སྲིད་འཛིན་མཱ་ཡུན་ཇིག་གིས་དུས་ཚོད་འོས་འཚམས་ཤིག་གི་སྐབས་སུ་ང་ཚོས་གདན་འདྲེན་གནང་གི་ཡིན་གསུངས་ཡོད་དུས། གཞུང་ཕྱོགས་ནས་༧སྐུ་མདུན་ཕེབས་པར་དཀའ་ངལ་ཞིག་ཡོད་རྒྱུ་རེད་ལ། སྐུ་མདུན་གྱིས་གཞུང་གི་དཀའ་ངལ་དེ་ལ་་དགོངས་པ་བཞེས་ནས་དུས་ཚོད་འོས་འཚམ་མིན་དུས་ཤིག་ལ་ཕེབས་གི་མ་རེད་བསམ་གྱི་ཡོད། ཅེས་བོད་གཞུང་གི་མགྲིན་ཚབ་པས་གསུངས་བྱུང༌།
བདུན་ཕྲག་རེ་གཉིས་ནས་བཟུང་ཐའེ་ཝན་གླིང་ཕྲན་གྱི་གཞུང་དམངས་དང་བརྒྱུད་ལམ་བཅས་སུ་༧གོང་ས་མཆོག་གླིང་ཕྲན་དེར་གདན་འདྲེན་ཞུ་མིན་ལས་འཕྲོས་པའི་གླེང་སློང་ཤུགས་ཆེར་བྱེད་ཀྱི་ཡོད་ལ། ༧གོང་ས་མཆོག་གིས་ཉེ་ལམ་གསར་འགོད་པ་ཚོར། ད་ཆར་རྒྱ་ནག་དང་ཐའེ་ཝན་གཉིས་ཀྱི་འབྲེལ་བ་ཡག་ཏུ་འགྲོ་བཞིན་པར་བརྟེན། ཐའེ་ཝན་ལ་ཕེབས་པའི་དུས་ཚོད་ཡག་ཤོས་ཤིག་ཡིན་པར་གསུངས་ཡོད་ཀྱང༌། ཉིན་ཤས་སྔོན་ཐའེ་ཝན་སྲིད་འཛིན་གྱིས་༧གོང་ས་མཆོག་ཕེབས་པར་དགའ་བསུ་ཡོད་ནའང༌། ད་ལྟའི་ཆར་དུས་ཚོད་འོས་འཚམ་མ་རེད་ཅེས་གསུངས་འདུག
འདིའི་ཐད། བཞུགས་སྒར་གྱི་མཐོ་རིམ་མི་སྣ་ཞིག་གིས་གསུངས་དོན། ཟླ་ཤས་སྔོན་༧གོང་ས་མཆོག་གིས་བཞུགས་སྒར་ནས་ཐའེ་ཝན་དང་སིང་གྷ་པུར་སོགས་ཨེ་ཤ་ཡའི་ནང་བའི་ཆོས་ཞུ་བ་ཚོར་གསུང་ཆོས་གནང་སྐབས། ཐའེ་ཝན་དད་ལྡན་མང་ཚོགས་དང་གཞུང་འབྲེལ་མ་ཡིན་བའི་ཚོགས་པ་འགས་༧གོང་ས་མཆོག་ཐའེ་ཝན་ལ་ཆིབས་བསྒྱུར་གནང་རྒྱུའི་གསོལ་བ་བཏབས་པ་བཞིན་༧གོང་ས་མཆོག་གིས་ཐའེ་ཝན་མི་མང་དང་ཆོས་འབྲེལ་འཛུགས་པའི་དགོངས་གཞི་ཡོད་པ་རེད། ཡིན་ན་ཡང་དམིགས་བསལ་གྱིས་གཏན་འཁེལ་དང་འཆར་གཞི་ད་ལྟའི་ཆར་མེད་ཅེས་གསུངས་བྱུང༌།
