ཆོས་ལུགས་ཁག་ཚང་མས་འཚེ་བ་མེད་པ་གཙོ་བོར་འཛིན་གྱིན་ཡོད། འཛམ་གླིང་ཞི་བདེ་ཡི་མིང་ཁྱེར་ཏེ་དམག་དཔུང་འབོར་ཆེན་ཕུང་གསོག་བྱེད་པ་ཡོང་གིན་ཡོད། འཚེ་བ་མེད་པ་ཡོང་ཐབས་སུ་དམག་དཔུང་བསྡུ་སྐོང་བྱེད་པ་ཧ་ཅང་དཀོན། དེར་བརྟེན། ཞི་བདེ་དང་འཚེ་བ་མེད་པ་གཉིས་ཀྱི་དོན་དག་འདྲ་བོ་ཡིན་རུང༌། མཚམས་རེར་འཚེ་བ་མེད་པ་ཞི་བདེ་ལས་ནུས་སྟོབས་ཆེ་བ་ཆགས་ཀྱིན་ཡོད། ཅེས་༧གོང་ས་མཆོག་གིས་གསུངས།
རྒྱ་གར་ཆོས་རིག་ལེགས་བྱང་སྲུང་སྤེལ་ཚོགས་པའི་གོ་སྒྲིག་འོག ཕྱི་ཚེས་ ༥ ཉིན་གྱི་ཞོགས་པར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། འཛམ་གླིང་ཞི་བདེ་ཡོངས་ཐབས་ལ་རྒྱ་གར་གྱི་ལྟ་སྟངས། ཞེས་བའི་རྒྱ་གར་ཆོས་ལུགས་རིས་མེད་ཀྱི་ཞི་བདེ་ལྷན་ཚོགས་ཐེངས་ ༢ དེ་སྐོང་ཚོགས་གནང་ཡོད་པ་དང༌། ལྷན་ཚོགས་དེའི་སྐུ་མགྲོན་གཙོ་བོར་སྤྱི་ནོར་༧གོང་ས་མཆོག་དང་དཔལ་རྒྱལ་བ་ཀརྨ་པ། རྒྱ་གར་གྱི་ཨཅརྱ་སའོ་མའེ་ངྷན་ནན་ཏི་དང་སའོ་མའེ་ཅེ་ཐི་ཨ་ནན་ཏི། ཨ་ཅརྱ་ཤེ་རེ་རོབ་ཅན་ངྷི་ར་རྗེ་བཅས་ཧིན་ངྷི་དང་རྗེན་སོགས་ཆོས་ལུགས་རིས་མེད་ཀྱི་དབུ་ཁྲིད་རྣམ་པ་བཅས་གདན་ཞུ་གནང་ཡོད་པ་དང༌། བོད་གཞུང་གི་བཀའ་བློན་རྣམ་པ་དང་སྤྱི་འཐུས་རྒྱུན་ལས། གཞན་ཧི་མ་ལ་ཡའི་རི་རྒྱུད་ཀྱི་སློབ་གྲྭ་དང་ཆོས་ཀྱི་བསྟི་གནས་ཁག་གི་སྐུ་ཚབ། ངྷ་རམ་ས་ལ་ཁུལ་གྱི་རྒྱ་གར་ཡུལ་མི་དང་བོད་རིགས་མང་ཚོགས་བཅས་མི་གྲངས་ ༡༥༠ ཙམ་ཕེབས་ཡོད།
སྐབས་དེར་རྒྱ་གར་ཧིན་ངྷིའི་ཆོས་ལུགས་ཀྱི་དབུ་ཁྲིད་ཨཅརྱ་སའོ་མའེ་ངྷན་ནན་ཏི་མཆོག་གིས་བཀའ་སློབ་གནང་དོན། དེ་རང་འདིར་བོད་མིའི་ཆོས་སྲིད་གཉིས་ཀྱི་དབུ་ཁྲིད་༸ཏཱ་ལའི་བླ་མ་མཆོག་གཙོས་པས་ཆོས་ལུགས་ཁག་གི་དབུ་ཁྲིད་མང་པོ་ཞིག་མཉམ་འཛོམས་ཀྱིས་འཛམ་གླིང་ཞི་བདེ་ཐད་སྐད་ཆ་བཤད་རྒྱུ་བྱུང་བ་དེ་ཧ་ཅང་གི་གཟི་བརྗིད་ཆེན་པོ་དང་དོན་སྙིང་ལྡན་པ་ཞིག་རེད། ལྷག་པར་དུ་གོང་ས་༸ཏཱ་ལའི་བླ་མ་མཆོག་གིས་སྔར་འཛམ་གླིང་ཞི་བདེའི་གཟེངས་རྟགས་བཞེས་མྱོང་ཡོད་ལ། ད་དུང་མུ་མཐུད་དུ་འཛམ་གླིང་ཞི་བདེའི་ཆེད་རླབས་ཆེན་གྱི་ཕྱག་ལས་མང་པོ་གནང་མུས་ཡིན། ནང་པ་སངས་རྒྱས་པ་དང་ཧིན་ངྷི། རྗེན་སོགས་ཆོས་ལུགས་གང་ཞིག་ཡིན་རུང་ཆོ་ཀ་ཕྱག་ལེན་དང་ལྟ་གྲུབ། ཉམས་ལེན་བྱེད་སྟངས་སོགས་ཕྲན་བུ་མི་འདྲ་བ་ཡོད་ཀྱང༌། རྩ་བའི་ཆ་ནས་ཆོས་ལུགས་ཚང་མའི་དགོངས་དོན་སྙིང་བོ་འཛམ་གླིང་ཞི་བདེ་དང༌། འགྲོ་བ་མིའི་རིགས་ལ་གནས་སྐབས་དང་མཐར་ཐུག་གི་ཕན་བདེ་བསྒྲུབ་རྒྱུ་དེ་ཡིན་སྟབས། ཆོས་ལུགས་ཁག་གིས་ནུས་པ་གཅིག་སྒྲིལ་བྱས་ཏེ། འཚེ་བ་མེད་པ་དང་འཛམ་གླིང་ཞི་བདེ་ཆེད་འབད་བརྩོན་བྱ་དགོས། ཞེས་གསུངས་སོང༌།
དེའི་རྗེས་༸གོང་ས་མཆོག་གིས་བཀའ་སློབ་གནང་དོན། ང་ཚོ་བོད་པའི་ལོ་རྒྱུས་ནང༌། བོད་མི་རིགས་དང་ཆོས་ལུགས། རིག་གཞུང་བཅས་རྒྱ་གར་དང་འབྲེལ་བ་གཏིང་ཟབ་ཡོད་པ་ཞིག་ཆགས་བསྡད་ཡོད་ལ། རྒྱ་གར་ནི་ལོ་ངོ་སྟོང་ཕྲག་དུ་མའི་སྔོན་ནས་རིག་གཞུང་འདྲ་མིན་དར་རྒྱས་ཕྱིན་ཞིང༌། ཡི་ཤུ་དང་ཇེའུ། ཧིན་ངྷི་དང་ནང་པ། རྗེན་དང་ཁ་ཆེ་སོགས་ཆོས་ལུགས་འདྲ་མིན་ལ་དད་མོས་བྱེད་མཁན་ཚོས་ཕན་ཚུན་འཆམ་མཐུན་མཉམ་གནས་ཀྱིས་འཚོ་སྡོད་བྱས་ཡོད་པའི་རྒྱལ་ཁབ་ཅིག་ཡིན་སྟབས། ང་ཚོ་ཆོས་བརྒྱུད་མི་འདྲ་བའི་མི་སྣ་ལྷན་འཛོམས་ཀྱིས་འཛམ་གླིང་ཞི་བདེ་དང་སྤྱི་ཚོགས་བདེ་དོན་ལ་མཉམ་དུ་ལས་ཀ་བྱེད་ཐུབ་ཀྱིན་ཡོད། ཆོས་ལུགས་ཁག་ཚང་མས་འཚེ་བ་མེད་པ་གཙོ་བོར་འཛིན་གྱིན་ཡོད། འཛམ་གླིང་ཞི་བདེ་ཡི་མིང་ཁྱེར་ཏེ་དམག་དཔུང་འབོར་ཆེན་ཕུང་གསོག་བྱེད་པ་ཡོང་གིན་ཡོད། འཚེ་བ་མེད་པ་ཡོང་ཐབས་སུ་དམག་དཔུང་བསྡུ་སྐོང་བྱེད་པ་ཧ་ཅང་དཀོན། དེར་བརྟེན། ཞི་བདེ་དང་འཚེ་བ་མེད་པ་གཉིས་ཀྱི་དོན་དག་འདྲ་བོ་ཡིན་ཡང༌། མཚམས་རེར་འཚེ་བ་མེད་པ་ཞི་བདེ་ལས་ནུས་སྟོབས་ཆེ་བ་ཆགས་ཀྱིན་ཡོད།
