བཀའ་རྒྱའི་འོག་གི་རྒྱས་སྟོན།

རྒྱ་ནག་དབུས་གཞུང་དང་མཚོ་སྔོན་ཞིང་ཆེན་རིམ་པའི་བཀའ་རྒྱའི་འོག ཟླ་འདིའི་ཕྱི་ཚེས་ ༡ ནས་ ༣ བར་གྱི་ཉིན་གྲངས་གསུམ་རིང་། མཚོ་སྔོན་ཞིང་ཆེན་རྨ་ལྷོ་སོག་རྫོང་གིས་ཀྲུང་གོ་གསར་བ་དབུ་བརྙས་ཏེ་ལོ་འཁོར་ ༦༠ དང་། ཧི་ནན་སོག་རིག་རང་སྐྱོང་རྫོང་བཙུགས་ཏེ་ལོ་ ༥༥ འཁོར་བའི་དགའ་སྟོན་མཛད་སྒོ་ཟེར་བ་ཞིག་བསྡུ་རུ་བཅུག་ཡོད་འདུག འབྲེལ་ཡོད་མི་སྣས་བརྗོད་པ་ལྟར་ན། ཐེངས་འདིའི་མཛད་སྒོ་ལ་ཀྲུང་དབྱིང་དང་ཞིང་ཆེན་རིམ་པའི་མ་དངུལ་འབོར་ཆེན་བཏང་སྟེ། ཟླ་འགའི་སྔོན་ནས་གྲ་སྒྲིག་བྱེད་དུ་བཅུགས་ཡོད་པ་མ་ཟད། རྨ་ལྷོ་སོག་རྫོང་གི་ལས་ཁུངས་ཁག་ལ་ཁྲལ་བཞག་གིས་གླུ་གར་ཞབས་བྲོ་དང་རྒྱན་གོས་སོགས་གྲ་སྒྲིག་བྱེད་དུ་བཅུག་ཡོད་པ་དང་། དེ་བཞིན། རྫོང་དང་གྲོང་རྡལ་ཁག་གི་ལས་བྱེད་ཆེད་དུ་ཡོང་སྟེ། ས་གནས་འབྲོག་དམངས་ལའང་ཞབས་བྲོ་དང་རྒྱན་གོས་སྒྲིག་ཏུ་བཅུག་པ་རེད་ཟེར། 

ཐེངས་འདིའི་མཛད་སྒོ་དེའི་སྟེང་རྒྱ་ནག་དབུས་འཐབ་ཕྱོགས་གཅིག་གྱུར་ཁེ་ལས་ལྟ་ཞིབ་ཚོགས་པའི་ཚོགས་གཙོ་གཞོན་གཉིས་དང་། མཚོ་སྔོན་ཞིང་ཆེན་དམངས་འཐུས་ཚོགས་ཆེན་གྱི་རྒྱུན་ལས་ཚོགས་གཙོ་དབང་མོ། རྨ་ལྷོ་ཁུལ་གྱི་ཁུལ་དཔོན་རྡོ་རྗེ་ཚེ་རིང་སོགས་ཞུགས་ཡོད། གཞན་རྒྱ་ནག་དབུས་གཞུང་དང་ཞིང་ཆེན། ཁུལ་རིམ་པ། དེ་བཞིན་ནང་སོག་ས་ཁུལ་བཅས་ཀྱི་འབྲེལ་ཡོད་ལས་བྱེད་དང་། གླུ་གར་འཁྲབ་སྟོན་ཚོགས་པ་སོགས་མི་གྲངས་ཆིག་ཁྲི་ ༡༠༠༠༠ ལྷག་ཞུགས་ཡོད་འདུག མཛད་སྒོའི་ཐོག་རིག་རྩལ་འཁྲབ་སྟོན་དང་རྟ་རྒྱུགས་འགྲན་བསྡུར། འཇུ་རེས། ས་སྒྱེ་འགྱོག་པ། གླང་ཆེན་ས་གཤགས། སྤོ་ལོ་འགྲན་བསྡུར་སོགས་བྱས་ཡོད་འདུག་པ་མ་ཟད། རྨ་ཆུའི་གཡུ་འབྲུག་ཚན་སྡེབ་དང་གླུ་བ་གངས་བཞུགས། གླུ་མ་རིག་འཛིན་སྒྲོན་དང་སྒྲོལ་བྷེ་སོགས་བོད་ཁུལ་གྱི་གླུ་བ་གླུ་མ་སྐད་གྲགས་ཅན་མང་པོ་ཞིག་ཆེད་དུ་གདན་དྲངས་ཏེ། མཚོ་སྔོན་བརྙན་འཕྲིན་ཁང་གིས་མདོ་འཛིན་དང་བརྙན་ཕབ་ཀྱི་རོགས་འདེགས་བསྒྲུབས་ཡོད་འདུག