ནང་ཆོས་ཀྱིས་མང་གཙོའི་དཀའ་ངལ་སེལ་ཐུབ།

ནང་ཆོས་ཀྱི་ཐོག་ནས་འདྲ་མཉམ་དང། སྤུན་ཟླར་བརྩི་བ། དྲང་བདེན་གྱི་འགྲེལ་བརྗོད་དང། གྷན་དི་རྗེ་ཡིས་གསུངས་པའི་རང་དབང་གི་འགྲེལ་བརྗོད་དེ་དག ད་ལྟའི་ལམ་སྲོལ་གྱི་ཐོག་ཏུ་སྦྱར་ན་འཕྲད་བཞིན་པའི་རང་བཞིན་གྱི་དཀའ་ངལ་མཐའ་དག་གཙང་སེལ་འགྲོ་རྒྱུར་བསྙོན་མེད་ཡིན་པར་བསམ་གྱི་འདུག

ཕྱི་ཚེས་ ༢ ཉིན་གྱི་དམངས་གཙོའི་དུས་དྲན་ཐེངས་ ༤༩ པའི་ཉིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་གོ་སྒྲིག་འོག བཀའ་ཁྲི་ཟམ་གདོང་རིན་པོ་ཆེ་མཆོག་གིས། དེང་རབས་མང་གཙོའི་ལམ་ལུགས་ལ་འཕྲད་བཞིན་པའི་དཀའ་ངལ་དང་། དེའི་གདོང་ལེན་བྱ་ཕྱོགས། ཞེས་པའི་སྟེང་གསུང་བཤད་ཅིག་གནང་ཡོད། དེ་ཡང་བཀའ་ཁྲི་མཆོག་གིས། དེ་རིང་འདིར་ཕེབས་མཁན་ཚང་མར་ད་ལྟ་ངོ་སྤྲོད་གནང་བ་ནང་བཞིན། ང་ལ་དེང་རབས་མང་གཙོའི་ལམ་ལུགས་ལ་འཕྲད་བཞིན་པའི་དཀའ་ངལ་དང། དེའི་གདོང་ལེན་བྱ་ཕྱོགས་སྐོར་ལ་བགྲོ་གླེང་བྱ་རྒྱུའི་གོ་སྐབས་གནང་ཡོད་པ་རེད། སྤྱིར་བཏང་གི་འགྲོ་སྟངས་བྱས་ན་ང་སྲིད་དོན་ཚན་རིག་གི་སློབ་ཕྲུག་མིན་པས། དེའི་ཐོག་ལ་ང་ལ་སྐད་ཆ་བཤད་རྒྱུའི་གནས་ཚད་ཡོད་པ་མ་རེད། འོན་ཀྱང་བར་ལམ་བཙན་བྱོལ་བོད་མིའི་ཆབ་སྲིད་མང་གཙོའི་རིང་ལུགས་སྟེང་དུ་ལས་རིགས་ཕྲན་བུ་བྱས་པ་ཡིན་པའི་ཆ་ནས།  དེང་རབས་ཀྱི་སྲིད་དོན་ཚན་རིག་དང་། སྤྱི་ཚོགས་ཚན་རིག དཔལ་འབྱོར་ཚན་རིག་བཅས་ལ་ཕྲན་བུ་མ་བལྟས་ས་མེད་པ་ཞིག་དང། ཡང་སྒོས་དེ་འབྲེལ་གྱི་གནད་དོན་ལ་གོ་མྱོང་ཐོས་མྱོང་ཕྲན་བུ་ཞིག་ཡོད་པ་རེད། ཅེས་གསུངས་པ་དང་སྦྲགས་ཁོང་གིས་མུ་མཐུད་དོན། དེ་རིང་གི་བརྗོད་གཞི་འདི་ངས་སྡེ་ཚན་གཉིས་སུ་ཕྱེས་ནས་བགྲོ་གླེང་བྱ་རྒྱུའི་འབད་རྩོན་ཞུ་རྒྱུ་ཡིན། དོན་ཚན་དང་པོ། ལྟ་གྲུབ་དང་ལམ་སྲོལ་ནང་དུ་ཡོད་