རྒྱ་གཞུང་གིས་བོད་དང་ཞིན་ཅང་སོགས་གྲངས་ཉུང་མི་རིགས་ལ་དམིགས་བསལ་གྱི་མི་རིགས་མཐུན་སྒྲིལ་གྱི་སློབ་གསོ་སྤེལ་རྒྱུ་ཡིན་འདུག
ཕྱི་ཚེས་ ༢༦ ཉིན་རྒྱ་ནག་དྲིལ་བསྒྲགས་ལས་དོན་ཨུ་ཡོན་ལྷན་ཁང་དང་སློབ་གསོ་ཨུ་ཡོན་ལྷན་ཁང་། རྒྱ་ནག་དམངས་ཆེན་རྒྱུན་ལས་ཁང་བཅས་མཉམ་འབྲེལ་བྱས་ཏེ་གནས་ཚུལ་བརྒྱུད་བསྒྲགས་བྱས་པ་ལྟར་ན། འདིའི་ལོའི་སྟོན་མཇུག་གི་སློབ་མགོ་གསར་བ་རྩོམ་བཞིན་པའི་དུས་སྐབས་འདི་དང་བསྟུན་ཏེ་མགྱོགས་མྱུང་ངང་གྲངས་ཉུང་མི་རིགས་ས་ཁུལ་གྱི་སློབ་གྲྭ་རིམ་པར་ ” མི་རིགས་མཐུན་སྒྲིལ་”གྱི་སློབ་གསོ་གཙིགས་ཆེན་བྱ་རྒྱུ་ཡིན་ཚུལ་བརྗོད་ཡོད་པ་དང་། དེ་ཡང་བོད་རིགས་གཙོས་གྲངས་ཉུང་མི་རིགས་འདུས་སྡོད་ཀྱི་ས་ཁུལ་དུ་སློབ་གསོ་དེའི་རིགས་སྤེལ་རྒྱུ་ཡིན་ཚུལ་བརྗོད་ཡོད་པ་རེད། ཉེ་བའི་ཆར་ཞིན་ཅང་ཡུ་གུར་མི་རིིགས་རང་སྐྱོང་ལྗོངས་ཀྱི་སློབ་གྲྭ་ཁག་ཏུ་ད་ལྟ་ནས་མི་རིགས་མཐུན་སྒྲིལ་གྱི་སློབ་གསོ་མགོ་འཛུགས་བྱས་ཡོད་འདུག་ལ། འབྲེལ་ཡོད་མགོ་ཁྲིད་ཚན་པས་སློབ་གྲྭ་ཁག་གི་དབྱར་གནང་གུང་གསེང་གི་གོ་སྐབས་འདི་དང་བསྟུན་ཏེ་སློབ་གྲྭའི་མགོ་ཁྲིད་དང་དགེ་རྒན་རྣམས་ལ་མི་རིགས་མཐུན་སྒྲིལ་དང་འབྲེལ་བའི་ཟབ་སྦྱོང་སྤྲོད་ཀྱིན་ཡོད་པ་དང་། སློབ་སྐབས་གསར་བ་མགོ་ཚུགས་པ་ནས་བཟུང་གྲངས་ཉུང་མི་རིགས་ས་ཁུལ་གྱི་དམའ་འབྲིང་དང་མཐོ་འབྲིང་རིམ་པའི་སློབ་མར་དམིགས་བསལ་གྱི་”མི་རིགས་མཐུན་སྒྲིལ”གྱི་སློབ་གསོ་སྤྲོད་རྒྱུ་མ་ཟད། སློབ་ཆུང་རིམ་པར་དེའི་སྐོར་ལ་རྟོགས་ཞིབ་བྱ་རྒྱུ་ཡིན་པ་དང་། དམའ་འབྲིང་དང་མཐོ་འབྲིང་སློབ་མར་མ་འོངས་མཐར་ཕྱིན་ཡིག་རྒྱུགས་ཁྲོད་འཇོག་རྒྱུ་ཡིན་པའི་གསལ་བསྒྲགས་གནང་ཡོད་པ་རེད།
