རང་བཙན། བོད་མིའི་རྨི་ལམ།

ཚོ་ཁྲང་ཆེན་གྱིས་བརྩམས། དོན་གོས་སྒྱུར།

༡༩༩༤ ལོར་ངས་ “པེ་ཅིན་གྱི་དཔྱིད་ཀ “ཞེས་པའི་དུས་དེབ་སྟེང་ཁ་བྱང་ལ་ “རང་བཙན། བོད་མི་མང་གི་བདག་དབང”ཅེས་པའི་དཔྱད་རྩོམ་ཞིག་སྤེལ་ཏེ། བོད་མི་རིགས་ཀྱི་དངོས་ཡོད་ལོ་རྒྱུས་ཀྱི་རིན་ཐང་དང་། རང་དབང་དང་རང་སྲིད་རང་སྐྱོང་གི་བདག་དབང་ཐད་ཀྱི་འདོད་འདུན་སོགས་བོད་མི་ཚོས་རང་གི་རྒྱལ་ཁབ་དང་མི་རིགས་ཀྱི་ཆེད་དུ་རང་བཙན་འཐབ་རྩོད་བྱེད་བཞིན་པ་དེ་ཁྲིམས་མཐུན་དང་ཚུལ་མཐུན། ལུགས་མཐུན་ཞིག་ཡིན་པའི་སྐོར་གསལ་བོར་བཀོད་པ་ཡིན།  མི་ལོ་ལྔ་བཅུའི་རིང་རིམ་གྱིས་ཀྲུང་གོའི་ཤེས་ལྡན་པ་གང་མང་གིས། བོད་དོན་ལ་མཐོང་ཆེན་དང་འབོད་སྐུལ་གནང་བ་མ་ཟད། ཁག་ཅིག་གིས་དངོས་སུ་བོད་མིའི་རང་དབང་འཐབ་རྩོད་ལ་རྒྱབ་སྐྱོར་གང་ལེགས་བྱེད་ཀྱིན་ཡོད་པ་རེད། ཡིན་ཡང། བོད་མིའི་དབུ་ཁྲིད་ཏཱ་ལའི་བླ་མ་དང་བཙན་བྱོལ་བོད་གཞུང་གིས་ད་ལྟའི་དུས་འདིར་ཡང་མུ་མཐུད་དབུ་མའི་ལམ་ལ་ཤར་སྐྱོད་བྱ་རྒྱའི་ནན་བཤད་བྱས་ཏེ། བོད་རང་བཙན་འཐབ་རྩོད་ཀྱི་ལམ་ཁ་དོར་བ་དང་། རྒྱ་ནག་གཞུང་གི་མི་སེར་སྤེལ་བའི་དབང་བསྒྱུར་ལ་ངོས་ལེན་མི་བྱེད་པར། བོད་དེ་རྒྱ་ནག་གི་ཆ་ཤས་ཤིག་ཡིན་པ་ངོས་ལེན་བྱས་ཏེ་(དམངས་གཙོ་འདུས་པའི)ཆེས་མཐོའི་རང་སྲིད་རང་སྐྱོང་གླེང་གི་ཡོད་པ་རེད།

ཉེ་ཆར་སུད་སིར་འཚོགས་པའི་ “བོད་རྒྱའི་ཚོགས་འདུའི་ ” སྟེང་དུའང་ཏཱ་ལའི་བླ་མས་དེའི་སྐོར་གྱི་གསུང་བཤད་གནང་བྱུང་ལ། བཀའ་ཁྲི་ཟམ་གདོང་རིན་པོ་ཆེ་མཆོག་གིས་ཀྱང་དེའི་སྐོར་ལ་ནན་བཤད་བྱེད་ཀྱིན་པ་མ་ཟད། ད་དུང་རྒྱ་ནག་གཞུང་དང་འབྲེལ་མོལ་བྱས་ཏེ་རང་སྲིད་རང་སྐྱོང་གི་གཉིས་ཕན་གྱི་འབྲས་བུ་ལ་རེ་བ་རྒྱག་གིན་འདུག   