མཛངས་མའི་དབུ་རྒྱན་བསྟན་འཛིན་ཆོས་འཛོམས་ལ་ཐོབ།

༢༠༠༩ ལོའི་བོད་ཀྱི་མཛངས་མའི་དབུ་རྒྱན་དེ་ངྷ་ས་ནས་ཡིན་པ་བུ་མོ་བསྟན་འཛིན་ཆོས་འཛོམས་ལགས་ལ་ཐོབ་ཡོད་པ་རེད།

དེ་དགོང་བོད་གཞུང་ཟློས་གར་ཁང་དུ་མི་ཚོགས་ཀྱིས་ཡོངས་སུ་ཁེངས་ཤིང་། ལྟད་མོ་བ་རྣམས་ཀྱི་ཚོད་དཔག་ལྟར་ན་དེ་དགོང་གི་འདུ་འཛོམས་འདི་ནི་བོད་གཞུང་ཟློས་གར་ཁང་དུ་ད་བར་དུ་འཛོམས་པའི་མི་ཚོགས་རྒྱ་ཆེ་ཤོས་དེ་ཡིན་པར་བཤད་ལ། ཚོད་དཔག་གི་གྲངས་འབོར་ནི་མི་གྲངས་སྟོང་ཕྲག་ ༦ ལྷག་ཡིན་པར་འདོད། འདི་ལྟའི་མི་ཚོགས་འདུ་འཛོམས་ཁྲོད་དུ་ ༢༠༠༩ ལོའི་བོད་ཀྱི་མཛངས་མའི་འགྲན་ཞུགས་པ་རྣམས་ཀྱིས་མཐའ་མཇུག་གི་འགྲན་བསྡུར་གསུམ་སྟེ། དེང་རབས་དཔེ་གསར་གྱི་གྱོན་ཆས་དང་བོད་མིའི་སྲོལ་རྒྱུན་གྱི་གོན་ཆས། དེ་བཞིན་བོད་ཀྱི་མཛངས་མའི་འགྲན་ཞུགས་པ་རྣམས་ཀྱིས་དཔྱད་འདེམས་པ་དག་གི་དྲི་བར་ལན་འདེབས་བཅས་སྣ་གསུམ་འགྲན་རྗེས་ ༢༠༠༩ ལོའི་བོད་ཀྱི་མཛངས་མའི་དབུ་རྒྱན་དེ་ངྷ་ས་ནས་ཡིན་པའི་བུ་མོ་བསྟན་འཛིན་ཆོས་འཛོམས་ལགས་སུ་ཐོབ་ཡོད་པ་རེད།

བློ་བཟང་དབང་རྒྱལ་ལགས་ཀྱིས་བོད་ཀྱི་མཛངས་མའི་འགྲན་བསྡུར་གྱི་མཐའ་མའི་འགྲན་ཐེངས་གསུམ་དངོས་སུ་དབུ་འཛུགས་མ་བྱས་གོང་དུ། འགྲན་བསྡུར་འདི་ནི་བོད་མི་རྣམས་རྒྱལ་སྤྱིའི་སྡིངས་ཆར་བསླེབས་ནས་ལོ་ ༥༠ དང་། བཙན་བྱོལ་དུ་འབྱོར་ནས་ལོ་ ༥༠ འགོར་བའི་དུས་སྐབས་ཤིག་ལ་འཁེལ་སྟབས། འདི་ནི་རྒྱ་གར་གཞུང་དམངས་གཉིས་ལ་ཐུགས་རྗེ་ཆེ་ཞུ་བའི་ལས་འགུལ་ཞིག་ཡིན་ཅེས་བཤད་བྱུང་ལ། བོད་ཀྱི་མཛངས་མའི་ལས་འགུལ་གོ་སྒྲིག་པའི་ངོས་ནས་དེ་དགོང་ ༢༠༡༡ ལོའི་བཀའ་བློན་ཁྲི་པའི་འོས་གཞི་ཡང་ཁྱབ་བསྒྲགས་བྱས་ཡོད་ལ། ཁོང་ལྟར་ན་ཤེས་ཡོན་འདབ་གཤོག་གཉིས་ལྡན་དང་མི་གཞི་ལེགས་པ། མཐོང་ཐོས་ཀྱི་རྒྱ་ཆེ་བ་བཅས་ལ་བརྟེན་བཀའ་བློན་ཁྲི་པའི་འོས་གཞིར་ཧར་ཝར་ཌི་གཙུག་ལག་སློབ་གཉེར་ཁང་གི་སློབ་དཔོན་བློ་བཟང་སེང་གེ་འོས་ལ། བོད་ཀྱི་མཛངས་མའི་ལས་འགུལ་གོ་སྒྲིག་བྱེད་མཁན་གྱི་ངོས་ནས་ཁོང་ལ་འོས་ཤོག་འཕེན་རྒྱུ་ཡིན་ཅེས་ཡོངས་ཁྱབ་ཏུ་བསྒྲགས། དེ་བཞིན་ད་ལྟའི་བཀའ་ཁྲི་ལས་ཐོགས་མཁས་དབང་ཟམ་གདོང་རིན་པོ་ཆེ་མཆོག་བསྐྱར་དུ་བཀའ་ཁྲིར་འདེམ་སྲོལ་མེད་ལུགས་དང་། བོད་རིགས་གཞོན་སྐྱེས་ཚོའི་འཕྲོད་བསྟེན་ལ་བདག་པོ་རྒྱག་དགོས་ཚུལ་བཅས་དོན་ཚན་གསུམ་གྱི་སྟེང་གཏམ་བཤད་གནང་བྱུང་།

དེ་དགོང་གི་མཛངས་མའི་འགྲན་བསྡུར་གྱི་མཐའ་མའི་ལས་རིམ་ཁྲོད་དུ་ས་གནས་བོད་མིའི་གཞས་པ་དང་གཞས་མ། དེ་བཞིན་རྒྱ་གར་ཡུལ་མིའི་ཟློས་གར་སོགས་གཞས་སྣ་འཁྲབ་སྟོན་ཡང་འདུག

བུ་མོ་བསྟན་འཛིན་ཆོས་འཛོམས་ལགས་ལ་བོད་ཀྱི་མཛངས་མའི་དབུ་རྒྱན་དང་ཧིན་སྒོར་འབུམ་གཅིག་ཐོབ་ཡོད་ལ། མཛངས་མའི་དབུ་རྒྱན་ཕུད། འགྲན་རྩོད་ཨང་དང་པོ་ནི་རྡོ་རྗེ་གླིང་ནས་ཡིན་པའི་ངག་དབང་ཆོས་དབྱངས་ལགས་ལ་ཐོབ་ཅིང་ཧིན་སྒོར་ཁྲི་ ༥ ཡི་གཟེེངས་རྟགས། ཨང་གཉིས་པ་རྡེར་ལྡུན་ནས་ཡིན་པ་བུ་མོ་སྒྲོལ་དཀར་ཡིན་པ་དང་། ༢༥༠༠༠ ཐོབ་ལ། ངོ་སོའི་གཟེངས་རྟགས་ཆེད་སྦིར་ནས་ཡིན་པའི་བུ་མོ་ཡེ་ཤེས་ལྷ་མོ་ལགས་ལ་བྱ་དགའ་ཧིན་སྒོར་ ༥༠༠༠ བཅས་ཐོབ་ཡོད་པ་རེད།