ང་ཚོར་ཐོབ་ཐང་དགོས་པ་ལས་རྙོག་དྲ་མི་དགོས།
ལུང་རྟོགས།
ཉེ་ཆར་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ཉིན་མཐའ་མར་སླེབས་གྲབས་ཡོད་སྐབས། སྤྱི་འཐུས་སྒེར་གྱི་གྲོས་ཆོད་གྲོས་འཆར་ཞིག་གི་ཐད་གྲོས་ཚོགས་འཐུས་མིའི་ནང་ཁུལ་དགོངས་ཚུལ་མ་མཐུན་པ་བྱུང་སྟེ། ཉིན་གཅིག་དང་ཕྱེད་ཀའི་ལས་རིམ་ཡོངས་རྫོགས་ལྷག་ཡོད་ལ། ཚོགས་འདུའི་མཇུག་བསྡོམས་ཀྱང་གནང་མ་ཐུབ་པ་བྱུང་ཡོད་པའི་གནས་ཚུལ་གསར་ལམ་ཁག་ནང་ཐོན་ཡོད་པའི་བློ་འཚབ་ཆེན་པོ་བྱུང་།
དྲ་རྒྱའི་ཐོག་རྩོམ་པ་པོར་རློམ་པ་རྣམས་ནས་ཆོལ་ཁའི་ཕྱོགས་ཞེན་གྱི་གཏམ་མང་པོ་ཞིག་བྲིས་འདུག་པ་ནི་དེ་བས་ཀྱང་བློ་ཕམ་གྱི་གནས་ལས་མ་འདས།
ད་ཐེངས་ཀྱི་རྩོད་རྙོག་དེའི་བྱུང་རིམ་ལ་ཕྱིར་མིག་གིས་བལྟས་ནས་དེ་ལ་དཔྱོད་གླེང་བྱེད་རྒྱུ་གལ་ཆེ་བར་མཐོང་ལ། དེ་བས་ཀྱང་ས་གནས་ཨོ་ཀྲི་ལི་ཡའི་བོད་མིའི་ངོས་ནས་ད་ཐེངས་ཀྱི་རྩོད་རྙོག་ལ་ལྟ་ཚུལ་གང་འདྲ་ཡོད་མེད་ཀྱང་ངེས་པར་དུ་ཤེས་དགོས་ཞིག་ཏུ་མཐོང་།
ཨོ་སི་ཀྲི་ལི་ཡའི་ནང་སྤྱི་འཐུས་བྱུང་མྱོང་མེད།
ཕྱི་ལོ་༡༩༧༠་ནང་བོད་མི་ས་གནས་འདིར་སླེབས་ནས་ད་ལྟའི་བར་མི་ལོ་༤༠་ཙམ་གྱི་རིང་ས་གནས་བོད་རིགས་ཀྱི་གྲངས་འབོར་མང་རུ་ཕྱིན་ཡོད་པ་མ་ཟད། རང་དབང་དྭངས་བླངས་ཀྱི་དཔྱ་ཁྲལ་འབུལ་མཁན་བརྒྱ་ཆ་བདུན་ཅུ་ཙམ་ཡོད་པ་སོགས་ས་གནས་གཞན་དང་བསྡུར་ན་བཙན་བྱོལ་བོད་མིའི་འོས་འགན་བླངས་ཡོད་ན་ཡང་ད་ལྟའི་བར་བཙན་བྱོལ་བོད་མིའི་ཐོབ་ཐང་གཙོ་བོའམ། ས་གནས་བོད་མིའི་སྐུ་ཚབ་ཅིག་བཙན་བྱོལ་བོད་གཞུང་གི་སྤྱི་འཐུས་ནང་སླེབས་ཐུབ་མེད།
ད་ལྟའི་ཨོ་སི་ཀྲི་ལི་ཡའི་བོད་མིའི་གནས་སྟངས་ལ་བལྟས་པ་ཡིན་ན་སྤྱི་འཐུས་ཞིག་དགོས་པ་གལ་ཆེ་བ་མ་ཟད། ཉེ་བའི་ལོ་ཤས་གོང་ནས་ས་གནས་བོད་མི་འགའ་ཤས་ཀྱིས་གལ་སྲིད་ང་ཚོར་ས་གནས་ཀྱི་སྤྱི་འཐུས་ཀྱི་ཐོབ་ཐང་མེད་པ་ཡིན་ན་དཔྱ་ཁྲལ་འབུལ་གྱི་མིན་སྐོར་གྱི་སྐད་ཆ་ཡང་བྱུང་མྱོང་། དེ་བས་༢༠༠༥་ལོ་ནས་ཚོགས་བཞིན་པའི་ཨོ་སི་ཀྲི་ལི་ཡ་དང་ནེའུ་ཛི་ལེན་ཊི་དང་གཉིས་ཀྱི་བོད་རིགས་རྒྱལ་ཡོངས་ཚོགས་ཆེན་ཐོག་དམིགས་བསལ་གྱི་གྲོས་ཆོད་ཅིག་བཞག་ཡོད་པའི་ནང་༼ཨོ་སི་ཀྲི་ལི་ཡ་དང་ནེའི་ཛི་ལན་ཊི་ཡུལ་གྲུ་གཉིས་སུ་གནས་སྡོད་བོད་མི་རྣམས་ནས་བཙན་བྱོལ་བོད་མིའི་རྩ་ཁྲིམས་རིན་པོ་ཆེའི་དགོངས་དོན་ལྟར་འོས་འགན་རྣམས་བསྒྲུབ་དང་བསྒྲུབས་བཞིན་ཡང་། རྩ་ཁྲིམས་རིན་པོ་ཆེའི་ནང་འཁོད་འདམ་བྱ་དང་འདེམས་བྱེད་ཀྱི་ཁེ་དབང་ཆ་ཚང་ད་དུང་ཐོབ་མེད་པས་ཡུལ་གྲུ་གཉིས་སུ་གནས་སྡོད་བོད་མིའི་སྐུ་ཚབ་ཞིག་གྲོས་ཚོགས་ནང་ཡོད་དགོས་པ་དང་སྤྱི་འཐུས་འོས་འཕེན་ཐོབ་ཐང་ཡོང་བའི་ཐམས་ལམ་གནང་རྒྱུ་༽་སོགས་འཁོད་ཡོད་པ་དང་ས་གནས་རང་གཞུང་དོན་གཅོད་བརྒྱུད་ནས་སྤྱི་འཐུས་ལྷན་ཁང་ལ་ཡི་གེ་བཏང་ཡོད་པ་གོ་ཐོས་བྱུང་།
ཨོ་སི་ཀྲི་ལི་བོད་མི་རྣམས་བོད་མིའི་བདེན་དོན་ཆེད་ལས་འགུལ་རབ་དང་རིམ་པ་སྤེལ་པའི་ནང་གྲུབ་འབྲས་ཆེན་པོ་ཐོན་ཡོད་པ་དང། ས་གནས་བོད་རིགས་མཐུན་ཚོགས་དང་བོད་དོན་རྒྱབ་སྐྱོར་ཚོགས་པ་སོགས་མཉམ་འབྲེལ་གྱིས་གང་ལྟར་བོད་རིགས་བཙན་བྱོལ་བའི་ལས་འགན་སྒྲུབ་མུས་ཀྱང་སྤྱི་པའི་འཐུས་ཚབ་ཅིག་ད་ལྟའི་བར་བྱུང་ཐུབ་མེད་པ་ལ་ཚོགས་མི་མང་པོ་ཞིག་གིས་བློ་ཕམ་བྱེད་བཞིན་ཡོད་པ་རེད།
ང་ཚོར་རྙོག་དྲ་མི་དགོས།
གོང་ཞུས་ལྟར་ས་གནས་བོད་རིགས་རྣམས་ཀྱིས་ས་གནས་སྤྱི་འཐུས་ཞིག་ཡོང་བའི་འབད་བརྩོན་བྱེད་བཞིན་པའི་སྐབས་འདིར་བཙན་བྱོལ་བོད་གཞུང་ནས་ཆབ་སྲིད་བཙོན་པ་སྤྱི་མཚུངས་ལྟར་སྤྱི་འཐུས་བསོད་ནམས་སྟོབས་རྒྱལ་ཁོང་གི་ནང་མི་དང་བཅས་པ་གཞིས་ཆགས་བྱེད་པར་བཏང་ཡོད་པ་རེད། ཁོང་རང་ཉིད་སྤྱི་འཐུས་ཞིག་ཡིན་པའི་ཆ་ནས་ས་གནས་བོད་རིགས་རྣམས་ཀྱིས་བརྩི་བཀུར་དང་ཁོང་གི་ལམ་སྟོན་ཡོང་བའི་རེ་བ་རྒྱག་གི་ཡོད་པ་རེད། འོན་ཀྱང་། ཁོང་ཉིད་ཨོ་སི་ཀྲི་ཡ་བོད་མིའི་སྐུ་ཚབ་མཚོན་པའི་སྤྱི་འཐུས་མིན་པའི་ཁོང་གི་མཛད་འཆར་དང་འབྲེལ་པའི་ད་ཐེངས་ཀྱི་རྙོག་དྲ་འདི་ལ་ས་གནས་བོད་རིགས་ཚོར་འབྲེལ་བ་སྤུ་ཙམ་མེད་པའི་གསལ་བཤད་ཞུ་འདོད་བྱུང་། གལ་སྲིད་སྤྱི་འཐུས་ཀྱི་འོས་འདེམས་བྱས་པ་ཡིན་ན་ཡང་ས་གནས་ས་ཐོག་ཏུ་ཉམས་མྱོང་ཡོད་མཁན་ཞིག་འདེམས་རྒྱུ་ཡིན་པ་གསལ་བོ་རེད། གང་ཡིན་ཟེར་ན་ས་གནས་བོད་མིའི་སྒྲིག་གཞི་གཏན་འབེབས་བྱས་པའི་ནང་རྒྱུན་ལས་ཀྱི་འོས་ཆོས་ནང་འཁོད་དོན་༼རང་ཉིད་ཚོགས་རྒྱུན་བྱེད་པར་རང་ཉིད་གནས་ཡུལ་རྒྱལ་ཁབ་ནང་འབྱོར་ནས་ཉུང་མཐར་ལོ་གཉིས་ཕྱིན་པའི་ཉམས་མྱོང་ངེས་པར་དགོས༽་པ་འཁོད་ཡོད་པའི་རྒྱུ་མཚན་ནི་རྒྱ་གར་སོགས་སུ་མཁས་གྲགས་ཡོད་མེད་ལ་མ་བལྟས་པར་ས་གནས་ས་ཐོག་གི་ཉམས་མྱོང་དགོས་པ་གསལ་བོར་བསྟན་ཡོད།
འགྲོ་སོང་ཐད་ཀྱི་རྙོག་གླེང་འདི་སེལ་ཐབས།
ཚོགས་གཙོ་སྤེན་པ་ལགས་ནས་གསུང་བར་གཞིག་ན་ཆོལ་ཁ་དང་ཆོས་བརྒྱུད་ཁག་གི་སྤྱི་འཐུས་རྒྱ་བལ་འབྲུག་གསུམ་ནས་ཡོང་དགོས་པ་དང་། རྒྱ་བལ་འབྲུག་གསུམ་ཕུད་པའི་ཕྱི་རྒྱལ་ཁག་ནས་ཆོལ་ཁ་དང་ཆོས་བརྒྱུད་ཀྱི་སྤྱི་འཐུས་ཡོང་སྲོལ་མེད། དེར་བརྟེན། ཁུངས་སོ་སོ་ནས་འོས་འདེམས་བྱུང་བའི་སྤྱི་འཐུས་ཚོ་གནས་སྤོར་བྱས་པ་ཡིན་ན། སྔར་སྲོལ་ལྟར་སོ་སོའི་འགྲོ་སོང་སོ་སོས་གཏོང་དགོས་པ་རེད། གཞུང་གྲོན་བཏང་ན་འགྲིག་གིན་མེད་ཅེས་གྲོས་འཆར་ནང་བཀོད་ཡོད་པར་བརྟེན་ད་ཐེངས་ཀྱི་རྩོད་རྙོག་འདི་བྱུང་ཡོད་པ་དང། སྤྱི་འཐུས་ཁག་ཅིག་ནས་མང་གཙོའི་འགྲོ་སྟངས་ལྟར་འོས་འཕེན་གྱི་ལམ་ནས་གྲོས་ཆོད་དེ་ཐག་གཅོད་མི་བྱེད་པར་བརྩི་མེད་རྡོག་རོལ་གཏོང་རྐྱང་བྱས་པ་དེས་ང་ཚོ་བཙན་བྱོལ་བོད་མིའི་སྤྱིའི་སྒྲིག་འཛུགས་ལ་མཐོང་ཆུང་བྱས་པ་ཞིག་ཡིན་པ་མངོན་གསལ་དོད་པོ་རེད།