ཡིན་ཡང། འདས་པའི་དུས་དང་མི་མཐུན་པ་ཞིག་ནི། བཙན་བྱོལ་བོད་གཞུང་གིས་སྲིད་བྱུས་ཀྱི་ལྟེ་བ་ནུབ་ཕྱོགས་སུ་བཟུང་སྟེ་གཙོ་གནད་ཀྲུང་གོ་སྲིད་གཞུང་ (རྒྱ་གཞུང་དང་འབྲེལ་མོལ) ལ་འཛིན་བཞིན་ཡོད་པ་དང་།  དེ་ནས་རིམ་གྱིས་རྒྱ་ནག་དམངས་ཁྲོད་དང་ལྷག་པར་དུ་ཕྱི་སྡོད་རྒྱ་རིགས་ཤེས་ལྡན་པ་དག་ལ་དོ་སྣང་བྱས་ཏེ། ཁོང་ཚོ་བརྒྱུད་དེ་བོད་དོན་འཐབ་རྩོད་ཀྱི་གནས་སྟངས་ངོ་མ་བརྒྱུད་སྒྲོག་བྱེད་བསམ་པ་དེ་རེད།

ཀ༽ དམངས་གཙོ་དང་སྲིད་དབང་སྒེར་གཅོད་མཉམ་གནས་དང་གཉིས་ཕན་འབྱུང་ཐུབ་བམ།
ཉེ་ཆར་སུད་སིར་འཚོགས་པའི་ “ཐུན་མོང་གི་གཞི་རྟེན་འཚོལ་བ” ཅེས་པའི་བོད་རྒྱའི་ཚོགས་འདུ་དེར་ང་ཡང་ཞུགས་པ་ཡིན།   སྐབས་དེའི་ཚོགས་འདུའི་རང་དབང་གི་དྲི་བ་དྲི་ལན་གྱི་སྐབས་སུ་ངས་ཟམ་གདོང་རིན་པོ་ཆེར་ཏཱ་ལའི་བླ་མ་དང་བཙན་བྱོལ་བོད་གཞུང་གི་ “དབུ་མའི་ལམ” དང་” གཉིས་ཕན” ལ་རེ་བའི་ཐད་ལ་དྲི་བ་གཉིས་བཏོན་པ་ཡིན།

དང་པོ། མིའི་རིགས་ཀྱི་ལོ་རྒྱུས་སྟེང་སྲིད་དབང་སྒེར་གཅོད་དང་དམངས་གཙོའི་རིན་ཐང་གི་མངོན་འགྱུར་ཏེ་ལམ་ལུགས་གཅིག་གི་མངའ་ཁོངས་སུ་མཉམ་གནས་དང་གཉིས་ཕན་འབྱུང་ཐུབ་བམ་མི་ཐུབ།   གལ་སྲིད་མ་ཐུབ་པ་ཡིན་ན།  ཟམ་གདོང་རིན་པོ་ཆེས་གཙོས་བཙན་བྱོལ་བོད་གཞུང་གིས་འདི་ལྟ་བུའི་མངོན་འགྱུར་མི་ཐུབ་པའི་ལམ་བུ་ཞིག་ལ་རེ་བ་དང་ཁ་ཕྱོགས་དགོས་དོན་ཅི་ཡིན་ནམ། གཉིས་པ། དབུ་མའི་ལམ་ལ་དུས་བཅད་  deadline ཡོད་མེད་དང་།  