བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཀྲང་ཆིན་ལིས་དམར་ཤོག་ཚོགས་པའི་ལས་བྱེད་ཚོར་གསང་བའི་གཏམ་བཤད་སྤེལ་བའི་ཡིག་ཆ་ལྟར་ན། ཨོ་ལིམ་པིག་རྩེད་འགྲན་དང་རྒྱལ་སྤྱིའི་དོ་སྣང་ལ་མ་ལྟོས་པར་རྒྱ་ནག་གིས་བོད་ནང་དུ་དྲག་རྡུང་གི་ལས་འགུལ་སྤེལ་འཆར་ཡོད་འདུག
ཕྱི་ཚེས་ ༡༣ ཉིན་ཧོང་ཀོང་ན་ཡོད་པའི་གཟའ་ཉི་མའི་དུས་བབ་ཅེས་པས་གནས་ཚུལ་སྤེལ་བ་ལྟར་ན། ཀྲང་ཆིན་ལིས་བོད་རང་སྐྱོང་ལྗོངས་ཀྱི་དམར་ཤོག་ལས་བྱེད་ཚོར་བསམ་བློའི་སློབ་གསོ་སྐོར་གྱི་ལས་འགུལ་སྐོར་ལ་སྐྱ་ཐིག་ཕབ་ནས་བརྗོད་ཡོད་པ་དང་། ཁོའི་གསང་བའི་གཏམ་བཤད་དེ་དག་རྒྱ་ནག་གི་གསར་ལམ་ཁག་ལའང་གསང་རྒྱ་བྱས་ཤིང་། དམར་ཤོག་ཚན་པའི་ནང་ཁུལ་ཁོ་ནར་འགྲེམ་སྤེལ་བྱེད་ཀྱིན་པའི་བོད་ཀྱི་གསར་འཕྲིན་ཅེས་པ་དེའི་ཕྱི་ཟླ་ ༤ དང་ ༥ པའི་འདོན་ཐེངས་སྟེང་བཀོད་ཡོད་འདུག ཀྲང་ཅིན་ལི་ཡི་གཏམ་བཤད་ཀྱི་ཚིག་དོན་དབྱིན་བསྒྱུར་མ་ཞིག་ཧོང་ཀོང་ན་ཡོད་པའི་གཟའ་ཉི་མའི་དུས་བབ་ཅེས་པའི་གསར་འགོད་པར་རག་ཡོད་འདུག
ཀྲང་ཅིན་ལིས་ནང་ཁུལ་གཏམ་བཤད་ཀྱི་སྐབས་ངོས་ལེན་བྱས་དོན། ལྷ་སར་ཡོད་པའི་རྒྱ་གཞུང་གི་ལས་བྱེད་ཚོས་ཕྱོགས་ཡོངས་ཀྱི་ངོ་རྒོལ་རིམ་པ་ཞིག་ལ་གདོང་ལེན་བྱེད་དགོས་པར་འཁེལ་ཞིང་། ཟླ་གསུམ་པའི་རྒྱ་རྒོལ་ངོ་ལོག་དེས་སྤྱི་ཚོགས་ཀྱི་བདེ་འཇགས་གཏོར་བརླག་བྱས་ཡོད་ལ། འདིའི་མཐའ་མཇུག་གི་རྒྱལ་ཁ་ལ་ད་དུང་ཧ་ཅང་ཐག་རིང་སྐོར་ཉེན་བརྡ་བཏང་ཡོད་པ་རེད།
ཡིག་ཆ་དེ་དག་གི་ནང་བཤད་དོན། གསུམ་པའི་བཅུ་བཞིའི་ངོ་རྒོལ་སྐབས། རྒྱ་ནག་གི་དམག་མི་དང་ཉེན་རྟོག་པ་ ༢༤༢ བསད་པ་དང་རྨས་ཡོད་ཟེར་ལ། ཡིན་ནའང་གྲངས་ཀ་ངེས་ཅན་གྱི་སྒོ་ནས་བཤད་མེད། དེ་བཞིན་ཁྱིམ་ཚང་ ༡༢༠ དང་ཚོང་ཁང་ ༩༠༨ གཏོར་སྐྱོན་བཏང་ཡོད་ཚུལ་བཀོད་ཡོད་འདུག ཡིན་ནའང་བོད་མིའི་ཕྱོགས་སུ་ཆག་སྒོ་ཅི་ཙམ་ཞིག་བྱུང་ཡོད་མེད་སྐོར་བཤད་མི་འདུག
