ཟླ་བ་བཞིའི་སྔོན་དུ་ཕག་གི་ཆམ་ནད་མགོ་བཙུགས་པ་ནས་བཟུང་འཛམ་གླིང་ཁྱོན་ཡོངས་སུ་མི་ ༧༠༠ ལྷག་འདས་གྲོངས་སུ་སོང་ཡོད་པ་རྒྱལ་སྤྱིའི་འཕྲོད་བསྟེན་ཚོགས་པས་བཤད་འདུག
འདས་པའི་བདུན་ཕྲག་གསུམ་གྱི་ནང་དུ་ཕག་གི་ཆམ་ནད་ཕོག་པའི་མི་གྲངས་ལྡབ་གཉིས་འཕེལ་ཡོད་པ་མ་ཟད། འདི་ནི་ཆེས་མགྱོགས་ཤིང་འགོག་ཐབས་བྲལ་བའི་ནད་ཡམས་ཤིག་ཡིན་པ་ཡང་བཤད་འདུག་པ་བྷི་བྷི་སི་ཡིས་གནས་ཚུལ་སྤེལ་འདུག
འཛམ་གླིང་ཁྱོན་ཡོངས་སུ་བརྟག་དཔྱད་བྱས་ཏེ་ནད་རྟགས་དངོས་སུ་ཐོན་པའི་མི་ ༡༢༥༠༠༠ ཡོད་པའི་གནས་ཚུལ་སྤེལ་ཡོད་ན་ཡང་། དངོས་ཡོད་ཀྱི་གྲངས་ཀ་དེ་ལས་ལྡབ་འགྱུར་ཡོད་པའི་ཚོད་དཔག་བྱེད་ཀྱིན་ཡོད་འདུག རྒྱལ་སྤྱིའི་འཕྲོད་བསྟེན་ཚོགས་པའི་སྤྱི་ཁྱབ་འགན་འཛིན་ Margaret Chan མར་གྷ་རེ་ཊ་ ཆན་ གྱིས་འདི་ནི་སྔོན་ཆད་མཐོང་མ་མྱོང་བའི་ཆམ་པའི་ནད་ཡམས་ཆེ་ཤོས་ཤིག་ཆགས་རྒྱུ་རེད་ཟེར།
རྒྱ་གར་ནང་དུ་ཟླ་འདིའི་ཚེས་ ༡༦ བར་ཕག་གི་ཆམ་ནད་ཡོད་པའི་མི་ ༢༥༡ ལ་ཟིན་ཡོད་པ་རེད། མི་འདི་དག་མང་ཆེ་བ་ཨ་རི་དང་དབྱིན་ཡུལ། མ་ལེ་ཤི་ཡ། ཧོང་ཀོང་། ཨིན་ཌོ་ནེ་ཤི་ཡ་ནས་ཡོང་བའི་རྒྱ་གར་བ་རྣམས་ཡིན་འདུག རྒྱ་གར་འཕྲོད་བསྟེན་ལས་ཁུངས་ཀྱིས་བརྗོད་པ་ལྟར་ན། མི་ ༡༢༩༣ ལ་ནད་འདི་ཡོད་མེད་བརྟག་དཔྱད་བྱས་ཡོད་པ་དང་། དེའི་ནང་ནས་མི་ ༢༥༡ ལ་ཕག་ཆམ་གྱི་ནད་རྟགས་ཐོན་འདུག
བོད་ནང་དུ་སྤྱི་ཟླ་གསུམ་པ་དང་ལྔ་བའི་ནང་དུ་ཕྱི་ནས་ཡོང་བའི་ཡུལ་སྐོར་སྤྲོ་འཆམ་པ་དང་རྒྱ་མི་ཁ་ཤས་ཤིག་ལ་ནད་རྟགས་ཐོན་ཡོད་པ་ལས། དེའི་རྗེས་སུ་མི་སུ་ལའང་ནད་རྟགས་ཐོན་ཡོད་པའི་གནས་ཚུལ་མེད་ན་ཡང་། ད་ལྟ་རྒྱ་ནག་ཏུ་དངོས་སུ་ནད་རྟགས་ཡོད་པའི་མི་ ༢༠༠༠ ལྷག་ཡོད་འདུག
