དགེ་རྒན་ལས་རིཊ་གཞན་ལས་ལྡབ་འགྱུར་གྱི་ཕན་རླབས་ཆེ།

ཤེས་ཡོན་དང་སྤྱི་ཚོགས་ཀྱི་ལས་ཀ་གང་བྱས་ཀྱང་དཀའ་ངལ་ཕྲན་བུ་འཕྲད་པ་ཆོས་ཉིད་རེད། ངང་རྒྱུད་རིང་པོ་དང་བློ་ཁོག་ཡངས་པོས་གདོང་ལེན་བྱ་དགོས། གདོང་ལེན་བྱེད་སྟངས་དེ་བཅའ་ཁྲིམས་རིན་པོ་ཆེ་དང་༧་གོང་ས་མཆོག་གི་བཀའ་སློབ། བོད་གཞུང་གི་སྲིད་བྱུས་སོགས་སུ་དཀའ་ངལ་ལ་གདོང་ལེན་བྱེད་སྟངས་གསུངས་ཡོད། དཀའ་ངལ་གང་ལ་འཕྲད་ཀྱང་ལམ་སེང་རྙོག་དྲའི་ནང་མི་འགྲོ་བར་བདེན་པ་དང་འཚེ་བ་མེད་པ། ཡང་དག་པའི་དམངས་གཙོ་གསུམ་གཞི་རྩར་བཟུང་པ་ཡིན་ན་དཀའ་ངལ་སེལ་རྒྱུར་ཕན་ཐོགས་ཡོང་གི་རེད་ཟེར།

ཁ་སང་ཕྱི་ཚེས་ ༢༧ ཉིན་བཞུགས་སྒར་ཡོངས་གླིང་སྔོན་འགྲོའི་སློབ་གྲྭ་དབུ་བརྙེས་ཏེ་ལོ་ངོ་ ༢༥ འཁོར་བའི་དུས་དྲན་སྲུང་གཙི་བྱས་ཡོད། མཛད་སྒོའི་སྐུ་མགྲོན་གཙོ་བོར་བོད་གཞུང་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་མཆོག་ཕེབས་ཡོད་ལ། བོད་མི་མང་སྤྱི་འཐུས་ཡེ་ཤེས་སྒྲོལ་མ་མཆོག་དང་ངྷ་ས་ས་གནས་མགོ་འཛིན་ཚེ་རིང་ཕུན་ཚོགས། གཞན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་ཕེབས་ཡོད། མཛད་སྒོའི་ལས་རིམ་ཐོག་མར་སྒྲོལ་མ་ཤེལ་ཕྲེང་བཟོ་ལས་ཁང་དང་སློབ་གྲྭའི་པར་རིགས་འགྲེམས་སྟོན་ཞུས་ཡོད། དེའི་རྗེས་སྐུ་མགྲོན་གཙོ་བོ་མཆོག་གིས་སློབ་གྲྭའི་ལོ་རྒྱུས་དཔེ་དེབ་དབུ་འབྱེད་དང་ལས་བྱེད་རྒན་གྲས་རྣམས་ལ་ལེགས་སྐྱེས་ཕུལ་ཡོད་ལ། སློབ་གྲྭའི་འགན་འཛིན་མཆོག་ནས་དུས་དྲན་ངོ་སྤྲོད་དང་སྦྲགས་ལས་བསྡོམས་སྙན་སྒྲོན་ཞུས་ཡོད།

