སྔར་ལོའི་བོད་ནང་གི་དོན་རྐྱེན་ཁྲོད་ལྷ་སའི་ཆ་འཕྲིན་ལག་ཁྱེར་ཁ་པར་ལས་ཁུངས་ཀྱི་འགན་འཛིན་གཞོན་པ། བོད་རིགས་ན་གཞོན་ལས་བྱེད་བསྟན་དར་ལགས་ལ། མ་ཉེས་ཁ་ཡོག་གི་སྡུག་སྦྱོང་མནར་གཅོད་འོག་འདས་གྲོངས་སུ་སོང་ཡོད་འདུག
དེ་རིང་ཉིན་རྒྱབ་ཆུ་ཚོད་ ༣ པའི་ཐོག་བོད་གཞུང་ཕྱི་དྲིལ་ལས་ཁུངས་ལྷག་པ་ཚེ་རིང་ཚོགས་ཁང་དུ། ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས་དང་དྭགས་པོ་བསོད་ནམས་ནོར་བུ་ལགས་རྣམ་གཉིས་ཀྱིས་སྔར་ལོའི་གསུམ་བཅུའི་དུས་དྲན་ནས་ད་ལྟའི་བར་གྱི་བོད་ནང་གི་གནས་སྟངས་ཕྱོགས་བསྡོམས་ངོ་སྤྲོད་དང་འབྲེལ་རྒྱལ་གཅེས་དཔའ་བོ་བསྟན་དར་ལགས་ལ་རྒྱ་དམག་གིས་མེ་མདའ་བརྒྱབས་ཏེ། རྨས་རྐྱོན་ཚབས་ཆེན་འོག་འདས་གྲོངས་སུ་སོང་བའི་དངོས་བྱུང་གློག་བརྙན་གཟིགས་འབུལ་ཞུས་སོང༌། སྐབས་དེར་དྭགས་པོ་བསོད་ནམས་ནོར་བུ་ལགས་ཀྱིས་བོད་ཡིག་ཐོག་གནས་ཚུལ་སྒྲོག་སྦྱོང་གནང་དོན། ན་ནིང་གསུམ་བཅུའི་དུས་དྲན་ནས་ད་བར་བོད་ཀྱི་ས་ཁུལ་ཡོངས་སུ་ཞི་བའི་མི་དམངས་སྒེར་ལངས་བྱུང་བའི་དོན་རྐྱེན་ཁྲོད། བོད་མི་བསད་པ་དང་བཟུང་བ། བོར་བ་དང་རྨས་བ་བཅས་ཀྱི་གནས་ཚུལ་རག་བསྡུས་ལྟར་ན། ད་བར་མི་ ༢༢༠ འདས་གྲོངས་སུ་སོང་ཡོད་ལ། དེ་ལས་མི་ ༡༠༧ ཙམ་གྱི་མིང་དང་ལོ་རྒྱུས་ཆ་ཚང་རག་ཡོད། མི་ ༡༡༣ ཙམ་ད་དུང་ངོ་རྟགས་ཆོད་མེད། གང་ཡིན་ཟེར་ན། ལྷ་ས་བོད་ཀྱི་རྒྱལ་ས་ཡིན་སྟབས། བོད་ཀྱི་ས་ཁུལ་ཡོངས་ནས་གནས་སྐོར་བ་དང་སློབ་གཉེར་བ། ཚོང་བ་སོགས་མང་པོ་ཡོད་སྟབས་བརྩད་ཆོད་ཁག་པོ་ཆགས་འདུག ཟླ་ ༣ པའི་ཚེས་ ༡༤ ནས་ ༡༧ བར་ལྷ་ས་ཉེན་རྟོག་ལས་ཁུངས་ཀྱི་འཁྲིས་སུ་སྐུ་ཕུང་མང་པོ་བཞག་ཡོད་པ་དང༌། ལྷ་ས་སྟོད་ལུང་བདེ་ཆེན་དུ་སྐུ་ཕུང་ ༨༣ ཙམ་མེར་བསྲེགས་བཏང་ཡོད་པའི་གནས་ཚུལ་ཐོན་ཡོད། དེ་བཞིན་ཨ་མདོ་རྔ་བ་ཁུལ་དུ་མི་ ༢༣ ཙམ་བསད་ཡོད་པ་ལས་མི་ ༡༠ མ་གཏོགས་ངོ་རྟགས་ཆོད་མེད། ད་བར་མི་ ༡༠༠༠ ཙམ་བོར་བརླག་ཏུ་སོང་བ་ལས་མང་ཆེ་བ་འདས་གྲོངས་སུ་སོང་བར་ང་ཚོས་ངོས་འཛིན་བྱེད་ཆོག་པ་རེད། ཅེས་བརྗོད་སོང༌།
ཁོང་གིས་མུ་མཐུད་དུ་རྒྱལ་གཅེས་དཔའ་བོ་བསྟན་དར་ལགས་ཀྱི་གནས་ཚུལ་ངོ་སྤྲོད་གནང་དོན། སྔ་ལོའི་ཕྱི་ཟླ་ ༣ པར་ལྷ་སར་བོད་མི་ཚོའི་ཞི་བའི་སྒེར་ལངས་སྐབས། ལྷ་ས་ནུབ་ཕྱོགས་སུ་ཡོད་པའི་ཆ་འཕྲིན་ལག་ཁྱེར་ཁ་པར་ལས་ཁུངས་ཀྱི་འགན་འཛིན་གཞོན་པ། བོད་རིགས་ལས་བྱེད་བསྟན་དར་ལགས། ཕྱི་ཚེས་ ༡༤ ཉིན་གྱི་ཉིན་རྒྱབ་ཙམ་ལ་ལས་ཁུངས་སུ་སྐྱོད་སྐབས། པེ་ཅིན་ནུབ་ལམ་དུ་ཡོད་པའི་ལྷ་ས་གྲོང་ཁྱེར་ཉེན་རྟོག་རུ་ཆེན་གྱི་ཉེ་འགྲམ་དུ། དྲག་ཆས་དམག་མི་ལྔ་དྲུག་ཅིག་གིས་དགེ་འདུན་པ་ཞིག་ལ་ཉེས་རྡུང་ཚད་མེད་གཏོང་གིན་ཡོད་པ་མཐོང་སྟེ། ཁོང་གི་སེམས་ཀྱིས་མ་བཟོད་པར་ཉེས་རྡུང་དེ་འདྲ་མ་གཏོང་རོགས་ཞེས་བརྗོད་ཡོད་སྟབས། དྲག་ཆས་དམག་མིས་བོད་རིགས་ལས་བྱེད་བསྟན་དར་ལ་ཉེས་རྡུང་བཏང་བ་དང༌། མེ་མདའ་ཐེངས་གཉིས་ལ་བརྒྱབས་པ་སྟོད་སྒལ་དང་རྩིབ་མའི་མཚམས་སུ་ཕོག་ཡོད་འདུག
བསྟན་དར་དྲན་པ་འཐོར་རྗེས་དམག་མི་ཚོས་སེ་རྭ་དགོན་པའི་ཉེ་འཁྲིས་སུ་ཡོད་པའི་བོད་དམག་ཁུལ་ཁང་གི་སྨན་ཁང་དུ་འཁྲིད་ཡོད་སྟབས། དེ་གར་སྨན་བཅོས་ཀྱི་མཐུན་རྐྱེན་ཐོབ་རྒྱུ་ཕར་ཞོག མེ་མདའ་ཕོག་ཤུལ་གྱི་རྨ་ཁར་རྡོག་ཐོ་རྒྱག་པ་དང་ལུས་ལ་ཐ་མག་གི་མེ་ཚགས་བཙུགས་པ། གློག་རྒྱུགས་བཞུས་པ་སོགས་མནར་གཅོད་ཚད་མེད་བཏང་སྟེ། ལུས་ཡོངས་སུ་རྨ་ཁ་བཟོས་ཡོད་པ་དང་རྐང་པ་གཡས་པའི་མཐིལ་དུ་ལྕགས་གཟེར་ཡང་བཙུགས་ཡོད་འདུག སྐབས་དེར་ཁོང་གི་ནང་མི་ཚོས་འཚོལ་ཞིབ་བྱས་ཏེ་ལྗོངས་སྤྱི་ཁྱབ་སྨན་ཁང་དུ་ཡོད་པ་ཤེས་ཏེ། སྨན་ཁང་དུ་ཡོང་ནས་བསྟན་དར་ཁྱིམ་དུ་ཁྲིད་ཆོག་པའི་རེ་བ་ཡང་ཡང་ཞུས་ཀྱང་དོན་འབྲས་སོན་མེད། སྤྱི་ཟླ་ ༤ ཚེས་ཤར་ཙམ་ལ་ལྗོངས་མི་དམངས་སྨན་ཁང་དུ་སྨན་བཅོས་བྱ་མགོ་བཙུགས། སྐབས་དེར་སྨན་པ་དང་སྨན་གཡོག་ཚོས་བསྟན་དར་ལགས་ཀྱི་ལུས་སྟེང་མེ་མདའི་རྨ་ཁ་དང༌། ཉེས་རྡུང་ཚད་མེད་ཕོག་པའི་རྨ་ཤུལ་རྣམས་མཐོང་སྟེ་ཧ་ལས་ཡོད་འདུག
