ཟླ་འདིའི་ཚེས་ ༡༢ ཉིན་རྒྱ་བལ་འབྲུག་གསུམ་གྱི་ས་གནས་ ༢༢༠ དང༌། ཕྱི་རྒྱལ་དོན་གཅོད་ ༩ ཡི་ཁྱབ་ཁོངས་ས་གནས་ ༤༠ ལྷག་བཅས་ཁྱོན་བསྡོམས་ས་གནས་མི་འདྲ་བ་ ༢༦༠ ལྷག་ལ་དུས་གཅིག་ཏུ་མི་འབོར་ཞིབ་བཤེར་བྱ་རྒྱུ་ཡིན་འདུག
བོད་གཞུང་འཆར་འགོད་ལྷན་ཁང་གིས་ཕྱི་ཚེས་ ༩ ཉིན་བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བཙན་བྱོལ་བོད་མིའི་མི་འབོར་ཞིབ་བཤེར་ཐེངས་གཉིས་པའི་ཐད་གསར་འགོད་གསལ་བསྒྲགས་ཤིག་བསྐྱངས་ཡོད་པ་དང༌། སྐབས་དེར་འཆར་འགོད་ལྷན་ཁང་གི་འགན་འཛིན་དཀོན་མཆོག་བརྩོན་འགྲུས་ལགས་ཀྱིས་གསུངས་དོན། འཆར་འགོད་ལྷན་ཁང་ནི་བཙན་བྱོལ་བོད་མིའི་ལས་ཁུངས་ཁག་ལས་གསར་ཤོས་དེ་ཆགས་ཡོད་ལ། ༡༩༨༥ ལོར་བཙན་བྱོལ་བོད་མིའི་ཕུགས་རྒྱང་རིང་བོའི་གནས་སྟངས་ལ་དམིགས་ཏེ་ཆེད་མངགས་མི་སྣ་གསོ་སྐྱོང་གི་འོག་འཆར་འགོད་ཐད། དོ་སྣང་གནང་དགོས་པར་བསམ་ཚུལ་བྱུང་བ་བཞིན་ ༡༩༨༨ ལོར་བོད་གཞུང་འཆར་འགོད་ལྷན་ཁང་འདི་དབུ་བརྙེས་པ་རེད། འཆར་འགོད་ལྷན་ཁང་བཙུགས་ཏེ་ལོ་གཅིག་གཉིས་རིང་དཀའ་ངལ་གང་འཚམ་འཕྲད་ཡོད། འཆར་གཞི་ཞིག་གི་ནང་དུ་མི་འབོར་གྱི་གྲངས་ཀ་དང་ཤེས་ཚད། དཔལ་འབྱོར་དང་ཁོར་ཡུག་གི་གནས་སྟངས་སོགས་ལ་རྒྱུས་ལོན་བྱ་རྒྱུ་གལ་ཆེན་ཆགས་ཡོད་སྟབས། སྤྱི་ལོ་ ༡༩༩༨ ལོར་མི་འབོར་ཞིབ་བཤེར་ཐེངས་དང་པོ་དེ་ཞུས་ཡོད་པ་དང༌། སྐབས་དེར་ཞིབ་ཚགས་པོ་ཞིག་དང་གཙང་མ་ཞིག་བྱུང་ཐུབ་མེད། ༡༩༥༩ ལོའི་སྐབས་སུ་བཙན་བྱོལ་བོད་མིའི་མི་འབོར་ཁྲི་ ༨ ཡོད་ཟེར་ལ། ༡༩༩༨ ལོར་བཙན་བྱོལ་བོད་མིའི་འབོར་ཆིག་འབུམ་གཉིས་ཁྲི་གསུམ་སྟོང་ ༡༢༣༠༠༠ ཡོད། སྔར་ལོ་གསུམ་བཅུའི་དུས་དྲན་ནས་བོད་ནང་གི་གནས་སྟངས་ཛ་དྲག་ལ་གྱུར་བས་རེ་ཞིག་ཕྱིར་འགྱངས་བྱ་དགོས་བྱུང་ཡོད། ད་ལོ་འཛིན་སྐྱོང་བཀའ་ཤག་གིས་སྒྲིག་འཛུགས་ཁག་གི་ལས་གཞི་ལ་རྒྱུན་དུ་འཐུས་ཤོར་གཏོང་མི་རུང་ཚུལ་གསུངས་པ་བཞིན་ཐེངས་གཉིས་ལ་མི་འབོར་ཞིབ་བཤེར་བྱ་གཏན་འཁེལ་ཡོད། ཅེས་ངོ་སྤྲོད་གནང་བྱུང༌།
