དབུ་མའི་ལམ་ནས་འཆམ་མཐུན་སྤྱི་ཚོགས་བསྐྲུན་དགོས།

ང་ཚོ་༧རྒྱལ་བ་རིན་པོ་ཆེ་མཆོག་ལ་དགའ་ཞེན་ཆེ་བ་དེ་ནི་འགོག་ཐབས་ཡོད་པ་ཞིག་མ་རེད། ཏཱ་ལའི་བླ་མ་བོད་དུ་གདན་འདྲེན་ཞུས་ཏེ་དབུ་མའི་ལམ་གྱི་སྒང་ནས་གྲོས་བསྡུར་བྱེད་པ་ཡིན་ན་ད་གཟོད་འཆམ་མཐུན་སྤྱི་ཚོགས་འཛུགས་སྐྲུན་བྱེད་ཐུབ་རྒྱུ་རེད། ཁོང་དང་གྲོས་མོལ་མ་བྱས་ན་འཆམ་མཐུན་སྤྱི་ཚོགས་ཡོང་ཐབས་མེད་ཟེར།

ཕྱི་ཚེས་ ༢༧ ཉིན་འདི་གའི་གསར་འགོད་པས་ཁ་པར་བརྒྱུད་བོད་ནང་དུ་གནས་ཚུལ་རྒྱུས་ལོན་བྱས་པ་ཡིན་ལ། སྐབས་དེར་བོད་ནང་གི་འབྲེལ་ཡོད་མི་སྣ་ཞིག་གིས་བརྗོད་དོན། ཕྱི་ཚེས་ ༢༠ ནས་ ༢༦ བར་ཉིན་དྲུག་རིང་རྒྱ་ནག་གཞུང་གིས། ལོ་འདིར་མཚོ་སྔོན་གྱི་ས་ཁུལ་རིམ་པའི་དགོན་པ་ཁག་གི་འཐུས་མི་འདེམས་སྒྲིག་གིས་མཚོ་སྔོན་ཞིང་ཆེན་ཏང་གི་སློབ་གྲྭ་རུ་ཚོགས་འདུ་ཞིག་སྐོང་འཚོགས་གནང་ཡོད་འདུག་ལ། ཉེ་སྔོན་མཚོ་ལྷོ་ས་ཁུལ་གྱི་དགོན་སྡེ་ཁག་གི་མི་སྣ་འཚོགས་ཟིན་པ་དང༌། ཐེངས་འདིའི་ཚོགས་འདུ་ནི་རྨ་ལྷོ་ཁུལ་འོག་གི་དགོན་པ་ ༣༦ གྱི་དགོན་པའི་དོ་དམ་ལྷན་ཁང་གི་འཐུས་མི་ ༣༢ ཙམ་སླེབས་ཡོད་པ་དང༌། ཚོགས་འདུ་དེའི་སྟེང་མཚོ་སྔོན་ཞིང་ཆེན་རིམ་པའི་མགོ་ཁྲིད་མང་པོ་ཕེབས་ཡོད་པ་དང༌། ཉིན་དྲུག་གི་ཚོགས་འདུ་དེའི་སྟེང་རྒྱ་ནག་གི་དཔོན་རིགས་ཚོས་ཚོགས་ཞུགས་གྲྭ་བ་ཚོར་ཐེངས་འདིར་སོ་སོའི་བསམ་ཚུལ་ཞེད་སྣང་མེད་པར་བཤད་རྒྱུའི་ཆོག་མཆན་སྤྲད་ཡོད་པ་དང༌། ཚོགས་འདུའི་བརྗོད་གཞི་ནི། ཏཱ་ལའི་རུ་ཚོགས་ཀྱི་བཟོ་ལྟ་ངོ་མར་དགག་རྒྱག་བྱས་ཏེ་སྤྱི་ཚོགས་འཆམ་མཐུན་ལ་སློབ་སྦྱོང་བྱེད་དགོས། དགོན་པའི་སྒྲིག་ཁྲིམས་དང་སྲུང་སྐྱོབ་སྐོར། རང་སྐྱོང་ལྗོངས་ཀྱི་བདག་དབང་གི་སྐོར་བཅས་གནད་དོན་གསུམ་གྱི་སྟེང་གྲོས་བསྡུར་དང་བསམ་འཆར་སྤེལ་རེས་བྱས་ཡོད་འདུག་འདུག 