ལྗོངས་སྤྱི་ཁྱབ་སྨན་ཁང་དུ་སྡོད་རིང་སྨན་བཅོས་ཚུལ་བཞིན་བྱས་མེད་པའི་ཁར། རྨ་སྟེང་དུ་འགྱིག་ཤོག་གཡོག་པ་སོགས་བྱས་ཡོད་སྟབས། དཔྱི་མགོ་དང་རྐུབ་ཀྱི་གཡོན་ངོས་ཀྱི་རྨ་ཁའི་ཤ་ཡོངས་སུ་རུལ་ཡོད་པའི་གནས་སྟངས། བརྙན་འཕྲིན་འོད་སྡེར་ནང་གསལ་བོར་ཕབ་ཡོད། རྗེས་སུ་ནང་མིར་རྩིས་སྤྲོད་བྱས་ཏེ་ལྗོངས་མི་དམངས་སྨན་ཁང་ནས་སྨན་བཅོས་སྐབས། ཁོང་གི་ལུས་སྟེང་ནས་ཤ་རུལ་བ་རྒྱ་མ་ ༥ ཙམ་བཀོག་དགོས་པ་བྱུང་ཡོད། ནང་མིས་འགྲོ་སོང་ཕོན་ཆེན་བཏང་སྟེ་སྨན་བཅོས་གང་ཡོང་བྱས་ཀྱང༌། ཕན་འབྲས་མ་བྱུང་བར་ཟླ་ ༦ ཚེས་ ༡༩ ཉིན་གྱི་དགོང་མོའི་ཆུ་ཚོད་ ༩ བའི་ཐོག་རང་ཁྱིམ་དུ་འདས་གྲོངས་སུ་སོང་ཡོད་འདུག
རྒྱལ་གཅེས་དཔའ་བོ་བསྟན་དར་ལགས་ནི། སྤྱི་ལོ་ ༡༩༧༩ ལོར་ལྷ་སར་སྐྱེས་ཤིང༌། རྒྱ་ནག་ཟི་ཁྲོན་ཁུལ་དུ་སློབ་སྦྱོང་ཐོན་རྗེས་ཀྲུང་གོ་མི་དམངས་དངུལ་ཁང་དུ་ཕྱག་ལས་གནང་ཞིང༌། དེ་ནས་ཡུན་རིང་མ་འགོར་བར་ལྷ་སའི་ནུབ་ཕྱོགས་སུ་ཡོད་པའི་ཆ་འཕྲིན་ལག་ཁྱེར་ཁ་པར་ལས་ཁུངས་སུ་སྤར་ཏེ། ལས་ཁུངས་དེའི་འགན་འཛིན་གཞོན་པའི་ལས་འགན་འཁུར་ཡོད་འདུག བསྟན་དར་གྱི་ནང་མིའི་ལོ་རྒྱུས་ཁ་གསལ་ཤེས་རྟོགས་ཐུབ་མེད་ཀྱང༌། ཁོང་གི་ཕ་མ་གཉིས་ད་ལྟ་ལྷ་སར་བསྡད་ཡོད་པའི་གནས་ཚུལ་འདུག ཅེས་གསུངས་སོང༌།
དེ་དེ་བཞིན་དུ་བགྱིའོ།
འོན་ཀྱང་ད་དུང་དེར་ལམ་ཐག་ཅུང་རིང་པོ་རྒྱུད་དགོས་པ་འདྲ།
རྒྱ་སྤྲང་དེ་ཚོར་བོད་པ་གསོད་རྒྱུ་ལས་ཤིག་གསོད་རྒྱུར་བཞེད་སྣང་ཆེ་བ་འདྲ།
ནམ་ཞིག་ཁོང་ཚོར་འབྲས་བུ་སྨིན་ཡོང་།
དྲིན་ཆེན་ཕ་མ་དེ་གཉིས་ལ་དམིགས་གསལ་གྱིས་སྙིང་མ་རྗེ། སྐྱབས་བསླུ་མེད་ཡིན་བཞིན་ནོར་བུ་ལགས། མི་ཉེས་མེད་གངས་ཅན་བོད་པ་འདི་ཚང་གི་ལས་དབང་ལ་འགྱུར་བ་ཞིག་འགྲོ་གྲབས་ཡོད་པར་ཤོག