བཙན་བྱོལ་བོད་གཞུང་གིས་རང་བཙན་དོར་བ་དེ་བོད་མི་ས་ཡ་དྲུག་དང་དེ་དག་གི་བུ་རབས་ཚ་རྒྱུད་དག་གིས་མ་འོངས་པར་རྒྱལ་ཁབ་འདི་ཉིད་ཀྱི་མདུན་ལམ་ཐག་གཅོད་དང་གདམ་གསེས་བྱེད་པའི་དབང་ཆ་འཕྲོག་པ་ཞིག་ཡིན་ནམ་མིན། ཅེས་དྲིས་པའི་ལན་དུ་ཟམ་གདོང་རིན་པོ་ཆེས། ང་ཚོས་རེ་བ་བྱེད་ཀྱིན་པ་ནི་རྒྱ་ནག་གཞུང་གི་ཆབ་སྲིད་ཀྱི་སྒྲོམ་གཞིའི་འོག་མིང་དོན་མཚུངས་བའི་རང་སྲིད་རང་སྐྱོང་ཡོང་ཐབས་བྱ་རྒྱུ་དེ་ཡིན། ཅེས་ལན་གནང་བྱུང། ཡིན་ཡང་། རྒྱ་ནག་གཞུང་གི་ཆབ་སྲིད་ཀྱི་སྒྲོམ་གཞི་དེ་རྒྱ་ནག་དབུས་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་གཞོན་པ་ཀྲུའུ་ཝེ་ཆོན་གྱིས་ལོ་སྔོན་མའི་ལོ་མཇུག་ལ་པེ་ཅིན་གྱི་གསར་འགོད་ལྷན་ཚོགས་ཤིག་གི་སྟེང་གསལ་བཤད་གནང་བ་ལྟར།  རྒྱ་ནག་གཞུང་གི་ཆབ་སྲིད་སྒྲོམ་གཞི་ནི།  རྒྱུན་འཁྱོངས་གསུམ་ཡིན་ལ། རྒྱུན་འཁྱོངས་གསུམ་ནི་གུང་ཁྲན་ཏང་གི་དབུ་འཁྲིད་རྒྱུན་འཁྱོངས་དང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས། དེ་བཞིན་ (བོད་ཀྱི་གནད་དོན་ལ་གཞི་བཅོལ་ཏེ) མི་རིགས་ས་གནས་རང་སྐྱོང་རྒྱུན་འཁྱོངས་བཅས་ཡིན་པ་དང་། ཀྲུང་གོ་གུང་ཁྲན་ཏང་གི་དབུ་ཁྲིད་ནི་ང་ཚོར་ངེས་ཤེས་ཡོད་པ་ལྟར། དེ་ནི་སྲིད་དབང་སྒེར་འཛིན་རེད།  ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱང་སྣང་ཚུལ་གཅིག་ཡིན་ཏེ། དཔལ་འབྱོར་གང་དུ་ཕྱོགས་པ་དང་མཉམ་དུ་ཡོད་ཚད་གུང་ཁྲན་ཏང་གི་སྟངས་འཛིན་འོག་ཡོད་ལ། མི་རིགས་ས་ཁོངས་རང་སྐྱོང་གི་གནད་དོན་ཐད་ལའང་ཀྲུའུ་ཝེ་ཆོན་གྱིས་ཕྱིར་བཏོད་ཀྱི་རྣམ་པའི་སྒོ་ནས་བརྗོད་པ་ལྟར།   མནའ་འབྲེལ་གྱི་ཚོགས་པ་ཡིན་མི་ཆོག་པ་དང་།  ཧོང་ཀོང་ལྟར་རྒྱལ་ཁབ་གཅིག་དང་ལམ་ལུགས་གཉིས་ཀྱི་སྲིད་བྱུས་ལྟ་བུ་ཞིག་ཀྱང་མིན་པ།  ཏཱ་ལའི་བླ་མའི་རང་སྲིད་རང་སྐྱོང་གི་རེ་འདོད་ལྟ་བུ་ཞིག་དེ་བས་ཀྱང་མིན་ཚུལ་བརྗོད་ཡོད་པ་མ་ཟད། ཀྲུང་གོ་གུང་ཁྲན་ཏང་གི་དབུ་ཁྲིད་འོག་ད་ལྟའི་ “བོད་ཀྱི་རང་སྲིད་རང་སྐྱོང་གི་གནས་བབ་” དེ་འདྲ་ཞིག་ལས་གཞན་པའི་རང་སྲིད་རང་སྐྱོང་གི་གནས་བབ་དང་སྲིད་བྱུས་ཤིག་ལག་བསྟར་བྱ་ཐབས་མེད་ཚུལ་བརྗོད་ཡོད་པ་རེད། 