སྐབས་དེར་སྒུ་མགྲོན་གཙོ་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་མཆོག་གིས་གསུང་བཤད་གནང་དོན། ད་ལྟ་ཞབས་ཞུ་སྒྲུབ་བཞིན་པའི་དགེ་ལས་རྣམ་པར་འབྲེལ་བ་ཡོད་པའི་རེ་བ་ཞིག་ཞུ་རྒྱུ་ཡོད་པ་དེ་གང་ཡིན་ཟེར་ན། དགེ་རྒན་གྱི་བྱ་བར་ལྷག་བསམ་རྣམ་དག་དང་འབད་པ་བྱས་པ་ཡིན་ན། དགེ་རྒན་གྱི་ལས་ཀ་དེ་སྤྱི་ཚོགས་ནང་གི་ལས་རིགས་གཞན་དག་ལས་ལྡབ་འགྱུར་གྱི་ཕན་རླབས་ཆེན་པོ་ཡིན། ཆོས་ཕྱོགས་ནས་བཤད་ནའང་ཕར་ཕྱོགས་ནས་སོ་སོས་མི་ཚེ་བློས་བཏང་སྟེ། སྒྲུབ་པ་ཉམས་ལེན་བྱེད་མཁན་དང་ཚུར་ཕྱོགས་ནས་༧གོང་ས་སྐྱབས་མགོན་ཆེན་པོས་བཀའ་དགོངས་བཞིན་བོད་ཀྱི་ཤེས་ཡོན་ཐད་ཞབས་ཞུ་བསྒྲུབ་པ་གཉིས་བསྡུར་བ་ཡིན་ན། ངའི་བསམ་པར་ཕྱི་མ་དེ་ཕན་རླབས་ཆུང་བ་རེད་དྲན་གི་མེད། ཅེས་དང་།

གཉིས་པ། སློབ་གྲྭ་འདི་ངོ་བོའི་ཆ་ནས་སྔོན་འགྲོའི་སློབ་གྲྭ་རེད། གཞི་རིམ་ཤེས་ཡོན་སྲིད་བྱུས་གསར་བའི་ནང་སྔོན་འགྲོ་དང་དམའ་རིམ་དེ་ཧ་ཅང་གི་གལ་ཆེན་དུ་རྩིས་ཡོད། མཚམས་རེར་སློབ་གྲྭ་ཁག་ལ་ལྟ་སྐོར་ལ་འགྲོ་སྐབས། འཛིན་རིམ་ ༩ པའི་སློབ་མ་ཁ་ཤས་གནས་ཚད་ཧ་ཅང་སྐྱོ་བོ་ཡིན་པ་མཐོང་སོང་། སྐད་ཆ་འདྲི་དུས་དགེ་རྒན་ཚོས་སློབ་མ་དེ་དག་དང་པོ་ནས་གནས་ཚད་སྐྱོ་བོ་ཡིན་པའི་འགྲེལ་བཤད་བརྒྱབ་ཡོང་གིན་འདུག དེ་ལྟར་ཁུངས་གཏུགས་ནས་སོང་ན་སྔོན་འགྲོ་ལ་ཐུག་འདུག ཤེས་ཡོན་སྲིད་བྱུས་ཀྱི་དགོངས་དོན་གཞིར་བཟུང་སྔོན་འགྲོ་དང་། དམའ་རིམ་ལ་ཚན་རིག་དང་མཐུན་པའི་ཤེས་ཡོན་སློབ་སྦྱོང་སྤྲོད་ཐབས་སུ་དམིགས་བསལ་ཤུགས་སྣོན་རྒྱག་དགོས། ཞེས་གསུངས་བྱུང་།

ཁོང་གིས་མུ་མཐུད་དུ་གསུངས་དོན། ཡོངས་གླིང་སྔོན་འགྲོའི་སློབ་གྲྭ་དང་འབྲེལ་བའི་གནད་དོན་ཁག་ཅིག་གི་ཐད་སྐད་ཆ་ཁ་ཤས་བཤད་ན་བསམ་སོང་། ཤེས་ཡོན་སྲིད་བྱུས་ཀྱི་ལྟ་སྟངས་ཐོག་ནས་བསྔགས་བརྗོད་བྱ་དགོས་པ་ཞིག་ནི། ས་གནས་མི་མང་དང་དབུ་ཁྲིད་འགའ་ཤས་ཀྱི་རོགས་རམ་ལ་བརྟེན་ཏེ། ད་ལྟ་སློབ་གྲྭ་འདི་ཚགས་ཚུད་པོ་བྱུང་ཡོད། ཤེས་རིག་ལས་ཁུངས་ཀྱིས་འཛིན་སྐྱོང་བྱེད་ཀྱིན་མེད་མོད། མ་དངུལ་སྤྲད་ནས་སམ་བྷོ་ཊར་རོགས་རམ་ཞུས་ཟིན་ཡོད། ཡོངས་གླིང་སློབ་གྲྭ་ལྟ་བུ་ཡིན་ན་དེ་འདྲ་མི་ཡིན་པར་སྔོན་མ་ནས་ཚགས་ཚུད་པོ་དང་ཁུངས་འཁྱོལ་པོ་ཡོད་ལ། ད་ལྟའང་ཡར་རྒྱས་འགྲོ་བཞིན་པའི་གནས་སྟངས་ཆགས་ཡོད། འབྲེལ་ཡོད་དགེ་ལས་དང་ཕ་མ། དེ་བཞིན་མི་མང་ཚང་མར་བསྔགས་བརྗོད་དང་རྗེས་སུ་ཡི་རངས་ཡོད། ཅེས་དང་།

ཤེས་ཡོན་སྲིད་བྱུས་ནང་ཚིག་གསལ་དོན་གསལ་འཁོད་ཡོད་པ་བཞིན་སྔོན་འགྲོའི་སློབ་གྲྭར་ང་ཚོ་རང་དང་འཚམ་པའི་ལངས་ཕྱོགས་ཤིག་མ་བྱུང་བར་སྔར་རྒྱུན་བཞིན་འགྲོ་དགོས་རྒྱུ་དང་། གཞན་པ་ཞིག་ལ་དེང་སང་ས་ཁུལ་མང་པོ་ཞིག་གིས་སྔོན་འགྲོ་དང་གཞི་རིམ་ནང་དགེ་རྒན་བུད་མེད་དགོས་པའི་བསམ་འཆར་འདོན་མཁན་འདུག ཡང་ཕ་མ་ཁ་ཤས་ཀྱིས་བུད་མེད་དགེ་རྒན་མང་དྲགས་ན་སྐྱོན་འདུག ངའི་བུའང་བུད་མེད་ཀྱི་གཤིས་ཀ་ཡོད་མཁན་ཞིག་ཆགས་འདུག་ཟེར། དེའི་ཕྱིར་དམའ་རིམ་དགེ་རྒན་རྣམས་ནས་སྔ་ས་ནས་སྔོན་འགྲོའི་སློབ་ཕྲུག་ཇི་ལྟར་བསྐྱང་དགོས་མིན་དང་། དམའ་རིམ་སློབ་མར་སློབ་སྦྱོང་ཇི་ལྟར་སྤྲོད་དགོས་མིན་ཐད་ཐུགས་བསམ་བཞེས་དགོས་ཀྱིན་འདུག

དོན་ཚན་གསུམ་པ། ཤེས་ཡོན་སྲིད་བྱུས་ནང་ཕ་མ་དེ་ཧ་ཅང་གི་གལ་ཆེན་པོ་ཞིག་ཆགས་ཡོད། ཕ་མ་དང་སློབ་གྲྭའི་འབྲེལ་བ་དང་བུ་ཕྲུག་དང་ཕ་མའི་འབྲེལ་བ། ཕ་མས་སློབ་གྲྭའི་གནས་སྟངས་ལ་དོ་སྣང་དང་འཛིན་སྐྱོང་ལ་གཟིགས་རྟོགས་བྱ་དགོས་ལ། སློབ་གྲྭའི་དོན་གནད་གང་འདྲ་ཞིག་ཡིན་ན་ཡང་འབྲེལ་ཡོད་ལ་དྲི་བ་དང་དོགས་འདྲི་བྱ་དགོས། དེ་ནི་ཡར་རྒྱས་ཕྱིན་ཟིན་པའི་སྤྱི་ཚོགས་ནང་རྒྱུན་ལྡན་ཞིག་ཡིན་ཡང་། རང་རེའི་སྤྱི་ཚོགས་ནང་ད་དུང་དེ་ཙམ་ཡར་རྒྱས་འགྲོ་ཐུབ་ཀྱིན་མི་འདུག སློབ་གྲྭ་འདི་གཞན་དང་མི་འདྲ་བ་ཞིག་ཡིན་པ། དེ་རིང་གི་གནས་སྟངས་ལ་བལྟས་ན་གསལ་བོར་ཤེས་ཐུབ་ཀྱིན་འདུག ཚང་མས་མུ་མཐུད་དེ་ཤུགས་རྒྱག་རོགས་ཞེས་འབོད་སྐུལ་ཞུ་རྒྱུ་ཡིན། ཅེས་གསུངས་བྱུང་།