བཙན་བྱོལ་སྤྱི་ཚོགས་སུ་ད་ལྟ་ཕག་གི་ཆམ་ནད་ཀྱི་ནད་རྟགས་ཐོན་མེད་ན་ཡང་། རྡ་སའི་ས་ཁུལ་འདི་ནི་ཕྱི་ནས་ཡོང་བའི་ཡུལ་སྐོར་བའི་ལྟེ་གནས་ཤིག་ཡིན་སྟབས། བོད་ཀྱི་དུས་བབ་ཀྱི་གསར་འགོད་པ་ཆེད་དུ་གངས་སྐྱིད་བདེ་ལེགས་སྨན་ཁང་དུ་སོང་སྟེ་སྨན་པ་ཚེ་རིང་དོན་གྲུབ་ལ་ཁོང་ཚོར་ནད་རིགས་འདི་སྔོན་འགོག་གི་བྱ་འགུལ་གང་ཡོད་དྲིས་པའི་ལན་དུ་ཁོང་གིས་གསུངས་དོན། ང་རང་ད་ལྟ་གུང་གསེང་ནས་ཕྱིར་སླེབས་ཙམ་ཡིན། འགན་འཛིན་དང་སྨན་པ་རྣམས་ཀྱིས་འདིའི་ཐོག་ལ་བསམ་བློ་ཏན་ཏན་བཏང་ཡོད་པ་རེད་བསམ་གྱི་འདུག ཡིན་ན་ཡང་། འདི་ང་ཚོ་གཅིག་པུས་བསྒྲུབ་རྒྱུ་ཁག་པོ་རེད། སྤྱིར་བཏང་ཆམ་པ་ལ་རིགས་མང་པོ་ཡོད་པ་རེད། དེའི་ནང་ནས་ལམ་སེང་འདི་ཕག་གི་ཆམ་ནད་རེད་ཟེར་རྒྱུ་ཁག་པོ་རེད། ཆམ་ནད་ཡོད་པའི་མི་མང་པོ་རེད། དེའི་སྟེང་དུ་ནད་འདིའི་ནད་རྟགས་ཆམ་ནད་གཞན་དང་མི་འདྲ་བ་ཞེ་དྲག་ཡོད་པ་མ་རེད།
སྔོན་འགོག་གི་ཐབས་ལམ་གང་ཡོད་དྲིས་པའི་ལན་དུ་ཁོང་གིས། ལག་པ་ཡང་ནས་ཡང་དུ་འཁྲུ་དགོས་པ་དང་། མི་ཚོགས་མང་པོའི་དཀྱིལ་དུ་མི་འགྲོ་བ། སོ་སོ་ལུ་གིན་ཡོད་ན་ལུད་པ་གང་སར་མི་གཡུག་རྒྱུ་གལ་ཆེན་པོ་རེད། ཁ་ལག་ཡག་པོ་ཟས་ཏེ་གཟུགས་པོ་ཡག་པོ་ཡོད་ན་ནད་ཚ་འདིའི་རིགས་ལ་སྨན་ཟ་མི་དགོས་པར་རང་ཤུགས་ཀྱིས་དྲག་འགྲོ་བ་ཞིག་རེད་ཟེར།
