ཕ་རི་སིའི་ཧི་མ་ལ་ཡའི་དུས་སྟོན་ཐེངས་དགུ་པ།

ཉིན་ཐུང་ཤིང་མཚན་རིང་ལ། ཉི་འོད་དཀོན་པའི་ཕ་རི་སིའི་དགུན་ཟླ་རིང་མོ་མགོ་འཛུགས་ལ་ཉེ་སྐབས་འདིར། མི་ཚང་མས་ལོ་འདིའི་མཐའ་མཇུག་གི་ཉི་འོད་ལ་ལོངས་སུ་སྤྱོད་སླད་དུས་ཁོམ་དང་གཟའ་མཇུག་གི་གུང་གསེང་རྣམས་ཕྱི་ལོགས་ནས་གཏོང་བར་བྲེལ་བྲེལ་འཚུབ་འཚུབ་ངང་ཡོད།

དུས་ཚོད་འདིར་ཡུལ་མི་ཚོ་གྲོང་ཁྱེར་ཕྱི་ནང་གི་གླིང་ག་གང་རུང་ནང་ཕྱིན་ནས་ཉིན་གང་བོར་སྐྱིད་པོ་གཏོང་ཞོར་ཉི་མར་ལྡེ་རྒྱུ་ནི་འཚོ་བའི་རྒྱུན་སྲོལ་ལྟ་བུར་ཆགས་ཡོད། ཡུལ་མི་ཚོས་ཉི་འོད་ལ་ལོངས་སུ་སྤྱོད་དུས་འདི་རང་དབང་ཅན་གྱི་ཚོགས་སྡེ་འགའ་ལ་མཚོན་ན་རྩ་ཆེ་བའི་གོ་སྐབས་ཤིག་ཡིན་ཞིང་། ཁོ་ཚོས་གོ་སྐབས་འདི་བླངས་ནས་ལོ་ལྟར་མི་ཚོགས་འདུ་འཛོམས་ཆེ་སའི་གླིང་གའི་ནང་བྱེད་སྒོ་འདྲ་མིན་སྤེལ་བཞིན་ཡོད་ལ། རྒྱལ་ས་ཕ་རི་སིའི་ནང་རྟེན་གཞི་བྱས་པའི་བོད་ཀྱི་ཁང་པ་ཡང་ཚོགས་སྡེ་དེ་དག་གྲས་ཀྱི་གཅིག་ཡིན། བོད་ཀྱི་ཁང་པས་ལོ་ལྟར་དུས་ཚིགས་འདིར་ཧྥ་རན་སིའི་ཡུལ་མི་ཚོར་བོད་ཀྱི་རིག་གཞུང་ངོ་སྤྲོད་དང་། ཞོར་དུ་དཔལ་འབྱོར་འདུ་འགོད་གནང་ཆེད་ཧི་མ་ལ་ཡའི་དུས་སྟོན་ཞེས་པ་ཞིག་གོ་སྒྲིག་གནང་གིན་ཡོད་ལ། ད་ལོ་ནི་དུས་སྟོན་གོ་སྒྲིག་གནང་ཐེངས་དགུ་པ་དེ་ཡིན་འདུག