མདོ་དོན་སྤྱི་འཐུས་བསོད་ནམས་སྟོབས་རྒྱལ་ལགས་ཀྱི་འགྲོ་སོང་ལས་འཕྲོས་པའི་རྙོག་དྲ་ཞིག་ཡིན་པས་རྗེས་མ་ཁོང་གི་འགྲོ་སོང་ཐད་དཀའ་ངལ་ཡོད་པ་ཡིན་ན་ལམ་སེང་དཔལ་འབྱོར་གྱི་དཀའ་ངལ་ཆེ་བའི་བཙན་བྱོལ་བོད་གཞུང་ལ་ལག་པ་མི་བསྲིང་བར་ས་གནས་བོད་རིགས་མཐུན་ཚོགས་དང་གྲོས་མོལ་བྱས་ན་དགེ་མཚན་ཆེ་བར་མཐོང་། ས་གནས་བོད་མི་ཚོས་དྭངས་བླང་དཔྱ་ཁྲལ་འབུལ་དོན་ཡང་བཙན་བྱོལ་བོད་མིའི་སྒྲིག་འཛུགས་ཚགས་ཆེན་ཡོང་རེ་ཁོ་ན་མ་འདས་པས་སྤྱི་འཐུས་ཞིག་གི་འགྲོ་སོང་གི་དཀའ་ངལ་དེ་སེལ་མི་ཐུབ་པའི་སེམས་ཁྲལ་མེད་པར་མཐོང་།
ཡིན་ན་ཡང།གསལ་བོར་ཞུ་དགོས་པ་ཞིག་མི་ལོ་ ༤༠ ཙམ་གྱི་རིང་ཨོ་སི་ཀྲི་ལི་ཡའི་བོད་མིའི་ལོ་རྒྱུས་ནང་་ས་གནས་མི་མང་གིས་འདེམས་པའི་སྤྱི་འཐུས་ཞིག་ད་ལྟའི་བར་བྱུང་མེད་ན།
གོ་སྐབས་འདི་བརྒྱུད་ནས་ཨོ་སི་ཀྲི་ལི་ཡའི་བོད་རིགས་རྣམས་ཀྱི་འཐུས་ཚབ་མཚོན་པའི་སྤྱི་འཐུས་ཞིག་གདམས་ཆོག་པའི་བཀའ་དྲིན་བླ་མེད་སྐྱོང་གནང་ཡོད་པ་ཞུ།
བསོད་ནམས་སྟོབས་རྒྱལ་ཟེར་བ་འདི་ཝ་མོ་གར་སོང་ས་ན་ཝ་དྲི་ཐུ་ལུ་ལུ་ཞེས་པའི་དཔེ་ལྟར་ས་གང་དུ་ཡོད་ན་རྙོག་དྲ་ཞིག་འདུག
ཆོལ་ཁ་གསུམ་གྱི་སྤྱི་འཐུས་སུ་ཡིན་མིན་ལ་མ་ལྟོས་པར་མི་མང་གིས་མངོན་འདོད་ལ་རྡོག་རོལ་གཏོང་མཁན་ཞིག་ཡིན་ཕྱིན་མི་མང་གིས་ཚ་ནན་གཏོང་དགོས་པ་མང་གཙོའི་ཐོ་ཐང་བླ་ན་མེད་པ་དེའོ།
བོད་གཞུང་གིས་སྐུ་དྲིན་ལས་ཕྱིའི་ཡུལ་གྲུ་ཞིག་ཏུ་རང་གི་འཚོ་གནས་ཙམ་མ་ཟད་གཞན་ལ་རོགས་རེམ་བྱེད་པའི་དཔལ་འབྱོར་གྱི་མཐུན་རྐྱེན་འཛོམས་ཀྱང་།ད་དུང་བོད་གཞིས་
ལུས་རྒྱ་ཆེའི་མི་མང་གི་རྔུལ་ཁྲག་དང་༧གོང་ས་མཆོག་གིས་འཛམ་གླིང་ཡུལ་གྲུ་ཀུན་ཏུ་
ངལ་བ་ཁྱད་བསད་གྱིས་བསགས་པའི་དངུལ་ལོ་དེ་དག་ཧབ་ཐོབ་གྱིས་སྐད་གསེང་མཐོ་བ་ལ་བལྟས་ན་རྒྱུན་ལྡན་གྱི་བོད་དོན་ལ་ཤ་ཚ་མདོག་གི་རྣམ་འགྱུར་ངོ་མ་དེ་མངོན་དུ་གྱུར་སོང་།ད་དུང་སྤྱི་འཐུས་རེ་འགས་གྲོས་འཚོགས་སྐབས་སུ་ཀུན་སྤྱོད་འདྲ་མིན་སྟོན་པ་བརྗེད་དེ་གྲོས་ཚོགས་གྲོལ་རྗེས་ཀུན་སྤྱོད་སྐོར་གྱི་རྩོམ་ཡིག་བྲི་སྟངས་ལ་ལྟོས་དང་།རང་མཚང་
སྟོན་པའི་རྒྱུ་རུ་མི་འགྱུར་རམ།