ཡང་བཙན་བྱོལ་བོད་གཞུང་གི་མགྲིན་ཚབ་པ་ཐུབ་བསྟན་བསམ་འཕེལ་ལགས་ཀྱིས་འདིའི་ཐད་གསུངས་དོན། ༧གོང་ས་མཆོག་འཛམ་གླིང་རྒྱལ་ཁབ་གང་དུ་ཕེབས་ཀྱང་ཆོས་འབྲེལ་གྱི་མཛད་འཕྲིན་གཙིགས་འཛིན་གནང་གི་ཡོད་པ་བཞིན། ཐའེ་ཝན་ལ་ཕེབས་འདུན་ཡོད་པ་ཡང་ཐའེ་ཝན་མི་མང་དང་ཁོང་བར་གྱི་ཆོས་འབྲེལ་གྱི་དབང་གིས་རེད། ཡིན་ན་ཡང་ཐའེ་ཝན་སྲིད་འཛིན་མཱ་ཡུན་ཇིག་གིས་དུས་ཚོད་འོས་འཚམ་ཞིག་གི་སྐབས་སུ་གདན་འདྲེན་གནང་གི་ཡིན་གསུངས་ཡོད་དུས། ད་ལྟའི་ཆར་༧སྐུ་མདུན་ཕེབས་པར་གཞུང་ཕྱོགས་ནས་ དཀའ་ངལ་ཞིག་ཡོད་པ་ཡིན་སྟབས། སྐུ་མདུན་ནས་གཞུང་གི་དཀའ་ངལ་དང་ཐག་གཅོད་དེ་ལ་དགོངས་པ་བཞེས་ནས་དུས་ཚོད་འོས་འཚམ་མིན་དུས་ཤིག་ལ་ཕེབས་གི་མ་རེད་བསམ་གྱི་ཡོད། ཅེས་གསུངས་བྱུང༌། ཁོང་གིས་མུ་མཐུད་དོན། ༧གོང་ས་མཆོག་གི་ཐུགས་རེ་དེ་ནི་གཞུང་འབྲེལ་མ་ཡིན་པའི་ཚོགས་པ་ཁག་དང༌། ཐའེ་ཝན་དད་ལྡན་མང་ཚོགས་ཀྱིས་གདན་ཞུ་གསོལ་འདེབས་གནང་བ་བཞིན་རེད། ཡིན་ན་ཡང་ བཙན་བྱོལ་བོད་གཞུང་གི་ངོས་ན་༧གོང་ས་མཆོག་ཐའེ་ཝན་ལ་ཆིབས་བསྒྱུར་གནང་རྒྱུའི་དམིགས་བསལ་གྱི་མཛད་རིམ་དང་འཆར་གཞི་ཡོད་མ་རེད། ཅེས་གསུངས་བྱུང༌།
སྤྱི་ཟླ་ ༡༡ ཚེས་ ༣༠ ཉིན་ཐའེ་ལྦན་རྒྱལ་ཡོངས་རླུང་འཕྲིན་ཁང་གིས་༧གོང་ས་མཆོག་ལོ་རྗེས་མའི་ནང་དུ་ཐའེ་ཝན་ལ་ཆིབས་བསྒྱུར་གནང་སྲིད་པའི་སྐོར་བཀོད་པར། སྤྱི་ཟླ་ ༡༢ ཚེས་ ༣ ཉིན་ཐའེ་ཝན་སྲིད་འཛིན་མ་ཡུན་ཇིག་གིས། སྤྱིར་བཏང་ཐའེ་ཝན་གླིང་ཕྲན་ནང་དུ་ཆོས་ལུགས་ཁག་གི་དབུ་ཁྲིད་ཚོ་ཕེབས་པར་དགའ་བསུ་ཞུ་གི་ཡོད་ཀྱང༌། ད་ལྟའི་དུས་འདིར་ཏཱ་ལའི་བླ་མ་ཕེབས་འདོད་ཀྱི་དུས་ཚོད་དེ་འོས་འཚམ་མ་རེད་ཅེས་ཐའེ་པེ་ནས་ གསར་འགོད་པའི་དྲི་བར་ལན་བཏབས་ཡོད་འདུག
