ཟླ་འདིའི་ཕྱི་ཚེས་ ༢༠ དགོང་མོ་ཨ་མདོ་རྨ་ཆུ་རྫོང་ལ་དྲག་ཆར་བབས་ཏེ། རྫོང་མཐའ་འཁོར་གྱི་འབྲོག་སྡེ་མང་པོ་ཞིག་ལ་ཆུ་ལོག་གི་གནོན་སྐྱོན་ཚབས་ཆེན་ཕོག་ཡོད་པ་མ་ཟད། རྨ་ཆུ་རྫོང་མཚེ་རུ་མ་ཞང་གི་མིང་ལ་བཀྲ་ཁོ་ཞུ་བའི་བུད་མེད་ཁེར་རྐྱང་ཞིག་གི་བྱིས་གསུམ་ཡང་ཆུས་ཁུར་ཡོད་འདུག ཨ་མ་བཀྲ་ཁོས་བྱིས་པ་དག་སློབ་གྲྭར་བསྐྱལ་འདོད་ཀྱིས་ལོ་འགའི་གོང་ནས་རྨ་ཆུ་རྫོང་གི་ཉེ་འཁོར་དུ་ཡོང་ནས་ཞོར་ལས་ལ་བརྟེན་ཏེ། ཐབས་ཆག་གི་འཚོ་བ་ངན་ངོན་ཞིག་སྐྱེལ་གྱིན་ཡོད་ཀྱང་། ཟླ་འདིའི་ཕྱི་ཚེས་ ༢༠ ཉིན་གྱི་དྲག་ཆར་དེས་ཁོ་ཚང་གི་ཁང་ཁྱིམ་གཏོར་ཅིང་ནར་མ་སོན་པའི་བྱིས་པ་གསུམ་པོ་ཆུས་ཁུར་ཡོད་འདུག ད་ལྟ་ཤུལ་དུ་ལུས་པ་ནི་ཁོ་མོ་དང་དབང་བོ་སྐྱོན་གྱི་བུ་མོ་གཅིག རང་བྱུང་གནོད་འཚེ་འོག་བཅག་ཉིལ་དུ་བཏང་བའི་བེད་མེད་ཀྱི་བཅའ་དངོས་འགའ་བཅས་ཡིན་འདུག
གོང་གི་དོན་རྐྱེན་དེའི་ཐད་ཧི་གཟུགས་དྲ་བར་གནས་ཚུལ་སྤེལ་དོན། དྲག་ཆར་དང་ཆུ་ལོག་གིས་མི་དམངས་ཀྱི་སྡོད་ཁང་མང་པོ་ཞིག་ཆུས་ཁུར་ཏེ། རྒྱུ་ནོར་ལ་གྱོང་གུད་མི་ཆུང་བ་ཞིག་ཐེབས། དེ་ལས་གལ་ཆེ་བ་ནི་ལོ་འགའི་སྔོན་དུ་བྱིས་པ་སློབ་གྲྭར་མངག་པར་དམིགས་ནས་རྫོང་ ཐོག་ཏུ་ཡོང་སྟེ་ཞོར་ལས་བགྱིས་ནས་རང་ཁ་རང་གསོ་བྱེད་ཀྱིན་པའི་དབུལ་ཕོངས་ཀྱི་ཁྱིམ་ཚང་ཞིག་ལ་ཆུ་ལོག་དྲག་ཏུ་རྒྱུགས་ཏེ། ཁྱིམ་ཚང་གི་རེ་བའམ་བསོད་ནམས་སུ་སྒོམ་པའི་བྱིས་པ་གསུམ་པོ་ཆུས་ཁུར་སོང༌། བྱིས་པ་གསུམ་གྱི་ཨ་མ་ནི་ངང་ཚབ་དང་སྐྱོ་སྡུག་གིས་ཇི་ལྟར་གདུང་ནའང༌། རང་གི་བགྲོད་ལམ་ཡང་མི་མཐོང་བའི་མུན་ནག་གི་ཁྲོད་ནས་བྱིས་པ་ཚོ་འཚོལ་དུ་ཅི་ལྟར་འགྲོ།