ངས་བལྟས་ན་ལུང་རྟོགས་ལགས་ཀྱིས་གསུངས་པར་རྒྱུ་མཚན་མེད་པ་མིན་འདུག སྤྱི་འཐུས་བསོད་ནམས་སྟོབས་རྒྱལ་ལགས་ཨོ་སི་ཀྲི་ལི་ཡའི་ནང་དུ་ཕེབས་སྐབས་སྤྱི་མཚུངས་ཀྱི་བཙོན་ཟུར་བཙན་བྱོལ་བ་ཞིག་ལས། ཨོ་སི་ཀྲི་ལི་ཡའི་སྤྱི་འཐུས་གནང་བར་ཕེབས་པ་ཡིན་འདོགས་ཁ་པོ་མ་རེད། གལ་སྲིད་མདོ་སྟོད་ཀྱི་མི་མང་བློས་གཏོང་མ་ཐུབ་ན། དགུང་ལོ་འདི་ཙམ་ལ་ད་དུང་ཡུལ་གཞན་ཞིག་ལ་སྐྱབས་བཅོལ་ཞུ་དོན་མེད། གལ་སྲིད་བཙན་བྱོལ་སྤྱི་ཚོགས་ལ་བརྩི་མཐོངས་འདི་ཙམ་ཡོད་ན། དཔལ་འབྱོར་འཕེལ་རྒྱས་ཀྱི་ཡུལ་གྲུ་ཨོ་སི་ཀྲི་ལི་ཡར་ཕེབས་ཟིན་ནས་ད་དུང་བཙན་བྱོལ་བོད་གཞུང་ལ་དཔལ་འབྱོར་གྱི་རོགས་རམ་ཞུས་པ་དེ། སུས་བལྟས་ཀྱང་མི་འཚམས་པ་ཞིག་མངོན།
མ་ཟདཨོ་སི་ཀྲི་ལི་ཡར་་སྤྱི་འཐུས་ཀྱི་འོས་འདེམས་བྱས་པ་ཡིན་ན་ཡང་ས་གནས་ས་ཐོག་ཏུ་ཉམས་མྱོང་ཡོད་མཁན་ཞིག་འདེམས་རྒྱུ་ཡིན་པ་གསལ་བོ་རེད། དེ་དྲ་གྲོགས་ཚོས་སྐུ་ཞབས་ལུང་རྟོགས་ལགས་འདེབས་དགོས་པའི་ངེས་པ་མེད།། ཧྰ་ཧྰ་་་་་་་་་་་་་
ལུང་རྟོགས་ལགས་ཨེ་འདྲ་མ་བཤད་
ཁྱོད་ཀྱིས་༼ ཉེ་བའི་ལོ་ཤས་གོང་ནས་ས་གནས་བོད་མི་འགའ་ཤས་ཀྱིས་གལ་སྲིད་ང་ཚོར་ས་གནས་ཀྱི་སྤྱི་འཐུས་ཀྱི་ཐོབ་ཐང་མེད་པ་ཡིན་ན་དཔྱ་ཁྲལ་འབུལ་གྱི་མིན་སྐོར་གྱི་སྐད་ཆ་བྱུང་མྱུང་༽ཞེས་བྲིས་འདུག
དེ་ལ་ཧ་ཅང་བློ་ཕམ་ཡོད་
དྭངས་བླངས་དཔྱ་ཁྲལ་གཞུང་ལ་ལྷག་བསམ་གྱིས་ཕུལ་བ་ལས་
ཐོབ་ཐང་སྤྱི་འཐུས་ཀྱི་ཆད་དུ་ཡིན་ན་ཐབས་སྐྱོ་རེད།
བློ་བཟང་ལུང་རྟོགས་ལགས། ཁྱེད་ལ་སྤྱི་འཐུས་བྱེད་འདོད་དང་དེའི་འཇོན་ཐང་ཡོད་ན་དེ་དེ་བཞིན་བྱེད་ཆོག་པ་ཞིག་རེད། ང་ཚོ་དེ་ལ་མི་དགའ་བ་ཅི་ཡོད། ང་ཚོས་སྤྱིའི་་གནས་བབ་དང་ད་ལྟའི་བཙན་བྱོལ་གྱི་གནས་བབ་ལ་ལྟོས་ནས་བཤང་ཀྱི་ཡོད། དངོས་ཡོད་ཀྱི་གནས་སྟངས་ལའང་ང་ཚོའི་བཙན་བྱོལ་ནང་དུ་སྤྱི་འཐུས་མང་མེད་ན་ཉུང་མི་འདུག དེ་དག་གིས་བཞག་པའི་བྱས་པ་ནི་འདི་ཕན་སོང་བསམ་བསམ་ཞིག་མཐོང་རྒྱུ་མི་འདུག ཁྱེད་རང་སླེབས་ནའང་ཞེ་པོ་ཞིག་བྱེད་ཐུབ་མདོག་ཁ་པོ་མ་རེད་དཱ།