བོད་གཞུང་སྨན་རྩིས་ཁང་གི་ནད་རིགས་ཉམས་ཞིབ་སྡེ་ཚན་གྱིས་བོད་ལུགས་སྨན་པ་རིག་འཛིན་བཟང་མོ་ལ་སྨན་རྩིས་ཁང་ལ་ནད་ཡམས་འདིའི་ཆེད་དུ་དམིགས་པའི་བྱ་འགུལ་ཡོད་མེད་ཀྱི་སྐོར་ལ་དྲིས་པའི་ལན་དུ་ཁོང་གིས་གསུངས་དོན། ང་ཚོ་ནད་རིགས་ཉམས་ཞིབ་སྡེ་ཚན་གྱི་ངོས་ནས་བྱ་འགུལ་དེ་འདྲ་གང་ཡང་མེད། གང་ཡིན་ཟེར་ན། ནད་ཡམས་འདི་ད་ལྟ་ང་ཚོའི་སྤྱི་ཚོགས་ནང་དུ་བསླེབས་ཡོད་པ་མ་རེད། རིལ་སྲུང་དེ་ག་དུས་ཡིན་ནའང་ཡོད་ཡོད་པ་རེད། རིལ་སྲུང་འདིས་འགོ་བའི་ཆམ་ནད་ཀྱི་རིགས་ཚང་མར་ཕན་གི་རེད། རིལ་བུ་འདི་སྐེ་ལ་བཏགས་ཏེ་དྲི་མ་རྔུབ་རྒྱུ་ཞིག་རེད། མི་ཁ་ཤས་ཀྱིས་ཟོས་པའི་ལོ་རྒྱུས་ཀྱང་གོ་རྒྱུ་འདུག
འདིའི་ཐད་གཟབ་དགོས་པའི་གནད་གང་ཡོད་དྲིས་པའི་ལན་དུ་ཁོང་གིས། ཕག་གི་ཆམ་ནད་འདི་ཧ་ཅང་འགོ་སླ་བོ་ཞིག་རེད། ཁ་རླངས་བརྒྱུད་ནས་འགོ་བ་དང་ཕག་ཆམ་ཡོད་མཁན་གྱིས་ལག་པ་འཆིངས་པའི་ཅ་དངོས་ནས་འགོ་སྲིད་པ་རེད། གཙང་སྦྲ་བྱེད་རྒྱུ་གལ་ཆེན་པོ་རེད་ཟེར།
སྤྱིར་བཏང་ཕག་ཆམ་འདི་མི་ལ་མང་བོར་མི་འགོ་ཞིང་། འགོས་ཀྱང་ནམ་རྒྱུན་ཕག་གི་བཟོ་གྲྭའི་མི་རྣམས་ལ་འགོ་བ་ཞིག་ཡིན་འདུག
ལོ་འདིར་བྱུང་བའི་ཕག་ཆམ་འདི་ཐོག་མར་སྤྱི་ཟླ་བཞི་བའི་ནང་དུ་མེག་སི་ཀོ་ནས་ངོས་འཛིན་ཐུབ་འདུག དེ་ནས་ཕྱོགས་ཡོངས་སུ་ཁྱབ་པར་བརྟེན། རྒྱལ་སྤྱིའི་འཕྲོད་བསྟེན་ཚོགས་པས་སྤྱི་ཟླ་དྲུག་པའི་ཟླ་མགོར་འདི་ནི་ནད་ཡམས་ཤིག་ཡིན་པའི་ཁྱབ་བསྒྲགས་བྱས། དུས་ཚིགས་དེ་ནི་འཛམ་གླིང་ལྷོ་ངོས་ལ་དགུན་ཁ་ཡིན་ཞིང་ཆམ་ནད་ཕོག་པའི་དུས་ཚོད་ཡིན་སྟབས། དེར་ཡོད་པའི་རྒྱལ་ཁབ་ཚོའི་ནང་དུ་ཁྱབ་པ་རེད། རྒྱལ་སྤྱིའི་འཕྲོད་བསྟེན་ཚོགས་པས་ལོ་འདིའི་ལོ་མཇུག་བར་དུ་ཕག་ཆམ་སྔོན་འགོག་གི་ཁབ་འགྲུབ་རྒྱུ་མིན་པའི་ཚོད་དཔག་བྱས་ཡོད་ན་ཡང་། དབྱིན་ཡུལ་དུ་སྔོན་འགོག་ཁབ་སྤྱི་ཟླ་བརྒྱད་པའི་ཟླ་མགོ་བར་འགྲུབ་རྒྱུ་ཡིན་པའི་གནས་ཚུལ་སྤེལ་ཡོད་པ་རེད། ད་ལྟ་ཨོ་སི་ཊོ་ལི་ཡའི་ནང་དུ་དང་བླངས་བ་མི་སུམ་བརྒྱ་ལྷག་ལ་ཕག་ཆམ་སྔོན་འགོག་གི་ཁབ་ཅིག་ཚོད་ལྟ་བྱེད་བཞིན་ཡོད་འདུག
རྭ་ལོ་ལགས་ཁྱོད་ཀྱིས་ཕག་ཤ་ཟོས་དང་སྐྱོན་མེད། ནད་རིགས་འདི་དང་པོ་ཕག་ནས་བྱུང་བ་ཞིག་ཡིན་ཡང་། ད་ལྟ་མི་བརྒྱུད་ནས་འགོས་ལས་ཕག་ལ་ཡོད་པའི་སྐད་ཆ་ཨེ་ཤེ་ཡའི་ཡུལ་དུ་མེད།
དབྱིན་ཇིའི་རྒད་པོ་ཚོ་མགོ་བདེ་བོ་ཡོད་པ་རེད་དེ། འདི་འདྲའི་ཁ་བདེ་བོ་ཞིག་ཡོད་པ་ད་བར་མ་ཤེས།
ཕག་ཆམ་འདི་ནད་གཞི་ཧ་ཅང་གི་ཛ་དྲག་ཅིག་མིན་པ་འདྲ། དེ་ལ་ཡང་བཅོས་ཐབས་ཤིག་ཡོད་པ་འདྲ། ཡིན་ནའང་ང་ཚོས་སོ་སོའི་འཕྲོད་བསྟེནལ་ངེས་པར་དུ་དོ་སྣང་བྱེད་དགོས།
དབྱིན་ཇིའི་གཏམ་དཔེ་གཅིག་ལ་ Health is wealth ཞེས་གཟུགས་གཞི་བདེ་ཐང་ནི་དོན་དངོས་ཐོག་རྒྱུ་ནོར་ཞིག་ཡིན་པ་བསྟན་ཡོད།
ཕག་ཤ་ཟ་ཉན་མི་ཉན་ཤེས་སམ། ང་ནི་ཕག་ཤ་ཟ་རྒྱུར་དགའ་བོ་ཡོད། སྔོན་མ་བྱ་ནད་བྱུང་དུས་བྱ་ཤའང་མི་ཟ་བ་དང་། ཐ་ན་བྱ་མང་པོ་གསོད་ཀྱིན་པ་མཐོང་བྱུང་། སྐུ་མཁྱེན་ལམ་སྟོན་ཞིག་གནང་རོགས། དེ་མིན་དུས་ཕག་ཤ་ཟས་ཏེ་ང་ལའང་ཕག་ནད་ཕོག་རྒྱུ་ཡིན་པ་འདྲ།
ནད་འདིའི་རིགས་སྤྱི་ཚོགས་ནང་གོ་རྟོགས་སྤེལ་རྒྱུ་དང་མི་མང་རང་ངོས་ནས་ཀྱང་ཉིན་རེའི་འཚོ་བའི་ནང་དངས་ལེན་བྱེད་རྒྱུ་གལ་ཆེན་ཡིན།
མ་གཞི་ཆམ་ནད་རིགས་སྣང་མེད་དུ་འཇོག་རྒྱུའི་གོམས་སྲོལ་ཞིག་འུ་ཅག་ལ་ཡོད་མུས་ཡིན།
སེམས་པ་ནད་པ་ཇི་རྙེད་པ། མྱུར་ཏུ་ནད་ལས་ཐར་གྱུར་ཅིག