ད་ནངས་ཞོགས་པར་ང་རང་ས་དེར་འབྱོར་དུས་ཁ་ཆག་སྣ་རལ་དུ་གྱུར་བའི་ཁྱིམ་ཤུལ་དག་དང༌། བྱིས་པ་གསུམ་གྱི་ཨ་མའི་ངུ་ངག་གིས་བདག་གི་མགོ་རུས་སྐམ་པོའི་གསེང་ནས་མིག་ཆུ་བཙན་གྱིས་བཙིར་བྱུང༌། ཡིད་ཕངས་པ་ཞིག་ལ། ཆུ་ལོག་གིས་གནོད་སྐྱོན་ཐེབས་པའི་ཁྱིམ་ཚང་གི་བདག་མོ་དེ། ཡོང་སྒོ་བཙལ་མཁན་ནི་དབང་བོ་སྐྱོན་ཅན་ཞིག་ཡིན་པ་མ་ཟད་བུ་མོ་ནད་པ་ཞིག་ཀྱང་གཉོར་རྒྱུ་འདུག ཁོ་མ་བུ་གཉིས་ཀྱི་རྗེས་ཕྱོགས་ཀྱི་འཚོ་བར་དཀའ་ངལ་འཕྲད་རྒྱུ་ཡིན་པ་སྨྲས་མ་དགོས་པ་ཞིག་རེད། ཁྲག་གསོག་རྣག་གསོག་བྱས་པའི་རྒྱུ་ནོར་དང་དཔྲལ་བའི་མིག་ལྟར་གཅེས་པའི་བྱིས་པ་ཚོ་ཆུས་ཁུར་སོང་སྟབས། ཁོ་མོ་གཉིས་ཡིད་ཐང་ཆད་དེ་མུ་མཐུད་དུ་འཚོ་བའི་འདུན་པ་གཞི་ནས་མི་འདུག
ང་ནི་ཉམ་ཆུང་འཁོས་ཞན་གྱི་སློབ་མ་དཀྱུས་མ་ཞིག་ཡིན་པས་རིགས་རུས་གཅིག་པའི་ཁོ་ཚོར་རོགས་རམ་ཅི་ཡང་བྱེད་མ་ཐུབ། དེ་བས་ངས་འདི་ནས་ཁ་བ་རུ་བའི་ནང་མི་སྤུན་ཟླ་དག་ལ་རེ་བ་ཞིག་ཞུ་རྒྱུ་ཡོད་པ་ནི། ཁྱེད་ཅག་གིས་ཁོང་མ་བུ་གཉིས་ཀའི་རྗེས་ཕྱོགས་ཀྱི་འཚོ་བར་ཐུབ་ཚོད་ཀྱིས་མཐུན་རྐྱེན་རེ་སྦྱོར་རྒྱུ་ཤིན་ཏུ་ནས་ཀྱང་གལ་ཆེའོ།།
འབྲེལ་གཏུགས་ཁ་པར་ ༡༣༨༩༣༩༩༥༤༡༥ ཞེས་བཀོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
བྱ་བ་འདི་ནི་གལ་ཆེན་ནང་གི་དོན་ཆེན་ཞིག་རེད། ཡིན་ནའང་། རང་ཕྱོགས་ན་བལྟ་མཁན་མེད་པར་དོ་སྣང་མ་བྱུང་བ་དང་། འཁུར་དུ་མ་བླངས་པ། ཕྱོགས་འཛིན་གྱིས་བརྡ་ཁྱབ་མ་བཏང་བ་སོགས་ཀྱི་དབང་གིས་འདི་ལས་ལྷག་པའི་ཉམ་ཆུང་ནི་མ་མཐོང་མ་ཤེས་ས་ན་ཁེངས་ནས་ཡོད་པས། ལྷག་བསམ་དག་པས་སྟོང་ཕོད་གྱི་ཕྱག་ཟུང་རིང་དུ་ཡོད་མཁན་ཚོས་ནི་འདི་དང་འདི་ལྟ་བུར་ཡོད་ཚོད་ནུས་ཚོད་ཀྱིས་མུ་ནས་མུ་རུ་སྦྱིན་གཏོང་གནང་རྒྱུ་ནི་མི་རུ་སྐྱེས་པའི་བྱ་བ་རླབས