གསལ་བསྒྲགས་ནང་བཀོད་དོན་ལྟར་ན། ཟླ་འདིའི་ཚེས་ ༡༢ ཉིན་རྒྱ་བལ་འབྲུག་གསུམ་གྱི་ས་གནས་ ༢༢༠ དང༌། ཕྱི་རྒྱལ་དོན་གཅོད་ ༩ ཡི་ཁྱབ་ཁོངས་ས་གནས་ ༤༠ ལྷག་བཅས་ཁྱོན་བསྡོམས་ས་གནས་མི་འདྲ་བ་ ༢༦༠ ལྷག་ལ་དུས་གཅིག་ཏུ་མི་འབོར་ཞིབ་བཤེར་བྱ་རྒྱུ་ཡིན་འདུག དཀོན་མཆོག་བརྩོན་འགྲུས་ལགས་ནས་མུ་མཐུད་གསུངས་དོན། བཙན་བྱོལ་བོད་མིའི་མི་འབོར་ཞིབ་བཤེར་ཐེངས་གཉིས་པ་བྱ་དགོས་པའི་དམིགས་ཡུལ་ནི། ལོ་ངོ་ ༥༠ འཁོར་བའི་འཛམ་གླིང་ནང་གི་བཙན་བྱོལ་བོད་མི་སྤྱིའི་གནས་སྟངས་རྟོགས་སླད་དང༌། རྒྱ་བལ་འབྲུག་གསུམ་ནང་གི་གཞིས་ཆགས་ཁག་གི་སྤྱི་ཚོགས་ཡར་རྒྱས་དང་སྲ་བརྟན་བཟོ་རྒྱུའི་ལས་འཆར་ཁག་ལ་མི་འབོར་གཞིར་བཟུང་གི་སྤྱི་ཚོགས་དང་དཔལ་འབྱོར། ཤེས་ཡོན་དང་འཕྲོད་བསྟེན་སོགས་ཀྱི་གནས་ཚུལ་ཞིབ་ཕྲ་དགོས་གལ་ཆེ་བ། དེ་བཞིན་སྤྱི་ཚོགས་ཀྱི་གནས་སྟངས་དང་མི་འབོར་གསལ་བོ་ཆགས་ན། གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག ང་ཚོ་ལ་རོགས་སྐྱོར་གནང་མཁན་གྱི་ཚོགས་པ་ཁག་སོགས་ལ་ཕན་ནུས་ཡོད་ལ། གཞུང་ལའང་སྲིད་བྱུས་གཏན་འབེབས་གནང་བར་ཕན་གི་རེད། ལས་གཞི་གཏན་འབེབས་ཀྱི་ཐབས་ཇུས་དེ་ཡང་མི་འབོར་གྱི་གྲངས་ཚད་འོག་འཐོན་གི་རེད། མི་འབོར་ཞིབ་བཤེར་བྱེད་སྟངས་འདི་ཚོགས་པ་རེ་གཉིས་དང་ས་གནས་རེ་གཉིས་ནས་ཞིབ་མཇུག་བྱས་པ་དང་མི་འདྲ་བར། འཆར་གཞི་གཏན་འབེབས་སོགས་ཀྱི་ཞིབ་མཇུག་ལ་ཕན་གི་རེད། ཅེས་གསུངས་བྱུང༌།
