རྡུལ་ཕྲན་གཅིག་ཁོ་ནའི་སྟེང་གི་འཇིག་རྟེན་ཞེས་པའི་དཔེ་དེབ་ལས་འཕྲོས་པའི་གཏམ།
ཨ་འབྲུག་དཀོན་མཆོག
༄༅།། ཕྲན་གྱིས་དུས་ཡུན་གང་འཚམས་ཤིག་གི་སྔོན་ནས་ྋགོང་ས་མཆོག་དང་ཁོང་གི་དགོངས་གཞིའི་སྐོར་ལ་དམིགས་བསལ་གྱིས་སློབ་སྦྱོང་དང་དོ་སྣང་བྱས་ཤིང༌། དེ་ནི་ཐོག་མའི་ཆར་ང་རང་སྒེར་གྱི་ཤེས་ཡོན་དང་བསམ་བློའི་རྒྱབ་རྟེན་ཞིག་གི་ཆེད་དུ་ཡིན་རུང༌། དུས་ཡིན་གང་འཚམས་འདས་རྗེས་ངས་དོ་སྣང་བྱེད་ཡུལ་དེ་ཉིད་ང་ཚོའི་སྤྱི་ཚོགས་ཀྱི་དགོས་མཁོ་ཆེན་པོ་ཞིག་ཡིན་པ་དང༌། ང་ཚོས་སྤྱི་ཚོགས་ཀྱིས་བསྒྲུབ་མ་ཐུབ་པའི་སྟོང་ཆ་ཆེན་པོ་ཞིག་ཡིན་པ་ངོས་འཛིན་བྱུང་བས་ངས་འཚོལ་ཞིབ་ཀྱི་ལས་དོན་དེ་གང་ཐུབ་ཀྱིས་རྒྱ་བསྐྱེད་བྱས་པ་ཡིན། དེ་ལྟའི་སློབ་ཞིབ་ཀྱི་བརྒྱུད་རིམ་ནང་ངས་ཁོང་གི་སྐོར་གྱི་གལ་ཆེའི་ཡིག་ཆ་གང་མང་ཞིག་བཀླགས་པ་ལས་རྡུལ་ཕྲན་གཅིག་ཁོ་ནའི་སྟེང་གི་འཇིག་རྟེན་ཞེས་པ་འདི་ཕྲན་གྱི་སློབ་ཞིབ་ཀྱི་ལས་དོན་ལ་སྤྲོ་སྣང་འདྲེན་པ་དང་སེམས་ཁུར་ཆེས་ཆེར་སློང་བའི་དཔེ་དེབ་གལ་ཆེ་ཤོས་དེ་རེད། ྋགོང་ས་མཆོག་གི་སྤྱི་དང་བྱེ་བྲག་གི་དགོངས་དོན་གསལ་བའི་རྩ་འཛིན་རང་བཞིན་གྱི་དཔེ་དེབ་ཅིག་རང་ཉིད་ཀྱི་མ་སྐད་ཀྱི་ཐོག་ནས་བཀླགས་རྒྱུ་བྱུང་བ་དེས་ང་ལ་གཞན་ལས་ལྷག་པའི་སྤྲོ་སྣང་བྱུང་བ་སྨྲོས་མ་དགོས་མོད། ཁོང་གི་དགོངས་བཞེས་ཀྱི་རྒྱ་ཁོན་དང༌། རྒྱང་གཟིགས་ཀྱི་དགོངས་པ་དེ་ཅིག་བྱས་ན་དེང་གི་འཇིག་རྟེན་འདིའི་ཤེས་ཡོན་གྱི་རྒྱ་ཁྱོན་ལས་ཀྱང་བརྒལ་འདུག་པས་ངས་འཚོལ་ཞིབ་ཀྱི་ལས་དོན་གྱི་ངོ་བོ་དེ་དཀའ་ཁག་དང་ལས་འགན་གཞན་ལས་ཆེ་བ་ཞིག་གི་ངོས་འཛིན་བསྐྱར་བསླངས་བྱས་པས་ངས་གནད་དོན་འདི་ཚོར་སེམས་ཁུར་མ་བྱས་ཐབས་མེད་རེད། འོན་ཀྱང་དེ་རིང་འདིར་བརྗོད་འདོད་པ་ནི་ང་སྒེར་གྱི་ཚོར་བ་ཡན་གར་བ་དེ་ཚོ་མིན།