སྐབས་དེར་ཚོགས་ཐོག་ཏུ་གྲྭ་བ་དྲུག་གིས་རང་ཉིད་ཀྱི་བསམ་ཚུལ་བཏོན་ཡོད་པ་དང་དེའི་ནང་གི་ཚོགས་མི་ཞིག་གིས་བློ་སྟོབས་ཆེན་པོས། ཏཱ་ལའི་བླ་མ་ལ་དགག་རྒྱག་ཟབ་མོ་བྱས་ཏེ་འཆམ་མཐུན་སྤྱི་ཚོགས་ཀྱི་བདེ་འཇགས་སྲུང་སྐྱོབ་བྱ་དགོས་ཞེས་པའི་སྐོར་ལ། ཁོང་གིས། ཏཱ་ལའི་བླ་མར་དགག་རྒྱག་ཟབ་མོ་བྱས་ཏེ་འཆམ་མཐུན་སྤྱི་ཚོགས་འཛུགས་སྐྲུན་བྱེད་པའི་བརྗོད་གཞི་དེའི་སྒང་ང་རང་འཐད་པ་མེད། ཁྱེད་རང་ཚོས་ཏཱ་ལའི་བླ་མ་མེས་རྒྱལ་ཁ་བྲལ་གཏོང་མཁན་དང་མི་ངན་པ་ཞིག་ཏུ་ངོས་བཟུང་ཡོད་པ་རེད། དེ་གཏན་ནས་མ་རེད། ཏཱ་ལའི་བླ་མ་ནི་བོད་ཆོལ་ཁ་གསུམ་གྱི་རྒྱལ་པོ་དང༌། ཏཱ་ལའི་བླ་མ་ནི་ནམ་མཁའི་ཉི་མ་ལྟ་བུ། ཁོང་ནི་ང་ཚོའི་ཁོག་གི་སྙིང་དང་དཔྲལ་བའི་མིག་ལྟ་བུ་ཡིན། ཏཱ་ལའི་བླ་མར་དགག་པ་རྒྱབ་སྟེ་འཆམ་མཐུན་སྤྱི་ཚོགས་ཡོང་དགོས་ཞེས་པ་དེ་ཡོང་ཐབས་མེད་པ་ཞིག་རེད། ཁྱེད་མགོ་ཁྲིད་རྣམ་པས་ཀྱང་ཧ་གོ་གི་རེད། ཏཱ་ལའི་བླ་མ་ཞུ་བ་འདི་ནི་འཛམ་གླིང་ན་སྙན་གྲགས་ཆེ་བ་དང༌། འཛམ་གླིང་མི་མང་གིས་གུས་བཀུར་བྱེད་བཞིན་པའི་མི་སྣ་གྲགས་ཆེན་ཞིག་རེད། ད་ལྟའི་དུས་འདིར་ཏཱ་ལའི་བླ་མ་ནི་འཛམ་གླིང་ཞི་བདེའི་དེད་དཔོན་ཆེན་མོ་དང༌། འཛམ་གླིང་ཞི་བདེའི་ལྡེ་མིག་ལྟ་བུ་རེད། ཏཱ་ལའི་བླ་མར་དགག་པ་རྒྱག་པའི་ཐད་ལ་ང་རང་གཏན་ནས་འཐད་པ་མེད། ང་རང་ཉིད་ལ་དཔེ་བཞག་ན། ང་ཐོག་མར་འཇིག་རྟེན་འདིར་སླེབས་པའི་དུས་དེར་བོད་ཀྱི་དབུ་ཁྲིད་ཏཱ་ལའི་བླ་མ་བོད་ནང་ཁུལ་ཏུ་ཡོད་པ་མ་རེད། རྒྱ་གར་ཏུ་བྲོས་བྱོལ་ཏུ་ཕེབས་ཡོད་པ་རེད་ཅེས་གོ་མྱོང༌། ཡིན་ནའང༌། ངའི་སེམས་ཁོང་ན་ཁོང་ཡོད། ཁོང་དང་ན་མཉམ་གྱི་མི་དེ་དག་ཁོང་ལ་དགའ་ཞེན་ཆེ་བ་མ་ཟད་བོད་ཀྱི་གཞོན་སྐྱེས་ཚང་མའང་ཁོང་ལ་དགའ་གི་རེད། ཁོང་ལ་དགའ་ཞེན་ཇི་འདྲ་ཞིག་ཆེ་མིན་དེ་ང་ལ་བལྟས་པས་ཀྱང་ཤེས་ཐུབ། ངས་ཁོང་ཉིད་དངོས་སུ་མ་མཐོང་ནའང་ང་ཁོང་ལ་ཧ་ཅང་དགའ། དེ་བཞིན་ང་ལྟ་བུ་བོད་ཆོལ་ཁ་གསུམ་གྱི་བོད་མི་ཡོངས་ཁོང་ལ་དགའ་ཞེན་ཆེ། དེ་ནི་འགོག་ཐབས་མེད་པ་ཞིག་རེད། ཏཱ་ལའི་བླ་མས་དབུ་མའི་ལམ་གླེང་གི་ཡོད་པ་རེད། སྤྱི་ཚོགས་འཆམ་མཐུན་ཡོང་དགོས་ན་ཏཱ་ལའི་བླ་མའི་དབུ་མའི་ལམ་ལ་ཡིད་ཆེས་བྱ་དགོས། ཏཱ་ལའི་བླ་མའི་གསུང་རྩོམ་འཛམ་གླིང་ནང་དར་ཁྱབ་ཆེ་བ་དང་རྒྱ་ནག་ནང་ཁུལ་ཏུའང་ཡོད་པ་རེད། དབུ་མའི་ལམ་སྐོར་གྱི་དཔྱད་པ་མང་པོ་ཡོད་པ་རེད། ཁྱེད་རྣམས་ཀྱིས་ཀྱང་ཁོང་གི་གསུང་ལ་བལྟས་རྗེས་བསམ་ཚུལ་རྒྱུས་ལོན་དང་བགྲོ་གླེང་བྱ་དགོས་པ་དང༌། ཁོང་གི་དབུ་མའི་ལམ་གྱི་སྒང་ལ་གྲོས་བྱས་ན་ཡག་པོ་ཡོང་གི་རེད། ཁྱེད་རང་ཚོས་ཏཱ་ལའི་བླ་མ་སྐུ་མྱ་ངན་ལས་འདས་པ་ཡིན་ན་བོད་ཀྱི་གནད་དོན་མཇུག་རྫོགས་པར་ངོས་འཛིན་བྱེད་བཞིན་ཡོད་པ་རེད། དེ་འདྲ་ཞིག་གཏན་ནས་མ་རེད། དེ་ལྟར་བྱུང་བ་ཡིན་ན་གནས་ཚུལ་ཚབས་ཆེན་དུ་འགྱུར་གི་རེད། ཁོང་ཉིད་བཞུགས་པའི་དུས་འདིར་དབུ་མའི་ལམ་གྱི་སྒང་ནས་གྲོས་བསྡུར་མ་བྱས་ན་བོད་ཀྱི་གནད་དོན་དེ་ཧ་ཅང་ཛ་དྲག་ཏུ་འགྱུར་རྒྱུ་རེད། གནས་ཚུལ་ཛ་དྲག་ཏུ་གྱུར་བ་ཡིན་ན་དེ་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ངོ་ཚ་རེད། གལ་སྲིད་ཁོང་ཉིད་བོད་དུ་གདན་འདྲེན་བྱེད་མ་ཐུབ་ན་མཚོ་སྔོན་ཞིང་ཆེན་དང་ས་གནས་མི་མང་གི་ངོ་ཚ་རེད། ཏཱ་ལའི་བླ་མ་བོད་དུ་གདན་འདྲེན་ཞུས་ཏེ་དབུ་མའི་ལམ་གྱི་སྒང་ནས་གྲོས་བསྡུར་བྱེད་པ་ཡིན་ན་ད་གཟོད་འཆམ་མཐུན་སྤྱི་ཚོགས་འཛུགས་སྐྲུན་བྱེད་ཐུབ་གི་རེད། ཁོང་དང་གྲོས་མོལ་མི་བྱེད་པ་ཡིན་ན་འཆམ་མཐུན་སྤྱི་ཚོགས་ནི་ཡོང་ཐབས་མེད་པ་ཞིག་རེད། གལ་སྲིད། ཁྱེད་ཚོའི་ཕ་མ་སྡུག་བསྔལ་ཆེན་པོ་ཞིག་གིས་མནར་ཏེ་ས་མཐར་འཁྱམས་པ་ཡིན་ན། ཁྱེད་ཚོ་ཡིན་ནའང་ཕ་བུ་ལྷན་འཛོམས་འབྱུང་འདོད་སྐྱེས་གི་རེད། དེ་བཞིན་བོད་ཆོལ་ཁ་གསུམ་གྱི་སྐྱེས་བོ་རྣམས་ཀྱི་ཕ་མ་ལྟ་བུའི་ཁོང་ཉིད་དང་ང་ཚོ་ཡང་མཉམ་འཛོམས་འབྱུང་འདོད་ཧ་ཅང་ཆེ། དེ་བཞིན་ཟླ་མཇུག་གི་བོད་རྒྱའི་གྲོས་མོལ་དེ་ལམ་སློང་ཡོང་བ་དང་ཞི་བདེ་ངང་ཐག་གཅོད་བྱ་རྒྱུ་དེ་མགོ་ཁྲིད་རྣམས་ལ་རེ་བ་ཡིན་ཅེས་དང༌། དེ་དང་ཆབས་ཅིག་ངའི་བསམ་ཚུལ་འདི་ཀྲུང་དབྱང་གི་མགོ་ཁྲིད་རྣམས་ལ་བརྗོད་རོགས་གནོངས་ཤེས་རེ་བ་ཞུས་ཡོད་པ་རེད་ཟེར།

ཁོང་གིས་མུ་མཐུད་དུ་ངོ་སྤྲོད་བྱས་དོན། སྐབས་དེར་རྒྱ་གཞུང་གི་དཔོན་རིགས་ཚོས་ཀྱང་ཁྱེད་ཅག་གིས་ཐེངས་འདིར་མངོན་ཀློག་མེད་པར་རེ་འདུན་བཏོན་པར་ང་ཚོ་དགའ་བོ་བྱུང་ཡོད། ཚོགས་འདུའི་སྟེང་གི་རེ་འདུན་ཁག་གོང་རིམ་ལ་སྙན་སྒྲོན་ཁ་གསལ་ཞུ་རྒྱུ་ཡིན་ཟེར་ཞིང༌། ཁྱེད་ཅག་གིས་བཤད་པའི་མི་རིགས་ས་གནས་རང་སྐྱོང་ཟེར་གྱིན་ཡོད་པ་ལས། བོད་པའི་སྐད་ཡིག་རིག་གཞུང་ཉམ་ཆགས་སུ་འགྲོ་བཞིན་ཡོད་པ་དེ་བོད་རིགས་གཅུག་པུ་མ་རེད། མི་རིགས་གཞན་མང་པོ་ཞིག་གི་རིག་གཞུང་རྩ་མེད་དུ་སོང་ཚར་ཡོད་པ་རེད་ཟེར་ཞིང༌། ཟླ་བཅུ་བའི་ཟླ་མཇུག་ཙམ་ལ་རྒྱ་གར་ནས་༧གོང་ས་མཆོག་གི་སྐུ་ཚབ་པེ་ཅིན་དུ་ཕེབས་ཏེ། བོད་རྒྱའི་གནད་དོན་ཐད་གྲོས་མོལ་གནང་འཆར་ཡོད་པ་རེད་ཟེར་སྐབས་རྒྱ་ནག་གི་དཔོན་རིགས་ཚོ་ཅུང་ཧང་སང་སྟེ། དོ་སྣང་ཆེན་པོས་གསན་གྱིན་འདུག་ཟེར། ཚོགས་འདུ་འདི་ནི་རྒྱ་ནག་གཞུང་གིས་ལོ་ངོ་གསུམ་རིང་རྒྱུན་བསྐྱངས་པའི་ཚོགས་འདུ་ཞིག་ཡིན་འདུག་ལ། གཙོ་བོ་ཏཱ་ལའི་བླ་མར་དགག་པ་རྒྱག་ཆེད་ཡིན་པས་གྲྭ་བ་མང་པོས་ཐེངས་འདིར་ཡང་ཚོགས་འདུ་འདིའི་ཐད་ལ་དགག་པ་དང་བསམ་ཚུལ་ཤུགས་ཆེར་གླེང་ཡོད་འདུག