ཁ༽ སེམས་བཟང་གི་”སྤྱང་ཀི” ལ་རེ་བ་བྱ་མི་རུང།
དེ་བཞིན། ཀྲུའུ་ཝེ་ཆོན་གྱིས་ཡང་བསྐྱར་བརྗོད་དོན། ང་ཚོས་ད་ལྟའི་བར་བཙན་བྱོལ་བོད་གཞུང་ངོས་ལེན་བྱས་མེད།  ང་ཚོས་ཏཱ་ལའི་བླ་མ་སྐུ་སྒེར་གྱི་འཐུས་ཚབ་ལ་འབྲེལ་མོལ་བྱས་པ་ཡིན་ལ། དེ་ཡང་གཙོ་བོ་ཇི་ལྟར་ཏཱ་ལའི་བླ་མས་ ” ནོར་འཁྲུལ་བསྒྱུར་བཅོས་ ”བྱས་ཏེ་ང་ཚོའི་བཟོད་སྒོམ་རྩོད་ལེན་བྱ་རྒྱུ་དེ་རེད། ཁོང་གི་རྣམ་འགྱུར་ལེགས་དུ་ཕྱིན་ཚེ་ཁོང་ཕྱིར་ལོག་ཆོག་པ་མ་ཟད། ཁོང་དང་མཉམ་དུ་ཡོད་པའི་མི་མང་གང་མང་ཞིག་ཀྱང་ཡོང་ཆོག་གི་རེད། ཅེས་དང་། ནུབ་ཕྱོགས་ཀྱི་གསར་འགོད་པ་མང་པོའི་མདུན་དུ་གུས་བརྩི་ཅི་ཡང་མེད་པའི་སྒོ་ནས་བརྗོད་དོན། འདས་པའི་ལོ་འདི་འགའི་རིང་ཀྲུང་དབྱང་སྲིད་གཞུང་གིས་ཏཱ་ལའི་བླ་མའི་སྐུ་ཚབ་དང་མཉམ་དུ་འབྲེལ་མོལ་དེ་ལྟར་བྱས་པ་ཡིན་ལ། མ་འོངས་པར་ཡང་འགྱུར་མི་སྲིད་པའི་བཙན་པོ་དབང་ཡོད་ཀྱི་སྐད་ཆ་དེ་འདྲ་བཤད་ཡོད་པ་རེད།

ངས་ཟམ་གདོང་རིན་པོ་ཆེ་ལགས་སུ། གུང་ཁྲན་གཞུང་གིས་སྐད་ཆ་མཐའ་དག་གསལ་ཐག་ཆོད་པའི་སྒོ་ནས་འགྲེལ་བརྗོད་གནང་ཚར་བ་རེད། ད་དུང་བཙན་བྱོལ་བོད་གཞུང་གིས་པེ་ཅིན་གྱིས་ཅི་ཞིག་བཤད་པར་རེ་སྒུག་བྱེད་ཀྱིན་ཡོད་དམ།  གུང་ཁྲན་གཞུང་གི་སྲིད་དབང་སྒེར་གཅོད་འོག་ ”མིང་དོན་མཚུངས་བའི་རང་སྐྱོང་” ལ་རེ་བ་ནི་སེམས་བཟང་གི་སྤྱང་གི་ལ་རེ་བ་དང་གཅིག་མཚུངས་རེད་ལ། ལུག་དང་སྤྱང་གི་གཉིས་མཉམ་གནས་དང་གཉིས་ཕན་འབྱུང་ཐུབ་བམ། མིའི་རིགས་ཀྱི་འདས་པའི་ལོ་རྒྱུས་ནང་དེ་འདྲའི་རིགས་བྱུང་མྱོང་ཡོད་དམ། ཅེས་དྲིས་པར། ཟམ་གདོང་རིན་པོ་ཆེས། དབུ་མའི་ལམ་ནི་བཙན་བྱོལ་བོད་མིས་སྤྱི་མོས་ཀྱི་ཐག་གཅོད་བྱུང་བ་ཞིག་དང་བོད་མི་མང་པོས་བསྔགས་བརྗོད་བྱེད་ཀྱིན་པའི་ལམ་བུ་ཞིག་ཡིན་པ་མ་ཟད།  འདས་པའི་དམིགས་བསལ་ཚོགས་ཆེན་གྱི་སྐབས་སུའང་མི་མང་གིས་མུ་མཐུད་དབུ་མའི་ལམ་ལ་རྒྱབ་སྐྱོར་བྱས་ཡོད་སྟབས། འདི་ནི་བོད་རིགས་མི་མང་གི་མངོན་འདོད་ཡིན་པ་གསལ་བོར་མཚོན་ཡོད། ཅེས་དྲིས་ལན་གནང་བྱུང་། ངས་ཁོང་ལ་བཙན་བྱོལ་ནང་བོད་མི་ཁྲི་ ༡༣ ལྷག་ཡོད་པ་དེ་དག་གི་མོས་མཐུན་བྱུང་ཡོད་པ་དེས། བོད་ནང་གི་བོད་མི་ས་ཡ་དྲུག་གི་མོས་མཐུན་གྱི་ཚབ་མཚོན་མི་ཐུབ་པས། བཙན་བྱོལ་བོད་གཞུང་གིས་འདི་ལྟར་སྒྲུབ་ཚེ་བོད་རིགས་མི་འབོར་མང་པོས་མ་འོངས་རྒྱལ་ཁབ་ཀྱི་གདེམ་གསེས་ཀྱི་དབང་ཆ་འཕྲོག་པ་མ་རེེད་དམ།

ག༽ བོད་ཀྱི་གནད་དོན་དེ་ཆོས་ལུགས་དང་རིག་གཞུང་སྲུང་སྐྱོབ་ཀྱི་གནད་དོན་ཞིག་གཏན་ནས་མ་རེད།
བོད་འདི་ཉིད་ལོ་རྒྱུས་ཀྱི་ཐོག་རང་བཙན་གྱི་རྒྱལ་ཁབ་ཅིག་ཡིན་པ་རྒྱལ་མིང་དང་རྒྱ་དར། རྒྱལ་པོ། དངུལ་སྒོར། ཕྱི་སྐྱོད་ལག་འཁྱེར། དམག་མི། དཔྱ་ཁྲལ་སོགས་དང་། ཆིན་རྒྱལ་རབས་རྗེས་དང་གོ་མིན་ཏང་གི་ཅང་ཅེ་ཧྲུའུ་དུས་སྐབས་སོགས་སུའང་བོད་དེ་དག་གི་མངའ་ཁོངས་ཀྱི་ས་ཁུལ་ཅིག་ཀྱང་ཆགས་མེད་པར་རང་བཙན་གྱི་རྒྱལ་ཁབ་ཅིག་ཡིན་ནའང་།   མི་ལོ་ལྔ་བཅུའི་ཡར་སྔོན་གྱི་དུས་དེར་ད་གཟོད་རྒྱ་ནག་གིས་བཙན་བཟུང་བྱས་པ་རེད།

