ཕྱི་ཚེས་ ༣༡ ཉིན་སྦེལ་ཀོབ་བོད་ཁྱིམ་བདེ་སྐྱིད་ཚེ་རིང་ཚོགས་ཁང་དུ་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་གོ་སྒྲིག་འོག ལོ་སྔོན་མར་བཙན་བྱོལ་བོད་གཞུང་གིས་རྒྱ་གཞུང་ལ་ ༼ བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ། ༽ཕུལ་ཏེ། ལོ་གཅིག་ཧྲིལ་བོ་འཁོར་བར་བགྲོ་གླེང་ཚོགས་འདུ་ཞིག་བསྐོངས་ཡོད་ལ། བགྲོ་གླེང་བ་ངྷ་ས་དབུས་གཞོན་ནུ་ཚོགས་པའི་ཚོགས་གཙོ་ཚེ་དབང་རིག་འཛིན་ལགས་དང་སྦེལ་ཀོབ་ལུགས་ཟུང་བསམ་འགྲུབ་གླིང་གི་གཞིས་མགོ་དགྲ་འདུལ་ལགས་གཉིས་གདན་ཞུ་བྱས་ཏེ། གཞིས་མགོས་འབྲེལ་ཡོད་ཡིག་ཆ་དེའི་སྒྲུབ་ཕྱོགས་ནས་གསུང་བཤད་གནང་བ་དང་གཞོན་ནུ་ཚོགས་གཙོས་དགག་ཕྱོགས་ནས་གསུང་བཤད་གནང་ཡོད་པ་མ་ཟད། མཇུག་མཐར་དྲི་བ་དྲིས་ལན་གྱི་གོ་སྐབས་ཀྱང་ཕུལ་ཡོད།
ཉིན་དེར་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་ཚོགས་གཙོ་གྲྭ་བློ་བཟང་དཔལ་ལྡན་ལགས་ཀྱིས། ཚོགས་པའི་བསྒྲགས་གཏམ་ཞིག་སྒྲོག་སྦྱང་བྱས་པའི་ནང་དུ། སྔ་ལོ་བཙན་བྱོལ་བོད་གཞུང་གི་ངོས་ནས་༧གོང་ས་མཆོག་གི་སྐུ་ཚབ་རྣམ་གཉིས་བརྒྱུད་རྒྱ་ནག་དབུས་འཐབ་ཕྱོགས་གཅིག་གྱུར་ལས་ཁུངས་སུ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་སྤྲད་པ་ནས་དེ་རིང་བར་ལོ་གཅིག་འཁོར་ཞིང་། ལོ་གཅིག་གི་དུས་ཡུན་དེའི་ནང་རྒྱ་ནག་གཞུང་ཕྱོགས་ནས་བོད་ཀྱི་རེ་འདུན་བསམ་འཆར་ཡོངས་རྫོགས་རྩིས་མེད་དང་དགག་བཞག་རིམ་པར་བྱས་ཡོད་ཅེས་དང་། ཡང་དེ་རིང་ང་ཚོ་འདུ་འཛོམས་ཐོག་ལོ་རྒྱུས་ཀྱི་དོན་སྙིང་ལྡན་པའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཞེས་པའི་ཡིག་ཆ་འདིའི་བསྟན་དོན་གྱིས་གཞིས་བྱེས་བོད་མིའི་མངོན་འདོད་སྐོང་ཐུབ་མིན་ཐོག་བགྲོ་གླེང་བྱེད་ཀྱི་ཡོད་ཅེས་གསུངས་ཡོད།