དེ་བཞིན་འདི་ལོ་ནས་བཟུང་རྒྱ་གཞུང་གིས། ཐབས་བརྒྱ་ཇུས་སྟོང་གིས་སྔོན་མ་བོད་ཀྱི་སློབ་མ་རྒྱ་ནག་ནང་ཁུལ་དུ་སློབ་སྦྱོང་ལ་འགྲོ་བཞིན་པའི་ཚད་གཞི་མང་དུ་བཏང་སྟེ་བོད་རང་སྐྱོང་ལྗོངས་ཀྱི་བོད་རིགས་དམའ་འབྲིང་མཐར་ཕྱིན་སློབ་མ་དེ་དག་རྒྱ་ནག་ནང་ཁུལ་གྱི་ཐེན་ཅིན་དང་ཧྲང་ཧེ། ཅང་སུའུ། ཧུའུ་ནན། ཧྲན་ཏུང་སོགས་ཞིང་ཆེན་ ༡༡ གི་སློབ་གྲྭ་ཁག་ ༦༠ ནང་གི་འབྲིང་རིམ་ཆེད་ལས་འཛིན་གྲྭ་རུ་བསྡུ་རུབ་བྱེད་ཀྱིན་ཡོད་འདུག་ལ། ༢༠༡༥ བར་བོད་རང་སྐྱོང་ལྗོངས་ཀྱི་སློབ་མ་ ༡༤༠༠༠ ལྷག་བསྡུ་རུབ་བྱ་འཆར་ཡོད་འདུག་ལ། ལོ་འདིར་བོད་ཀྱི་སློབ་མ་ ༣༠༠༠ ལྷག་བསྡུ་རུབ་བྱས་ཏེ་རྒྱ་ནག་ནང་ཁུལ་དུ་ཕྱིན་ཡོད་པ་དང་། དེ་དག་གི་ཁྲོད་བརྒྱ་ཆའི་ ༧༠ བོད་ཀྱི་ཞིང་གྲོང་ནས་འཚར་ལོངས་བྱུང་བའི་སློབ་མ་ཡིན་པ་རེད།
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
ཕྱི་ལོགས་ནས་༸ གོང་ས་མཆོག་དང་བཙན་བྱོལ་གཞུང་གིས་རྒྱ་བོད་ཞི་མོལ་གནང་རྒྱུར་ཐུགས་རེ་ཚད་མེད་ཇི་ཙམ་ཞིག་གནང་ནའང་དེ་ཙམ་གྱིས་རྒྱ་ནག་གཞུང་འཛིན་པ་དག་སྡུག་ཏུ་འགྲོ་བཞིན་ཡོད།
ནང་ལོགས་ནས་རྒྱ་ནག་དབུས་གཞུང་གིས་མི་རིགས་མཐུན་སྒྲིལ་གྱི་བསློབ་གསོ་ཇི་ཙམ་སྤེལ་ན་དེ་ཙམ་གྱིས་གྲངས་ཉུང་མི་རིགས་དབར་གྱི་མཐུན་སྒྲིལ་ཡང་སྡུག་ཏུ་འགྲོ་བཞིན་ཡོད།
དོན་དངོས་ཐོག་རྒྱ་བོད་གཉིས་ཀྱི་དབར་གནད་དོན་དེ་ཐག་གཅོད་ཡང་དག་ཅིག་མ་བྱས་བར་དུ་ཕྱོགས་གཉིས་ཀའི་འདོད་དོན་རྣམས་མངོན་འགྱུར་ཡོང་རྒྱུར་རེ་བ་གཏན་ནས་མེད།
གསར་འགོད་པ་ལགས། ང་ཚོ་བོད་པ་ཚོར་རྒྱ་གཞུང་ནས་བོད་རང་སྐྱོང་ལྗོངས་ཞེས་བརྗོད་པར་ང་ཚོར་མི་བདེ་བའི་ཚོར་སྣང་ཞིག་སྐྲུན་གྱི་ཡོད། གང་ཡིན་ཟེར་ན། ཐ་སྙད་འདིར་མདོ་སྟོད་པའི་ས་ཁུལ་མང་པོ་ཞིག་དང་ཨ་མདོའི་ས་ཁུལ་ཕལ་ཆེར་དེ་ནང་ཚུད་ཀྱི་མེད། དེ་བཞིན་རྒྱ་གཞུང་ནས་ཤིན་ཅང་ཟེར་བར་དེ་དག་གི་ས་ཁུལ་དུམ་བུར་འགྲོ་བའི་ཐ་སྙད་ཞིག་ཡིན་པ་ཁྱེད་ཀྱིས་ཕལ་ཆེར་མཁྱེན་གྱི་མེད་པ་འདྲ། ང་ཚོ་ངོས་ནས་དེ་ལྟར་དམིགས་ནས་བརྗོད་པ་མ་ཡིན་ཡང་དོན་ལ་རྒྱའི་དོན་དམིགས་ཀྱི་རྗེས་སུ་འགྲོ་བས་ང་ཚོ་དང་མཉམ་པའི་མི་རིགས་ཤིག་གི་མི་མང་ས་ཡ་མང་པོ་ཞིག་ལ་ཕོགས་ཐུག་འགྲོ་ངེས་ཡིན། ཁྱེད་རང་ཡུ་གུར་《རང་བཙན་རྩོད་ལེན་པའི་》དྲ་རྒྱར་གཟིགས་དང་རྟོགས་ངེས་ཡིན།