 ཧི་མ་ལ་ཡའི་དུས་སྟོན་ཚུགས་ཡུལ་སྟེ། Bois-du Vinnencen ནི་གྲོང་ཁྱེར་ཕ་རི་སིའི་ནང་གི་གླིང་ཁ་ཆེ་ཤོས་དེ་ཡིན། གླིང་གའི་ནང་རང་བྱུང་ཁམས་ཀྱི་མཛེས་ཉམས་དོད་པའི་སྤང་ཐང་དང་ཤིང་ནགས་རྒྱ་ཆེ་ཙམ་ཡོད་པ་མ་ཟད། གླིང་གའི་དཀྱིལ་དུ་མཚོ་གྲུ་གཏོང་སའི་མཚེའུ་ཞིག་ཡོད་ལ། རྟ་ཞོན་ནས་མཚེའུ་སྐོར་དུ་འགྲོ་བའི་བྱེད་སྒོ་སྤེལ་བཞིན་པ་དེས་སྤྲོ་འཆམ་པ་དང་སྐྱིད་པོ་གཏོང་བར་ཡོང་མཁན་ཚོར་རང་བྱུང་ཁམས་དང་ཐག་ཉེ་བའི་ཚོར་བ་སྣོན་མ་ཞིག་སྤྲོད་ཀྱིན་ཡོད། དེར་བརྟེན་གླིང་ག་འདི་གླིང་ག་གཞན་དང་བསྡུར་ན་མི་ཚོགས་འདུ་འཛོམས་ཆེ་ས་དེ་ཆགས་ཡོད།

ད་ལོའི་ཧི་མ་ལ་ཡའི་དུས་སྟོན་དེ་ཟླ་འདིའི་ཕྱི་ཚེས་ ༣ དང་ ༤ ཉིན་སྟེ་རེས་གཟའ་སྤེན་པ་དང་ཉི་མའི་ཉིན་འཚོགས་ཡོད་ལ། བོད་མི་སྒེར་བ་དང་སྐྱིད་སྡུག་ཚོགས་པ། བོད་དོན་རྒྱབ་སྐྱོར་ཚོགས་པ། ཆོས་ཚོགས་ཁག་ཅིག་གིས་རྒྱུན་ལྡན་ལྟར་དུས་སྟོན་ནང་བོད་ཀྱི་རིག་དངོས་ཐོན་རྫས་ཚོང་འགྲེམ་གྱི་ཆ་ཤས་བླངས་ཤིང་། ཧྥ་རན་སིའི་ཡུལ་མི་ཁག་ཅིག་གིས་བོད་ཀྱི་གཡག་གཉིས་དང་འབྲོག་ཁྱི་འགའ་དངོས་སུ་དུས་སྟོན་སྟེང་འཁྲིད་ཡོང་ནས་གཡག་ལ་ཁལ་འགེལ་སྟངས་དང་། འབྲོག་ཁྱིས་སྦྲ་སྒོ་སྲུང་སྟངས་ཐད་ངོ་སྤྲོད་བྱས། བོད་ཁང་དྲུང་ཆེ་དབང་པོ་ལགས་ཀྱིས་དུས་སྟོན་ངོ་སྤྲོད་གནང་བ་ལྟར་ན། བོད་ཁང་གིས་ལོ་ལྟར་འདི་འདྲའི་དུས་སྟོན་ཞིག་གོ་སྒྲིག་གནང་དོན་གཙོ་བོ་ཧྥ་རན་སིའི་ཡུལ་མི་དཀྱུས་མ་ཚོར་ཧི་མ་ལ་ཡའི་རིག་གནས་དང་། དམིགས་བསལ་བོད་ཀྱི་ཆོས་དང་རིག་གཞུང་། གནས་བབ་བཅས་ངོ་སྤྲོད་ཡོང་ཐབས་ཆེད་ཡིན་ཞིང་། ཞོར་དུ་བོད་ཁང་གིས་ཟ་ཁང་དང་ཚོང་ཁང་། རོལ་དབྱངས་མཚན་ཚོགས་སོགས་བསྡུས་ནས་དཔལ་འབྱོར་འདུ་འགོད་ཅུང་ཙམ་བྱེད་ཆེད་ཡིན་འདུག

ད་ལོའི་དུས་སྟོན་སྐབས་བོད་ཁང་གིས་བྷེལ་རྗམ་བོད་རིགས་ཚོགས་པའི་རིག་གཞུང་འཁྲབ་སྟོན་པ་དང་། ཧྥ་རན་སིར་གནས་བཞུགས་རྒྱ་གར་དང་བལ་བོའི་རིག་གཞུང་འཁྲབ་སྟོན་ཚོགས་པ་ཁག་ཅིག་ཆེད་དུ་གདན་དྲངས་ནས་ཡུལ་ལུང་སོ་སོའི་རིག་གཞུང་འཁྲབ་སྟོན་གནང་ཡོད་འདུག་ལ། ཧྥ་རན་སིའི་རྩོམ་པ་པོ་དང་གསར་འགོད་པ་ཨེ་རན་ཧྥུ་རན་ཁོས་༼ ཧྥ་རན་སིའི་ཡུལ་མི་དང་བོད་མིའི་མཚུངས་ཆ། ༽ཞེས་པ་དང་། ཉམས་ཞིབ་པ་ཁེ་རོན་ལེན་བན་སོན་གྱིས་༼ བོད་རྒྱའི་གནས་བབ། ༽ཅེས་པའི་བརྗོད་གཞིའི་ཐོག་བགྲོ་གླེང་གཏམ་བཤད་གནང་ཡོད་འདུག

དེ་བཞིན་ལྷ་སའི་རྨི་ལམ་དང་ཨ་མ་ཨ་བདེའི་ལོ་རྒྱུས་ཀྱིས་མཚོན་པའི་བོད་སྐོར་གྱི་གློག་བརྙན་ཁག་ལྔ་གཟིགས་འབུལ་ཞུས་ཡོད་པ་མ་ཟད། བོད་གཞུང་འགྲེམ་སྟོན་ཁང་གི་ལོ་རྒྱུས་འདྲ་རིས་ཁག་ཧྥ་རན་སིའི་སྐད་ཡིག་ནང་བསྒྱུར་ནས་འགྲེམས་སྟོན་བྱས་ཡོད་འདུག

ཧྥ་རན་སིའི་ཡུལ་མི་ལྕམ་ཨེ་ཟ་རྦེད་ལགས་ཀྱིས་དུས་སྟོན་ཐད་རང་གི་བསམ་ཚུལ་གསུངས་དོན། ༼ ང་རང་ད་ལོ་བརྩིས་པའི་དུས་སྟོན་འདིར་ཐེངས་གསུམ་བཞི་ཙམ་ཡོང་མྱོང་ཡོད། དུས་སྟོན་འདི་ངོ་མས་ང་ཚོ་ལ་ཕན་ཐོགས་པོ་ཞེ་དྲག་འདུག བོད་དང་བོད་མི། བོད་ཀྱི་གནས་སྟངས་ལ་རྒྱུས་ལོན་བྱེད་པར་ཕན་ཐོགས་པོ་ཞེ་དྲག་འདུག ང་རང་བོད་ལ་འགྲོ་མྱོང་མེད། དུས་སྟོན་འདི་བརྒྱུད་ནས་ངས་ཐེངས་དང་པོར་བོད་ཀྱི་གཡག་དང་འབྲོག་ཁྱི་མཐོང་སོང་ལ། ངས་བོད་ཀྱི་ཤོ་རྩེད་སྟངས་དང་ཕྱུ་བ་གྱོན་སྟངས་ཤེས་སོང་། མ་ཟད་རང་གི་མིང་བོད་ཡིག་ནང་འབྲི་ཚུལ་ཀྱང་ཤེས་སོང་། སོང་ཙང་དུས་སྟོན་འདི་ང་ཚོ་ལ་ཕན་ཐོགས་འདུག ང་དུས་སྟོན་འདིའི་རིགས་ལ་དགའ་བོ་ཞེ་དྲག་ཡོད་།༽ ཅེས་དང་། ཧྥ་རན་སིར་གནས་སྡོད་བོད་མི་རྒྱལ་མཚན་ལགས་ཀྱིས་༼ ང་རང་ཧྥ་རན་སིའི་བོད་མི་རྙིང་ཤོས་གྲས་རེད། དུས་སྟོན་འདི་འདྲ་ཞིག་གོ་སྒྲིག་གནང་བ་དེ་ཧ་ལས་པའི་ཡག་པོ་རེད་བསམ་གི མགོ་སེར་པོ་ཚོ་གཅིག་པུ་མ་རེད། ང་ཚོ་བོད་པ་ཚོ་ལའང་ཕན་ཐོགས་འདུག འདི་འདྲའི་སྐབས་སུ་བོད་མི་ཚོ་མཉམ་དུ་འཛོམས་ནས་ཕན་ཚུན་ངོ་ཤེས་བྱེད་པ་དང་། ལྷག་པར་དུ་བོད་ཕྲུག་ཆུང་ཆུང་དེ་ཚོ་མཉམ་དུ་འཛོམས་ནས་རྩེད་མོ་ཙམ་ལས་རྩེ་མ་ཐུབ་ནའང་ཁོ་ཚོའི་སེམས་ནང་ལ་ང་ཚོ་བོད་པ་ཞེས་པའི་བག་ཆགས་ཤིག་འཇོག་ཐུབ་པར་ཕན་ཐོགས་ཡོད་པ་རེད། འདི་གལ་ཆེན་པོ་རེད་བསམ་གི་འདུག ༽ཅེས་དུས་སྟོན་འདིས་ཧྥ་རན་སིར་གནས་སྡོད་བོད་མི་དང་བོད་ཕྲུག་ཚོར་ཐོགས་ཆེ་ཚུལ་གསུངས་སོང་།