གནས་ཚུལ་སྤེལ་བ་ལྟར་ན་སྲིད་འཛིན་མ་ཡུན་ཇིག་གིས་རྒྱས་བཤད་གནང་མེད་ཀྱང༌། ཁོང་གིས་ཟླ་སྔོན་མའི་ནང་རྒྱ་ནག་གི་མཐོ་རིམ་དཔོན་རིགས་ཤིག་གིས་ཐའེ་ཝན་ལ་ལྟ་སྐོར་སྐབས་ཕྱོགས་གཉིས་བར་དུ་དཔལ་འབྱོར་གྱི་གྲོས་ཆོད་རིམ་པ་མང་པོ་ཞིག་བཞག་ཡོད་པ་དང༌། རྒྱ་ནག་དང་ཐའེ་ཝན་གཞུང་གཉིས་བར་གྱི་ཚོང་འབྲེལ་རྒྱ་བསྐྱེད་བྱ་རྒྱུའི་འདོད་པ་ཡོད་ཚུལ་ལ་ལྟས་ན། མ་ཡུན་ཇིག་གིས་གྲོས་མཐུན་འདི་ལ་བར་ཆད་མི་ཡོང་ཆེད་༧གོང་ས་མཆོག་ཐའེ་ཝན་ལ་ཕེབས་པར་དུས་ཚོད་འོས་འཚམ་མ་རེད་ཅེས་བརྗོད་པ་དང་འབྲེལ་བ་ཡོད་པར་བརྗོད་ཀྱི་ཡོད་པ་རེད། སྲིད་འཛིན་མ་ཡུན་ཇིག་གི་དགོངས་ཚུལ་སྐོར་གྱི་གནས་ཚུལ་སྤེལ་མ་ཐག ཚེས་ ༤ ཉིན་ནས་ཐའེ་ཝན་གྱི་གསར་ལམ་གང་སར་སྲིད་འཛིན་མ་ཡུན་ཇིག་ལ་ངོ་རྒོལ་བྱེད་མཁན་གྱི་གྲོས་ཚོགས་འཐུས་མི་དང༌། དམངས་གཙོ་ཚོགས་པ། ཁྲིམས་བཟོ་བ་དང་མི་མང་སོགས་རིམ་པས་བྱུང་ཞིང༌། གྲོས་ཚོགས་མགྲིན་ཚབ་པ་སྐུ་ཞབས་བཱང་ཅེན་ཕེན་གྱིས། ཆོས་ཕྱོགས་ནས་བཤད་ན་ཏཱ་ལའི་བླ་མ་ནི་ང་ཚོའི་ཡིད་ཆེས་དང་དད་པ་བྱེད་སའི་བཀུར་བར་འོས་པའི་དབུ་ཁྲིད་ཡིན་པས་ང་ཚོས་ངེས་པར་དུ་བསམ་བློ་ཡང་བསྐྱར་གཏོང་དགོས། སྤྱི་ཟླ་ ༥ པ་ནས་སྲིད་འཛིན་མཱ་ཡིས་འཕེལ་རྒྱས་གཏོང་བཞིན་པའི་རྒྱ་ནག་དང་ཐའེ་ཝན་གཉིས་ཀྱི་ཚོང་འབྲེལ་ལ་མ་གནོད་པའི་ཐོག་ནས། ཐའེ་ཝན་གྱིས་ངེས་པར་དུ་ལམ་ཁ་ཞིག་བཙལ་ནས་ཏཱ་ལའི་བླ་མ་ཐའེ་ཝན་ལ་གདན་འདྲེན་གནང་ཐབས་བྱ་དགོས་ཅེས་གྲོས་ཚོགས་སུ་གསུངས་ཡོད་འདུག