ཡིད་སྐྱོའི་གནས་ཚུལ།

མདོ་སྨད་ཡུལ་གྱི་ཆོས་སྡེ་ཆེན་པོ་སྟག་ཚང་ལྷ་མོ་ཀིརྟི་དགོན་བློ་གླིང་དགེ་ལྡན་བཀྲ་ཤིས་འཁྱིལ་གྱི་གདན་རབས་ ༥༩ པ་ངེས་པ་དོན་གྱི་མཁས་གྲུབ་ཆེན་པོ་དགེ་བའི་བཤེས་གཉེན་ ༧རྗེ་བློ་བཟང་བསྟན་འཛིན་དཔལ་བཟང་པོ་མཆོག་འདི་ལོའི་བོད་ཟླ་ལྔ་པ་དང་པོའི་ཚེས་ཉེར་གསུམ་དང་ཕྱི་ཟླ་ ༦ ཚེས་ ༡༦ ཉིན་གཞན་དོན་དུ་དགོངས་པ་རྫོགས་པའི་ཚུལ་མཛད་ཀྱང་། ཉིན་ཉེར་གཉིས་རྗེས་ཀྱི་ད་ལྟ་ཡང་ཐུགས་དམ་མ་གྲོལ་བར་འོད་གསལ་མ་བུ་གཉིས་སྦྱོར་གྱི་ཚུལ་དུ་བཞུགས་བཞིན་པ་ལགས་ཤིང་། སྐུའི་གཟི་མདངས་གཏན་ནས་མ་ཉམས་པར་སེངྒེ་ཉལ་སྟབས་ཀྱི་ཚུལ་དུ་བཞུགས་བཞིན་ཡོད་འདུག

མདོ་སྔགས་རབ་འབྱམས་སྨྲ་བའི་དབང་པོ་༧དགེ་བའི་བཤེས་གཉེན་ཆེན་པོ་གང་ཉིད་ནི་ཤིང་བྱི། ཕྱི་ལོ་ ༡༩༢༤ ལོར་མདོ་སྨད་ཐེ་བོ་ཡུལ་དུ་སྐུ་འཁྲུངས། དགུང་ལོ་བཅུ་གསུམ་ཐོག་༧སྐྱབས་མགོན་ཀིརྟི་སྐུ་ཕྲེང་རིམ་བྱོན་གྱི་གདན་སའི་གཙོ་བོ་མདོ་སྔགས་བསྟན་པའི་འབྱུང་གནས་གདན་ས་ཆེན་པོ་སྟག་ཚང་ལྷ་མོ་ཀིརྟི་དགོན་དུ་ཆོས་ཞུགས་ཀྱིས་འདུལ་བ་འཛིན་པ་ཆེན་པོ་དགེ་བཤེས་ཉ་རུ་བློ་བཟང་ཤེས་རབ་ཀྱི་དྲུང་དུ་རབ་བྱུང་དང་དགེ་ཚུལ་གྱི་བསླབ་པ་མནོས། སྐུ་ཚེའི་ཐོག་མཐའ་བར་གསུམ་དུ་གདན་ས་རང་གི་དཔལ་ལྡན་སྟོད་རྒྱུད་གྲྭ་ཚང་གི་ཁྲི་པ་མཁན་པོ་དཀོན་ཚུལ་སོགས་མཁས་གྲུབ་གཉིས་ལྡན་གྱི་སྐྱེས་བུ་དམ་པ་དུ་མ་རིགས་ཀྱི་ཅོད་པན་དུ་བསྟེན་ནས་མ་གའི་འདུལ་བ་ཀ་རི་ཀ་ནས་ཡ་གའི་གསང་བ་འདུས་པའི་བར་གྱི་མདོ་རྒྱུད་དགོངས་འགྲེལ་ཡོངས་རྫོགས་ལ་གསན་བསམ་སྒོམ་པ་མཐའ་ཕྱིན་པར་མཛད།

དགུང་ལོ་ཉེར་གསུམ་ཐོག་བཀའ་དྲིན་གསུམ་ལྡན་གྱི་བླ་མ་ཡོངས་འཛིན་མགོན་པོ་ཀླུ་སྒྲུབ་ཐར་འདོད་འགྱུར་མེད་རྒྱ་མཚོ་དཔལ་བཟང་པོ་མཆོག་ལས་བསྙེན་པར་རྫོགས་པ་དགེ་སློང་གི་དངོས་པོ་བཞེས། དེ་ཡང་ཁས་ལེན་ལ་དཔའ་བ་ཙམ་མ་ཡིན་པར་སྐུ་ཚེ་ཧྲིལ་པོར་ཆོས་འདུལ་བའི་བཅས་མཚམས་ཕྲ་རགས་མཐའ་དག་སྤྱན་འབྲས་ལས་ཀྱང་གཅེས་པར་མཛད་དེ། ཕྱི་ཉན་ཐོས་ཀྱི་སྤྱོད་པས་དུལ་བ་དང་། ནང་དུ་རྣལ་འབྱོར་ཟབ་མོའི་གདེངས་དང་ལྡན་པར་མཛད་པའི་རྣམ་ཐར་བསམ་གྱིས་མི་ཁྱབ།

དགུང་ལོ་སོ་གསུམ་ཐོག་གདན་ས་རང་གི་དགེ་བཤེས་གྲས་ནས་ལེགས་འདེམས་ཀྱིས་སྐྱབས་མཆོག་ཀིརྟི་རིན་པོ་ཆེའི་མཚན་ཉིད་ཞབས་ཞུ་པར་བསྐོ་བཞག་ཞུས་པ་བཞིན། ཁོང་རིན་པོའི་ཚུལ་བསྟན་གསན་བསམ་ལ་ཕན་ངེས་ཀྱི་ཞབས་ཞུ་འཐུས་ཚང་ཞུས།

དགུང་ལོ་སོ་ལྔའི་ཐོག་དམངས་གཙོ་བཅོས་བསྒྱུར་ཟེར་བ་གནམ་ས་བླ་འོག་ཏུ་བསྒྱུར་བ་ལྟ་བུའི་དུས་འགྱུར་བྱུང་བ་ནས་བཟུང་ལོ་ཧྲིལ་པོ་ཉི་ཤུ་ལྷག་རིང་ངལ་རྩོལ་སྒྱུར་སྐོར་དང་། རྙིང་བཞི་རྩ་གཏོར་ཟེར་བས་མཚོན་རྡུང་བརྡེག་དང་བསམ་བློའི་མནར་གཅོད་འོག་སྐུ་ངལ་ཚད་མེད་མྱོང་དགོས་ཐུག་ཀྱང་། སློབ་དཔོན་དཔའ་བོས། གཡུལ་ངོ་དག་ཏུ་དཔའ་བོ་བཞིན། །ཞེས་གསུངས་པའི་དོན་ལྟར་ལྟོས་གྲུབ་ཀྱི་ལྟ་བ་དང་བྱང་ཆུབ་སེམས་དཔའི་ཉམས་ལེན་ལྷོད་མེད་བདག་གིར་མཛད་དེ་མུན་པའི་ཁྲོད་ཀྱི་ཉིན་བྱེད་ལྟ་བུའི་རླབས་ཆེན་གྱི་རྣམ་ཐར་བདག་གིར་བཞེས།

