ང་ཚོས་གཞིས་ལུས་མི་མང་ལ་འགན་ཞིག་འཁུར་དགོས་ཡོད།

བོད་ནང་གི་བོད་མི་ཚོར་རྒྱ་གཞུང་གིས་བསྒྲགས་པ་ལྟར་བདེ་སྐྱིད་ལྡན་པ་ཞིག་ཡོད་ན། བཙན་བྱོལ་བོད་མི་ཚོས་བོད་ཀྱི་གནད་དོན་མེད་ཅེས་ཁས་ལེན་བྱ་རྒྱུ་མ་ཟད། རྒྱ་གཞུང་ལའང་དགོངས་སེལ་ཞུ་རྒྱུ་ཡིན། ཅེས་༧གོང་ས་མཆོག་གིས་གསུངས་ཡོད།

ཟླ་ ༥ བའི་ཚེས་ ༢༨ ཉིན་གྱི་ཕྱི་དྲོ་༧གོང་ས་སྐྱབས་མགོན་ཆེན་པོ་མཆོག་བཞུགས་སྒར་ནས་ཆིབས་བསྒྱུར་གྱིས་ཡུ་རོབ་ཌེན་མག་རྒྱབ་ཁབ་དུ་ཞབས་སོར་བདེ་བར་འཁོད་ཡོད་པ་དང་། ཕྱི་ཚེས་ ༣༠ ཉིན་ཌེན་མག་རྒྱལ་ཁབ་ཀྱི་སྲིད་བློན་ Lars Lokke Rasmussen མཆོག་དང་མཇལ་འཕྲད་གནང་རྗེས་རྒྱལ་ས་ཁོ་བྷན་ཧཱ་གྷན Copenhagen དུ་ཡོད་པའི་བྷི་ལ་འདུ་ཚོགས་བསྟི་གནས་ཁང་ Bella Convention Center ཁང་དུ་ཡུལ་དེའི་མི་མང་དང་ཌན་མག་གནས་སྡོད་བོད་རིགས། དེ་བཞིན་རྒྱ་རིགས་མི་དམངས་བཅས་མི་གྲངས་ ༣༦༠༠ ལྷག་ལ་སློབ་དཔོན་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་དང་། སློབ་དཔོན་ཀ་མ་ལ་ཤིས་མཛད་པའི་སྒོམ་རིམ་བར་པའི་གསུང་ཆོས་དང་བཀལ་སློབ་གནང་ཡོད། སྐབས་དེར། ༧གོང་ས་མཆོག་གིས། ང་རང་ཉིད་ཆོས་ལུགས་གཅིག་ནས་གཅིག་ལ་བསྒྱུར་བར་འདོད་མོས་མེད་མཁན་ཞིག་ཡིན་སྟབས། མི་སུ་ཡིན་རུང་ནང་པའི་ཆོས་ལུགས་ལ་འགྱུར་ཐབས་མ་གནང་རོགས། ཞེས་དང་། ནུབ་ཕྱོགས་རྒྱལ་ཁབ་ཀྱི་སྔ་མོའི་ཆོས་ལུགས་ཡེ་ཤུའི་ཆོས་ཡིན་སྟབས། སོ་སོ་རང་གི་ཆོས་ལུགས་ལ་མུ་མཐུད་རྒྱུན་འཁྱོངས་བྱ་རྒྱུ་ལེགས་ཤོས་ཡིན་མོད། མི་སྒེར་བ་དང་བླངས་ཐོག་ནང་པའི་ཆོས་སྒོར་ཞུགས་ཤིང་ཉམས་ལེན་བྱས་ཏེ་སོ་སོར་ཕན་ཐོགས་ཡོང་གི་ཡོད་ཚེ་འགྲིག་གི་ཡོད་པ་རེད།  དེ་བས། འཛམ་གླིང་གིའགྱུར་ལྡོག་ལ་བལྟས་ཏེ་མི་ཕན་ཚུན་གཅིག་ལ་གཅིག་རྟེན་གྱི་འབྲེལ་ལམ་ཟབ་དུ་ཕྱིན་ཏེ་ཆོས་ལུགས་གཞན་ལ་བརྩི་བཀུར་དང་རྗེས་སུ་ཡི་རངས་བྱ་རྒྱུ་གལ་ཆེན་ཆགས་ཡོད། ཅེས་བཀའ་སྩལ་ཡོད་པ་དང་། ༧གོང་ས་མཆོག་ནས་ཌེན་མག་གྲོས་ཚོགས་ཀྱི་སྲིད་དོན་ཚོགས་པའི་སྐུ་ཚབ་དང་གྲོས་ཚོགས་འཐུས་མི་རྣམས་ལ་མཇལ་འཕྲད་གནང་རྗེས་ཡུལ་དེའི་ནང་གསར་འགོད་ལྷན་ཚོགས་ཤིག་བསྐྱངས་སྐབས།   