འོན་ཀྱང་། ཧི་མ་ལ་ཡའི་དུས་སྟོན་འདི་ཕྱི་ལོ་ ༢༠༠༠ ལོ་ནས་མགོ་འཛུགས་ཀྱིས་ལོ་ལྟར་འཚོགས་བཞིན་ཡོད་ནའང་། ༢༠༠༧ ལོའི་དུས་སྟོན་སྐབས་ཀྱི་འགྲོ་སོང་དང་ཡོང་སྒོ་དོ་མ་མཉམ་པས་ ༢༠༠༨ ལོར་དུས་སྟོན་མུ་མཐུད་ཚུགས་ཐུབ་མེད་ལ། འདིའི་སྐོར་བོད་ཁང་དྲུང་ཆེ་དབང་པོ་ལགས་ལ་བཀའ་འདྲི་ཞུས་པར་ཁོང་གིས་༼ སྤྱིར་བཏང་དུས་སྟོན་འདིའི་སྐབས་དཔལ་འབྱོར་འདུ་འགོད་ཡོང་ཐབས་ལ་འབད་བརྩོན་བྱེད་གིན་ཡོད་པ་རེད། ༢༠༠༦ ལོ་དང་༢༠༠༧ ལོ་གཉིས་ལ་དུས་སྟོན་སྐབས་དཔལ་འབྱོར་ཁ་འདུམ་བྱུང་ཐུབ་ཡོད་པ་མ་རེད། དེ་ག་ནང་བཞིན་ད་ལོ་ཡང་ཁག་སེ་འདུག ཡིན་ནའང་འདིའི་དམིགས་ཡུལ་གཙོ་བོ་བོད་ཀྱི་རིག་གཞུང་ཡུལ་མི་དཀྱུས་མར་ངོ་སྤྲོད་བྱེད་རྒྱུ་དེ་རེད། དེ་གལ་ཆེན་པོ་རེད། སོང་ཙང་དཔལ་འབྱོར་གཅིག་པུའི་ཐོག་ལ་བསམ་བློ་མ་བཏང་བར་དུས་སྟོན་འདི་མུ་མཐུད་རྒྱུར་འབད་བརྩོན་བྱས་པ་ཡིན་ལ། མ་འོངས་པར་ཡང་མུ་མཐུད་ནས་འཚོག་ཐུབ་པའི་རེ་བ་རྒྱག་གིན་ཡོད། ༽ཅེས་གསུངས།

ཧྥ་རན་སིའི་ས་གནས་གསར་འགོད་པ། ཟླ་བ་ཚེ་རིང་གིས་སྤེལ།