དྲུང་ཆེ་མཆོག་གིས་སློབ་གྲྭའི་དགེ་ལས་ཚོས་དཀའ་ངལ་ཁག་ལ་གདོང་ལེན་བྱེད་ཕྱོགས་ངོ་སྤྲོད་གནང་དོན། ང་ཚོས་དཀའ་ལས་བརྒྱབས་ཏེ་ཤེས་ཡོན་སྲིད་བྱུས་གཏན་འབེབས་བྱས་དོན་གང་ཡིན་ཟེར་ན། དེང་དུས་ཤེས་ཡོན་སློབ་སྦྱོང་དང་ཕ་མེས་ནས་ཡོད་པའི་སྲོལ་རྒྱུན་ཤེས་ཡོན། ཡ་རབས་བཟང་སྤྱོད་སོགས་ཉམས་ཆག་ཏུ་མི་འགྲོ་བར་སླར་གསོ་གཏོང་ཆེད་རེད། སྔོན་འགྲོའི་དཀའ་ངལ་དང་གཞི་རིམ་གྱི་དཀའ་ངལ་རིགས་འཕྲལ་སེལ་ཙམ་གྱིས་འདང་གི་མེད། རིམ་གྱིས་འཛིན་རིམ་ཚང་མའི་སློབ་ཚན་ལ་བཅོས་སྒྱུར་བཏང་སྟེ། བོད་ཀྱི་སྐད་ཡིག་ཡག་པོ་ཞིག་ཤེས་སུ་འཇུག་དགོས། དགེ་རྒན་དང་འབྲེལ་ཡོད་འཛིན་སྐྱོང་ཚན་པས་དེ་སྔོན་བོད་ལ་ཡོད་པའི་ཁོར་ཡིག་གི་ཁྱད་ཆོས་དེ་འདྲ་ཞིག་ཚང་བར་འབད་པ་བྱ་དགོས། འོན་ཀྱང་། མི་འདང་ས་ཡོད་ཀྱང་ཉམས་མྱོང་རིམ་བསགས་ཀྱིས་ཡར་རྒྱས་སུ་གཏོང་དགོས།

སློབ་གྲྭ་འདིའི་ཤེས་ཡོན་དང་འབྲེལ་བ་ཡོད་མཁན་ཚང་མར་མུ་མཐུད་ནས་ཤུགས་སྐྱོན་རོགས་ཞེས་འབོད་སྐུལ་ཞུ་བཞིན་ཡོད། ཤེས་ཡོན་དང་སྤྱི་ཚོགས་ཀྱི་ལས་ཀ་གང་བྱས་ཀྱང་དཀའ་ངལ་ཕྲན་བུ་འཕྲད་པ་ཆོས་ཉིད་རེད། ངང་རྒྱུད་རིང་པོ་དང་བློ་ཁོག་ཡངས་པོས་གདོང་ལེན་བྱ་དགོས་པ་རེད། གདོང་ལེན་བྱེད་སྟངས་དེ་བཅའ་ཁྲིམས་རིན་པོ་ཆེ་དང་༧གོང་ས་མཆོག་གི་བཀའ་སློབ། དེ་བཞིན་བོད་གཞུང་གི་སྲིད་བྱུས་སོགས་སུ་དཀའ་ངལ་ལ་གདོང་ལེན་བྱེད་སྟངས་གསུངས་ཡོད། དཀའ་ངལ་གང་ཞིག་ལ་འཕྲད་ཀྱང་ལམ་སེང་རྙོག་དྲའི་ནང་མི་འགྲོ་བར་བདེན་པ་དང་འཚེ་བ་མེད་པ། ཡང་དག་པའི་དམངས་གཙོ་གསུམ་གཞི་རྩར་བཟུང་པ་ཡིན་ན་དཀའ་ངལ་སེལ་རྒྱུར་ཕན་ཐོགས་ཡོང་གི་རེད། ཅེས་གསུངས་སོང་།