ཡང་ཁ་གཏད་ཚོགས་པས་སྲིད་འཛིན་མཱ་ཡིས་རྒྱ་ནག་གི་འདོད་པ་བཞིན་ཏཱ་ལའི་བླ་མ་གདན་འདྲེན་གནང་གི་མེད་ཚུལ་བཤད་གི་ཡོད། དམངས་གཙོ་ཡར་ཐོན་ཚོགས་པའི་འཐུས་མི་ ཧཱང་ཝིས་ཁྲེན་དང་ལའེ་ཆེན་ཁྲིས་གཉིས་ཀྱིས། སྲིད་འཛིན་མཱ་ཡིས་ཐག་གཅོད་བྱས་པ་དེས་ཐའེ་ཝན་རྒྱ་ཆེའི་མི་མང་གི་ཚབ་མཚོན་ཐུབ་གི་མེད། ང་ཚོས་སླར་ཡང་གྲོས་ཚོགས་ལ་ཞུས་ནས་ཏཱ་ལའི་བླ་མ་ཐའེ་ཝན་ལ་གདན་འདྲེན་གནང་བར་འབོད་སྐུལ་ཞུ་རྒྱུ་ཡིན། ཅེས་གསར་འགོད་གསར་བསྒྲགས་སྤེལ་ཡོད་པ་རེད། དེ་བཞིན་དུ་དམངས་གཙོ་ཡར་ཐོན་ཚོགས་པའི་མགོ་ཁྲིད་ཚའེ་ལེན་ཝིན་གྱིས། ཁོ་མོས་ཐའེ་ཝན་ནང་ཁུལ་གྱི་ཆོས་ཚོགས་རྣམས་ལ་མཉམ་འབྲེལ་གྱིས་༧གོང་ས་མཆོག་གདན་འདྲེན་གནང་ཐབས་བྱ་གི་ཡིན་ཅེས་བརྗོད་འདུག
ལོ་ཤས་ནང་ལ་སྲིད་འཛིན་མཱ་ཡིས་ཀྱང་རྒྱ་ནག་དམངས་གཙོ་ཅན་དུ་འགྱུར་རྒྱུ་དང༌། ༧གོང་ས་མཆོག་གིས་བོད་ལ་རང་སྲིད་རང་སྐྱོང་གི་དགོས་འདུན་འདོན་བཞིན་པར་རྒྱབ་སྐྱོར་བྱས་ཡོད་པ་རེད། སྲིད་འཛིན་མ་ཡུན་ཇིག་ཨི་ཊ་ལིའི་ཁྲིམས་བཟོ་བ་འགའ་དང་མཇལ་འཕྲད་སྐབས་ཁོང་གིས། ཏཱ་ལའི་བླ་མ་ཐའེ་ཝན་དུ་ཐེངས་གཉིས་ལ་ཕེབས་སྐབས་ཐའེ་ཝན་མི་མང་གིས་ཚད་མཐོ་བའི་བརྩི་བཀུར་ཐོབ་ཡོད་ལ། ཐའེ་ཝན་དུ་ཁོང་གི་རྗེས་མཇུག་སློབ་མ་དང་དད་པ་བྱེད་མཁན་ཡང་ཤིན་ཏུ་མང་པོ་ཡོད། ཅེས་བརྗོད་ཡོད་པ་མ་ཟད། ད་ལོའི་སྤྱི་ཟླ་ ༧ ཚེས་ ༡༢ ཉིན་འཇར་མན་ཚགས་པར་Süddeutschen Zeitung གྱི་གསར་འགོད་པར་ལན་འདེབས་སྐབས། ཁོང་གིས། གལ་ཏེ་ཏཱ་ལའི་བླ་མ་ཆོས་ཕྱོགས་ཀྱི་དབུ་ཁྲིད་ཅིག་གི་ངོས་ནས་ཐའེ་ཝན་ལ་ཆིབས་བསྒྱུར་གནང་འདོད་ཡོད་ཚེ། ང་ཚོའི་ངོས་ནས་ཁོང་ལ་ཕེབས་བསུ་བྱ་གི་ཡིན། ཅེས་བརྗོད་ཡོད་པ་རེད།
