༧གོང་ས་མཆོག་དགོང་གྲངས་ ༧༤ བཞེས་པའི་འཁྲུངས་སྐར།

སྔ་ལོར་འབྲེལ་མོལ་ཐེངས་བརྒྱད་པའི་སྐབས་ྋགོང་ས་ཆེན་པོའི་སྐུ་ཚབ་རྣམ་པས་རང་སྐྱོང་ཡོང་ཐབས་ཀྱི་བསམ་འཆར་ཡིག་ཐོག་ཏུ་ཕུལ་ཟིན་པ་དེར་བོད་མིའི་འབྱུང་འགྱུར་གྱི་མངོན་འདོད་ཆ་ཚང་གསལ་སྟོན་བྱས་ཡོད་ཅིང་། དེ་ནི་ྋགོང་ས་མཆོག་གི་བོད་ཀྱི་དཀའ་རྙོག་སེལ་ཐབས་ཀྱི་དགོངས་འཆར་རྗེས་ཤོས་དེ་ཡིན། གྲོས་གཞི་ངེས་གཏན་གྱི་བསམ་འཆར་ཕུལ་ཟིན་པ་འདིའི་ཐོག ང་ཚོའི་ངོས་ནས་འབྲེལ་མོལ་གནང་རྒྱུའི་གོ་སྒྲིག་ཡོད་མུས་ལྟར། རྒྱ་ནག་གཞུང་གིས་བརྡ་ལན་ནམ་བྱུང་དང་བསྟུན་ཏེ། འབྲེལ་མོལ་མུ་མཐུད་བྱ་རྒྱུའི་ཆོད་སེམས་ལ་འགྱུར་བ་མེད་ཟེར།

དེ་རིང་ཞོགས་པའི་ཆུ་ཚོད་ ༨ དང་ཕྱེད་ཀའི་སྟེང་། བོད་གཞུང་ཟློས་གར་ཚོགས་པའི་རོམ་མོའི་རམས་འདེགས་འོག དཔལ་རྒྱལ་བ་ཀརྨ་པ་མཆོག་གིས་དབུས་པའི་བཀའ་བློན་རྣམ་པ་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གཙོས་པའི་སྤྱི་འཐུས་རྒྱུན་ལས་རྣམ་པ། གཞུང་ཞབས་ལས་བྱེད་ཆེ་ཕྲ་དང་ལས་ཟུར་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་དབུ་ཁྲིད། དེ་བཞིན། ཐེངས་འདིར་ཆེད་དུ་ཕེབས་པའི་ཨོ་སི་ཊོ་ལི་ཡའི་གྲོས་ཚོགས་འཐུས་མི་རྣམ་པ་བཅས་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༧གོང་ས་ལྷ་མིའི་རྣམ་འདྲེན་མཆོག་དགོང་གྲངས་ ༧༤ བཞེས་པའི་སྐུའི་འཁྲུངས་སྐར་གྱི་མཛད་སྒོར་ཞུགས།

སྐབས་དེར་ཆོས་རིག་བཀའ་བློན་ཚེ་རིང་འཕུན་ཚོགས་མཆོག་གིས་ཞབས་ལོ་ ༢༥ འཁོར་བའི་གཞུང་ཞབས་ལས་བྱེད་རྒན་གྲས་རྣམ་པར་ལག་སྐྱེས་དང་། གཞུང་ཞབས་ལས་བྱེད་གཟེངས་ཐོན་གཉིས་ལ་གཟེངས་བསྟོད་བྱ་དགའ་བསྩལ་ཅིང་། འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་གིས་འདོན་སྤེལ་བྱས་པའི་ ༼ANEC SOUVENIR MAGAZINE༽ ཞེས་པའི་དུས་དེབ་དང་། ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གིས་འདོན་སྤེལ་བྱས་པའི་༼གསེར་འོད་འཕྲོ་བའི་ཞབས་རྗེས ༽ཞེས་པའི་དཔེ་དེབ་དང་། སྐྱེས་གསར་ཀླུ་སྒྲུབ་ལགས་ཀྱིས་བརྩམས་པའི་༼རྒྱ་གར་ནང་པའི་གནས་ཡིག༽ ཅེས་པའི་དཔེ་དེབ་གསུམ་དབུ་འབྱེད་གནང་སོང་།