སྲིད་བྱུས་ཕྲན་བུ་གུ་ཡངས་ཀྱིས་ཆོས་ལུགས་དད་པ་རང་མོས་དང་དགོན་པ་བསྐྱར་འཛུགས་ཀྱི་དུས་སྐབས་བྱུང་བ་དང་གདན་ས་རང་ན་རྒྱུན་བཞུགས་ཀྱིས་དགེ་བའི་བཤེས་ཆེན་པོ་འབུ་སྒང་བ་ཨ་ཁུ་བརྩོན་འགྲུས་ཚང་གི་མདུན་ནས་མཛོད་འདུལ་དང་གསང་སྔགས་ལ་གསན་བསམ་མཐའ་ཕྱིན་པར་མཛད་པར་མ་ཟད། རིམ་པས་གདན་ས་རང་གི་དཔེ་ཁྲིད་ཀྱི་འགན་གཙོ་བོ་བཞེས་ནས་རྒྱལ་བའི་བསྟན་པ་ལ་བཤད་སྒྲུབ་ཀྱིས་ཞབས་ཞུ་ཐུབ་ངེས་ཀྱི་སློབ་ཚོགས་ཤིན་ཏུ་མང་པོ་གསོ་སྐྱོང་བཀའ་དྲིན་ཆེ་བར་མཛད།

ས་འབྲུག ཕྱི་ལོ་ ༡༩༨༨ ལོར་མདོ་ཕྱོགས་བཀའ་པོ་ལྔ་ལ་སྦྱངས་པ་མཐའ་སོན་པའི་འབྲས་རྟགས་དགེ་བཤེས་ལྷ་རམས་པའི་དམ་འཇོག་དང་། ཆུ་སྤྲེལ། ཕྱི་ལོ་ ༡༩༩༢ ལོར་གསང་སྔགས་རྒྱུད་སྡེ་བཞི་ལ་གསན་བསམ་སྒོམ་པ་མཐའ་སོན་པའི་འབྲས་རྟགས་སུ་སྔགས་རམས་པའི་དམ་འཇོག་མཛད་པས་མཁས་པའི་སྙན་པ་ཡོངས་སུ་གྲགས་པ་བྱུང་། དགུང་ལོ་རེ་ལྔའི་གདན་ས་རང་གི་ཚོགས་ཆེན་ཞལ་ངོའི་མཛད་འགན་བཞེས་ནས་དགོན་པའི་ཆོས་འཆད་ཉན་དང་འགྲིག་ལམ་ཀུན་སྤྱོད་གང་ཅིའི་ཐད་གཟིགས་རྟོག་ནན་པོ་རྒྱ་གཡེན་དུ་མ་སོང་བར་མཛད།

དགུང་ལོ་རེ་བརྒྱད་ཆུ་བྱ། ཕྱི་ལོ་ ༡༩༩༣ ལོར་གདན་ས་རང་གི་དཔལ་ལྡན་སྟོད་རྒྱུད་གྲྭ་ཚང་གི་མཁན་ཁྲིར་ཕེབས་ཏེ་གྲྭ་ཚང་དེ་ཆོས་གཉིས་ཀས་ཤིན་ཏུ་བཀའ་དྲིན་ཆེ་བར་བསྐྱངས། ལྷག་པར་འབུལ་དངོས་ཡོངས་རྫོགས་ཆུད་ཟོས་སུ་མ་སོང་བར་ཤ་ཁུ་ཤ་ལ་ཐིམ་པ་དང་ཇ་ཁུ་ཇ་ལ་ཐིམ་པའི་དཔེ་ལྟར་ཕྱག་རྫས་གང་ཡོད་བསོད་ནམས་ཀྱི་ཞིང་ལ་བསྔོ་བར་མཛད། དགུང་གྲངས་བདུན་ཅུ་པ་ཤིང་ཕག ཕྱི་ལོ་ ༡༩༩༥ ལོར་གདན་ས་རང་གི་དགོན་ལག་ཧོར་ཚང་ཀིརྟི་དགོན་དགེ་ལྡན་བསྟན་འཕེལ་གླིང་གི་མཁན་ཁྲིར་ཕེབས་ཏེ་དགོན་དེའི་བསྟན་སྲིད་ཉམས་པ་སླར་གསོ་དང་མ་ཉམས་གོང་སྤེལ་མཛད་དེ་མཐའ་འཁོབ་ཡུལ་དུ་བཤད་སྒྲུབ་ཀྱི་བསྟན་པའི་སྒྲོན་མེ་ཆེས་ཆེར་སྦར་བར་མཛད་པའི་རྣམ་ཐར་རླབས་ཆེན་བསྐྱངས།