རྡུལ་ཕྲན་གཅིག་ཁོ་ནའི་སྟེང་གི་འཇིག་རྟེན་ཞེས་པའི་དཔེ་དེབ་འདི་ནི། ང་ཚོ་འཚོ་གནས་བྱེད་སའི་རང་བྱུང་ཁམས་ཆེན་པོ་དང༌། སྐྱེ་འགྲོ་སེམས་ཅན། དེ་བཞིན་དུ་འགྲོ་བ་མི་བཅས་ལས་གྲུབ་པའི་འཇིག་རྟེན་ཆ་ཚང་བ་ཤེས་རྟོགས་བྱེད་ཐུབ་པའི་བརྟག་ཐབས་སམ་དཔྱོད་སྒོ་སྟོན་པའི་ཐོག་མའི་སྐྱ་རིས་ལྟ་བུ་ཞིག་དང༌། དེ་བཞིན་དུ་འགྲོ་བ་མིའི་ཤེས་ཡོན་དང་ཤེས་རབ་ལ་མཐའ་རྒྱ་གསར་བསྐྱེད་ཀྱི་ལས་གཞི་སྟེ། ཚན་རིག་དང་སེམས་དོན་རིག་པའི་དཔྱད་གཞི་དང་དཔྱད་ཐབས་མཉམ་སྦྲགས་ལས་གྲུབ་པའི་ྋགོང་ས་མཆོག་གི་འཚོལ་ཞིབ་རང་བཞིན་གྱི་ཤེས་ཡོན་གྱི་འགྲུལ་བཞུད་ཀྱི་ཕྱོགས་བསྡོམས་ཀྱི་གྲུབ་འབྲས་ཤིག་ཡིན་པ་རེད། དཔེ་དེབ་ཅིག་གམ་བརྩམས་ཆོས་ཤིག་གི་རིན་ཐང་གཙོ་བོ་ནི་དེས་སྤྱི་ཚོགས་ལ་གོ་རྟོགས་སྤྲོད་པའི་ནུས་པའི་སྟེང་ན་ཡོད་པའི་ངོས་ནས་བལྟས་ན་ཁོང་གི་བརྩམས་ཆོས་འདི་ལ་བོད་ཙམ་མ་ཟད་འཛམ་གླིང་རང་བཞིན་གྱི་བློ་འབྱེད་ཀྱི་ཁྱད་ཆོས་ཤིག་ཀྱང་ལྡན་ཡོད་ཚོད་རེད་ལ། ཆེད་རྩོམ་འདིའི་ཆེད་དམིགས་ཀྱི་དགོངས་དོན་ཀྱང་དེ་ཉིད་ཡིན་རེད།
འོན་ཀྱང་བོད་པའི་སྤྱི་ཚོགས་ཀྱི་ངོས་ནས་དཔེ་དེབ་འདི་ལ་གཞི་རྩའི་ལྟ་སྟངས་གང་འདྲ་ཞིག་འཛིན་དགོས་པར་གྱུར་ཡོད་དམ། ཚད་མཐོ་ས་ནས་བཤད་ན་དཔེ་དེབ་འདིས་འཛམ་གླིང་གི་ཤེས་ཡོན་གྱི་ཁ་ཕྱོགས་ཤིག་འཆད་ཀྱིན་ཡོད་པས། དཔེ་དེབ་འདིའི་ནང་དོན་དང་ང་ཚོའི་སྤྱི་ཚོགས་ཀྱི་བསམ་བློ་གཉིས་ད་དུང་ཅུང་རྒྱང་ཐག་རིང་བོ་རེད། འོན་ཀྱང་བོད་པ་ཡང་འཛམ་གླིང་གི་ཆ་ཤས་ཤིག་ཡིན་པ་མ་ཟད། འཛམ་གླིང་གི་གལ་ཆེའི་ཤེས་ཡོན་གྱི་གྲུབ་ཆ་ཆེན་པོ་ཞིག་གི་རྒྱུན་འཛིན་པ་ཞིག་ཡིན་པའི་ཆ་ནས་བོད་མི་ཚོས་དཔེ་དེབ་འདི་ལ་བརྟེན་ནས་རང་ཅག་གི་སྲོལ་རྒྱུན་རིག་གནས་འཛིན་སྐྱོང་སྤེལ་གསུམ་ཞེས་པར་གོ་དོན་གསར་པ་ཞིག་རྙེད་དགོས་པ་དང༌། ལྷག་པར་དུ་ཡང་ང་ཚོ་རིག་གནས་གསར་རྙིང་གང་ལའང་རྨོངས་དད་ཀྱིས་འཇུག་པའི་བསམ་བློའི་སྟེང་གི་ནོར་འཁྲུལ་དང༌། རིན་ཐང་ལྟ་ཚུལ་དང་ངོས་འཛིན་གྱི་ལྟ་བ་ཆུང་ཆུང་གིས་བསླངས་པའི་རྩོད་གཞི། དེ་བཞིན་དུ་རིག་གནས་བསམ་བློའི་སྟེང་གི་འགལ་ཟླ་ལས་གྲུབ་པའི་བོད་པའི་ཤེས་ཡོན་ཅན་གྱི་བསམ་བློའི་ཁོར་ཡུག་དེར། མཐོང་རྒྱ་ཡངས་པའི་རྣམ་དཔྱོད་ཀྱི་གོ་རྟོགས་དང༌། རྒྱ་ཁྱོན་ཆེ་བའི་ཤེས་ཡོན་གྱི་བགྲོ་གླེང་ལས་གྲུབ་པའི་དཔེ་དེབ་འདི་ལ་བརྟེན་ནས་བློ་སྒོ་གསར་པ་ཞིག་འབྱེད་ཐུབ་ངེས་ཀྱི་རིན་ཐང་ལྡན་ཡོད་ཅིང༌། དཔེ་དེབ་འདིས་ནུས་པ་དེ་འདྲ་ཞིག་ཐོན་རྒྱུ་དེ་ལོ་ཙཱ་བས་བོད་སྒྱུར་བྱེད་པའི་དམིགས་ཡུལ་དེའང་ཡིན་པ་རེད།
དེ་བཞིན་དུ་དཔེ་དེབ་འདིས་ྋགོང་ས་མཆོག་གིས་དུས་ཀུན་གསུངས་བཞིན་པའི་དུས་རབས་ཉེར་གཅིག་པའི་ཆོས་པ་ཞིག་བྱེད་དགོས་ཞེས་པའི་ཆོས་ལུགས་དང་འབྲེལ་བའི་ལམ་སྟོན་དང༌། གནའ་དེང་ཤེས་ཡོན་གྱི་འདབ་གཤོག་ཟུང་ལྡན་བྱེད་དགོས་པའི་ཤེས་ཡོན་ལམ་སྟོན་སོགས་ཁོང་གི་དགོངས་དོན་སྤྱི་དང་བྱེ་བྲག་གི་ངོ་བོར་ངོས་འཛིན་དང༌། རྒྱབ་ལྗོངས་ལ་གོ་བ་ལེན་པའི་དཔེ་གཞི་ཆེན་པོ་ཞིག་ཀྱང་བཏང་ཡོད་པས་ན་དཔེ་དེབ་འདི་ནི་