དེ་ནས་ཉེ་ཆར་ཨོ་སི་ཊོ་ལི་ཡའི་གྲོས་ཚོགས་གོང་འོག་གི་སྐུ་ཚབ་འཐུས་མི་ ༦ བཞུགས་སྒར་ལ་གཟིགས་སྐོར་དུ་ཕེབས་ཡོད་པ་ལས་གྲོས་ཚོགས་གོང་མའི་ཕྱི་འབྲེལ་སྡེ་ཚན་གྱི་འགན་འཛིན་དང་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མའེ་ཁལ་ཌན་པེ་ Michael Danby ལགས་ཀྱིས་སྤྱི་ནོར་༧གོང་ས་མཆོག་དགོང་གྲངས་ ༧༤ བཞེས་པའི་སྐུའི་འཁྲུངས་སྐར་ལ་རྟེན་འབྲེལ་ཞུས་པ་དང་སྦྲགས། ཐེངས་འདིར་ཁོང་ཅག་བཞིགས་སྒར་ངྷ་རམ་ས་ལར་བཅར་དོན། ཨོ་སི་ཊོ་ལི་ཡའི་གྲོས་ཚོགས་ཀྱིས་བོད་དོན་ཐོག་འཛིན་པའི་སྲིད་བྱུས་དང་། སྔར་ལོའི་དོན་རྐྱེན་དང་འབྲེལ་ཏེ་བོད་རྒྱའི་གནད་དོན་ཐོག་ལ་ལྟ་ཕྱོགས་བཅས་ཀྱི་སྐོར་ལ་གསུང་བཤད་གནང་སོང་།

དེའི་རྗེས་ཆོས་རིག་བཀའ་བློན་ཚེ་རིང་འཕུན་ཚོགས་མཆོག་གིས་བོད་གཞུང་བཀའ་ཤག་གི་གཏམ་བཤད་སྒྲོག་སྦྱང་གནང་དོན། སྔ་ལོ་ཕྱི་ཟླ་གསུམ་པ་ནས་ད་ལྟའི་བར་ཆོལ་གསུམ་བོད་ཀྱི་ས་ཁུལ་ཡོངས་སུ་བོད་མིའི་ཞི་རྒོལ་དང་དེ་ལ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབང་འཛིན་པ་ཚོས་ཚད་ལས་བརྒལ་བའི་དྲག་གནོན་གྱི་འོག་ལུས་སྲོག་ཤོར་བ་དང༌། རྨས་སྐྱོན་བྱུང་བ། མནར་གཅོད་ཕོག་པ། ད་ལྟ་བཙོན་ཁང་དུ་ཡོད་པའི་བོད་རིགས་དཔའ་བོ་དཔའ་མོ་རྣམས་ལ་རྗེས་དྲན་དང་ཐུགས་གསོ། གདུང་སེམས་མཉམ་བསྐྱེད་ཀྱིས་སྒོ་ནས་མཛའ་བརྩེའི་འཚམས་འདྲི་དང་ཆབས་ཅིག ཁྱེད་རྣམ་པའི་རླབས་ཆེན་གྱི་བློས་གཏོང་དེ་དག་ཆུད་ཟོས་སུ་མི་འགྲོ་བའི་ཡིད་ཆེས་ཀྱིས་དབུགས་དབྱུང་ཞུ་རྒྱུ་ཡིན།

བོད་རྒྱ་འབྲེལ་མོལ་སྐོར་ལ་བསྟན་དོན། ཀུན་གྱིས་མཁྱེན་གསལ་ལྟར། སྔ་ལོ་འབྲེལ་མོལ་ཐེངས་བརྒྱད་པའི་སྐབས་ྋགོང་ས་ཆེན་པོའི་སྐུ་ཚབ་རྣམ་པས་རང་སྐྱོང་ཡོང་ཐབས་ཀྱི་བསམ་འཆར་ཡིག་ཐོག་ཏུ་ཕུལ་ཟིན་པ་དེར་བོད་མིའི་འབྱུང་འགྱུར་གྱི་མངོན་འདོད་ཆ་ཚང་གསལ་སྟོན་བྱས་ཡོད། དེ་ནི་ྋགོང་ས་མཆོག་གི་བོད་ཀྱི་དཀའ་རྙོག་སེལ་ཐབས་ཀྱི་དགོངས་འཆར་རྗེས་ཤོས་དེ་ཡིན། འོན་ཀྱང་། རྒྱ་ཕྱོགས་ནས་བསམ་འཆར་དེའི་འབྲུ་དོན་ལ་ངོས་ལེན་ནམ། རྒྱུ་མཚན་ལྡན་པའི་འགྲེལ་བརྗོད་མེད་པར་འཁྱོག་བཤད་དང༌། ལོ་མང་སྔོན་གྱི་ྋགོང་ས་མཆོག་གི་གསུང་བཤད་ལུང་འདྲེན་གྱིས་རྒྱལ་སྤྱིའི་མང་ཚོགས་མགོ་བོ་རྨོངས་ཐབས་བྱས་པ། བསམ་བཞིན་བོད་ནང་བརྟན་ལྷིང་མེད་པ་བཟོ་བཅས་ལ་གཞིགས་ན། ད་ལྟའི་རྒྱ་ནག་དབུ་ཁྲིད་རྣམ་པར་བོད་ཀྱི་དཀའ་རྙོག་སེལ་རྒྱུའི་མོས་འདུན་ཡོད་མེད་ཀྱི་དྭོགས་གཞི་ཇེ་ཆེར་འགྲོ་བཞིན་པར་བརྟེན། ད་ཆ་རྒྱ་རིགས་མང་ཚོགས་དང་འབྲེལ་ལམ་བྱ་རྒྱུ་གལ་ཆེར་བཟུང་སྟེ་འཛམ་གླིང་ཡུལ་གྲུ་དུ་མར་རྒྱ་བོད་མཛའ་མཐུན་ཚོགས་པ་གསར་འཛུགས་དང་། བདེན་པའི་གནས་ཚུལ་དྲིལ་བསྒྲགས་གང་ཐུབ་བྱེད་བཞིན་པ་ལྟར། འབྱུང་འགྱུར་ཡང་གཞུང་མང་ཡོངས་ནས་འདིའི་ཐོག་ཤུགས་ནུས་བཏོན་གལ་ཆེ།

བོད་རྒྱ་འབྲེལ་མོལ་རྒྱུན་འཁྱོངས་བྱ་རྒྱུའི་གྲོས་གཞི་ངེས་གཏན་གྱི་བསམ་འཆར་ཕུལ་ཟིན་པ་འདིའི་ཐོག་ང་ཚོའི་ངོས་ནས་འབྲེལ་མོལ་གནང་རྒྱུའི་གོ་སྒྲིག་ཡོད་མུས་ལྟར། རྒྱ་ནག་གཞུང་གིས་བརྡ་ལན་ནམ་བྱུང་དང་བསྟུན་ཏེ་འབྲེལ་མོལ་མུ་མཐུད་བྱ་རྒྱུའི་ཆོད་སེམས་ལ་འགྱུར་བ་མེད། འཛམ་གླིང་ཁྱོན་ཡོངས་ཀྱི་ཞི་བདེ་ལ་དགའ་བའི་མང་ཚོགས་བོད་ཀྱི་རྩ་དོན་དང་། ཆོས་རིག་འཛིན་སྐྱོང་བཅས་ལ་དངོས་ཤུགས་བརྒྱུད་གསུམ་ནས་རྒྱབ་སྐྱོར་དང་མཐུན་འགྱུར་གནང་མཁན་ཡོངས་ལ་གོ་སྐབས་འདི་བཟུང་སྟེ་འཚམས་འདྲི་དང་ཐུགས་རྗེ་ཆེ་ཞེས་ཞུ་རྒྱུ་ཡིན། ལྷག་པར་སྔ་ལོ་ནས་བཟུང་རྒྱ་རིགས་རྩོམ་པ་པོ་དང་མཁྱེན་ལྡན་བོད་དོན་དང་འབྲེལ་བའི་དྲང་བདེན་གྱི་གཏམ་བཤད་དང་རྩོམ་ཡིག་སྤེལ་མཁན་མང་པོ་བྱུང་བ་རྣམས་ལ་ཡང་བཀའ་དྲིན་རྗེས་དྲན་གྱི་སྒོ་ནས་ལེགས་སོའི་བསྔགས་བརྗོད་ཞུ་རྒྱུ་ཡིན། ཅེས་སྒྲོག་སྦྱོང་གནང་སོང་།