ནང་སེམས་ཀྱི་ཐོག་ནས་བྱམས་པ་དང་བརྩེ་བ། སྙིང་རྗེ་སོགས་ཀྱི་ཀུན་སློང་དང་ལྡན་པ། གཞན་གྱི་བདེ་དོན་ལ་སེམས་ཁུར་དང་ཐོབ་ཐང་ལ་བརྩི་བཀུར་ཡོད་པའི་ཐོག གཞན་ལ་ཉེས་རྡུང་ལྟ་བུ་ཏོག་ཙམ་བྱུང་ཡང་འཚེ་བའི་ལས་སུ་འགྲོ་བ་མ་རེད། གཞན་ལ་མགོ་བསྐོར་དང་བསླུ་བྲིད། ཕ་རོལ་བོ་རྩ་བརླག་གཏོང་འདོད་ཀྱི་ཀུན་སློང་ངན་པ་ཞིག་བཅངས་ཏེ། ཁ་མཁས་ཚིག་སྙན། གདོང་ལ་འཛུམ་མདངས་ལྡན་པ་བྱས་ཀྱང༌། ཕྱིའི་ལུས་ངག་གི་རྣམ་འགྱུར་ལ་འཚེ་བ་མེད་པ་ལྟ་བུར་མཐོང་ཡང༌། གཞན་ལ་བསླུ་བྲིད་དང་གནོད་སེམས་ཀྱི་ཀུན་སློང་དང་འགྲོག་ཡོད་སྟབས་འཚེ་བའི་ལས་ཆགས་ཀྱིན་ཡོད། སྤྱི་བཏང་འཚེ་བ་མེད་པ་ཟེར་བ་དེ་ཚིག་ཙམ་ལ་བལྟ་རྒྱུ་མ་ཡིན་པར་ནང་སེམས་ཀྱི་ཀུན་སློང་གཙང་མིན་ལ་རག་ལས་ཡོད། ཅེས་དང༌། ངས་དེ་རིང་ཁྱེད་ཅག་ལ་གསལ་བོ་བཟོ་རྒྱུ་ཞིག་ལ། ང་རང་འགྲོ་བ་མི་ཞིག་ཡིན་པའི་ཆ་ནས་འགྲོ་བ་མིའི་རིན་ཐང་དང༌། ཐོབ་ཐང་སྲུང་
སྐྱོབས་དེ་ངའི་ལས་འགན་དང་པོ་ཡིན་ལ། ང་རང་ནང་པའི་དགེ་སློང་ཞིག་ཡིན་པའི་ཆ་ནས་ནང་ཆོས་དར་སྤེལ་དང༌། འཛམ་གླིང་ཆོས་ལུགས་འཆམ་མཐུན་མཉམ་གནས་དེ་ངའི་ལས་འགན་གཉིས་ཡིན། ང་རང་བོད་པ་ཞིག་ཡིན་པ་དང་ལྷག་པར་དུ་༸ཏཱ་ལའི་བླ་མ་ཡིན་པའི་ཆ་ནས་བོད་པའི་རྩ་དོན་དེ་ངའི་ལས་འགན་གསུམ་པ་དེ་ཆགས་ཡོད། ཅེས་གསུངས་སོང༌།
གཞན། ཐེངས་འདིའི་ཞི་བདེ་ལྷན་ཚོགས་དེའི་སྟེང༌། རྒྱ་གར་ཆོས་ལུགས་ཁག་གི་མི་སྣ་ཚོས་༸གོང་ས་མཆོག་ལ་རྒྱ་གར་གཞུང་གིས་མི་སེར་གྱི་ཆེས་བསྟོད་འབུལ་དགོས་པ་དང༌། བོད་མི་སྐྱབས་བཅོལ་བ་རྣམས་ལ་རྒྱ་གར་གྱི་མི་སེར་ལག་ཁྱེར་སྤྲོད་དགོས་པ་བཅས་ལ་རྒྱ་གར་གྲོས་ཚོགས་ནང་གླེང་སློང་བྱ་དགོས་པའི་འབོད་སྐུལ་ཡང་ཞུས་སོང༌། ཉིན་གུང་ཆུ་ཚོད་ ༡ སྟེང་བོད་གཞུང་ཟློས་གར་ཁང་དུ་གཞས་སྣ་འཁྲབ་སྟོན་དང༌། རྒྱ་གར་ཐུགས་རྗེ་ཆེ། ཞེས་པའི་གློག་བརྙན་གཟིགས་འབུལ་གྲུབ་རྗེས། ཟློས་གར་སྤོ་ལོ་རྩེད་ཐང་ནས་སྐུ་མགྲོན་ཡོངས་ལ་ཉིན་གུང་གསོལ་ཚིགས་འདེགས་འབུལ་ཞུས་སོང༌།
ཡག་པོ་འདུག།