བསྐྱར་དུ་བཟུང་བ།

ཉིན་ཤས་སྔོན་གནས་ཚུལ་གོ་གསལ་ལྟར་ན། རྔ་པ་རྫོང་རྨེའུ་རུ་མའི་སྒང་བ་ཚང་གི་རྔ་པ་ཀིརྟི་དགོན་གྱི་གྲྭ་པ་བློ་བཟང་ཚུལ་ཁྲིམས། རང་ལོ་ ༢༣ ཡིན་པ་ཁོང་རྒྱ་གཞུང་གིས་འཛིན་བཟུང་བྱས་ཡོད་འདུག ཁོང་ནི་ལོ་སྔོན་མའི་རྔ་པའི་ཞི་རྒོལ་ཆེན་མོའི་སྣེ་ཁྲིད་པའི་གྲས་སུ་བརྩིས་ཏེ། རྗེས་སུ་འཛིན་བཟུང་བརྡ་ཁྱབ་ས་གནས་མང་པོར་སྦྱར་ཞིང་ཡུན་རིང་རྩད་གཅོད་བྱས་ཡོད་ཀྱང་སྐབས་དེར་རྒྱ་ལག་ཏུ་ཤོར་མེད་ཀྱང་། མཐར་འདི་ལོའི་ཟླ་དང་པོ་ཡས་མས་ལ་མགོ་བཏགས་བྱས་ན་གུ་ཡང་གཏོང་རྒྱུ་ཡིན་ཚུལ་བརྗོད་པར་བརྟེན། སྐབས་དེར་མགོ་བཏགས་བྱས་ཏེ༌ཟླ་ཤས་རིང་བཀག་ཉར་བྱས་རྗེས་ཕྱིར་བཏང་ཡོད་འདུག་མོད། ཉེ་ཆར་ཟླ་ ༨ མཇུག་ཙམ་ལ་བསྐྱར་དུ་རྔ་པ་རྫོང་ཉེན་རྟོག་པས་འཛིན་བཟུང་བྱས་ཏེ། རྔ་བ་རྫོང་ནས་ལོ་ ༣ གྱི་བཙོན་འཇུག་ཁྲིམས་ཐག་བཅད་ཡོད་འདུག

གཞན། བློ་བཟང་བརྩོན་འགྲུས། རང་ལོ་ ༢༨ ཡིན་པ་ཁོང་ལོ་སྔོན་མའི་ཞི་རྒོལ་རྗེས་འཛིན་བཟུང་བརྡ་ཁྱབ་སྦྱར་བ་སོགས་བྱས་ནས་དུས་ཡུན་རིང་པོར་བརྩད་གཅོད་བྱས་ཡོད་ཀྱང་འཛིན་བཟུང་ཐུབ་མེད་མོད། རྗེས་སུ་གོང་མཚུངས་མགོ་བཏགས་ཞུས་ཡོད་སྟབས། གཞན་དག་དང་འདྲ་བར་ཟླ་བ་གཅིག་ཙམ་གྱི་རྗེས་གློད་འདུག་ནའང༌། ཉེ་ཆར་ཟླ་ ༩ ཚེས་མགོར་བསྐྱར་དུ་རྔ་པ་རྫོང་ཉེན་རྟོག་པས་འཛིན་བཟུང་གིས་ད་ལྟ་གར་ཡོད་ཀྱི་གནས་སྟངས་ཤེས་རྟོགས་བྱུང་མི་འདུག མགོ་ལོག་གཅིག་སྒྲིལ་རྫོང་ནས་ཡིན་པའི་རྔ་པ་ཀིརྟི་དགོན་གྱི་གྲྭ་བློ་བཟང་བསམ་གཏན། (བསམ་གཏན་ཁ་ཆེ་) རང་ལོ་ ༣༥ ཡིན་པ་ཁོང་ཡང་། ཟླ་ 9 ཚེས་མགོར་བསྐྱར་དུ་འཛིན་བཟུང་བྱས་ཡོད་ཀྱང་། ད་ལྟའི་གནས་སྟངས་གང་ཡང་ཤེས་རྟོགས་བྱུང་མེད། ཁོང་ཡང་སྔར་ལོའི་ཕྱི་ཟླ་ ༣ ཚེས་ ༢༨ ཉིན་འཛིན་བཟུང་གིས་ཟླ་ཤས་རིང་བཀག་ཉར་བྱས་ཡོད་འདུག

རྔ་པ་ཀིརྟི་དགོན་གྱི་གྲྭ་བློ་བཟང་བྱམས་པ། རང་ལོ་ ༣༠ ཡིན་པ། རྔ་པ་མཐའ་བ་གོང་མའི་ཚུལ་དེ། (མི་སྐྱ་) རང་ལོ་ ༢༥ ། ཙན་ཌ། (མི་སྐྱ་) རང་ལོ་ ༢༦ ཡིན་པ་བཅས་ཀྱང་ཟླ་ ༩ ཚེས་མགོ་ནས་འཛིན་བཟུང་བྱས་ཡོད་ལ། དེའི་ཁྲོད་ཀྱི་ཚུལ་དེ་ཞུ་བ་ཁོང་ཟི་ལིང་ནས་བཟུང་ཡོད་པ་དང་། ལོ་སྔོན་མའི་ཞི་རྒོལ་སྐབས་བཀྲ་ཤིས་དབང་ཕྱུག་མེ་མདས་དམར་གསོད་བྱེད་སྐབས་ཁོང་ལ་ཡང་མེ་མདའ་ཕོག་ཡོད་པའི་གནས་ཚུལ་འདུག གཞན་དག་རྔ་པ་ནས་བཟུང་འདུག་ཅིང་། ཚུལ་དེ་དང་ཙན་ཌ། དེ་སྔོན་བཟུང་བའི་རྔ་པ་ཇོ་ལེབ་སྡེ་བའི་ཀིརྟི་དགོན་པའི་གྲྭ་བློ་བཟང་དཀོན་མཆོག རྔ་པ་མཐའ་འགབ་མའི་དོན་ཁོ་རྒྱག་པ་བཅས་ཕྱི་ཟླ་ ༩ ཚེས་ ༡༧ ཉིན་རླངས་འཁོར་ཞིག་གི་ནང་བཀྱིགས་བསྡམས་བྱས་ཏེ། རྔ་པ་རྫོང་གི་ཉེན་རྟོག་པ་མང་པོས་གཡས་གཡོན་ནས་འཇུས་ཏེ་ཁྲོམ་སྐོར་བྱས་ཡོད་འདུག་ལ། དེའི་རྗེས་ཁོང་ཅག་གི་གནས་ཚུལ་ཤེས་རྟོགས་བྱུང་མི་འདུག གོང་གསལ་གནས་ཚུལ་དེ་འཕགས་ཡུལ་ཀིརྟི་བྱེས་པ་གྲྭ་ཚང་གི་གྲྭ་ཚེ་རིང་གིས་མཁོ་སྤྲོད་བྱས།