ལྟད་མོ་རིག་ནོ་ཁོ་ཐག་རེད། ཤུ་རེ་གོ བོད་མི་འདི་དག་འདི་ལྟར་འཐོར་འདོད་ཡོད་པ་ཡིན་ནམ།
འོ་ཏག་ཏག་རེད། བོད་པ་ཡོད་སའི་རྒྱལ་ཁབ་རེ་ལ་སྤྱི་མཐུས་རེའི་ཐོབ་ཐང་སྤྲད། བཙན་བྱོལ་གཞུང་གི་རོགས་དངུལ་ཆུང་ཙག་དེ་ཁོང་ཚོའི་ལམ་གྲོན་ལ་སྤྲད། རྡ་སར་ཚོགས་འདུ་འཚོགས་སྐབས་རང་གི་བསམ་ཐོག་ལ་མ་ཡོང་ན་ཕྱི་ལོག་ལ་ཕྱིན། ཚོགས་གཙོས་ཚོགས་འདུ་མཇུག་སྡོམ་རྒྱག་མ་ཐུབ་པར་གྲོས་ཚོགས་འཐོར། ཡུན་གྱིས་བཙན་བྱོལ་བོད་གཞུང་འཐོར་སོང་ན་དེ་ནས་ཁྱོད་ཚོར་ཐོབ་ཐང་རྩོད་ས་ཡོད་པ་མ་རེད། ཕར་ཕྱོགས་རྒྱ་མིའི་ལ་ཁྱོད་ཚོས་ཐོབ་ཐང་རྩོད་མི་ཐུབ། དེ་ནས་གསང་སྤྱོད་རེ་བཀྲུ་རྒྱུ་རེག་ན་ཁྱོད་ཚོས་བསམ་དོན་འགྲུབ་སོང་པ་རེད།
ཉེ་ཆར་ང་ཚོའི་མཛད་གཙོ་ཞིག་གིས་གསུངས་དོན། སྐབས་རྗེས་མ་དེར་བྱང་ཨ་རི་དང་ཁེ་ན་ཌ་བཅས་སུ་སྤྱི་འཐུས་གཉིས་བསྐོ་སྲིད་པ་རེད། དེ་བཞིན་ཤར་ཨེ་ཡ་དང་ཞི་བདེའི་རྒྱ་མཚོའི་མངའ་ཁུལ་ལ་སྤྱི་འཐུས་ཤིག་བསྐོ་སྲིད་པ་རེད་ཟེར། ཤར་ཨེ་ཤ་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་ཁོངས་སུ་ཨོ་སི་ཊོ་ལི་ཡ་དང་ནེའུ་ལན་ཌི། ཐའེ་ཝན་དང་ཉི་ཧོང་སོགས་ཚུད་ཡོད་འདུག ཡུ་རོབ་ལ་སྤྱི་འཐུས་གཉིས་དགོས་ན་ཨ་རི་དང་ཁེ་ན་ཌར་ཡང་སྤྱི་འཐུས་གཉིས་ཀྱི་དགོས་མཁོ་ཡོད་པ་འདྲ།
ང་རང་སྤྱིར་བློ་བཟང་ལུང་རྟོགས་ལགས་ཀྱི་བསམ་ཚུལ་མོས་བ་ཡོད། བོད་མི་འདུས་སྡོད་བྱེད་སའི་ས་ཁུལ་ནས་བོད་མིའི་འཐུས་ཚབ་བམ་བསམ་ཚུལ་བཤད་མཁན་གྱི་ངོ་ཚབ་མཚོན་བྱེད་ཀྱི་སྤྱི་འཐུས་ལྟ་བུ་ཞིག་དགོས་བ་དངོས་ཡོད་རེད། འོན་ཀྱང་གལ་སྲིད་ཨོ་སི་ཊི་ལི་ཡ་དང་ནིས་ཛིར་ལན་ཌི་ལ་སྤྱི་འཐུས་ཞིག་གི་ས་མིག་སྤྲད་ན་མི་འགྱངས་བར་ཐེ་ཝན་ནས་བསམ་ཚུལ་འདི་འཁྱེར་ཡོང་མཁན་ཡོད་སྲིད་ལ་དེ་ནས་འཇར་པན་ཡང་གཅིག་མཚུངས། ཡོ་རུབ་ལ་སྤྱི་འཐུས་ཀྱི་ས་མིག་ཡོད་ཀྱང་ukནང་གི་བོད་རིགས་ཚོ་ཡོ་རུབ་དང་གཅིག་སྒྲིལ་བྱས་ཡོད་པ་རེད། དངོས་ཡོད་ཀྱི་སྟེང་ནས་བཤད་ན་ཡོ་རུབ་སྤྱི་འཐུས་ཀྱང་སྔ་གཞུག་ཀུན་ཏུ་སི་ཝུས་སི་ནས་ཡོང་གི་ཡོད་པས་ཡོ་རོབ་མནའ་འབྲེལ་གྱི་འོག་ཏུ་མེད་པའི་ukརྒྱལ་ཁབ་ཁག་གི་བོད་པ་ཚོར་གདམས་བྱ་འདེམས་བྱེད་གཉིས་ཀྱི་ཐོབ་ཐང་ཆ་ཚང་ཞིག་རེགས་ཀྱི་ཡོད་དམ་ཞེས་ན་ཐེ་ཚོམ་རེད། དེ་བཞིན་དུ་ཆོས་བརྒྱུད་ཁག་ཀྱང་གཅིག་མཚུངས་རེད། ཇོ་ནང་བར་སྤྱི་འཐུས་ཀྱི་ས་མིག་ངེས་བར་དུ་དགོས་ན་མ་འོངས་བར་དོལ་རྒྱལ་ཚོགས་པས་ཀྱང་སྤྱི་འཐུས་ཀྱི་ས་མིག་ཞིག་རྩོད་མི་སྲིད་པ་མ་རེད། ༼ སྐབས་འདིར་ངས་ཇོ་ནང་བ་དོལ་ཚོགས་གདན་ཐོག་གཅིག་ལ་བཞག་མིན་མོད་དོལ་ཚོགས་འདི་ད་དུང་ང་ཚོའི་སྤྱི་ཚོགས་འདིའི་གཏིང་ཟབ་ས་ན་འཛུལ་ཡོད་པས་ཉིན་ཞིག་སླར་ཡང་རོ་ལངས་རྒྱག་རྩིས་ཡོད་པ་༧གོང་ས་མཆོག་གི་བཀའ་སློབ་ཁག་ན་གསལ༽ དེར་བརྟེན་གནས་སྟངས་འདིའི་སྒང་ནས་ང་ཚོའི་གཞུང་ལ་གྲོས་ཚོགས་གོང་འོག་གཉིས་དགོས་བ་དང་འོག་མ་དེ་ས་གནས་གང་དུ་བོད་རིགས་འདུས་སྡོད་ཆེ་ན་བོད་མིའི་གྲངས་འབོར་ལྟར་གྲོས་ཚོགས་འོག་མའི་སྤྱི་འཐུས་ཡོང་སྲོལ་ཡོད་པ་ཞིག་དགོས་ཀྱི་འདུག། རྒྱལ་ཁབ་གཅིག་གི་ནང་དུ་མང་ན་ལྔ་དང་ཉུང་ན་གཅིག་ལྟ་བུ། དེའི་འགྲོ་གྲོན་ཡང་ས་གནས་རང་ནས་གཏོང་སྲོལ་ཡོད་པ་བྱས་ན་རྗེས་ཕྱོགས་ས་མིག་གཅིག་དང་གཉིས་བར་གྱི་རྩོད་རྙོག་དེ་མེད་པར་ཆགས་ངེས་ཡིན།
གླག་དང་རི་བོང་སོགས་སྲོག་ཆགས་ཀྱི་གྲས་ནས་མི་འདུག་པར་ང་ཚོ་མི་ལ་ཇུས་གཏོགས་བྱེད་པའི་ཐོབ་ཐང་སུས་སྤྲད་པ་རེད།
ངས་སྲོག་ཆགས་ཀྱི་སྐད་མི་ཤེས་པས་ལན་འདེབས་བྱེད་ཐུབ་མ་སོང་།
ལག་ཟུང་ཐལ་མོ་སྦྱར་ནས་དགོངས་དག་ཞུ་རྒྱུ་ཡིན།
ཁྱད་མཚར་་་་་་་་གླག་དང་རི་བོང་་
ད་དུང་་་་ཨ་ལ་ལ
ཨོ་སི་ཀྲི་ལི་ཡར་ས་གནས་སྤྱི་མཐུས་ཤིག་ངེས་བར་དུ་དགོས་ལ། མ་ཟད་ས་གནས་ས་ཐོག་གི་ཉམས་མྱོང་ཡོད་པ་ཞིག་ཀྱང་དགོས་པས་ཁྱོད་མ་གཏོགས་འགྲོ་ས་མེད་ཀི རྗེས་མར་ཁྱོད་ཡིན་ད། གྲ་སྒྲིག་གནང་རོགས།