་ཆེན་ཞིག་རེད་ལ། དེ་བཞིན་ཀུན་སློང་དག་པས་ཉམ་ཆུང་གི་ཕྱོགས་ཁ་བལྟ་མིག་བལྟ་བྱས་ནས་རོགས་སྐྱོར་སློང་དངུལ་གྱི་སྐུལ་བརྡ་གཏོང་མཁན་ཚོས་ཀྱང་རང་གི་ཉེ་ས་ཁོ་ན་ནས་མི་བལྟ་བར་ཡོངས་ཁྱབ་རྒྱ་ཁྱབ་ཀྱིས་བལྟས་ཏེ་བྱ་བ་བཟང་པོ་འདི་བསྒྲུབ་རྒྱུའི་རེ་བ་ཡོད། མ་ཟད་ཕྱོགས་ཁག་ནས་རོགས་དངུལ་བསྡུ་གསོག་བྱས་པ་དེ་ཡང་ཁྲ་ཁྲ་ཟང་ཟིང་མིན་པར་དམ་གཙང་སྤུས་གཙང་གིས་ཕ་རོལ་པོའི་ལག་ཏུ་དངོས་སུ་རྩིས་འབུལ་ངེས་འབྱོར་བྱེད་ཐུབ་པ་དགོས་རྒྱུ་ནི་དེ་བས་ཀྱང་གལ་གནད་ཆེ་ཞིང་ཡིད་གཟབ་བྱ་དགོས་པ་ཞིག་ཏུ་སེམས་སོ།། སྐད་ཆ་འདི་དྲན་སྐུལ་ཙམ་ཡིན་པས་ཐུགས་བློ་དང་མི་མཐུན་པའི་འགལ་ཆ་ཡོད་ན་དགོངས་དག་ཞུ།
རྩེ་སྐར་རམ་འགར་ཚེ་རྒྱལ་གྱིས།
སློབ་བུ་ལགས། ངས་ཁྱོད་ལ་ཐབས་ཤེས་ཤིག་བཤད། ཨ་རིའི་ལུང་པ་ཁ་ལེ་ཧྥོར་ནེ་ཡ་ཞེས་པ་དེར། བུ་མོ་ལོ་ ༥ ཅན་ཞིག་གིས་མི་ ༡༨༠༠ ལྷག་གི་ལྟོག་སྐོམ་བསལ་བ་རེད། དེ་ཇི་ལྟར་བསལ་བ་རེད་ཟེར་ན། ཉིན་ཞིག་མོ་བུ་བཅོལ་ཁང་ནས་ཕྱིར་རང་ཁྱིམ་ལ་ཡོང་ཁར་རྒད་པོ་ཞིག་གིས་སྦྱར་ཤིང་ཞིག་གི་ཐོག་ཟ་མ་སློང་བཞིན་པ་བྲིས་ཡོད་པ་མཐོང་བ་རེད། མོ་རང་གིས་ཕྱིར་ཡོང་ནས་ཕ་མ་གཉིས་ལ་དྲི་བ་སྤྱིར་བཏང་བ་ཞིག་གི་ལམ་ནས་སྐད་ཆ་དྲིས་པ་རེད། མོས། ཅིའི་ཕྱིར་མི་འདི་འདི་འདྲའི་སྐྱོ་བོ་ཆགས་པ་དང་། སྲང་ལམ་ལ་ཡོང་ནས་སློང་མོ་རྒྱག་དགོས་དོན་ཅི་རེད། ཅེས་དྲིས་པ་རེད།
མོ་རང་གིས་ཕ་མ་གཉིས་ལ། ང་ཚོས་ཁོང་ཚོར་རོགས་པ་ག་རེ་བྱ་ཐུབ་གི་རེད། ཅེས་དྲིས་སྐབས། ཕ་མ་གཉིས་ཀྱིས་སློང་མོ་བ་ཚོར་རོགས་པ་བྱེད་མཁན་ཡག་ཤོས་དེ་ཟས་མཛོད་ཁང་ food bank ལ་འགྲོ་དགོས་པ་རེད་ཅེས་བཤད་པ་རེད།