བོད་མིའི་སྲོལ་རྒྱུན་དང་དེང་རབས་ཀྱི་སློབ་གསོའི་ལས་དོན་ཐད་ཀྱི་དཔེ་སྟོན་ལམ་ཡིག་ཅིག་དང༌། རྣམ་གཞག་བྱེ་བྲག་པ་ཞིག་གི་ནང་རོལ་ནས་ཕྱི་རུ་ཐོན་ཏེ་འཛམ་གླིང་གི་ངོས་ནས་འགྲོ་བ་མིའི་ཤེས་ཡོན་ལ་ལྟ་བ་དང༌། མིའི་རིགས་ཀྱི་ཤེས་ཡོན་གྱི་ངོས་ནས་འཛམ་གླིང་ལ་ལྟ་བ་སོགས་རང་དབང་གི་རིག་སྟོབས་ཀྱིས་དཔྱད་སྟངས་དང་དཔྱད་གཞི་གསར་པ་གསལ་འདོན་གནང་ཞིང༌། བོད་ཀྱི་ཤེས་རིག་ལ་དེ་ལྟ་བུའི་འཕེལ་རྒྱས་ཀྱི་མདུན་ལྗོངས་ཤིག་ཡོད་པའི་དཔང་རྟགས་ལྟ་བུ་ཞིག་ཀྱང་ཡིན་སྟབས། དཔེ་དེབ་འདི་ནི་བོད་ཀྱི་ཤེས་རིག་ཀྱི་འཕེལ་ཕྱོགས་དང་འཕེལ་རྒྱས་ཀྱི་མཚོན་རྟགས་གལ་ཆེན་ཡིན་ཅིང༌། འདིས་བོད་ཀྱི་ཤེས་རིག་གི་འཕེལ་རྒྱས་ལ་དཀྱོགས་མཚམས་གསར་པ་ཞིག་ཀྱང་ཕྱེས་གནང་ཡོད་པ་རེད། དེའི་ཕྱིར་ྋགོང་ས་མཆོག་གིས་དཔེ་དེབ་འདི་ལྟ་བུ་ཞིག་བརྩམས་གནང་མཛད་པ་དང༌། ན་གཞོན་ཤེས་ཡོན་ཅན་བསྟན་འཛིན་རིག་བཟང་གིས་འདི་ལྟ་བུ་ཞིག་བོད་བསྒྱུར་ཞུས་པ་གཉིས་ཀ་བོད་པའི་ཤེས་རིག་དང་སྤྱི་ཚོགས་ཀྱི་ངོས་ནས་བལྟས་ན་ཧ་ཅང་གལ་འགངས་དང་རིན་ཐང་ལྡན་པ་ཞིག་ཡིན་པས་ང་ཚོས་དཔེ་དེབ་འདིས་བོད་པའི་སྤྱི་ཚོགས་ལ་བློ་མིག་གསར་པ་ཞིག་སྦྱིན་པའི་རེ་བ་བྱེད་དགོས་པ་དང༌། རེ་བ་མངོན་གྱུར་ཡོང་ཕྱིར་དཔེ་དེབ་འདི་ལས་འཕྲོས་པའི་བགྲོ་གླེང་མང་པོ་བྱེད་དགོས་པར་འདོད།
འོན་ཀྱང་ངས་གལ་ཆེའི་དཔེ་དེབ་འདི་ལས་འཕྲོས་པའི་ཆེད་རྩོམ་འདི་འབྲི་བཞིན་པའི་སྐབས་སུ་བརྒྱུད་ལམ་འགའ་ཞིག་ཏུ་བཤད་བཞིན་པ་ནི་དཔེ་དེབ་འདི་བསྒྱུར་མཁན་སུ་ཞིག་ཡིན་མིན་གྱི་སྐོར་ལས་འཕྲོས་པའི་སྐད་ཆ་དེ་ཚོ་རེད། དོན་ངོ་