དག་བཅོས་ཞིག་བྱེད་དགོས་ངེས་རེད། ལུང་རྟོགས་ལགས་ཁྱེད་ཀྱིས་སྤྱི་མཐུས་རྣམས་ཀྱིས་གནས་ཚུལ་གསལ་བོ་ཞིག་ཐོས་ཡོད་སམ། ཁྱེད་ཀྱིས་དྲང་བདེན་ཀྱི་སྐད་ཆ་ཞིག་ཤོད་དང་།
དེ་མིན་ང་ཚོའི་དག་བཅོས་བྱེད་ངེས་ཡིན།
ངས་བཤད་འདོད་པ་བྲིས་ཚར་ཡོད་པས་གྲོགས་པོ་རྣམ་པས་དཔྱད་བསྡུར་གནང་རྒྱུ་གལ་ཆེ།
༡ ཨོ་སི་ཀྲི་ལི་ཡའི་བོད་རིགས་རྣམས་ཀྱི་གནས་སྟངས་ཡག་ཐག་གཅོད་ཡོད། ཁ་ཐོར་ལ་འགྲོ་གི་འདུག་ཟེར་བ་དེའི་ཁ་འདྲེས་བཟུང་པ་ཐག་གཅོད། དེ་མིན་རང་ཉིད་ལ་བོད་རིགས་ཚོགས་པ་ཡར་རྒྱས་གཏོང་བའི་འགན་ཡོད་བཞིན་དུ་དོན་མེད་དཀྲོག་གཏམ་སྤེལ་དོན་ཅི་ཡོད།
༢་ ཨ་ལ་ལ་ཟེར་བ་དེ་མིང་རྫུན་ཅན་ཞིག་ཡིན་པ་དང་མིང་རྫུན་ཅན་ལ་ལན་མི་འདེབས་རྒྱུ་རང་ཉིད་ཀྱི་ལངས་ཕྱོགས་ཡིན། དགོངས་འགལ་མེད་པ་ཞུ།
ལུང་རྟོགས་ལགས། ངས་ཁྱེད་ལ་འདྲི། ཨོ་སི་ཁྲོ་ལི་ཡར་སྤྱི་འཐུས་མེད་པས་སྐྱོན་ཆ་ཅི་ཞིག་བྱུང་ཡོད་པ་དང་། སྤྱི་འཐུས་འདེམས་པ་ཡིན་ན་ཁེ་ཕན་ཅི་ཞིག་ཐོབ་ཀྱི་ཡོད་པ་ཁ་གསལ་ཞིག་གསུང་གནང་དང་། དེ་ལ་བལྟས་ནས་ང་ཚོས་བསམ་གཞིགས་ཅི་འདྲ་ཞིག་བྱེད་དགོས་པ་རྟོགས་ཤུབ།
ཁ་འཐོར་དུ་འགྲོ་བཞིན་པའི་ཨོ་སི་ཊིར་ལེ་ཡའི་བོད་རིགས་སྤྱི་ཚོགས་འདི་ལ་སྤྱི་་་འཐུས་ཤིག་མེད་ན་མི་འགྲིག་པ་ཞིག་ག་ལ་ཡིན། ལུང་རྟོགས་ལགས་ཀྱི་བསམ་ཚུལ་འདི་ཅི་འདྲིའི་ལྐོགས་གྱུར་བ་ཞིག་རེད། རྩོམ་ཡིག་འདིའི་དམིགས་ཡུལ་དང་རྒྱབ་ལྗོངས་ལ་ཁྱོད་ཚོས་སོམས་དང་།
རང་ཉིད་ལ་གོ་གནས་ཤིག་གི་དགོས་མཁོ་ཡོད་ན་ཁག་གཡས་དཀྲི་གཡོན་དཀྲི་བྱེད་དགོས་དོན་མི་འདུག་ག། དེ་མིན་ན་ཁྱོད་ཀྱི་རྩམ་ཡིག་འདིའི་དམིགས་ཡུལ་གང་ཡིན་ནམ།
ཁོང་གིས་ང་ཚོར་རྙོག་དྲ་མི་དགོས་ཟེར་བའི་ཚབ་ལ་ང་ཚོར་རྙོག་དྲ་དགོས་ཞེས་བཅོས་ན་གང་འདྲ་འདུག
གོང་གི་གཏམ་དེ་ནི་དཀའ་རྙོག་ཐེ་བ་ཞིག་ཏུ་མི་འགྱུར་བའི་ངེས་པ་མི་འདུག