མོ་བུ་བཅོལ་ཁང་ལ་སོང་ནས་ཀྱང་དགེ་རྒན་ལའང་དེ་ལྟར་དྲིས་པ་རེད། མཐའ་མ་དེར་མོས། མི་དེ་དག་གི་ཆེད་དུ་ཞལ་འདེབས་བསྡུ་རྒྱུ་ཡིན་ཅེས། ཉིན་དེ་ནས་བཟུང་མོས་ཟླ་བ་གཉིས་ཀྱི་རིང་ཨ་སྒོར་ ༡༠༠༠ བསྡུ་རྒྱུའི་ལས་གཞི་བརྩམས་པ་རེད། དེ་བཞིན་མངར་ཆུའི་ལྕགས་ཀྲིན་བསྡུ་རུབ་ཀྱིས་བཙོང་སྟེ་དངུལ་བསག་པ་རེད། མོས་ཐོག་མར་རང་གི་ཉེ་འཁོར་གྱི་ཁྱིམ་མཚེས་དང་གྲོགས་པོ་གྲོགས་མོ་སོགས་ལས་ཞལ་འདེབས་བསྡུ་བ་དང་། ཁྱིམ་མཚེས་དག་གི་སར་ནས་མངར་ཆུའི་ལྕགས་ཀྲིན་དག་བསགས་པ་རེད། རིམ་བཞིན་བུ་མོ་ལོ་ ༥ ཅན་ཞིག་གིས་འདི་ལྟའི་སེམས་ཆེན་པོ་ཞིག་ཁྱེར་ནས་སྤྱི་ཚོགས་ཀྱི་དཀའ་ངལ་སེལ་བཞིན་པ་ཁྱབ་པར་བརྟེན། མི་ངོ་ཤེས་མི་ཤེས་ཚང་མས་ཞལ་འདེབས་བསྡུ་བ་དང་ལྕགས་ཀྲིན་ཁྱེར་ཡོང་ནས་མོར་སྤྲད་པ་རེད། དེ་ལྟར་མོས་ཟླ་བ་གཉིས་ཀྱི་རིང་ལ་ཨ་སྒོར་ ༣༧༢༦།༣༠ བསྡུ་རུབ་ཀྱིས་ཟས་མཛོད་ཁང་དུ་སྤྲད་པ་རེད། ཁོང་ཚོས་རྩིས་བརྒྱབས་དུས་དངུལ་སྒོར་དེས་མི་ ༡༨༠༠ ཡུ་ལྟོག་སྐོམ་སེལ་ཐུབ་ཀྱི་འདུག་ཅེས་བཤད་ཀྱིན་འདུག
ད་དུང་དྲི་བ་ཆེ་ཤོས་ནི། བུ་མོ་ཆུང་ཆུང་འདི་འདྲ་ཞིག་གིས་དོན་དག་འདི་ལྟ་བུ་ཐག་གཅོད་ཐུབ་ཀྱི་ཡོད་ན། མི་དར་མ་དང་བསམ་ཤེས་ཚོས་ཅི་ཞིག་གི་དོན་དུ་ལས་ཀ་འདི་འདྲ་སྒྲུབ་མ་ཐུབ་པ་རེད།
འདི་ནི་ང་ཚོས་ཀྱང་ཤེས་དགོས་པའི་གྲས་རེད། རོགས་རམ་གྱི་གོམས་གཤིས་དང་སྤྱི་ཚོགས་ཞབས་ཞུའི་ལས་ཀའང་གོམས་དགོས་པ་རེད།
འདི་ལྟར་བྱས་ན་གོང་གསལ་མ་བུ་གཉིས་ལའང་ང་ཚོས་རོགས་པ་རེ་བྱེད་ཐུབ་གི་རེད། སེམས་ཤུགས་མ་ཆག ཁྱོད་ཀྱི་རེ་བ་འགྲུབ་གི་རེད། ཁོང་མ་སྨད་གཉིས་ལ་དངོས་གནས་རོགས་པ་དགོས་པའི་དུས་ཤིག་རེད།
སེམས་ཞིག་ཡོད་ན་རོགས་ཤིག་བྱེད་རོགས།
ༀ་མ་ཎི་པདྨེ་ཧྰུཾ། ༀ་མ་ཎི་པདྨེ་ཧྰུཾ།
ༀ་མ་ཎི་པདྨེ་ཧྰུཾ།