ཡིན་ནའང་། ཁོང་གིས་གལ་ཆེའི་ཡིག་ཆ་འདིའི་ཐོག་ལ་སྒྲུབ་ཕྱོགས་ནས་གཏམ་བཤད་གནང་བར་སྔ་རྗེས་རིམ་པར་འབད་བརྩོན་བྱས་ཀྱང་གཏམ་བཤད་ཚད་ལྡན་གནང་མཁན་གྱི་མི་ཧ་ཅང་དཀོན་པའི་ཚོད་དུ་འདུག་ལ། བོད་ཀྱི་རྩོད་ལེན་གྱི་མཐའ་མའི་ཐག་གཅོད་བོད་མི་མང་གིས་བྱེད་དགོས་པ་སྔ་ཕྱི་བར་གསུམ་དུ་བཙན་བྱོལ་བོད་གཞུང་དང་། ༧གོང་ས་མཆོག་གིས་ལན་མང་གསལ་བསྒྲགས་གནང་ཡོད། འོན་ཀྱང་། བཙན་བྱོལ་བོད་ཀྱི་མཐོ་རིམ་མི་སྣ་ཁག་དང་བོད་མི་མང་ཚོགས། ལྷག་པར་དུ་བོད་ཀྱི་མི་རབས་གསར་བ་ཚོས་བོད་དང་བོད་མིའི་གནས་བབ་གང་འདྲ་ཞིག་རྩོད་ལེན་བྱེད་བཞིན་ཡོད་པ་ཧ་མི་གོ་བའི་ཚོད་དུ་ཡོད་ལ། བོད་ནང་དུ་ཡང་བོད་མི་ཚོས་ལྷག་བསམ་དང་སྙིང་སྟོབས་འགྱུར་བ་མེད་པའི་ངང་ནས་སོ་སོའི་སེམས་ཀྱི་ན་ཟུག་དང་རེ་འདུན་ཕྱིར་འདོན་བྱེད་བཞིན་པ་ལས་དོན་དངོས་བཙན་བྱོལ་བོད་གཞུང་མང་གིས་བོད་ཀྱི་རྩ་དོན་རྩོད་ལེན་གང་འདྲ་ཞིག་བྱེད་བཞིན་ཡོད་མེད་ཤེས་ཀྱི་མེད་པར་བརྗོད་ན་མི་འགྲིག་པ་མེད་པའི་ཚོད་དུ་ཡོད་ཅེས་བརྗོད་ཡོད།
སྤྱིར་ཐེངས་འདིའི་བགྲོ་གླེང་ཚོགས་འདུ་འདིའི་སྒྲུབ་ཕྱོགས་སུ་བགྲོ་གླེང་གནང་མཁན་སྔ་མོ་ནས་བོད་མི་མང་སྤྱི་འཐུས་དགེ་བཤེས་ཐུབ་བསྟན་འཕེལ་རྒྱས་ལགས་གདན་ཞུ་བྱས་ཡོད་ཀྱང་། ཚོགས་འདུ་མ་འཚོགས་པའི་སྔ་ཉིན་དེར་ཁོང་གིས་གློ་བུར་དུ་ནད་གཞི་ཞིག་གི་རྐྱེན་པས་ཚོགས་འདུར་བཅར་ཐུབ་ཀྱི་མེད་སྐོར་གསུངས་ཏེ། ཕེབས་མ་ཐུབ་པར་བློ་ཕམ་ཡོད་ཅེས་ཀྱང་གསུངས་ཡོད།
ཉིན་དེར་གྲྭ་བ་དང་མི་སྐྱ་བརྒྱ་ལྷག་གིས་བགྲོ་གླེང་ཚོགས་འདུར་མཉམ་ཞུགས་བྱས་ཡོད།
བཀུར་འོས་བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་ཚོགས་གཙོ་ཚེ་དབང་རིག་འཛིན་མཆོག་གནས་འདིར་ཕེབས་པར་བཀྲིས་བདེ་ལེགས་ཞུ།།
སྤྱི་འཐུས་ཐུབ་བསྟན་འཔེལ་རྒྱས་སླེབ་མེད་པ་ལ་སེམས་ཕམ་དགོས་དོན་མེད། གལ་ཏེ་ཉིན་དེར་ཁོ་སླེབ་ཡོད་པའི་དབང་དུ་བཏང་ཀྱང་ཁོས་གནས་ལུགས་ལས་གཡོལ་ཐབས་བྱེད་པ་མ་གཏོགས་དོན་གྱི་གཞི་འཛིན་ས་ཞིག་ཁོ་ལ་བཤད་རྒྱུ་མེད་པ་ཐག་གིས་ཆོད།
གོང་དུ་གུས་པས་༼་་་་་་གངས་ལྗོངས་རང་བདེན་ཚོགས་ཆུང་༽་་་་ཟེར་བ་༼་་་་་གངས་ལྗོངས་རང་བདེན་རྩོད་ལེན་མཐུན་ཚོགས་༽་ཡིན་འདུག་པ་ནོར་འཁྲུལ་བྱུང་འདུག་པར་དགོངས་དག་ཞུ་རྒྱུ།