མི་འབོར་ཞིབ་བཤེར་བྱེད་པའི་ཉིན་དེར་༸གོང་ས་མཆོག་ནོར་གླིང་དུ་ཕེབས་པའི་ཉིན་ཡིན་སྟབས། མི་རྣམས་ཀྱིས་མི་འབོར་ཞིབ་བཤེར་ཚེས་༡༣་ལ་འཕར་འགྱངས་བྱས་རེད་ཟེར་བའི་གཏམ་ཡན་ཞིག་ཀྱང་ཁྱབ་འདུག དེར་བརྟེན་རྡ་ས་གཡས་གཡོན་གྱི་མི་མང་པོ་ཞིག་ནོར་གླིང་དུ་ཕེབས་འདུག དེའི་ཕྱི་ཉིན་ནས་ནང་ནས་བསྡད་ཀྱང་ཡོང་མཁན་མེད་པ་དང་། ཚེས་༡༤ ཉིན་མཐའ་མཇུག་གི་ཉིན་དུ་འཁེལ་པས་ཐོ་འགོད་བྱེད་མ་ཐུབ་པ་མང་པོ་ཞིག་ཡོད་ཚོད་འདུག དེར་བརྟེན་གཞུང་ཕྱོགས་ནས་གསལ་བསྒྲགས་ཤིག་བསྐྱངས་ཏེ་ཐོ་རུ་མ་འཁོད་པ་རྣམས་ཡང་བསྐྱར་ལམ་ཞིག་སྟོན་རྒྱུ་ནི་གལ་ཆེན་པོ་རེད།
མི་འབོར་ཞིབ་བཤེར་གྱི་གྲངས་ཐོ་བསྡུ་མཁན་སློབ་ཕྲུག་ལོ་བཅོ་ལྔ་བཅུ་དྲུག་ཅན་རྐྱང་རེད་ལ། ཁོང་ཚོས་མི་ཚང་རེའི་སྒོ་ཉུལ་བྱས་ཀྱང་། སྐབས་དེར་ཁྱིམ་མི་མང་པོ་ཞིག་ནང་དུ་བསྡད་མེད་པས། གྲངས་ཐོ་ཡག་པོ་ཞིག་བསྡུ་ཐུབ་མི་འདུག མི་འབར་ཞིབ་བཤེར་འདི་གལ་ཆེན་པོ་ཞིག་ཡིན་ན། གཞུང་གི་ལས་རྣམ་པ་དངོས་སུ་ས་གནས་ས་ཐོག་འགྲོ་དགོས་པ་དང་ཡང་ན། ས་གནས་འགོ་འཛིན་དང་ལས་བྱེད་ཀྱིས་བྱེད་ན་ལས། སློབ་ཕྲུག་འགའ་བཏང་འདུག་པ་འདི་ནི་འཐུས་ཤོར་ཆེན་པོ་ཞིག་སྟེ། ཐེངས་འདིར་གྲངས་ཐོ་ཡག་པོ་ཞིག་གམ་ཆ་ཚང་བ་ཞིག་ལེན་ཐུབ་མེད་པ་གསལ་རེད།
མི་འབོར་ཞིབ་གཤེར་འདི་བོད་ཕྱི་ནང་གཉིས་ཀར་བྱེད་ཐུབ་ན་བཟང་མོད་ཀྱང་བཙན་བྱོལ་གཅིག་པུ་ལ་དེ་འདྲའི་དགོས་བ་རྒྱུ་མཚན་ཞིག་མ་མཐོང་། བསམ་ཚུལ་ཡིན་ན་ལོ་ངོ་ལྔ་བཅུའི་ཡར་སྔོན་ལ་བོད་མི་ས་ཡ་དྲུག་ཞེས་བ་དེ་ད་ལྟ་ས་ཡ་དྲུག་ལས་མང་ཤས་ཆེ་རྒྱུ་མཚན་ནི་མིའི་རིགས་ཀྱི་འཕེལ་ཁ་འདི་ཧ་ཅང་མགྱོགས། འོན་ཀྱང་བར་སྐབས་ཤིག་ནས་རྒྱ་ནག་གཞུང་གིས་འཆར་ལྡན་བུ་སྐྱེས་ཞེས་མིང་ཡག་པོ་ཞིག་གི་འོག་ནས་བུད་མེད་ཕལ་ཆེར་གྱི་སྐྱེ་སྒོ་བཀག་ཡོད་དེ་དང་ཕྱོགས་མཚུངས་བཙན་བྱོལ་ནང་གི་བུད་མེད་ཚོས་ཀྱང་རྒྱ་ནག་གི་ཁྲིམས་ལག་བསྟར་གྱི་ཚུལ་དུ་རང་འགུལ་གྱིས་ཕྲུ་གུ་གཉིས་ལས་མང་བ་སྐྱེས་འཇུག་གིས་མེད། འདི་ནི་མི་འབོར་འཕེལ་གྲིབ་ཀྱི་བཀག་རྡོ་ཞིག་ཡིན།