དེའི་རྗེས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་ཀྱིས་སྤྱི་འཐུས་ལྷན་ཚོགས་ཀྱི་གཏམ་བཤད་སྒྲོག་སྦྱོང་གནང་དོན། གཞིས་ལུས་བོད་མི་རྣམས་ཀྱིས་རྒྱའི་བཙན་གནོན་འོག ལུས་སྲོག་ལོངས་སྤྱོད་བློས་གཏོང་གནང་བར་རྗེས་དྲན་དང་འབྲེལ། བཙན་བྱོལ་བོད་མི་ཚོས་སླར་ཡང་ཆོད་སེམས་བརྟན་པོས་གཞིས་ལུས་བོད་མིའི་མགྲིན་ཚབ་པ་བྱ་ཐུབ་པ་དགོས་རྒྱུ་དང་། གཞིས་ལུས་རྒྱ་ཆེའི་མི་མང་གིས་ཉག་ཕྲ་བའི་གནས་སྟངས་འོག ལྷག་བསམ་ཞུམ་མེད་ཀྱི་བོད་མི་རིགས་ཀྱི་སྙིང་སྟོབས་དེ་གང་གིས་ཀྱང་བཏུལ་མི་ཐུབ་པའི་ཁུངས་སྐྱེལ་གསལ་བོ་བྱས་ཡོད། གཞིས་ལུས་བོད་མི་རྣམས་ཀྱི་ལས་འགུལ་འཚེ་བ་མེད་པའི་ཐབས་ལམ་ཉག་གཅིག་ལ་བརྟེན་པ་ལྟར། ད་དུང་དུས་ནམ་ཡང་འཚེ་མེད་ཞི་བའི་རྒྱ་ལས་མི་འགལ་བར་ང་ཚོའི་ལས་འགུལ་གྱི་ཆ་ཙམ་ཡང་རྒྱའི་ལག་ཆར་མི་འགྲོ་བ་གནང་དགོས་པའི་འབོད་སྐུལ་ཞུ་རྒྱུ་ཡིན།

ཁོང་གིས་མུ་མཐུད་དུ་ཕྱི་རྒྱལ་ཁག་གི་བོད་རིགས་ཚོས་རྒྱ་བལ་འབྲུག་གསུམ་ནང་གི་བོད་མི་ཚོར་རོགས་སྐྱོར་གནང་དགོས་ཚུལ་གསུངས་དོན། ༧གོང་ས་མཆོག་གི་དབུ་ཁྲིད་འོག བོད་གཞིས་བྱེས་མཉམ་འཛོམས་ཡོང་བའི་དུས་ཚོད་ཅིག་ཡོང་རྒྱུ་ཡིན་པ་གདོན་མི་ཟ། ང་ཚོའི་རྩོ་དོན་ནི་བོད་ལ་ལོག་རྒྱུ་དང་། ང་ཚོ་ནི་འཐབ་རྩོད་བྱེད་མཁན་ཞིག་ཡིན་སྟབས། བཙན་བྱོལ་བོད་མི་ཚོར་ལས་འགུལ་མདུན་སྐྱོད་ཀྱི་ལས་འགན་འཕར་མ་ཞིག་ཡོད། ང་ཚོས་བོད་དོན་དང་འབྲེལ་བའི་གནས་ཚུལ་ཤེས་རྒྱུ་ཤིན་ཏུ་གལ་ཆེ་ལ། བོད་མི་ཡོད་དོ་ཅོག་གིས་ཆབ་སྲིད་ཀྱི་གོ་རྟོགས་ཚད་ལྡན་ཡོད་དགོས་ཤིང་། རང་ནུས་གང་ཡོད་ཀྱིས་ཞབས་འདེགས་ཞུ་དགོས། ཕྱི་རྒྱལ་དུ་གནས་པའི་བོད་རིགས་ཚོགས་པ་ཚོས་སོ་སོའི་འཚོ་གནས་དྲག་ཙམ་བྱུང་རྗེས། རྒྱ་བལ་འབྲུག་གསུམ་ནང་གི་གཞིས་ཆགས་སྐྱོ་བོ་ཁག་ལ་རོགས་སྐྱོར་དང་། བོད་ནང་འཕྲོད་བསྟེན་དང་ཤེས་ཡོན་བཅས་ཀྱི་ལས་འཆར་ཁག་ལ་རོགས་སྐྱོར་གནང་གལ། ཞེས་གསུངས་བྱུང་།

མཇུག་མཐར་ཁོང་གིས་རྒྱ་གཞུང་ལ་འབོད་སྐུལ་ཞུས་དོན། དེ་རིང་གི་གོ་སྐབས་འདི་བརྒྱུད་དེ་རྒྱ་ནག་གི་མགོ་ཁྲིད་ཚོར་ཞུ་རྒྱུར། ཁྱེད་རྣམ་པས་ད་ལྟའི་འཁྲུལ་སྣང་གི་བསམ་བློ་ལས་ཐོན་ཏེ། དངོས་ཡོད་གནས་སྟངས་གཞིར་བཞག་གིས་བོད་དོན་དཀའ་རྙོག་ཞི་བའི་ཐོག་སེལ་ཐབས་བརྒྱུད། རྒྱ་ནག་ཙམ་མ་ཡིན་པར་འཛམ་གླིང་ཕྱེད་ཀྱི་ས་ཁུལ་ནང་ཞི་བདེ་དང་། བརྟན་བརླིང་། འཆམ་མཐུན་ཡོང་རྒྱུར་ནན་སྐུལ་བྱེད་ཀྱིན་ཡོད། རྒྱ་ནག་མགོ་ཁྲིད་ཚོས་༧གོང་ས་མཆོག་ལས་ལྷག་པའི་ཕན་ཚུན་གཉིས་སྨན་གྱི་དགོངས་གཞི་རླབས་ཆེན་ལྡན་པའི་སྐྱེས་བུ་ཞིག་ཡོང་དཀའ་བ་གསལ་བོར་ཤེས་པའི་ཐོག གོ་སྐབས་དམ་འཛིན་མ་ཐུབ་པ་ཡིན་ན། ད་ལྟའི་རྒྱ་ནག་གི་མགོ་ཁྲིད་ཚོ་མ་འོངས་པར་རྒྱ་ནག་གི་མི་རབས་གསར་པ་རྣམས་ཀྱིས་ལོ་རྒྱུས་ཀྱི་ཉེས་འགན་སྤུངས་རྒྱུར་ངེས་པས་དེའི་འགན་ཁྱེད་ཚོས་འཁྱེར་དགོས། ཞེས་སྒྲོག་སྦྱོང་གནང་རྗེས། བོད་གཞུང་ཟློས་གར་ཚོགས་པ་དང་ཐང་སྟོང་གླུ་གར་ཚོགས་པ། དེ་བཞིན། བཞུགས་སྒར་ཉེ་ཁུལ་གྱི་རྒྱ་གར་དང་བོད་པའི་སློབ་གྲྭ་ཁག་ནས་ཞབས་བྲོ་དང་གཞས་སྣ་འཁྲབ་སྟོན་མགོ་འཛུགས་བྱས་སོང་།