མར་ང་ཚོས་དཔེ་དེབ་རིན་ཐང་འདི་ལྟ་བུ་ཞིག་གི་རིན་ཐང་མ་གླེང་བའི་སྔ་རོལ་ནས་དཔེ་དེབ་པར་བསྐྲུན་གྱི་བདག་དབང་སོགས་སྤྱིར་བཏང་གི་གནས་ཚུལ་མང་པོ་ཞིག་ལ་རྩོད་གཞི་སློང་གི་ཡོད་པ་དེས་ང་ནི་སླར་ཡང་ང་ཚོའི་སྤྱི་ཚོགས་ཀྱི་རིན་ཐང་ལྟ་ཚུལ་དང་གོ་རྟོགས་ཀྱི་གནས་ཚུལ་ལ་དོགས་པ་ཆེ་རུ་སོང༌། འོན་ཀྱང་དོན་ངོ་མར་བོད་ཀྱི་ཤེས་རིག་དང་སྤྱི་ཚོགས་ལ་འགན་ཁུར་ལེན་འདོད་མཁན་ཚོས་དཔེ་དེབ་འདིའི་རིན་ཐང་ལས་འཕྲོས་པའི་གླེང་སློང་མང་པོ་བྱེད་འོས་པ་དང༌། ཆེད་རྩོམ་འདི་ལྟ་བུ་ལ་བརྟེན་ནས་བོད་པའི་སྤྱི་ཚོགས་དང་ལྷག་པར་སྲོལ་རྒྱུན་དང་དེང་རབས་ཀྱི་ཤེས་ཡོན་སྡེ་ཁག་ཚང་མར་གཡོ་འགུལ་ཞིག་ཐེབས་དགོས་པར་འདོད། གནའ་དུས་སྟོན་པས་ཆོས་སྟོན་པའི་ཚེ་ས་རྣམ་པ་དྲུག་ཏུ་གཡོས་པའི་བྱུང་བ་ང་ཚོས་འཆད་ཤེས་ཀྱི་རེད། འོན་ཀྱང་རིན་ཐང་ལྡན་པའི་དཔེ་དེབ་འདི་ལྟ་བུ་ཞིག་གིས་ང་ཚོར་ཅི་འདྲ་བའི་གཡོ་འགུལ་ཞིག་ཐེབས་དགོས་ཀྱི་རེད་དམ། མ་མཐའ་ཡང་ང་ཚོ་བླ་མའི་ཕྱག་མདུད་ལ་དགའ་ཞིང་དེ་ནི་རང་ཉིད་ཀྱི་སྲུང་བ་ཆེས་གལ་ཆེན་དུ་ངོས་འཛིན་བྱེད་པ་ལྟར། དཔེ་དེབ་འདི་ནི་བོད་ཀྱི་ཤེས་རིག་གི་སྲུང་བ་མཆོག་ཏུ་གྱུར་པའི་ཕྱག་མདུད་ཅིག་ཡིན་ངེས་ལ། དཔེ་དེབ་འདིའི་ནང་དུ་སྐུ་མདུན་གྱི་བྱིན་རླབས་ཀྱང་མང་པོ་ཞིག་འདུས་ཡོད་པས་ན་ཤེས་ཡོན་གྱི་ཕྱག་མདུད་རྩ་ཆེན་འདི་བོད་མི་ཚང་མས་སྐེ་ལ་འདོགས་དགོས་པ་དང༌། ལྷག་པར་དུ་བོད་ཀྱི་ཤེས་ཡོན་ཅན་རྣམས་ཀྱི་སྐེ་ལ་བཏགས་ཏེ་དུས་རབས་ཉེར་གཅིག་པའི་ཤེས་ཡོན་གྱི་གཡུལ་ས་ལ་བསྐྱོད་དགོས་པ་མ་རེད་དམ།
གཟུ་བློའི་གཏམ་ལ་ཐམས་ཅད་དགའ།