིན་རེ་བཞིན་ཕྱིན་ཏེ། ཁ་བྱང་དེ་བསུབ་པ་དང་རྒྱ་ནག་ཏུ་ལོག་དགོས་པའི་བླང་བྱ་བཏོན་པ་དང་། ཕ་མའི་རྒན་ཕོགས་བཅད་རྒྱུའི་འཇིགས་སྐུལ་བྱས་ཏེ་ཁྱིམ་གྱི་ཕྱི་ལོགས་སུ་ལྟ་ཞིབ་པར་ཆས་བཙུགས་འདུག ལི་ཡིང་ལ་ཉེན་རྟོག་དང་རྒྱལ་ཁབ་བདེ་འཇགས་ལས་བྱེད་ཀྱི་ཚན་ཆུང་ཆེད་མངགས་བཙུགས་ཏེ་ཨི་ཊ་ལི་ནས་འཛིན་བཟུང་གིས་རྒྱ་ནག་ཏུ་ཁྲིད་ཐུབ་ཅེས་བརྡ་ལན་བྱས་འདུག ཕྱི་ཟླ་ ༣ པར་ཨི་ཊ་ལི་གཞུང་གིས་ཁོ་ལ་ལྟ་ཞིབ་དང་སུན་གཙེར་བྱས་པའི་དོགས་པ་ཡོད་པའི་རྒྱ་ནག་མི་སེར་ ༨ ཕྱིར་བསྐྲད་བྱས་ཡོད།
སྙན་ཐོ་ལྟར་ན། རྒྱ་གཞུང་གི་ཆབ་སྲིད་སློབ་གསོའི་དམིགས་ཡུལ་ནི་ “ཡང་དག་པའི་”འཇིག་རྟེན་ལྟ་བ་དང་། མི་ཚེའི་ལྟ་བ། རིན་ཐང་ལྟ་བ་བཙུགས་རྒྱུ་ཡིན། རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་བསམ་བློའི་ལས་དོན་ནི་རྒྱ་ནག་དམར་ཤོག་ཚོགས་པའི་ “ཤིན་ཏུ་གལ་ཆེ་བའི་” ལས་འགན་ཞིག་ཡིན་ཞེས་ངོས་འཛིན་བྱེད་ཀྱི་ཡོད་ལ། ཕྱི་ལོ་ ༢༠༡༣ ལོར་དྲིལ་བསྒྲགས་དང་བསམ་བློའི་ལས་དོན་ཚོགས་འདུའི་ཐོག་བསམ་བློའི་ལས་དོན་ལེགས་པར་འགྲུབ་མིན་ནི་ཏང་གི་མ་འོངས་ལས་དབང་ལ་ཐད་ཀར་འབྲེལ་བ་ཡོད་ཅེས་བཤད་འདུག
རྒྱ་གཞུང་གིས་རྒྱལ་ཁབ་ནང་དུའང་ཚོད་འཛིན་ཇེ་དམ་དུ་གཏོང་བཞིན་ཡོད། རྒྱ་ནག་གི་རྒྱལ་སྲིད་སྤྱི་ཁྱབ་ཁང་གིས་ཕྱི་ཟླ་ ༧ ཚེས་ ༢༢ ཉིན་རྒྱལ་ཁབ་ནང་འཛུལ་ཐོན་དོ་དམ་གྱི་དོན་ཚན་ ༡༩ ཅན་གྱི་སྒྲིག་གཞི་ (Regulations on Exit-Entry Administration) ཁྱབ་བསྒྲགས་བྱས་ཤིང་། ཕྱི་ཟླ་ ༩ ཚེས་ ༡༥ ནས་ལག་བསྟར་བྱས་ཡོད། འགྲོ་བ་མིའི་ཐོབ་ཐང་ལྟ་ཞིབ་ཚོགས་པས། སྒྲིག་གཞི་དེས་མགོ་འཛིན་ལས་ཁུངས་ལ་མི་སེར་རྣམས་རྒྱལ་ཁབ་ནས་ཕྱིར་ཐོན་པར་རང་འདོད་ལྟར་བཀག་འགོག་བྱེད་པའི་དབང་ཆ་རྒྱ་བསྐྱེད་ཡོད་པས། རྒྱལ་སྤྱིའི་ཁྲིམས་ཀྱིས་སྲུང་སྐྱོབ་ཐོབ་ཆེད་རྒྱ་ནག་ནས་ཕྱིར་ཐོན་པའི་ཐོབ་ཐང་ལ་གནོད་ཡོད་ཅེས་བརྗོད་འདུག
བོད་མི་ཚོར་ཡང་རྒྱལ་མཚམས་བརྒལ་བའི་དྲག་གནོན་གྱི་ཤུགས་རྐྱེན་ཐེབས་བཞིན་ཡོད། བོད་ནང་གི་བཅའ་སྡོད་སློབ་གྲྭའི་དངོས་ཡོད་གནས་ཚུལ་རྒྱལ་སྤྱིའི་སྤྱི་ཚོགས་ཐོག་ཁྱབ་བསྒྲགས་བྱེད་མཁན་སྤྱི་ཚོགས་རིག་པའི་མཁས་དབང་འབུམ་རམས་པ་རྒྱལ་ལོ་ལགས་ཀྱི་ཁ་ན་ཌའི་ཁྱིམ་དུ་ཕྱི་ཟླ་ ༩ ཚེས་ ༢༣ ཉིན་རྒྱ་ནག་གི་ཁྲིམས་ཁང་ཞིག་ནས་ཁོང་ལ་དངུལ་ཆད་འབོར་ཆེན་ཞིག་འཇལ་དགོས་པའི་ཁྲིམས་གཏུག་ཡི་གེ་འབྱོར་ཡོད། དེ་ནི་རྒྱ་གཞུང་གིས་རང་གི་ཁྲིམས་ལུགས་རྒྱལ་མཚམས་ལས་བརྒལ་ཏེ་བེད་སྤྱོད་བྱེད་བཞིན་པའི་དཔེ་མཚོན་ཞིག་རེད།
བོད་ཀྱི་དུས་བབ་གསར་ཁང་གིས་སྤེལ།