ཚའོ་ཁྲང་ཆིན་གྱིས་བརྩམས། དོན་གོས་སྒྱུར།
མདང་དགོང་། ཏཱ་ལའི་བླ་མས་ཐའེ་ཝན་དུ་ཁོང་གི་ཆིབས་བསྒྱུར་ཐེངས་གསུམ་པ་དེ་བསྐྱངས་སོང། དེ་ལྟར་ཡང་། ཐེངས་འདིའི་ཁོང་གི་ཆིབས་བསྒྱུར་ནི་སྔོན་མ་དང་མི་འདྲ་སྟེ། ཐེངས་འདི་ནི་གུང་ཁྲན་ཏང་དང་གོ་མིན་ཏང་གཉིས་མཉམ་འབྲེལ་ཐོག་ཏཱ་ལའི་བླ་མར་དམའ་འབེབས་བྱས་པ་དེ་རེད། ལཱན་ཝེ་ཨུ་ཡོན་གྱིས་བཤད་པ་ལྟར་ན། ཏཱ་ལའི་བླ་མ་ཐེངས་འདིར་ཐའེ་ཝན་དུ་ཆིབས་བསྒྱུར་གནང་བ་དེ་ཆབ་སྲིད་ཀྱི་བསླུ་བྲིད་ཅིག་ཡིན་ཚུལ་བརྗོད་ཡོད་ལ། ཐའེ་ཝན་གྱི་གསར་ལམ་མཉམ་འབྲེལ་ཚགས་པར་སྟེང་། ཏཱ་ལའི་བླ་མའི་ཐེངས་འདིའི་ཆིབས་བསྒྱུར་ནི་ཐའེ་ཝན་གནོད་འཚེ་ཐེབས་ཡུལ་མི་མང་གིས་བསྐྲུན་པའི་ཆབ་སྲིད་ཀྱི་སྟེགས་བུ་ཞིག་ཡིན། ཅེས་བཀོད་འདུག དེ་བཞིན། སྐབས་འདི་དང་བསྟུན་ཏེ་དམིགས་བཀར་རྒྱ་ནག་ནས་ཆེད་དུ་ཕེབས་པའི་རྒྱ་ནག་ཆོས་ལུགས་འགན་འཛིན་ཡོས་ཞོ་ཝིན་གྱིས་འཛེམས་བག་ཅི་ཡང་མེད་པར་ཏཱ་ལའི་བླ་མ་ཆག་སྒོ་སློང་མཁན་གྱི་གང་ཟག་ཅིག་ཏུ་ངོས་འཛིན་བྱས་ཡོད་སྟབས། མཱ་ཡོན་ཅིག་གཙོས་པའི་གོ་མིན་ཏང་གི་དབང་འཛིན་མི་སྣ་དེ་དག་གིས། གནས་དུས་གང་དུའང་ཏཱ་ལའི་བླ་མར་མཇལ་འཕྲད་མི་གནང་བའི་དམ་བཅའ་བཞག་ཡོད་པ་རེད།
ཐེངས་འདིའི་ཐའེ་ཝན་གྱི་རང་བྱུང་གནོད་འཚེ་དེས་མཱ་ཡོན་ཅིག་ལ་ནུས་པ་ཅི་ཡང་མེད་པ་བདེན་དཔང་བྱས་ཡོད་ལ། ཏཱ་ལའི་བླ་མ་དང་མཇལ་འཕྲད་མ་གནང་བའི་ཐད་ནས་ཁོས་ཀྲུང་གོ་སྒེར་གཅོད་སྲིད་གཞུད་ལ་ངོ་དགའ་དང་པེ་ཅིན་གྱི་དབང་འཛིན་མི་སྣར་མགོ་སྒུར་ཏེ་རང་གི་འཇོན་ཐང་ཕྱི་རུ་མངོན་པ་གསལ་འདོན་བྱས་ཡོད། ཀྲུང་གུང་སྲིད་གཞུང་གིས། མདོག་ཉེས་པོའི་སྒོ་ནས་ཏཱ་ལའི་བླ་མར་ཚུར་རྒོལ་བྱས་པ་དེ་ལས་ང་ཚོའི་བློ་ངོར་ཤར་ཐུབ་པ་ཞིག་ནི། གུང་ཁྲན་ཁྲམ་པས་སྔར་ནས་བཟུང་མི་སྐད་མི་གོ་བ་སྨོས་མ་དགོས་པར། མིའི་གཤིས་བཟང་དང་ཕན་ཚུན་ཡི་རང་། མི་ཆོས་སོགས་ཀྱི་རིན་ཐང་རྟོགས་ཀྱི་མེད་པ་གསལ་བོར་ཤེས་ཐུབ། འོན་ཀྱང། མཱ་ཡོན་ཅིག་དབང་འཛིན་པ་རྣམས་ཀྱིས་རྫུན་བཟོ་དང་། རྫུན་ཚང་ཕྱི་རུ་བཏོད་མཁན་གྱི་ལཱན་ཝེ་ཨུ་ཡོན་སོགས་ཀྲུང་གོས་ཟེར་སྒྲོས་སུ་འབྲངས་ཏེ་སྐད་ཅོར་བརྒྱབས་པ་དེས། གོ་མིན་སྲིད་གཞུང་གིས་འོས་འདེམས་བྱས་པའི་སྲིད་འཛིན་དང་ཨུ་ཡོན་དག་ངོ་ཚ་པོ་བཟོས་ཡོད།
འདས་པའི་མི་ལོ་ཉི་ཤུའི་རིང་ཏཱ་ལའི་བླ་མས་བོད་རང་བཙན་དོར་ཏེ། བོད་རྒྱ་ནག་གི་མངའ་ཁོངས་སུ་འདུག་རྒྱུ་ཁས་ལེན་བྱས་ཤིང་། རྒྱ་ནག་གཞུང་ལ་ཆེས་མཐོའི་རང་སྲིད་རང་སྐྱོང་གི་དགོས་འདུན་བཏོན་ཡོད། འདི་ནི་ཆེས་དམའ་བའི་ཚད་གཞི་ལས་འགྲོ་ཐབས་མེད་པའི་ཁོང་གི་རེ་བ་ཞིག་རེད། འདས་པའི་དུས་སུ་ཏཱ་ལའི་བླ་མས་འདི་སྐད་དུ། ངས་རྒྱ་ནག་གཞུང་ལ་བཟོད་སྒོམ་ཚད་མེད་བྱས་པ་ཡིན་ལ། དེ་ལས་ལྷག་པའི་བཟོད་སྒོམ་ཞིག་བྱ་ཐབས་མེད་པ་རེད། ཅེས་གསུངས་ཡོད། ཉེ་ཆར་སུད་སི་བོད་རྒྱའི་ལྷན་ཚོགས་སྟེང་ཀྲུང་གོ་དང་ལངས་ཕྱོགས་མི་མཐུན་པའི་རྒྱ་རིགས་ཁག་ཅིག་གིས། བཙན་བྱོལ་བོད་གཞུང་དང་པེ་ཅིན་བར་གྱི་འབྲེལ་མོལ་གྱི་སྲིད་བྱུས་ལ་གྲུབ་འབྲས་ཅི་ཡང་བྱུང་མེད་པའི་དོགས་འདྲིའི་སྐབས། ཁོང་གིས་ཡང་བསྐྱར་དབུ་མའི་ལམ་གྱི་སྲིད་བྱུས་ལ་རྒྱུན་འཁྱོངས་བྱ་རྒྱུ་ཡིན་སྐོར་གསུངས་སོང་། ཁོང་གི་དབུ་མའི་ལམ་ལ་རྒྱབ་སྐྱོར་བྱ་རྒྱུའི་འདུན་པ་ཡོད་པ་ཡིན་ན། ཐེངས་འདིའི་ཁོང་གི་ཐའེ་ཝན་གྱི་ཆིབས་བསྒྱུར་སྐབས། ཆབ་སྲིད་ཀྱི་ཕྱག་ལས་ཅི་ཞིག་གནང་བ་ཡིན་ནམ། ཁོང་གིས། རྒྱ་གཞུང་ལ་བོད་འདི་ཀྲུང་གོའི་ཆ་ཤས་ཤིག་ཡིན་པ་ངོས་ལེན་བྱས་ཡོད་པ་མ་ཟད། ཡང་ནས་བསྐྱར་དུ་བོད་རང་བཙན་མི་རྩོད་པའི་ཁས་ལེན་བྱས་ཡོད་པ་རེད། འདི་ལྟར་བྱས་ཟིན་ནའང་མཱ་ཡོན་ཅིག་དང་གཅིག་མཚུངས་ཀྱི་དབུ་ཁྲིད་དག་གིས་ད་དུང་ཅི་ཞིག་ཏཱ་ལའི་བླ་མར་བསྒྲུབ་དུ་འཇུག་རྩིས་ཡོད་དམ། ད་ལྟའི་དུས་འདིར་ཡང་བོད་མི་ས་ཡ་དྲུག་རྒྱ་གཞུང་གིས་སྒེར་གཅོད་བྱས་ཡོད་ལ། ཏཱ་ལའི་བླ་མ་གཞན་ཡུལ་དུ་གྱར་ནས་མི་ལོ་ ༥༠ འདས་ཡོད་པ་རེད། འདི་ལྟ་བུའི་གནས་སྟངས་སུ་གྱུར་ཟིན་ནའང། ཀུན་བྱམས་དང་ཡི་རངས་མེད་པའི་ཆབ་སྲིད་པ་དེ་དག་ལ་མིའི་བརྩེ་སེམས་ཞེས་པ་ཞིག་མེད་པ་ཡིན་ནམ། ཁོང་ཚོ་ཚང་མ་ཡང་ཉེ་ཁུལ་གྱི་གུང་ཁྲན་ལྟར་འཛམ་གླིང་ཞི་བདེ་ལ་ནན་སྐུལ་བྱེད་ཀྱིན་པའི་ཆོས་ཕྱོགས་དབུ་ཁྲིད་དགྲ་རུ་འཛིན་མཁན་ཡིན་ནམ།
མཱ་སྲིད་གཞུང་ཕྱོགས་ཡོངས་ནས་ཀྲུང་གུང་ལ་ཁ་ཕྱོགས་ཤིང་ཀྲུང་གུང་གི་འཇིགས་སྐུལ་འོག་ཏུ་ཚུད་པ་ནས་བཟུང་། ཐེངས་སྔོན་མར་མཱ་ཡོན་ཅིག་གིས་ཏཱ་ལའི་བླ་མ་ཐའེ་ཝན་དུ་ཆིབས་བསྒྱུར་གནང་རྒྱུ་ནི་དུས་དང་མི་འཚམ་པའི་ཁྱབ་བསྒྲགས་གནང་ཡོད་པ་རེད། སྐབས་དེར། ཏཱ་ལའི་བླ་མ་ཐའེ་ཝན་དུ་ཆིབས་བསྒྱུར་གནང་བ་ཡིན་ན། ཁོང་ཚོས་ཏཱ་ལའི་བླ་མ་བཟུང་བའི་དགྲ་འཛིན་གྱི་འདུ་ཤེས་སོགས་གསལ་བོར་རྟོགས་སྲིད་པ་ཞིག་རེད། (དེ་ནི་མཱ་ཡོན་ཅིག་གིས་ཀྲུང་གུང་ལ་ཡིད་ཆེས་བློ་འགེལ་བྱས་ཏེ་ཏཱ་ལའི་བླ་མའི་འགུལ་སྐྱོད་ལ་ཚོད་འཛིན་བྱེད་ཀྱིན་ཡོད) དེ་ལྟ་ནའང་། ཐེངས་འདིར་ཏཱ་ལའི་བླ་མ་ས་ཐག་རིང་པོ་བརྒྱུད་དེ་ཐའེ་ཝན་དུ་ཕེབས་ཏེ་གནོད་འཚེ་ཐེབས་ཡུལ་མི་མང་ལ་གསོལ་འདེབས་སྨོན་ལམ་ཞུས་ཡོད་ལ་། དེ་ནི་བླ་མེད་ཀྱི་དབུ་ཁྲིད་ཏཱ་ལའི་བླ་མར་མཚོན་ན་ཚེ་སྲོག་ཆབ་སྲིད་ལས་གལ་ཆེན་ཡིན་པ་གསལ་སྟོན་བྱས་ཡོད་སྟབས། ཀྲུང་གུང་དང་མཉམ་འབྲེལ་བྱས་ཏེ་ཁོང་ལ་ཚུར་རྒོལ་དང་དམའ་འབེབས་ངན་སྨྲས་ཇི་འདྲ་བྱས་ཀྱང་ཕྱིར་འགྱངས་བྱེད་མི་སྲིད་ཀྱང་། ཐའེ་ཝན་མི་མང་གིས་ངེས་པར་དུ་ཐེངས་འདིའི་ཏཱ་ལའི་བླ་མའི་ཆིབས་བསྒྱུར་ལ་དགའ་བསུ་དང་བཀའ་དྲིན་དྲན་དགོས་པ་ཞིག་རེད།
ད་ལྟའི་དུས་འདིར་ཏཱ་ལའི་བླ་མ་ཤར་ཕྱོགས་པའི་ཁྲོད་ནས་འཛམ་གླིང་སྟེང་མིང་དུ་གྲགས་པའི་ཆོས་ལུགས་ཀྱི་དབུ་ཁྲིད་གཅིག་པུ་དེ་ཡིན་ལ། འཛམ་གླིང་དམངས་གཙོ་རྒྱལ་ཁབ་ཀྱི་དབུ་ཁྲིད་དག་གིས་ཀྱང་མཚན་སྙན་རྒྱས་ཆེད་ཏཱ་ལའི་བླ་མར་མཇལ་འཕྲད་གནང་གི་ཡོད། ལོ་སྔོན་མར་ཨ་རིའི་གྲོས་ཚོགས་ཀྱིས་ཏཱ་ལའི་བླ་མར་གསེར་གྱི་གཟེངས་རྟགས་ཕུལ་ཡོད་པ་དང་། གྲོས་ཚོགས་གོང་འོག་གཉིས་ཀྱི་གནད་ཡོད་མི་སྣ་དང་ཨ་རིའི་སྲིད་འཛིན་བཟའ་ཟླ་གཉིས་དངོས་སུ་ཕེབས་ཏེ་ཏཱ་ལའི་བླ་མར་གུས་འདུད་ཞུས་ཡོད། དེ་ལྟ་ནའང་། ད་ལྟའི་ཐའེ་ཝན་གྱིས། འཛམ་གླིང་མི་མང་གི་དད་ཞིང་གུས་བཞིན་པའི་བླ་མེད་ཀྱི་དབུ་ཁྲིད་ཅིག་ལ། དམའ་རིམ་གྱི་ཆབ་སྲིད་མི་སྣ་དག་གིས་དམའ་འབེབས་དང་ཚུར་རྒོལ་བྱས་པ་དེ་ནི་ཧ་ཅང་ཁོང་ཁྲོ་སྐྱེས་ཡུལ་ཞིག་ཏུ་གྱུར་ཡོད། གནས་སྟངས་དེ་ལ་བརྟེན་ནས་ཐའེ་ཝན་མི་མང་གིས་ T ཡིག་གིས་བོད་མཚོན་པར་བྱས་ཏེ་ལག་བརྡའི་སྒོ་ནས་ཏཱ་ལའི་བླ་མར་བསུ་བ་བྱས་ཡོད་པ་མ་ཟད། ཁོང་གིས་ཐའེ་ཝན་མི་མང་ལ་ཕུལ་བའི་བརྩེ་སེམས་དང་བཀའ་དྲིན་མཚོན་པར་བྱས་ཡོད་ལ། དེ་བཞིན། ཐེངས་འདིའི་ལྐོག་གཡོ་ངན་ཇུས་ཁྲོད་ངོ་རྒོལ་བྱ་མཁན་གྱི་རིགས་ལ་རྒོལ་ལན་སྤྲད་ཡོད་པ་རེད།
མཱ་ཡོན་ཅིག་གཙོས་པའི་དབང་འཛིན་མི་སྣ་དེ་དག་གི་བྱེད་ལས་ལ་ནུས་པ་ཅི་ཡང་མེད་པ་ང་ཚོས་ཤེས་ཐུབ་ལ། ཁོང་ཚོས་ངོ་ཚ་ཁྲེལ་མེད་ཀྱི་བྱ་སྤྱོད་སྤེལ་ཀྱིན་པའང་གསལ་བོར་རྟོགས་ཐུབ། ཁོང་ཚོ་གུང་ཁྲན་དང་འབྲེལ་བ་ཡོད་པ་ཇེ་གསལ་ནས་ཇེ་གསལ་དུ་འགྲོ་གིན་ཡོད། གནས་སྟངས་འདི་དག་ལས་གོ་མིན་ཏང་ཀྲུང་གུང་གི་ཆབ་སྲིད་ཀྱི་ཁ་གཏད་དུ་འགྲེངས་མཁན་མིན་པར་ཐའེ་ཝན་མི་དམངས་དང་བོད་མི་རིགས་ཀྱི་ཆབ་སྲིད་ཀྱི་དགྲ་བོ་ཞིག་ཏུ་གྱུར་འདུག་ལ། ཁོང་ཚོས་ཏཱ་ལའི་བླ་མའི་སྒྲུབ་སྟངས་ཏེ་ཆབ་སྲིད་ཀྱི་དགྲ་བོ་ཞིག་ཏུ་ངོས་འཛིན་བྱེད་ཀྱིན་པ་མ་ཟད། སྤྱི་ཚོགས་ནང་གི་ཆེས་དམའ་རིམ་གྱི་ཆབ་སྲིད་དགྲ་བོ་ཞིག་ཏུ་ངོས་འཛིན་བྱེད་ཀྱིན་ཡོད་པ་རེད།
ཅིས་མ་བདེན། དྲང་བདེན་ལ་དགའ་བའི་རྒྱ་རིགས་འདི་ཚོ་ནི་ངོ་མ་ང་ཚོས་རྗེས་སུ་ཡི་རངས་བྱེད་ས་ཉག་གཅིག་ལགས།