པའི་དཀའ་ངལ་གང་དང་གང་ཡིན་པ། དོན་ཚན་གཉིས་པ། ལག་ལེན་ལ་བསྟར་བའི་སྐབས་ལྟ་གྲུབ་ཀྱི་རྣམ་གཞག་དང། དངོས་སུ་ལག་ལེན་བསྟར་བའི་སྐབས་བསྟར་མ་ཐུབ་པའི་དཀའ་ངལ་བཅས་རིགས་གཉིས་ཡོད་པར་དྲན་གྱི་ཡོད། དང་པོ་ལམ་སྲོལ་ནང་དུ་ཡོད་པའི་སྐྱོན་ཆའམ་དཀའ་ངལ་དེ་ཇི་ལྟར་བྱས་ཏེ་ངོས་འཛིན་དགོས་པ་དང། དེ་ངོས་འཛིན་པར་ཐོག་མར་ལམ་སྲོལ་དེ་ཇི་ལྟར་བྱས་ནས་བྱུང་བ། ཡར་རྒྱས་ཇི་ལྟར་ཕྱིན་པ། ད་བར་ཇི་ལྟར་བྱས་ནས་སླེབས་པ་སོགས་དེའི་འཕེལ་རིམ་དང་བྱུང་རབས་ལ་བལྟ་རྒྱུ་གལ་ཆེན་པོ་རེད།  སྔོན་དུ་ང་ཚོས་ཤེས་དགོས་པ་ཞིག་ནི། འགྲོ་བ་མིའི་མངོན་འདོད་དང། སྒྲུབ་བྱ་གཏན་འཁེལ་སྟངས་མི་འདྲ་བ་གཉིས་པོ་དེ་རེད། ཆོས་དང་འཇིག་རྟེན་གཉིས་ཀ་ཡོད་པའི་སྲོལ་རྒྱུན་གྱི་ནང་དུ་སྐྱེ་བོའི་འདོད་དོན་གཏན་ལ་དབབ་སྟངས་ཤིག་དང། འཇིིག་རྟེན་ཁོ་ནའི་བསམ་པ་ལྡན་པའི་དེང་རབས་སྐྱེ་བོའི་མངོན་འདོད་གཏན་ལ་དབབ་རྒྱུའི་འགྲོ་སྟངས་ཤིག་བཅས་གཉིས་ཡོད་པ་རེད། ཆོས་སྲིད་གཉིས་ལྡན་གྱི་སྐྱེ་བོའི་འདོད་དོན་གཏན་ལ་དབབ་པའི་སྐབས་སུ་སྐྱེས་བུའི་འདོད་དོན་བཞི་ཞེས་བརྗོད་སྲོལ་ཡོད་ཅིང། དེ་ནི་ཆོས་དང་ཐར་པ། ནོར་དང་འདོད་པ་བཅས་ཡིན། དེང་རབས་སྤྱི་ཚོགས་ཀྱི་དཔལ་ཡོན་ནང་གང་ཡོད་པ་དེ་ཚོས། སྐྱེས་བུའི་མངོན་འདོད་ལ་ནོར་དང་འདོད་པ་གཉིས་མ་གཏོགས། མཐར་ཐུག་གི་སྐད་ཆ་མི་ཤོད་ཅིང། ནུབ་ཕྱོགས་ཀྱི་གཉའ་གནོན་དང་། བཤུ་གཞོག་གི་དཀའ་ངལ་མྱངས་ཟིན་པའི་མི་མང་པོ་ཞིག་གི་བསམ་བློའི་ནང་དུ། སྤྱི་འཐུས་དབང་འཛིན་རིང་ལུགས་དང། བཀས་བཀོད་རྒྱུད་འཛིན་རིང་ལུགས་པས་མི་མང་གི་ཐོག་ཏུ། གཉའ་མནོན་དང་བཤུ་གཞོག་ཚད་ལས་བརྒལ་བ་བཏང་སྟེ།  གྲལ་རིམ་མཐོ་དམའ་དང། ཕོ་མོའི་དབྱེ་བ་ལ་སོགས་པའི་དབང་གིས། འགྲོ་བ་མིའི་སྤྱི་ཚོགས་ཀྱི་ནང་དུ་འདྲ་མཉམ་གྱི་གནས་སྟངས་རྩ་བ་ནས་མེད་པའི་རྐྱེན་གྱིས། དྲང་བདེན་མེད་པ་དང། མིའི་སྤྱི་ཚོགས་ལ་རང་དབང་མེད་པའི་ཚོར་བ་རྣོན་པོ་ཞིག་འབྱུང་བཞིན་ཡོད་པ་དང།  དེ་ལས་གྲོལ་ཐབས་ཀྱི་ལས་རིམ་གྱི་ནང་དུ་སྲིད་དོན་གྱི་ཚན་རིག་དག་ཡར་རྒྱས་ཕྱིན་པ་རེད། མང་གཙོའི་རིང་ལུགས་དང་། དམར་པོའི་རིང་ལུགས་གཉིས་པོའི་ཁ་གཏད་གཅོག་སའང་སྤྱི་འཐུས་དབང་འཛིན་རིང་ལུགས་དང། བཀས་བཀོད་རྒྱུན་འཛིན་གྱི་རིང་ལུགས་གཉིས་པོ་དེ་རེད། དམར་པོའི་རིང་ལུགས་བྱུང་ཚུལ་ཡང་སྤྱི་འཐུས་དབང་འཛིན་རིང་ལུགས་དང་། མ་རྩ་རིང་ལུགས། མ་རྩ་ཡོད་མཁན་དང་། མེད་མཁན་གྱི་གྲལ་རིམ་བཅས་གསུམ་པོར་ཁ་གཏད་གཅོག་བྱེད་ཀྱི་ལས་གཞི་ཞིག་བརྩམས་པ་ལས་བྱུང་ཡོད་པ་དང། མང་གཙོའི་རིང་ལུགས་དེའང་། མང་ཚོགས་ཀྱི་ནང་དུ་འགྱུར་བ་ཡོད་མེད་དང། མ་རྩའི་བདག་པོ། ངལ་རྩོལ་བ་ཡིན་མིན་ལ་མ་ལྟོས་པར། མི་མང་ཚང་མ་མི་གཅིག་གཉིས་ཀྱི་འོག་ཏུ། དཀའ་ངལ་འཕྲད་པ་མཐོང་ནས་དེའི་ཁ་གཏད་ལ་དབང་ཆ་ཡོངས་རྫོགས། མི་མང་ཚང་མས་མཉམ་སྤྱོད་བྱ་རྒྱུར་བསམ་བློ་བཏང་སྟེ་བྱུང་བ་ཞིག་རེད། ཁོང་ཚོས་སྐྱེ་བོའི་འདོད་དོན་གྱི་སྒྲུབ་བྱ་བཞིར་བསམ་བློ་གཏོང་གི་ཡོད་དེ། མི་སྒེར་ལ་རང་དབང་དང།  འདྲ་མཉམ། དྲང་བདེན། ཆིག་སྒྲིལ་བཅས་ཡོད་དགོས་རྒྱུ་དེ་ཡིན་ཞིང། དེ་ནི་སྤྱིའི་ཆ་ནས་མང་གཙོའི་ལྟ་བ་བཞི་ཡང་ཡིན། དེ་ལྟར་མང་གཙོའི་ཆེད་བརྗོད་བཤད་ཚར་བའི་རྗེས། དེ་དག་ལ་དཀའ་ངལ་གང་འཕྲད་ཀྱི་ཡོད་དམ་ཟེར་ན། དཀའ་ངལ་དང་པོ་ལམ་སྲོལ་གྱི་ནང་དུ་ཡོད་པའི་སྐྱོན་ཆ་དེ་དག་ངོས་བཟུང་བ། དཔེར་ན། རང་དབང་ཞེས་པའི་སྐད་ཆ་བཤད་པའི་སྐབས། སུས་ཀྱང་རང་དབང་གི་མཚན་ཉིད་དེ་སྐྱོན་གང་ཡང་མེད་པར་འཇོག་ཐུབ་ཀྱིན་ཡོད་པ་མ་རེད། རང་དབང་དེར་མཐའ་མཚམས་ཤིག་མ་བཟུང་ཚེ། སྤྱི་ཚོགས་ཀྱི་གནས་སྟངས་དེ་ཞེ་དྲག་གིས་དཀའ་ངལ་ཆེན་པོ་ཆགས་འགྲོ་གི་རེད། ད་ལྟ་ཕན་ལ་ཁྲིམས་ཁང་རིམ་པའི་ནང་ལ་རང་དབང་བེད་སྤྱོད་སྟངས་ལ་ཁ་མཆུ་མང་པོ་བྱུང་ཞིང་། ཚང་མའི་བཀའ་བཅད་ལ་བལྟས་ཚེ། གོ་དོན་གཅིག་འགྱུར་གཅིག་ཀྱང་མེད། དེ་འདྲ་ཡིན་དུས་རང་དབང་གི་རྣམ་བཤད་ཁ་གསལ་མེད་པའི་རྐྱེན་གྱིས་མང་གཙོའི་ལམ་སྲོལ་ནང་དུ། རང་ཆས་སུ་ཡོད་པའི་དཀའ་ངལ་གཅིག་རེད། དེ་བཞིན་འདྲ་མཉམ་ལ་མཚོན་ནའང། ལྟ་གྲུབ་ཀྱི་ནང་དུ་ཡོད་པ་ཞིག་མ་གཏོགས་དེས་འདྲ་མཉམ་གྱི་གནས་ཚུལ་འགྲེལ་བཤད་བརྒྱབ་རྒྱུ་ཁག་པོ་རེད། དེང་སང་གི་ནུབ་ཕྱོགས་སྲིད་དོན་ཚན་རིག་པས་འདྲ་མཉམ་ཞེས་པ་དེ། འདྲ་མཉམ་ནང་གི་འདྲ་མཉམ་དེར་གོ་བ་མ་གཏོགས། འདྲ་མི་མཉམ་པར་མཉམ་པ་ཞེས་མི་བརྗོད་པར་བཤད་ཀྱིན་ཡོད་རེད། དེང་སང་མང་གཙོའི་ལམ་སྲོལ་གྱི་ནང་མང་ཚོགས་ལ་འདྲ་མཉམ་གྱི་ཁེ་ཕན་དེ་ཇི་ལྟར་སྤྲོད་དགོས་པར་བསམ་བློ་བཏང་དུས་འགྲེལ་བཤད་རྒྱག་ཁག་པོ་རེད། དྲང་བདེན་ཞེས་པར་ཡང་། མིས་བཟོས་པའི་ཁྲིམས་ཀྱི་ཐོག་ནས་དྲང་བདེན་ཡིན་མིན་གྱི་རྣམ་དབྱེ་ཕྱེ་རྒྱུ་མ་གཏོགས། མིས་མ་བཟོས་པའི་རང་བཞིན་གྱི་ཁྲིམས་ཀྱི་ཐོག་ནས་དྲང་བདེན་དེ་ད་ལྟའི་སྲིད་དོན་ཚན་རིག་གི་ནང་བསམ་བློ་འཁོར་མི་ཐུབ་པ་རེད། དེ་འདྲ་ཡིན་དུས་དྲང་བདེན་གྱི་མཚན་ཉིད་དང། དེར་འགྲེལ་བརྗོད་བྱ་རྒྱུ་ནི་ཞེ་དྲག་གི་དཀའ་ལས་ཁག་པོ་ཞིག་རེད། དེ་བཞིན་སྤུན་ཟླའི་འདུ་ཤེས་སམ་ཆིག་སྒྲིལ་ཟེར་བ་དེ་ལའང་དེ་ལྟར་གྱི་འགྲེལ་བརྗོད་ཅིག་བྱ་རྒྱུ་ཁག་པོ་རེད། དེ་དག་ནི་དེང་རབས་ཀྱི་མང་གཙོའི་རིང་ལུགས་ནང་དུ། ལྟ་གྲུབ་ཀྱི་རང་བཞིན་ལ་བརྟེན་ནས་གསལ་པོ་མེད་པའམ། སྐྱོན་ཆ་ཅན་ཞིག་རེད། སྐུ་ཚབ་ཀྱི་མང་གཙོ་ཞེས་པའི་སྐབས་མི་མང་གི་མངའ་དབང་དེ་སྐུ་ཚབ་ཚོ་བརྒྱུད་ནས། དབང་བསྒྱུར་བྱེད་ཀྱིན་ཡོད་པར་བཤད་ཀྱིན་ཡོད་ཅིང། ཁོང་ཚོས་དབང་འཛིན་བྱས་པའི་སྐབས། དབང་ཆ་ཐམས་ཅད་ཕྱོགས་གཅིག་ལ་སྒྲིལ་མི་འགྲོ་བ་དང། ཕན་ཚུན་ཐེ་བྱུས་མེད་ཅིང། སྤྱི་སྙོམས་བཏང་འཛིན་ཡོང་སླད། ཁྲིམས་བཟོ་དང།  