བོད་རྒྱ་འབྲེལ་མོལ་གྱི་གནས་སྟངས་ཐད་གསུངས་དོན། ང་ཚོའི་ངོས་ནས་འབད་བརྩོན་ག་ཚོད་བྱས་ཀྱང་གནས་སྟངས་ལ་འགྱུར་བ་འགྲོ་གི་མི་འདུག་ལ།  རྒྱ་གཞུང་གིས་བོད་རིགས་ཡོངས་ལ་རང་སྐྱོང་ཡོང་ཐབས་ཀྱི་བསམ་ཤོག་དེར་ངོས་ལེན་བྱས་མེད། འོན་ཀྱང། ང་ཚོས་རྒྱ་ནག་མི་མང་ལ་བཅངས་པའི་ཡིད་ཆེས་ལ་འགྱུར་བ་མེད། ང་ཚོས་བོད་དོན་ལ་རྒྱུས་མངའ་ཡོད་མཁན་དང་བོད་མིར་གདུང་སེམས་མཉམ་སྐྱེད། བོད་དོན་རྒྱབ་སྐྱོར་གནང་མཁན་གྱི་རྒྱ་ནག་མི་མང་དང་འབྲེལ་གཏུགས་བྱ་རྒྱུ་འབད་བརྩོན་མུ་མཐུད་བྱེད་བཞིན་ཡོད། གལ་ཏེ། བོད་ནང་གི་བོད་མི་ཚོར་རྒྱ་གཞུང་གིས་བསྒྲགས་པ་ལྟར་བདེ་སྐྱིད་ལྡན་པ་ཞིག་ཡོད་པ་ཡིན་ན། བཙན་བྱོལ་བོད་མི་ཚོས་བོད་ཀྱི་གནད་དོན་མེད་ཅེས་ཁས་ལེན་བྱ་རྒྱུ་མ་ཟད། རྒྱ་གཞུང་ལའང་དགོངས་སེལ་ཞུ་རྒྱུ་ཡིན། ཡིན་ནའང་།  བོད་ནང་གི་བོད་མི་ཚོ་རྒྱ་གཞུང་གི་སྲིད་བྱུས་ལ་འདོད་བློ་མི་ཁེངས་པར་འཇིགས་སྣང་དང་དངངས་སྐྲག་འོག་འཚོ་བཞིན་ཡོད་ཚེ། རྒྱ་གཞུང་གིས་དེར་དགོངས་སེལ་ཞུས་ཏེ་བོད་ཀྱི་གནད་དོན་དེ་བཞིན་ངེས་པར་དུ་སེལ་དགོས་ཀྱི་རེད། རྒྱལ་སྤྱིའི་སྤྱི་ཚོགས་ཀྱིས་ཀྱང་བོད་ནང་གི་དཀའ་རྙོག་ཡོད་མེད་ཐད་དཔྱད་ཞིབ་བྱ་དགོས་ཀྱི་རེད། ཅེས། གསར་འགོད་པར་དྲིས་ལན་གནང་ཡོད།

 ཕྱི་ཚེས་ ༣༡ ཉིན་༧གོང་ས་སྐྱབས་མགོན་ཆེན་པ་མཆོག་ནས་ཌེན་མག་ནང་གནས་སྡོད་བོད་མི་དང་སི་ཌན་ནས་འབྱོར་བའི་བོད་མི། ཌེན་མག་བོད་དོན་རྒྱབ་སྐྱོར་ཚོགས་པ། བོད་རང་དབང་སློབ་ཕྲུག་ཚོགས་པ། ཌེན་མག་བོད་ཀྱི་རིག་གཞུང་ཚོགས་པ་བཅས་ཀྱི་འཐུས་མི་བཅས་མཉམ་འཛོམས་ཐོག  ༧གོང་ས་མཆོག་གིས་བོད་རིགས་རྣམས་ལ་དམིགས་བསལ་བཀའ་སློབ་གནང་དོན། ད་ལྟ་གཉན་འཕྲང་གི་དུས་སྐབས་འདིར་གཞིས་བཞུགས་བོད་མི་ཚོས་བཙན་བྱོལ་གྱི་བོད་མི་རྣམས་ལ་བློ་གཏད་བཅོལ་བཞིན་པ་ངེས་པར་དུ་སེམས་ལ་བཅངས་ཏེ་ལས་ཀ་བྱེད་དགོས་ཀྱི་རེད། གང་དུ་སྡོད་མིན་ལ་མ་ལྟོས་པར་བོད་མིའི་ཤ་ཁྲག་རུས་གསུམ་ལ་བརྗེ་པོ་རྒྱག་རྒྱུ་ཡོད་མ་རེད། ལུང་པ་གང་དུ་སོང་ཡང་བོད་པ་རེད་ཅེས་བརྗོད་པ་ལས་འགྱུར་བ་འགྲོ་རྒྱུ་གང་ཡང་མེད། བོད་ནང་གི་བོད་མི་ཚོ་རང་དབང་དང་བྲལ་བའི་དཀའ་ངལ་འོག་གནས་ཡོད་ལ། མདོར་ན་རྣམ་འགྱུར་སྟོན་སྟངས་ཏོག་ཙམ་མ་འགྲིག་པ་བྱུང་ན་སྲོག་ཤོར་བའི་ཉེན་ཁ་ཆགས་ཡོད། དེ་རིང་ཁ་སང་རྒྱ་གཞུང་གིས་བོད་མིར་ཏོག་ཙམ་དོགས་པ་བྱུང་ཚེ་འཛིན་བཟུང་དང་ཉེས་རྡུང་ཚད་ལས་བརྒལ་བ་བཏང་སྟེ་ཁག་ཅིག་རྐྱེན་འདས་དང་། མང་པོ་ཞིག་ནད་པ་ཆགས་འགྲོ་གི་ཡོད། ཛ་དྲག་གི་གནས་སྟངས་དེ་འདྲའི་འོག་རེ་བ་རྒྱག་ས་དེ་ང་ཚོ་རང་དབང་ལུང་པའི་ནང་གི་བོད་མི་ཚོར་རེ་བ་རྒྱག་གི་ཡོད་པ་རེད། བོད་རྒྱ་ཆེའི་མི་མང་གིས་ང་ཚོར་རེ་འདུན་ཤུགས་ཆེ་རྒྱག་གི་ཡོད་དུས་ང་ཚོར་འགན་ཞིག་ཡོད་པ་རེད།  ཅེས་དང་། ཁྱེད་རང་ཚོ་ས་ཕྱོགས་གང་དུ་བསྡད་ཀྱང་བོད་པ་ཡིན་བསམ་པའི་འདུ་ཤེས་དེའི་ཐོག་ནས་བོད་རྒྱ་ཆེའི་མི་མང་གི་ཚབ་བྱེད་ཐུབ་བྱ་དགོས་པ་ཧ་ཅང་གལ་ཆེན་རེད། མི་མང་གི་ཚབ་ཡག་པོ་བྱ་ཐུབ་སླད་དུ་སྤྱི་ཚོགས་གང་དུ་ཡོད་ཀྱང་མི་གཞན་གྱི་ཡིད་ཆེས་དང་ཆེ་མཐོང་བྱ་ཡུལ་ཞིག་ཆགས་དགོས་པ་ལས། རྫུན་ཤོད་པ་དང་ཚུལ་ལྡན་མིན་པའི་ལས་བྱས་པ་ཡིན་ན་མི་གཞན་གྱིས་ཆ་འཇོག་བྱེད་ཀྱི་མ་རེད། རང་ཉིད་བོད་པའི་ཚབ་ཞིག་དང་བོད་རྒྱ་ཆེའི་མི་མང་གི་མདོག་དེ་འཛམ་གླིང་འདིའི་ཐོག་བཏོན་ཐུབ་པ་ཞིག་བྱ་བར་ཡིད་ཆེས་འཕེར་བ་ཞིག་བཟོ་དགོས་སྟབས། རང་གི་སྤྱོད་ལམ་དེ་བོད་ཀྱི་རིག་གཞུང་དུ་ཡ་རབས་དང་དྲང་བོ་བྱ་རྒྱུ། བདེན་པ་བདེན་དྲང་བྱ་རྒྱུ་དེ་ཧ་ཅང་གལ་ཆེན་ཆགས་ཡོད།  ཕྱི་ལོ་ ༡༩༦༠ དང་ ༡༩༧༠ ཙམ་ལ་བཙན་བྱོལ་ནང་འཁྲུག་པ་རྒྱག་མཁན་ཧ་ལམ་གོ་རྒྱུ་མེད། བར་སྐབས་ཤིག་ནས་ཏོག་ཙམ་གོ་རྒྱུ་འདུག  དེ་རིང་ཁ་སང་རྒྱ་གར་བ་ཁག་ཅིག་གིས་སྔ་མོའི་བོད་པ་དང་དེང་སང་གི་བོད་པ་འདྲ་གི་མི་འདུག ཅེས་ང་ལ་བཤད་མཁན་ཡོང་གི་འདུག  ཁྱེད་རང་ཚོ་ཚང་མས་གཟབ་གཟབ་བྱེད་དགོས་པ་རེད། ང་ཚོའི་ཕྱོགས་ནས་བརྗོད་པ་ཡིན་ན་ང་ཚོ་འཕགས་པ་སྤྱན་རས་གཟིགས་ཀྱི་གདུལ་ཞིང་གི་མི་རེད། ང་ཚོ་ཆུང་ཆུང་གི་སྐབས་ནས་མ་ཎི་འདོན་ཤེས་པ་དང་སེམས་ཅན་གྱི་སྲོག་ལ་སྙིང་རྗེ་ཟེར་བའི་གོམས་གཤིས་ཡོད་པ་ཞིག་རེད། དྲང་པོ་མ་བྱས་པ་ཡིན་ན་ལས་རྒྱུ་འབྲས་ཞེས་སྐད་ཆ་ཤོད་རྒྱུ་ཡོད་སྟབས། ས་ཕྱོགས་གང་དུ་བསྡད་ཀྱང་བོད་རྒྱ་ཆེའི་མི་མང་གི་རེ་འདུན་འཁྱེར་ཐུབ་པ་ཞིག་དང། རེ་འདུན་མི་ལ་བཏོན་པར་མིས་ཡིད་ཆེས་འཕེར་ཐུབ་པ་ཞིག་ཡོང་སླད། རང་ཉིད་ཀྱི་སྤྱོད་ལམ་དེ་རྫུན་མི་བཤད་མཁན་ཞིག་དང་ཕྱོགས་ལྷུང་མེད་མཁན་ཞིག་བྱ་དགོས་པ་རེད། དེ་ལྟར་བྱས་ཚེ་མིས་ཡིད་ཆེས་བྱེད་ཀྱི་རེད། ཅེས་ལམ་སྟོན་བཀའ་སློབ་གནང་ཡོད་པ་དང་། ༧གོང་ས་མཆོག་ནས་ཉིན་གཉིས་ཀྱི་རིང་གི་གསུང་ཆོས་ཡོངས་སུ་གྲོལ་རྗེས་བོད་ཀྱི་བདེན་དོན་ཚོགས་པའི་ཚོགས་གཙོ་ལཱ་ཁ་རིན་པོ་ཆེས་དབུས་ཚོགས་མི་དང་ཡུལ་དེའི་བོད་མི་རྣམས་ཀྱིས་༧གོང་ས་མཆོག་ལ་བརྟན་བཞུགས་བསྟར་འབུལ་གནང་ཡོད་པ་དང་། ཕྱི་ཚེས་ ༡ ཉིན་༧གོང་ས་མཆོག་གི་ཌེན་མག་རྒྱལ་ཁབ་ཀྱི་མཛད་འཕྲིན་ཡོངས་སུ་གྲུབ་རྗེས་ཨི་སི་ལན་ཌིའི་ཆོས་ལུགས་རིས་མེད་ཀྱི་ཐུགས་སྨོན་གསོལ་འདེབས་གནང་རྗེས་ཨི་སི་ལན་ཌི་རྒྱལ་ཡོངས་གྲོས་ཚོགས་ཀྱི་དབུ་ཁྲིད་དང་མཇལ་འཕྲད་གནང་ཡོད་པ་དང་། ཕྱི་ཚེས་ ༢ ཉིན་ཨི་སི་ལན་ཌིའི་ཡེ་ཤུའི་ལྷ་ཁང་ཧོལ་གྷི་རིམ་སི་ཀལ་ཇལ་ཞེས་པའི་ནང་ཆོས་ལུགས་རིས་མེད་ཀྱི་སྐུ་ཚབ་དང་མི་མང་འདུ་འཛོམས་ཐོག་༧གོང་ས་མཆོག་ནས་བརྗོད་གཞི་བདེ་སྐྱིད་ཀྱི་རིན་ཐང་ཞེས་པའི་ཐོག་ཉིན་གྲངས་གསུམ་རིང་བཀའ་སློབ་གསུང་བཤད་གནང་གི་ཡོད་པ་རེད།

འདི་ནི་༧གོང་ས་མཆོག་ ཨི་སི་ལན་ཌིའི་ཕེབས་པ་ཐོག་དང་པོ་ཆགས་ཡོད་པ་རེད།

(པར་དང་གནས་ཚུལ་གྱུ་ཁུངས་བོད་གཞུང་དྲ་རྒྱར་བཅོལ།)