རེབ་གོང་ནས་མི་དགུར་ཁྲིམས་ཆད།

འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ལོ་འདིའི་བོད་ནང་གི་ཞི་རྒོལ་དང་འབྲེལ་བའི་ཐོག མདོ་སྨད་རེབ་གོང་ཁུལ་གྱི་མི་ ༩ ལ་ལོ་ ༡ ནས་ ༣ བར་གྱི་ཁྲིམས་ཐག་བཅད་ཡོད་འདུག

འདི་ལོའི་ཞི་རྒོལ་ཆེན་མོའི་སྐབས་རྒྱ་ནག་གཞུང་གི་འབྲེལ་ཡོད་ཉེན་རྟོག་དང་དམག་མི། བདེ་སྲུང་ལས་ཁུངས་སོགས་ཀྱིས་འཛིན་བཟུང་བཀག་ཉར་འོག་ཡོད་རིགས་ལས། ད་ལམ་མདོ་སྨད་རེབ་གོང་ནས་གཤམ་གསལ་མི་གྲངས་དགུ་ལ་ཁྲིམས་ཐག་བཅད་པ་ཁྱབ་བསྒྲགས་བྱས་འདུག་ཅིང༌། ཁོང་ཚོའི་ནག་ཉེས་ནི། ཞི་བའི་ངོ་རྒོལ་གྱི་ལས་འགུལ་ནང་ངོ་རྒོལ་བ་ཚོའི་སྣེ་འཁྲིད་གཙོ་བོའི་ལས་ཀ་བྱས་པ་དང༌། ངོ་རྒོལ་སྐབས། རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས། བོད་ལ་རང་བཙན་དང་རང་དབང་སྤྲོད་དགོས། བོད་རྒྱ་ཞི་མོལ་མྱུར་དུ་བྱེད་དགོས་སོགས་ཀྱི་སྐད་འབོད་བྱས་པ་སོགས་ནི་རྒྱལ་ ཁབ་ལ་ངོ་རྒོལ་དང༌། སྤྱི་ཚོགས་བརྟན་བརླིང་ལ་གཏོར་བཤིག་གི་ལས་འགུལ་ཞིག་ཡིན་པའི་ངོས་འཛིན་དང་བཅས་ཏེ་ཁོང་ཚོར་ཁྲིམས་ཐག་བཅད་པའི་སྐོར་ཡོངས་བསྒྲགས་བྱས་ཡོད་འདུག
ད་ལམ་ཁྲིམས་ཐག་བཅད་པའི་མི་གྲངས་དགུ་པོ་ནི། རེབ་གོང་རྒྱལ་པོ་ཀླུ་ཆུ་ས་ཁུལ་ནས་འདི་ལོའི་ཟླ་ ༣ ཚེས་ ༡༧ ཉིན་ཞི་བའི་ངོ་རྒོལ་གྱི་སྐད་འབོད་བྱས་པའི་སྐབས་ཀྱི་ལས་འགུལ་འཆར་འགོད་དང༌། སྣེ་འཁྲིད་བྱེད་མཁན། ལས་འགུལ་དངོས་གཞིའི་སྐབས་སུའང༌། བོད་ཀྱི་རྒྱལ་དར་འཕྱར་བཞིན་སྣེ་འཁྲིད་ནས་མགར་རྩེ་ཞང་སྲིད་གཞུང་གི་ནང་བསྒྲེངས་འཛུགས་བྱས་ཡོད་པའི་རྒྱ་ནག་གི་དར་ཆ་མར་ཕབ་ནས་བོད་ཀྱི་རྒྱལ་དར་བསྒྲེངས་མཁན་གཙོ་བོ་ཡིན་པའི་ངོས་འཛིན་འོག་འཛིན་བཟུང་བྱེད་ཉེའི་མཚམས་མགོ་ལོག་ཕྱོགས་ལ་བྲོས་བྱོལ་དུ་ཡོད་པ་ནས་འཛིན་བཟུང་བྱས་ནས་ཡོད་པ་ཀླུ་ཆུའི་གཅོད་པ་ཐར་ལ་ལོ་ ༣ དང༌། དེ་བཞིན་རེབ་གོང་ཕྱོགས་ནས་ཞི་རྒོལ་ལས་འགུལ་སྔ་རྗེས་སུ་སྤེལ་སྐབས་འཛིན་བཟུང་བྱས་པ་བྱེ་དྲིའི་ཤ་བོ་ཀླུ་རྒྱལ་ལ་ལོ་ ༢ སྡོང་ངེ་ནམ་མཁའ་ཚེ་རིང་ལ་ལོ་ ༢ སྡོང་ངེ་ཤ་བོ་བཀྲ་ཤིས་ལ་ལོ་ ༡ དང་ཟླ་ ༦ ངོ་མོ་བཀྲ་ཤིས་རྒྱལ་ལ་ལོ་ ༢ རོང་པོ་དགོན་པའི་གྲྭ་སྦྱིན་པ་ལ་ལོ་ ༡ དང་ཟླ་ ༦ ཀོའུ་སྡེའི་སྐར་རྒྱམ་ལ་ལོ་ ༡ རྒྱལ་པོ་སྒང་ཆོས་ལྡན་ལ་ལོ་ ༢ ཧོར་ནག་ཤ་བོ་རིན་ཆེན་ལ་ ༢ བཅས་ཀྱི་ཁྲིམས་ཐག་བཅད་ཡོད་པ་ཉིན་ཤས་སྔོན་ཁྱབ་བསྒྲགས་བྱས་ཡོད་འདུག