ད་ལྟའི་དུས་འདིར་བོད་ཀྱི་གནད་དོན་དེ་ཆོས་ལུགས་དང་རིག་གཞུང། ཁོར་ཡུག་སྲུང་སྐྱོབ་སོགས་ཀྱི་་གནད་དོན་ཞིག་མིན་པར་རྒྱལ་ཁབ་ཞིག་གི་འཇིག་ཉེན་དང་མི་རིགས་ཤིག་གི་འཆི་གསོན་གྱི་གནད་དོན་ཞིག་ཆགས་ཡོད།  བོད་མི་ཚོས་རང་ཉིད་ཀྱི་དབུ་ཁྲིད་ཏཱ་ལའི་བླ་མར་བརྩི་མཐོང་གུས་བཀུར་ཆེན་པོ་བྱེད་ཀྱིན་ཡོད་པ་རེད། ཡིན་ཡང་། དམངས་གཙོའི་རྩ་དོན་གཞིར་བཞག་གི་སྟེང་ནས་བཤད་པ་ཡིན་ན།  ཚད་མཐོ་བའི་དབུ་ཁྲིད་སུ་འདྲ་ཞིག་ཡིན་ཡང་། མི་མང་གིས་རང་གི་རྒྱལ་ཁབ་གདམ་གསེས་ཀྱི་དབང་ཆ་ལ་ཐེ་གཏོགས་བྱེད་པའི་དབང་ཆ་མེད། བོད་མི་མང་གི་མདུན་ལམ་དེ་བོད་མི་ས་ཡ་དྲུག་གིས་ཐག་གཅོད་དགོས་པ་ལས་བཙན་བྱོལ་བོད་མིའི་གཞུང་ཞབས་པ་གང་རུང་ཞིག་གིས་ཐག་གཅོད་བྱེད་ཆོག་པ་ཞིག་མ་རེད། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཟུར་པ་ཀརྨ་ཡེ་ཤེས་དང་བོད་མི་མང་སྤྱི་འཐུས་ཚོགས་གཙོ་ཟུར་པ་ཀརྨ་ཆོས་འཕེལ་གཉིས་ཀྱིས་སྔོན་མར་འདི་ལྟར་བརྗོད་ཡོད་པ་རེད། ང་ཚོ་བཙན་བྱོལ་དུ་ཡོད་པའི་མི་ཉུང་ཤས་ཤིག་གིས་ལོ་རྒྱུས་ཐོག་བོད་འདི་རང་བཙན་གྱི་རྒྱལ་ཁབ་ཞིག་ཡིན་པ་དང་དེ་རང་བཙན་སླར་གསོ་བྱ་དགོས་ཅེས་བཤད་པའི་དབང་ཚད་མེད་པ་མ་ཟད། མ་འོངས་མི་རབས་རྗེས་མའི་མདུན་ལམ་དང་བདག་དབང་ལ་འགྱུར་བ་གཏོང་བའི་དབང་ཆ་དེ་བས་ཀྱང་མེད། ང་ཚོའི་གནད་དོན་ནི་མི་རིགས་དང་རྒྱལ་ཁབ་ཀྱི་རང་དབང་རང་བཙན་ཡིན་པ་ལས། རིག་གནས་དང་ཆོས་ལུགས། ཁོར་ཡུག་སྲུང་སྐྱོབ་སོགས་ཀྱི་གནད་དོན་དེ་བས་ཀྱང་མིན། ཅེས་བཤད་ཡོད་པ་རེད།

ད་ལྟའི་དུས་འདིར་བོད་མི་ས་ཡ་དྲུག་དེ་རྒྱ་ནག་གི་ཆབ་སྲིད་ཀྱི་གནོན་ཤུགས་དང་མི་སེར་སྤེལ་བའི་གཉའ་གནོན་འོག་རང་ཉིད་ཀྱི་སྐད་སྒྲ་ཕྱི་རུ་སྒྲོག་པའི་ཐབས་ལམ་རྙེད་དཀའ་བའི་གནས་སུ་གྱར་ཡོད་ཀྱང་།  བོད་ནང་གི་བོད་མི་ཚོས་ཐེངས་གང་མང་གི་ངོ་རྒོལ་སྐད་འབོད་དང་མངོན་འདོད་ལས་ཁོང་ཚོའི་འདོད་འདུན་རང་བཙན་ཡིན་པ་ཤེས་འོང་གི་འདུག་ལ། དེ་བཞིན། འདས་པའི་ལོ་ངོ་འདི་དག་ཏུ་རྒྱ་གར་དང་ཡུ་རོབ། ཨ་རི་སོགས་སུ་ངས་བོད་མི་གང་མང་ལ་བཅར་འདྲིའི་ལམ་ནས་ཁོང་ཚོར་ ” རང་སྐྱོང་དང་རང་བཙན་” གཉིས་ཀྱི་གང་ལ་འདོད་མོས་ཡོད་མིན་བཀའ་འདྲི་བྱས་པ་ཡིན།  དེ་དག་གི་གནས་སྟངས་ལས་ཏཱ་ལའི་བླ་མ་མ་གཏོགས་གཞན་ཚང་མས་རང་བཙན་འདེམས་ཀྱི་འདུག  སྔོན་མ་ངས་ཏཱ་ལའི་བླ་མར་གདོང་དང་གདོང་གཏད་དེ་འདི་ལྟར་བཤད་མྱོང།  ངས་རང་སྐྱོང་དང་རང་བཙན་ཐད་བཅར་འདྲི་བྱས་མཐར་བོད་མི་མང་ཆེ་བས་རང་བཙན་གྱི་ལམ་ཁ་འདེམས་ཀྱི་འདུག  ཡིན་ནའང། མི་གཅིག་གིས་རང་བཙན་འདེམས་ཀྱི་མི་འདུག་ཅེས་བཤད་པ་ཡིན། ཏཱ་ལའི་བླ་མས་ང་ལ་མི་དེ་སུ་རེད་ཅེས་དྲིས་བྱུང། ངས་ཁོང་ལ་དེ་ཁྱེད་རང་རེད་ཅེས་བཤད་པར། ཏཱ་ལའི་བླ་མས་ང་ལ་དཀྱེལ་ཡངས་འཛུམ་མདངས་ཀྱི་དགོད་སྒྲ་ཁོ་ནས་ལན་བཏབས་བྱུང།

ང༽ སྲིད་པ་དང་འོས་པ་ཞིག་རེད་དམ།
ངས་ཀྱང་ཏཱ་ལའི་བླ་མར་དཀའ་ངལ་གང་མང་ཞིག་ཡོད་པ་དེར་ངོས་ལེན་བྱེད་ཐུབ་ཀྱིན་འདུག  ད་ལྟའི་དུས་འདིར་བོད་ཀྱི་ཆོས་དང་རིག་གཞུང་བརླག་བཞིན་པའི་སྒང་ཡིན་ལ། རྒྱ་རིགས་འབོར་ཆེན་བོད་ནང་གནས་སྤོར་བྱས་ཏེ་རྒྱ་གཞུང་གིས་བོད་རྒྱ་ཡུལ་ཅན་དུ་བསྒྱུར་བའི་སྲིད་བྱུས་ལག་བསྟར་བྱེད་ཀྱིན་པ་སོགས་རྒྱ་ནག་གིས། བོད་དེ་ནང་སོག་ལྟ་བུ་ཞིག་ཏུ་འགྱུར་བའི་རེ་བ་བྱེད་ཀྱིིན་ཡོད་པ་རེེད། (ད་ལྟའི་ནང་སོག་ཏུ་མི་འབོར་ཁྲི་ ༢༣༨༠ ཡོད་པ་དང་། དེ་དག་ཁྲོད་བརྒྱ་ཆའི་ ༨༠ རྒྱ་རིགས་ཀྱི་ཟིན་ཡོད་ལ། མི་བཞིའི་ཁྲོད་མི་གསུམ་རྒྱ་རིགས་ཡིན་པའི་གནས་སྟངས་ཆགས་ཡོད་པ་རེད། ) དབུ་མའི་ལམ་ལ་རྒྱབ་སྐྱོར་གནང་མཁན་ཁག་ཅིག་གིས། རྒྱ་ནག་སྟོབས་ཆེ་བའི་དབང་གིས་བོད་མིས་རང་བཙན་འཐབ་རྩོད་བྱས་ཚེ་དེ་ནི་མི་སྲིད་པ་ཞིག་རེད། ཅེས་བརྗོད་ཀྱིིན་འདུག  