ཀྲང་ཆིན་ལིས་མའོ་སྐབས་ཀྱི་བྱེད་ཐབས་ཤིག་འཁྱེད་ཡོང་ནས་ལས་འགུལ་གྱི་སྐྱ་ཐིག་ཕབ་པ་ནི། དགོན་སྡེ་ཁག་ལ་སྟངས་འཛིན་བྱེད་མཁན་གྱི་ ༼འཛིན་སྐྱོང་ཚོགས་ཆུང་༽ཞིག་དང་། གྲོང་ཁྱེར་ནང་ལྟ་རྟོག་དང་དྲག་ཆས་ཉེན་རྟོག་པར་རོགས་འདེགས་བྱེད་མཁན་༼སྲང་ལམ་ཚོགས་ཆུང་༽ ཞེས་པ་ཞིག་བཙུགས་ཡོད་འདུག
རྒྱ་ནག་གཞུང་གིས་༧གོང་ས་མཆོག་གི་སྐུ་ཚབ་མཉམ་དུ་སྐད་ཆ་བཤད་ཀྱིན་རྒྱལ་སྤྱིའི་སྟེང་ཞི་མོལ་གྱི་རྣམ་པ་ཞིག་བསྟན་ཡོད་ནའང་། ཀྲང་ཆིན་ལིའི་སྐད་ཆ་དག་གིས་བོད་རྒྱའི་བར་གྱི་སྐད་ཆ་འདི་དག་ནི་རྒྱ་ནག་གིས་དོན་དངོས་ཐོག་བོད་ནང་བཟུང་བའི་སྲིད་བྱུས་ཀྱི་གདོང་རིས་འགེབས་ཐབས་བྱས་ཡོད་འདུག སྐབས་དེ་དག་གི་ཁོའི་སྐད་ཆ་དག་ནི་དྲང་གཏམ་དུ་སྣང་ཞིང་། དེས་བསྟན་པ་ནི་རྒྱ་ནག་གིས་བོད་ལ་བདམས་པའི་སྲིད་བྱུས་ནི་སྔོན་མའི་མར་ཁེ་སི་ལེ་ཉིན་རིང་ལུགས་ཀྱི་དྲིལ་བསྒྲགས་དང་དམག་དཔུང་གིས་རྒྱབ་རྩ་བྱས་པའི་བསམ་བློའི་སློབ་གསོ་སྤེལ་རྒྱུ་དེ་རེད།
ཀྲང་ཆིན་ལིས་གཏམ་བཤད་གཅིག་གི་ནང་བཤད་དོན། གསུམ་པའི་ ༡༤ དོན་རྐྱེན་གྱིས་སྤྱི་ཚོགས་ཀྱི་བདེ་འཇགས་ཡོངས་སུ་གཏོར་ཡོད་ལ། དེའི་རྗེས་ནས་བཟུང་མི་རྣམས་ཞེད་སྣང་གིས་ཁེངས་འདུག ཐ་ན་ཁོང་ཚོ་དགོན་པར་ཕྱིན་ནས་སྨོན་ལམ་འདེབས་པ་དང་མ་ཎི་འཁོར་ལོ་བསྐོར་བ་སོགས་ཀྱང་མཚམས་བཞག་འདུག འདིས་ང་ཚོར་བཤད་པ་ནི། ཏཱ་ལའི་བླ་མ་ནི་ནང་བསྟན་ཆོས་ལུགས་ཀྱི་ཉེས་ཅན་པ་ངོ་མ་དེ་རེད་ཟེར།
ཀྲང་གིས་ནམ་རྒྱུན་གྱི་གཏམ་བཤད་ནང་དུ། ལྷ་ས་ཁུལ་གྱི་སློབ་གྲྭ་དང་ཚོང་ལས། ལས་ཁུངས་སོགས་རྒྱུན་ལྡན་ཡིན་ཚུལ་སྒྲོག་གི་ཡོད།
ཀྲང་གིས་དམར་ཤོག་ནང་ཁུལ་ལ་བཤད་དོན། ང་ཚོ་མཐའ་མཇུག་གི་རྒྱལ་ཁའི་ཕྱོགས་ལ་ད་དུང་ཐག་རིང་ལ། ནུབ་ཕྱོགས་དགྲ་བོའི་སྟོབས་ཤུགས་ཀྱིས་རྒྱབ་རྩ་བྱས་པའི་ཏཱ་ལའི་སྒྲིག་འཛུགས་ཀྱི་ཁ་བྲལ་གྱི་འཆར་གཞི་གསར་པ་ཞིག་འདིང་གི་ཡོད་པ་རེད། དེར་བརྟེན། ཁྱེད་ཅག་ལས་དོན་རུ་ཁག་གི་མགོ་བ་ཚོས་ངེས་པར་དུ་ང་ཚོའི་རྒྱལ་སྒོ་སྲུང་ཞིང་མི་རྣམས་བཀོད་སྒྲིག་ནན་པོ་བྱེད་དགོས་པ་རེད། སྲང་ལས་ཚོགས་ཆུང་གི་མགོ་ཁྲིད་ཚོས་དོགས་ཟོན་ནན་མོ་དང་ཕྱི་མི་ཚང་མར་ལྟ་རྟོག་ནན་ཏན་བྱེད་དགོས། ཅེས་བཤད།