དགུང་གྲངས་དོན་དྲུག་པ་ལྕགས་གླང་། ཕྱི་ལོ་ ༢༠༠༡ ལོར་གདན་ས་ཆེན་པོ་སྟག་ཚང་ལྷ་མོའི་ཚོགས་ཆེན་ཁྲི་ཐོག་ ༥༩ པར་ཕེབས་ཏེ་དགོན་པའི་ཆོས་སྲིད་ཀྱི་ལས་དོན་མཐའ་དག་འཐུས་ཤོར་ནོར་འཛོལ་མེད་པར་ཡར་ངོའི་ཟླ་བའི་དཔལ་ལ་འགྲན་ནུས་སུ་མཛད། མདོ་སྔགས་ཀྱི་གནད་ལས་འཕྲོས་པའི་བཀའ་རྩོམ་ཡང་དུ་མ་བཞུགས། མཐའ་དགུང་གྲངས་གྱ་དྲུག་པ་ས་གླང་། ཕྱི་ལོ་ ༢༠༠༩ ལོའི་བོད་ཟླ་ལྔ་པ་དང་པོའི་ཚེས་ཉེར་གསུམ་ཉིན་གཟུགས་སྐུའི་བཀོད་པ་ཆོས་དབྱིངས་སུ་བསྡུས་པའི་ཚུལ་མཛད།

 མདོར་ན། ཁོང་གི་སྐུ་ཚེ་ཧྲིལ་པོ་གྲྭ་རྐྱང་དཀྱུས་མའི་ལུགས་སུ་ལྟོ་སྐྱ་གོས་ཧྲིལ་གྱིས། ཐོས་བསམ་སྒོམ་པ་དང་། འཆད་རྩོད་རྩོམ་གསུམ། མཁས་བཙུན་བཟང་གསུམ་བཅས་ཀྱི་རྣམ་ཐར་ཡ་མ་བྲལ་བར་མཛད་པའི་བཀའ་དྲིན་སྟོང་གསུམ་ནོར་གྱིས་བཀང་ཡང་ཆ་ཤས་ཕྲ་མོ་ཙམ་ཡང་གསབ་པ་ག་ལ་ནུས་ཤིང་། མཐའ་མེད་ཀྱི་རྒྱ་མཚོ་ལྟ་བུའི་གསང་གསུམ་གྱི་རྣམ་པར་ཐར་པའི་ཆ་ཤས་ཕྲ་མོ་ཙམ་ཡང་བརྗོད་པའི་སྤོབས་པ་རྨོངས་པ་བདག་ལ་མ་མཆིས་མོད། སྐྱེ་བ་ནས་ཚེ་རབས་ཐམས་ཆད་དུ་དགེ་བའི་བཤེས་གཉེན་དམ་པ་ཁོང་གིས་དགྱེས་བཞིན་རྗེས་སུ་འཛིན་པ་དང་། གཞན་རྒྱུད་ལ་ཡང་དད་པའི་ས་བོན་ཕྲན་བུ་སྤེལ་ཐུབ་ན་སྙམ་པ། དེང་གི་སྐྱེ་བོ་མགོ་སྟོང་ཇི་སྙེད་ཅིག་གིས་ཆོས་པས་མི་ཚེར་ཆོས་སྒྲུབ་པ་ལ་མངོན་གྱུར་པའི་འབྲས་རྟགས་གང་ཡང་མི་འདུག་སྙམ་པའི་ལོག་རྟོག་སུན་འབྱིན་བཅས་ཀྱི་ཆེད་དུ་དམིགས་ཁོང་གི་མཐུན་མོང་བའི་རྣམ་ཐར་རགས་པ་ཆེས་བསྡུས་སུ་བཀོད་པ་ལགས།