འཛིན་སྐྱོང་། ཁྲིམས་ལུགས་དབང་འཛིན་བཅས་གསུམ་བཟོས་པ་རེད། ལམ་སྲོལ་དེ་ཚོའི་ནང་དུ་དབང་ཆའི་དབྱེ་བ་ཕྱེ་ཡོད་ཀྱང། ཆུ་སྒྲོམ་ལྟར་ཕན་ཚུན་མ་འདྲེས་པར་གནས་རྒྱུ་ནི་ཧ་ཅང་གི་ཁག་པོ་རེད།  དཔེར་ན། ད་ལྟ་ང་ཚོ་བཙན་བྱོལ་བོད་མིའི་བཅའ་ཁྲིམས་དེ། དེང་རབས་ཀྱི་མང་གཙོའི་རིང་ལུགས་ཀྱི་རིག་པའི་གཞུང་ལུགས་གཞི་རྩར་བཞག་སྟེ་བྲིས་པ་ཞིག་ཡིན་ཞིང། གྲོས་ཚོགས་དང། བཀའ་ཤག ཁྲིམས་ཞིབ་ཁང་ལ་དབང་ཚད་གང་ཡོད་མེད་མཐའ་དག ཕན་ཚུན་ཐེ་བྱུས་མེད་པའི་ཐོག་ནས་དབྱེ་བ་གསལ་པོ་ཕྱེ་ཡོད་ཀྱང་། མཐའ་མའི་འགྲོ་ས་ནི་གྲོས་ཚོགས་ཀྱི་ནང་དུ་སླེབས་ཡོང་གི་ཡོད་དུས། མཐར་ཐུག་གི་དབང་ཚད་དེ་གྲོས་ཚོགས་སུ་བཞག་ཡོད་པ་རེད། ཡང་དག་པའི་མང་གཙོ་ཞིག་ཡོང་བར་བྱེད་པར་མི་མང་གི་སྐུ་ཚབ་མཚོན་ཐུབ་དགོས་ཀྱི་ཡོད་པ་དང། སྲིད་དོན་གྱི་ཚོགས་པ་མང་པོ་ཡོད་དགོས་པ་རེད། སྲིད་དོན་གྱི་ཚོགས་པ་མང་པོ་ཞིག་བཙུགས་ནས་དེས་མི་མང་གི་མངོན་འདོད་ཡོངས་སུ་རྫོགས་པ་སྟོན་ཐུབ་རྒྱུར་བཤད་པ་དེ་ནི། ཞེ་དྲག་གི་དཀའ་ལས་ཁག་པོ་རེད།  ནང་ཆོས་ཀྱི་ཐོག་ནས་འདྲ་མཉམ་དང། སྤུན་ཟླར་བརྩི་བ། དྲང་བདེན་གྱི་འགྲེལ་བརྗོད་དང། གྷན་དི་རྗེ་ཡིས་གསུང་པའི་རང་དབང་གི་འགྲེལ་བརྗོད་དེ་དག ད་ལྟའི་ལམ་སྲོལ་གྱི་ཐོག་ཏུ་སྦྱར་ན་འཕྲད་བཞིན་པའི་རང་བཞིན་གྱི་དཀའ་ངལ་མཐའ་དག་གཙང་སེལ་འགྲོ་རྒྱུར་བསྙོན་མེད་ཡིན་པར་བསམ་གྱི་འདུག གང་ལྟར་ཡང་། ངས་རགས་བསྡུས་ཀྱི་ཚུལ་དུ་བལྟ་གྲུབ་དང་ལམ་སྲོལ་གྱི་ནང་དུ་ཡོད་པའི་དཀའ་ངལ་དག་མདོར་བསྡུས་ཤིག་ཞུས་པ་ཡིན་ཞིང། དེའི་གདོང་ལེན་ཐད་ལ་ང་ལ་དམིགས་བསལ་ཞུ་རྒྱུ་གང་ཡང་མེད། ཅེས་གསུངས་ཡོད་པ་རེད།