དུས་ནམ་ཡང་བོད་མིའི་མཚན་ཐོག་གམ་ཡང་ན་༧གོང་ས་མཆོག་གི་མཚན་ཐོག་ཏུ་གནས་སྲིད་པའི་སྡོད་ཁང་ཞིག་རྒྱག་ཐུབ་མ་སོང་ཟེར།
ཕྱི་ཚེས་ ༨ ཉིན་སྦེལ་ཀོབ་ལུགས་བདེ་གཉིས་ཀྱི་གཞིས་མགོའི་ལས་ཚབ་རྣམ་གཉིས་དང་མཉམ་འབྲེལ་ཚོགས་གཙོ་རྣམ་གཉིས། དགོན་སྡེ་ཁག་དང་གཞིས་གྲོང་ཁག་གི་སྤྱི་མི། གཞོན་ནུ་དང་བུད་མེད་སོགས་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་གནད་ཡོད་མི་སྣ་བཞི་བཅུ་ལྷག་མཉམ་ དུ་འཛོམས་ཏེ། ཨན་ངྷ་ར་མངའ་སྡེ་དང་ཀར་ན་ཌ་ཀ་མངའ་སྡེའི་བྱང་ཕྱོགས་ཁུལ་གྱི་རྫོང་ཁག་འགའི་ཡུལ་མིར་ཆུ་ལོག་གིས་གནོད་སྐྱོན་ཕོག་པར་ཛ་དྲག་ཐོག་མི་མང་ནང་ཞལ་འདེབས་བསྡུ་རྒྱུའི་སྐོར་ལ་ གྲོས་བསྡུར་བྱས་ཏེ། ཞལ་འདེབས་བསྡུ་མགོ་བརྩམས་ཡོད་པ་དང་། ད་ལྟ་ལས་བྱེད་ཀྱི་ཉིན་གཅིག་གི་ཟས་དོད་ནས་ཞལ་འདེབས་སུ་ཡོང་བ་ཧིན་སྒོར་འབུམ་གཅིག་དང་བཞི་སྟོང་བདུན་བརྒྱ་དྲུག་ཅུ་རེ་ལྔ་ ༡༠༤༧༦༥ དང་། མི་མང་ནས་ཡོང་བ་ཧིན་སྒོར་འབུམ་ ༦ བཅས་ཡིན་འདུག་ལ། དེ་གཉིས་བསྡོམས་པས་ཧིན་སྒོར་ ༧༠༤༧༦༥ ཡི་ཞལ་འདེབས་བསྡུས་ཡོད་འདུག
ཐེངས་འདིར་ཞལ་འདེབས་སུ་བསྡུས་པའི་ཧིན་སྒོར་འདི་དག་ཕྱི་ཚེས་ ༢༢ ཉིན་མེ་སོར་རྫོང་དཔོན་དང་ཧོང་སོར་རྫོང་དཔོན་གཉིས་བརྒྱུད་ཀར་ན་ཌ་ཀ་མངའ་སྡེའི་སྤྱི་ཁྱབ་བློན་ཆེན་མཆོག་གི་ཕྱག་ཏུ་འབུལ་རྒྱུ་ཡིན་པ་དང་། ཉིན་དེར་ཀར་ན་ཌ་ཀའི་སྤྱི་ཁྱབ་བློན་ཆེན་གྱི་ལས་ཁུངས་གཡས་གཡོན་གྱི་སྤང་ཐང་དུ། གྲྭ་བ་ཉིས་བརྒྱ་ལྷག་གདན་ཞུས་ཀྱིས་བསྔོ་སྨོན་གསུང་རྒྱུའི་ལས་རིམ་ཞིག་ཀྱང་བསྒྲིགས་ཡོད་པ་མ་ཟད། ཞལ་འདེབས་ཀྱི་དངུལ་འཛིན་དང་མཉམ་དུ་སངས་རྒྱས་ཀྱི་སྐུ་བརྙན་ཞིག་ཀྱང་དྲན་རྟེན་དུ་འབུལ་རྒྱུ་ཡིན་འདུག དེ་བཞིན་ཐེངས་འདིར་ཧོང་སོར་གཞིས་ཆགས་སུ་བསྡུས་པའི་ཞལ་འདེབས་ཀྱང་ཉིན་དེར་མཉམ་དུ་འབུལ་རྒྱུ་ཡིན་འདུག
སྦེལ་ཀོབ་ལུགས་ཟུང་བསམ་འགྲུབ་གླིང་མཉམ་འབྲེལ་ཚོགས་གཙོ་པདྨ་བདེ་ལེགས་མཆོག་གིས་འདིའི་ཐད་དུ་གསུངས་དོན། ང་ཚོས་འདི་ལྟར་ཞལ་འདེབས་བསྡུ་དགོས་པའི་དམིགས་ཡུལ་ནི། སྤྱིར་རྒྱ་གར་གཞུང་དང་ལྷག་པར་ཀར་ན་ཌ་ཀ་མངའ་སྡེ་ནི་ང་ཚོའི་དགོན་པ་གྲྭ་ཚང་ཁག་དང་གཞིས་ཆགས་ཁག་གི་མི་མང་སོགས་སེར་སྐྱ་སྟོང་ཕྲག་ ༣༥ ལྷག་ལ་བཀའ་དྲིན་ཆེན་པོ་ཡིན་སྟབས། ཡུལ་མི་རང་ལ་དཀའ་ངལ་བྱུང་བའི་སྐབས་འདིར་ང་ཚོས་ངོས་ནས་ཁོང་ཚོར་གདུང་སེམས་མཉམ་སྐྱེད་བྱེད་པ་དང་། བཀའ་དྲིན་དྲན་པའི་ཐོག་ནས་ཐེངས་འདིའི་ཞལ་འདེབས་འདི་དག་བསྡུས་པ་རེད་ལ། ཉེ་ཆར་སྐུ་སྒེར་ཡིག་ཚང་ནས་ཀྱང་གོང་གསལ་མངའ་སྡེ་གཉིས་ལ་ཧིན་སྒོར་འབུམ་ ༥ རེས་ཞལ་འདེབས་ཕུལ་ཡོད་འདུག དངོས་གནས་བྱས་ན་ཐེངས་འདིར་སྐུ་སྒེར་ཡིག་ཚང་ནས་ཕུལ་བའི་ཧིན་སྒོར་འབུམ་ ༡༠ དང་། སྦེལ་ཀོབ་ནས་བྱུང་བའི་ཧིན་སྒོར་འབུམ་ ༧ ། དེའི་སྟེང་དུ་གཞིས་ཆགས་གཞན་གསུམ་ནས་ཧིན་སྒོར་འབུམ་ ༣ བྱུང་བ་ཡིན་ན། ཧིན་སྒོར་འབུམ་ ༢༠ ཆགས་ཀྱི་ཡོད་ལ། དེའི་སྟེང་དུ་རྒྱ་གར་གཞུང་གིས་ཀྱང་ཧིན་སྒོར་འབུམ་ ༢༠ སྣོན་གི་རེད། དེ་ལྟར་བྱུང་ན་ཧིན་སྒོར་འབུམ་གཅིག་རེ་སྤྲད་དེ། ཐེངས་འདིར་གནོད་སྐྱོན་ཕོག་ཡུལ་གྱི་ས་ཁུལ་དུ་སྡོད་ཁང་བཞི་བཅུ་ཐམ་པ་བརྒྱབ་ཐུབ་ལ། སྡོད་ཁང་དེ་དག་ནི་བོད་མིས་མིང་ཐོག་གམ་ཡང་ན་༧གོང་ས་མཆོག་གི་མཚན་ཐོག་ནས་དུས་ནམ་ཡང་གནས་སྲིད་པ་ཞིག་རེད། འོན་ཀྱང་། གཞིས་ཆགས་གཞན་ཁག་ནས་བྱུང་བའི་ཞལ་འདེབས་ཀྱིས་ཧིན་སྒོར་འབུམ་ ༣ ལོངས་མི་འདུག་པས་དངུལ་འཛིན་སྤྲོད་རྒྱུ་ཙམ་ལས། ཁང་པ་རྒྱག་ཐུབ་ཀྱི་མི་འདུག་ཅེས་གསུངས་ཡོད།
ཞལ་འདེབས་འདི་དག་ཆད་ལུས་མེད་པར་མི་དམངས་གི་ཐོག་ཏུ་གཏང་བ་ཡིན་ན་དངོས་གནས་ཡག་པོ་ཞིག་རེད་དེ་མིན་དཔོན་ངན་མང་པོའི་ལག་པ་རྒྱུད་ནས་མཐའ་མ་མི་དམངས་ལ་གསུམ་ཆའི་གཅིག་ཙམ་ལས་མ་དབང་ཚེ་དངོས་གནས་ཞལ་འདེབས་འབུལ་མཁན་གྱི་མི་དམངས་དེ་ཚོའི་ཁྲག་རྣག་ལས་བྱུང་བའི་དངུལ་འདི་དག་དོན་དུ་དམྱལ་བར་ལྷུང་ངེས་ཡིན་པས་དཔོན་ངན་ཚོ་ཟབ་དགོས། །
བཀྲ་ཤིས་བདེ་ལེགས་ཞུ།
སྐྱབས་བཅོལ་བོད་མིའི་ཞལ་འདེབས་ཕྲན་བུ་བྱུང་བ་དེ་དཔོན་ཆེན་ཕོ་ལུག་ཅིག་གི་ལྟོ་བའི་ནང་དུ་མི་འགྲོ་བར་ཡུལ་མི་ཉམས་ཐག་ཚོའི་གནས་སྐབས་ཀྱི་ལྟོ་གོས་ཀྱི་དཀའ་ངལ་ཕྲན་ཙམ་སེལ་ཐུབ་པར་ལྷ་དབང་ཕྱུག་ཆེན་པོས་གྲོགས་དན་མཛོད་ཅིག ལྷ་མོ་ཨུ་མས་གྲོགས་དན་མཛོད་ཅིག ཧཱ་ནུ་མན་ཐས་གྲོགས་དམ་མཛོན་ཅིག
མི་མང་ལ་གཞན་ཕན་གྱི་ལྷག་བསམ་མེད་པ་ཡིན་ནམ་ཞལ་འདེབས་བསྡུ་མཁན་ཚོར་མི་མང་གིས་ཡིད་ཆེས་མ་བྱས་པ་ཡིན་གང་ཤེས།