བོད་ཀྱི་དུས་བབ་སྤྱིའི་འདོན་ཐེངས་ ༤༢༩ པའི་སྟེང་གི་རྩོམ་སྒྲིག་པའི་གཏམ།
བདུན་ཕྲག་འདིའི་ནང་༧གོང་ས་མཆོག་གི་དམིགས་བསལ་སྐུ་ཚབ་རྣམ་པ་པེ་ཅིན་དུ་ཡོད། ཁོང་ཚོས་པེ་ཅིན་གྱི་དབུ་ཁྲིད་ཚོའི་མཉམ་དུ་བོད་མི་རིགས་འདི་ཀྲུང་ཧྭ་མི་དམངས་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་འོག་ཏུ་སྡོད་སྟངས་འཚོལ་གིན་ཡོད། བཞུགས་སྒར་ངྷ་སའི་ཅ་ཅོ་ནི་མུ་མཐུད་ནས་ཇེ་མཐོར་འགྲོ་བཞིན་གཞིས་ལུས་མི་དམངས་ཀྱི་མངོན་འདོད་རྩོད་གི་ཡོད། རྩོད་པ་མཐོ་དྲག་ནས་མི་གོ་བའི་ཚད་དུ་གྱུར་འདུག དེའི་ཁར་ནུབ་ཕྱོགས་ཀྱི་གསར་འགོད་པ་ཚོས་རྒྱལ་བ་རིན་པོ་ཆེ་མཆོག་དང་གངས་སྐྱིད་ཀྱི་དབུ་ཁྲིད་རྣམ་པའི་ཁ་འཕྲོག་ནས་གནས་ཚུལ་སྒྲོག་གི་འདུག
བོད་རྒྱ་གཉིས་བར་གྱི་དཀའ་རྙོག་ལྟེ་བ་ནི་བོད་ནང་རྒྱ་ནག་གི་མི་སེར་སྤེལ་བའི་སྲིད་བྱུས་མཚམས་འཇོག་བྱེད་མིན་ལ་ཐུག་ཡོད། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་ཏང་ཀྲུང་དབྱང་གི་ཐུགས་ཁུར་ལམ་སྟོན་འོག་རྒྱའི་མི་སེར་ནི་མེ་འཁོར་དང་རླངས་འཁོར། གནམ་གྲུ་བཅས་བརྒྱུད་དེ་ཉིན་མཚན་མེད་པར་ཆུ་ལོག་ལྟར་བཞུར་ཡོང་གི་ཡོད་ལ། མདོ་དབུས་མཐོ་སྒང་འདི་རྒྱ་མིའི་རྒྱ་མཚོ་རུ་འགྱུར་བཞིན་ཡོད། བོད་མི་རིགས་ཀྱིས་རང་ཉིད་རྒྱ་ནག་གི་མི་ཚོགས་དབུས་ནས་བོར་ཏེ་སླར་བརྙེད་མི་ཐུབ་པར་འགྱུར་གི་ཡོད།
འདི་ལྟའི་གནས་སྟངས་འོག་ང་ཚོས་བོད་དོན་གླེང་གི་ཡོད་ལ། བོད་མིའི་རྩ་དོན་གྱི་ལངས་ཕྱོགས་རྩོད་བཞིན་མཐའ་མར་བོད་ཀྱི་མ་འོངས་པ་དེ་བོད་མི་རིགས་ཀྱིས་ཐག་གཅོད་དགོས་ཟེར་བཞིན། དམིགས་བསལ་གྱི་ཚོགས་ཆེན་ཞིག་ལ་གྲ་སྒྲིག་བྱེད་གི་ཡོད། འོན་ཀྱང་། བོད་མི་རིགས་ཀྱིས་ཐག་གཅོད་འོས་པའི་མ་འོངས་པ་དེ་ད་ལྟ་ནས་རྒྱ་རིགས་རྒྱ་མཚོ་ཆེན་པོའི་ནང་དུ་འཐིམ་གིན་ཡོད་ལ། བོད་མི་རིགས་ལ་རང་གི་ངོ་རྟགས་དང་རིག་གཞུང་། སྐད་ཡིག ཆོས་ལུགས། གོམས་གཤིས་བཅས་ཁེ་གཙང་དུ་ཉར་སའི་ཁོར་ཡུག་ཅིག་ལྷག་དཀའ་བར་གྱུར་ཡོད།
གལ་སྲིད་ང་ཚོར་མི་རིགས་འདི་སྐྱོབ་པའི་ལམ་ཁ་ཉག་གཅིག་ལྷག་ཡོད་ཚེ། དེ་ནི་བོད་དུ་བཞུར་ཡོང་གིན་པའི་རྒྱའི་མི་སེར་གྱི་ཆུ་ལོག་ཆེན་པོ་འདིའི་ཁ་འགོག་པའང་ཁ་བསྒྱུར་ཐབས་བྱེད་རྒྱུ་འདི་ཡིན་ལ། རྒྱལ་སྤྱིའི་རོགས་རམ་དང་ཁྲིམས་ལུགས་ཀྱི་སྲུང་སྐྱོབ་འོག་ནས་འཛམ་གླིང་སྟེང་གི་མི་སེར་སྤེལ་ཡུལ་གྱི་སྲིད་བྱུས་མཐའ་མ་འདི་མཚམས་འཇོག་བྱེད་དུ་འཇུག་རྒྱུ་འདི་ཡིན་ངེས། འོན་ཀྱང་། ང་ཚོས་རང་བཙན་དང་རང་སྐྱོང་གི་ཁ་ཤུགས་བརྩད་བསྡད་དེ་དམིགས་བསལ་ཚོགས་ཆེན་གྱི་སྟེང་འདི་ལྟའི་གོ་བསྡུར་ཞིག་ཀྱང་བྱེད་ཐུབ་མིན་བཤད་དཀའ་བར་འདུག
ད་རེབ་༧གོང་ས་མཆོག་གི་དམིགས་བསལ་སྐུ་ཚབ་རྣམ་པ་ཕྱིར་ཕེབས་ཏེ་༧རྒྱལ་བ་རིན་པོ་ཆེ་མཆོག་དང་བོད་མིའི་དམིགས་བསལ་ཚོགས་ཆེན་གྱི་སྟེང་སྙན་ཞུ་འབུལ་དགོས་པ་ཡང་རྒྱ་ནག་གི་རྩ་ཁྲིམས་འོག་ནས་ང་ཚོར་ཆུ་ལོག་ཆེན་པོ་འདི་འགོག་ཐབས་ཤིག་ཡོད་མེད་དང་། ཏང་ཀྲུང་དབྱང་གིས་བོད་འདི་རྒྱ་མིའི་ཆུ་ལོག་གིས་བསྣུབ་ཏུ་འཇུག་པའི་སྲིད་བྱུས་དེ་མཚམས་འཇོག་བྱེད་མིན་བཅས་ཡིན་ལ། འདི་ལ་བརྟེན་ནས་ང་ཚོས་མ་འོངས་པའི་བོད་ཀྱི་རྩ་དོན་འདི་བོད་མི་རང་ཉིད་ནས་ཐག་གཅོད་ཐུབ་མིན་བཤད་དགོས་པར་འདོད་དོ།།