ཁོས་མུ་མཐུད་དོན། དྲིལ་བསྒྲགས་དང་སློབ་གསོ་ནི་ང་ཚོའི་ཏང་གི་ཁྱད་དུ་འཕགས་པའི་ཁེ་ཕན་དེ་ཡིན་ལ། ང་ཚོས་རང་ཉིད་ཏཱ་ལའི་རུ་ཚོགས་ཀྱི་ཁ་གཏད་ནས་སྐྱོབ་པའི་མཚོན་ཆ་བེད་སྤྱོད་ཆེ་ཤོས་ཀྱང་འདི་ཡིན། དེར་བརྟེན་དྲིལ་བསྒྲགས་པུའུ་ཡིས་སྔར་ལས་ལྷག་པའི་ལས་དོན་སྒྲུབ་སྟེ་གསང་བའི་ལས་དོན་འདི་དག་མངོན་འགྱུར་ཡོང་བ་བྱེད་དགོས་ཟེར།
ནང་ཁུལ་གྱི་ཡིག་ཆ་དེ་ལྟར་ན། ཉེན་རྟོག་པ་དང་གཞུང་ཆོས་ལུགས་ལྷན་ཁང་། ཏང་གི་ཡན་ལག་ལས་ཁུངས་མཐའ་དག་གིས་ཀྲང་ཆིན་ལི་ཡི་སྒྲིག་འཛུགས་ཀྱི་འོག་མཉམ་རུབ་ཀྱི་ལས་ཀ་བྱེད་དགོས་ཏེ། ཁོས་བཤད་རྒྱུར། འཛིན་སྐྱོང་ཚོགས་ཆུང་གི་ལས་དོན་ལ་ནུས་པ་ཐོན་པའི་ཆེད་དུ། སྡེ་ཚན་རེ་རེའི་ངོས་ནས་མེས་རྒྱལ་ལ་དགའ་ཞེན་དང་ཆོས་ལུགས་ལ་དགའ་ཞེན་ཆེ་བའི་མི་སྣ་དག་ཡོངས་སུ་བེད་སྤྱོད་གཏོང་དགོས་ཟེར།
འཛིན་སྐྱོང་ཚོགས་ཆུང་དེ་ནི་ཏང་གི་ཚད་ལྡན་ལམ་ལུགས་ཏེ། སྒྲིག་འཛུགས་གང་དུ་ཕྱིན་ནའང་ཏང་གི་སྲིད་བྱུས་ལ་བརྩི་སྲུང་བྱེད་པའི་ཡིད་ཆེས་ཡོད་མཁན་གྱི་དམར་ཤོག་ཚོགས་མི་དག་འདེམ་སྒྲིག་བྱེད་སྲོལ་ལྟར་བསྐོས་ཡོད་པ་རེད།
ཕྱི་ཟླ་ ༦ པའི་ཚེས་ ༢ ཉིན་གྱི་བོད་ལྗོངས་ཉིན་རེའི་གསར་ཤོག་ནང་དུ་ལྷ་སའི་དྲིལ་བསྒྲགས་པུའུ་ཡི་མགོ་གཙོ་ ལི་ཆེ་ ཟེར་བ་དེ་བས་མངོན་གསལ་གྱིས་བཀོད་ཡོད་ལ། ཁོས་བཤད་དོན། ང་ཚོས་ཐོག་མར་དགོན་པ་དག་གཙང་མ་བཟོ་དགོས་པ་དང་འཛིན་སྐྱོང་ཚོགས་ཆུང་གི་ནུས་ཤུགས་སྲ་བརྟན་གཏོང་དགོས་པ་རེད། དེའི་རྗེས་ནས་ང་ཚོས་ཁོང་ཚོ་དོན་དམ་གྱིས་སྟངས་འཛིན་བྱེད་ཅེས་བརྗོད་ཡོད་པ་རེད།
དོན་དངོས་ཐོག་བོད་ནང་གི་དམར་ཤོག་ཚོགས་པ་དང་དམག་མིས་དབང་སྒྱུར་གྱིན་ཡོད། ལྷ་སའི་ཉེ་འཁྲིས་མཐའ་སྐོར་ནི་དམག་སྒར་གྱིས་བསྐོར་ཞིང་། ལམ་མདོ་ཡོད་ཚད་ལ་ལྟ་སྲུང་བ་བཞག་ཡོད། དབང་ཆ་ངོ་མ་ནི་ཀྲང་ཆིན་ལི་དང་བོད་ལྗོངས་དམག་སྤྱི་ཐོང་ཀའེ་ཧྲན་གཉིས་ཀྱི་ལག་ཏུ་ཡོད་པ་རེད།