བཤད་སྟངས་འདིས་ཅི་ཞིག་གསལ་བཤད་བྱེད་ཀྱིན་འདུག་ཅེ་ན། ཁོང་ཚོའི་བསམ་གཞིགས་བྱེད་སྟངས་ ”རྒྱ་རིགས་ཅན་” དུ་གྱུར་ཟིན་པས་རེད་ལ། དེ་ནི་རྒྱ་ནག་གི་མིས་བསམ་དགོས་པའི་གནད་དོན་ཞིག་རེད། ང་ཚོས་བྱ་བ་ཅི་ཞིག་སྒྲུབ་ཀྱང་ཐོག་མར་སྲིད་དང་མི་སྲིད་ལ་བསམ་བློ་མི་གཏོང་བར་ནུབ་ཕྱོགས་པ་བཞིན་ཐོག་མར་འོས་དང་མི་འོས་ཀྱི་གནད་དོན་འདྲི་དགོས།
 
ངས་འདི་ནས་དམིགས་བསལ་གྱི་གསལ་འདེབས་བྱ་འདོད་པ་ཞིག་ནི། གཙོ་བོ་རྒྱ་ནག་པ་དང་ནུབ་ཕྱོགས་པའི་བསམ་གཞིགས་བྱེད་སྟངས་རྩ་བ་ནས་མི་འདྲ་སྟེ། རྒྱ་ནག་པ་(རྒྱ་ནག་གི་སློབ་གསོས་གསོ་སྐྱོང་བྱས་པའི་མི) གནད་འགག་གི་དོན་དང་འཕྲད་ཚེ་ཐོག་མར་བསམ་འོང་བ་ནི། བྱུང་སྲིད་དམ་མི་སྲིད་ཅེས་པའི་དྲི་བ་འདི་རེད་ལ། ནུབ་ཕྱོགས་རིག་གནས་ཀྱིས་གསོ་སྐྱོང་བྱས་པའི་མིས་ཐོག་མར་དྲན་འོང་བ་ནི། འོས་སམ་མི་འོས། ཅེས་པ་དེ་རེད། ཡང་གཅིག་བཤད་ན་དེ་ནི་ཁོང་ཚོས་ཐོག་མ་ནས་མིའི་ཚད་གཞི་ཞིག་དང་འདུ་ཤེས་ཤིག་གི་སྟེང་ནས་དྲན་འོང་བ་ཞིག་རེད། མི་ལ་འདུ་ཤེས་ཡོད་པ་ནས་ཚད་གཞི་ཞིག་རྒྱུན་འཁྱོངས་བྱེད་ཀྱི་རེད་ལ། མུ་མཐུད་རྒྱུན་འཁྱོངས་བྱས་པ་ཡིན་ན་ལེགས་འགྲུབ་ངེས་པར་དུ་འབྱུང་སྲིད་པ་ཞིག་རེད། དེའི་རྐྱེན་གྱིས་ནུབ་ཕྱོགས་པར་རང་དབང་མེད་ཚེ་ཤི་བ་དང་གཅིག་མཚུངས་ཀྱི་འདུ་ཤེས་ཡོད་པ་དང་། རྒྱ་ནག་པར་ཤི་བ་ལས་རང་དགར་ཉིན་འཁྱོལ་བྱ་བའི་འདུ་ཤེས་དེ་ཡོད་པ་རེད། གནས་ཚུལ་དེ་དག་ལ་བལྟས་ཏེ་ནུབ་ཕྱོགས་པས་འོས་དང་མི་འོས་ཐག་གཅོད་པ་ལས་སྲིད་དང་མི་སྲིད་མི་བཤད་སྟབས།  དེ་ནི་རང་དབང་དང་ཕུན་ཚོགས་ཀྱི་ཐོག་མའི་དར་ཡུལ་དེ་ནུབ་ཕྱོགས་ནས་མགོ་བརྩམས་པའི་རྐྱེན་གྱིས་ཡིན་སྲིད།