གོང་དུ་གུས་པས་༼་་་་་་གངས་ལྗོངས་རང་བདེན་ཚོགས་ཆུང་༽་་་་ཟེར་བ་༼་་་་་གངས་ལྗོངས་རང་བདེན་རྩོད་ལེམམཐུན་ཚོགས་༽་ཡིན་འདུག་པ་ནོར་འཁྲུལ་བྱུང་འདུག་པར་དགོངས་དག་ཞུ་རྒྱུ།
དབུས་གངས་ལྗོངས་རང་བདེན་ཚོགས་ཆུང་གི་དབུས་ལས་ཡོངས་ཀྱི་ལྷག་བསམ་གྱི་བ་དན་དཀར་པསོ་རབ་ཏུ་བརྒྱན་ཏེ་བསྟན་སྲིད་སྤྲི་དམན་ཆེད་ལས་སྔ་པྱིར་ལས་འགུལ་སྣ་མང་སྤེལ་གནང་བར་ཡིད་རངས་དང་མངགས་བརྗོད་ཞུ་འོས་ཞུ་བཞིན་པ་མ་ཟད་ཚོགས་པ་དེ་ཉིད་བོད་བསྟན་སྲིད་ཆེད་ཡུན་དུ་འཚོ་ཞིང་བོད་མི་རིགས་རིག་གནས་དང་བཅས་པར་ཕན་རླབས་གུང་དུ་པྱུར་བའི་སྨོན་འདུན་བཅས།
གུས་མིང་བློ་བཟང་སྨྱོན་པ་འབོད་པས་གུས་པས་ཕུལ
གངས་ལྗོངས་རང་བདེན་རྩོད་ལེན་མཐུན་ཚོགས་ཀྱིས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆའི་བགྲོ་གླེང་སྟེང་སྤེལ་བའི་བསྒྲགས་གཏམ།
དེ་རིང་གལ་ཆེའི་གསུང་བཤད་གནང་བར་གདན་འདྲེན་ཞུས་པའི་བཀུར་འོས་བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་ཚོགས་གཙོ་ཚེ་དབང་རིག་འཛིན་མཆོག་དང་། སྦེལ་ཀོབ་ལུགས་ཟུང་བསམ་འགྲུབ་གླིང་གི་གཞིས་འགོ་སྐུ་ངོ་དགྲ་འདུལ་མཆོག གཞན་ཡང་ཚོགས་སྡེ་ཁག་གི་དབུ་འཛིན་རྣམ་པ། ཐེངས་འདིའི་ཟབ་སྦྱོང་བགྲོ་གླེང་ལ་ཆེད་ཕེབས་གནང་བའི་རྣམ་དཔྱོད་ལྡན་པའི་གསན་མཁན་རྣམ་པ་ལྷན་རྒྱས་ལ་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་ངོས་ནས་དགའ་བསུའི་འཚམས་འདྲི་དང་བཅས་ཚིག་འགའ་སྙན་ལམ་དུ་ཞུ་རྒྱུར།
བོད་གངས་ཅན་ནི་བོད་སྤྱི་ལ་དབང་བསྒྱུར་བའི་རྒྱལ་པོ་གཉའ་ཁྲི་བཙན་པོའི་གཙོས་བོད་རྗེ་རིམ་བྱུང་གི་རྒྱལ་རབས་ལོ་རྒྱུས་བྱུང་བ་ནས་བརྩིས་པའི་ཡོངས་གྲགས་མི་ལོ་ཉིས་སྟོང་བརྒྱ་ལྷག་ཙམ་དང་། གནའ་དངོས་སོགས་ལ་གཞིགས་ན་མི་ལོ་བཞི་སྟོང་བརྒལ་བའི་ལོ་རྒྱུས་དང་ལྡན་ཞིང་། ཡུལ་འདི་ནི་ཕྱི་སྣོད་ཀྱི་བཀོད་པ་ཆགས་སྟངས་དང་། ནང་བཅུད་སེམས་ཅན་གྱི་འབྱུང་ཁུངས། རིག་གཞུང་། སྐད་ཡིག ཆས་གོས། གོམས་གཤིས་སོགས་ཐུན་མོང་མིན་པའི་དམིགས་བསལ་གྱི་ཁྱད་ཆོས་ལྡན་པའི་ཨེ་ཤ་ཡའི་སྙིང་དཀྱིལ་དུ་ཆགས་པའི་ཆོས་ལྡན་གནའ་བོའི་རྒྱལ་ཁབ་ཅིག་ཡིན། འོན་ཀྱང་དུས་རབས་གོང་མའི་ལོ་དཀྱིལ་ཙམ་ནས་རྒྱ་ནག་དམར་པོའི་སྲིད་གཞུང་གིས་བོད་ལ་དྲག་པོའི་དཔུང་འཇུག་བྱས་ཏེ་བོད་ཀྱི་སྣོད་བཅུད་གཉིས་ཀ་བཙན་བཟུང་གིས་བོད་ཀྱི་ཆོས་སྲིད་གཉིས་ཀ་རྨང་ནས་བཤིག་རྒྱུའི་ལས་དོན་རིམ་བྱས་ལ་བརྟེན། ཕྱི་ལོ་ ༡༩༥༩ ལོར་༸གོང་ས་མཆོག་དང་། བོད་གཞུང་བཀའ་ཤག གཞུང་ཞབས་ཧྲག་བསྡུས། དེ་བཞིན་བོད་མི་འབུམ་ཕྲག་ལ་ཉེ་བ་བཙན་བྱོལ་དུ་སླེབས་ཏེ་ད་བར་མི་ལོ་ལྔ་བཅུ་སོང་ཞིང་། བོད་གཞིས་བྱེས་ཁ་བྲལ་དུ་ཕྱིན་པའི་དུས་ཡུན་དེའི་ནང་བོད་དུ་ཕྱིའི་སྣོད་བཅུད་བཤུ་གཞོག་དང་། ནང་བཅུད་སེམས་ཅན་གྱི་ཁེ་དབང་བཙན་འཕྲོག་གིས་ཆག་འཇིག་རིམ་པར་འཕྲད་དེ་ད་ཆ་བོད་ཡུལ་རྒྱ་ཡུལ་དུ་བསྒྱུར་དང་སྒྱུར་བཞིན་པའི་འོག་བོད་དང་བོད་མིའི་ངོས་འཛིན་བརླག་ཉེར་ཐུག་ཡོད་ལ། ཕྱི་ལོ་ ༢༠༠༨ ལོར་ཆོལ་གསུམ་བོད་ཀྱི་ས་ཁུལ་ཡོངས་ནས་འུ་ཐུག་ཐབས་ཟད་ཀྱིས་གྱེན་ལངས་བྱས་པའི་མཚོན་འདས་པའི་མི་ལོ་ལྔ་བཅུའི་རིང་གཞིས་ལུས་བོད་མི་ཚོས་བོད་དང་བོད་མིའི་རྩ་དོན་རྩོད་ལེན་བྱས་ཡོད།
ཕྱོགས་གཞན་ཞིག་ནས་བཙན་བྱོལ་བོད་གཞུང་དང་། ༸གོང་ས་མཆོག་གིས་དབུ་ཁྲིད་འོག་བཙན་བྱོལ་བོད་མི་ཚོས་བཙན་བྱོལ་བོད་མིའི་སྒྲིག་འཛུགས་སྲ་བརྟན་དང་རྒྱུན་གནས་གོང་འཕེལ་ཡོང་ཐབས་སུ་སློབ་གྲྭ་དང་། གཞིས་ཆགས་གསར་འཛུགས། དགོན་སྡེ་འཛིན་སྐྱོང་སོགས་བོད་ཀྱི་རྩ་དོན་རྩོད་ལེན་བྱེད་པའི་རྩ་བ་བཙུགས་ཤིང་། ཕྱི་ལོ་ ༡༩༧༤ ཡས་མས་ནས་རྒྱལ་སྤྱི་དང་། རྒྱ་ནག བོད་ཕྱི་ནང་གི་འགྱུར་བ་བཅས་ལ་བབ་བསྟུན་གྱིས་དབུ་མའི་ལམ་གྱི་ཐོག་ནས་བོད་དོན་རྩོད་ལེན་བྱས་ཤིང་། ད་ལྟ་མཐའ་མའི་བབ་དོན་དུ་རྒྱ་ནག་གི་རྩ་ཁྲིམས་དང་བཅའ་ཁྲིམས་ཀྱི་སྒྲོམ་གཞིའི་འོག་བོད་ལ་མིང་དོན་མཚུངས་པའི་རང་སྐྱོང་ཡོང་ཐབས་བྱེད་བཞིན་ཡོད་ཅིང་། སྔ་ལོ་བཙན་བྱོལ་བོད་གཞུང་གི་ངོས་ནས་༸གོང་ས་མཆོག་གི་སྐུ་ཚབ་རྣམ་གཉིས་བརྒྱུད་རྒྱ་ནག་དབུས་འཐབ་ཕྱོགས་གཅིག་གྱུར་ལས་ཁུངས་སུ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་སྤྲད་པ་ནས་དེ་རིང་བར་ལོ་གཅིག་འཁོར་ཞིང་། ལོ་གཅིག་གི་དུས་ཡུན་དེའི་ནང་རྒྱ་ནག་གཞུང་ཕྱོགས་ནས་བོད་ཀྱི་རེ་འདུན་བསམ་འཆར་ཡོངས་རྫོགས་རྩིས་མེད་དང་དགག་བཞག་རིམ་བསྟུད་བྱས་ཡོད། ཡིན་ནའང་སྔ་ལོ་དམིགས་བསལ་ཚོགས་ཆེན་སོགས་བོད་མིའི་ཆབ་སྲིད་ཀྱི་ཤིན་ཏུ་གལ་ཆེའི་གླེང་སྟེགས་ཁག་ཏུ་མང་མོས་ཀྱིས་མུ་མཐུད་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོངས་ཐབས་ཀྱི་དབུ་མའི་ལམ་གྱི་ཐོག་ཏུ་བསྐྱོད་གཏན་འཁེལ་ཏེ་རྒྱལ་སྤྱིའི་ཁྱོན་ལ་ཡོངས་བསྒྲགས་བྱས་ཤིང་། རྒྱ་ནག་གཞུང་གི་སྐྱོན་འཛུགས་ཁག་ལ་ལན་འདེབས་གསལ་བཤད་ཀྱང་བྱས་ཡོད།
དེ་རིང་ང་ཚོ་འདུ་འཛོམས་ཐོག་ལོ་རྒྱུས་ཀྱི་དོན་སྙིང་ལྡན་པའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཅེས་པའི་ཡིག་ཆ་འདིའི་བསྟན་དོན་གྱིས་གཞིས་བྱེས་བོད་མིའི་མངོན་འདོད་སྐོང་ཐུབ་མིན་ཐོག་བགྲོ་གླེང་བྱེད་ཀྱི་ཡོད་པ་རེད། གལ་ཆེའི་ཡིག་ཆ་འདིའི་ཐོག་ལ་སྒྲུབ་ཕྱོགས་ནས་གཏམ་བཤད་གནང་བར་སྔ་རྗེས་རིམ་པར་འབད་བརྩོན་ཞུས་ཀྱང་གཏམ་བཤད་ཚད་ལྡན་ཞིག་གནང་ཐུབ་མཁན་གྱི་མི་ཧ་ཅང་དཀོན་པའི་ཚོད་དུ་འདུག་ལ། བོད་ཀྱི་རྩོད་ལེན་གྱི་མཐའ་མའི་ཐག་གཅོད་བོད་མི་མང་གིས་བྱེད་དགོས་པ་སྔ་ཕྱི་བར་གསུམ་དུ་བཙན་བྱོལ་བོད་གཞུང་དང་། ༸གོང་ས་མཆོག་གིས་ལན་མང་གསལ་བསྒྲགས་གནང་ཡོད། འོན་ཀྱང་བཙན་བྱོལ་བོད་ཀྱི་མཐོ་རིམ་མི་སྣ་ཁག་དང་། བོད་མི་མང་ཚོགས། ལྷག་ཏུ་བོད་ཀྱི་མི་རབས་གསར་པ་ཚོས་བོད་དང་བོད་མིའི་གནས་བབ་གང་འདྲ་ཞིག་རྩོད་ལེན་བྱེད་བཞིན་ཡོད་པ་ཧ་མི་གོ་བའི་ཚོད་དུ་ཡོད་ལ། བོད་ནང་དུ་ཡང་བོད་མི་ཚོས་ལྷག་བསམ་དང་སྙིང་སྟོབས་འགྱུར་བ་མེད་པའི་ངང་ནས་སོ་སོའི་སེམས་ཀྱི་ན་ཟུག་དང་རེ་འདུན་ཕྱིར་འདོན་བྱེད་བཞིན་པ་ལས་དོན་དངོས་བཙན་བྱོལ་བོད་གཞུང་མང་གིས་བོད་ཀྱི་རྩ་དོན་རྩོད་ལེན་གང་འདྲ་ཞིག་བྱེད་བཞིན་ཡོད་མེད་ཤེས་ཀྱི་མེད་པར་བརྗོད་ན་མི་འགྲིག་པ་མེད་པའི་ཚོད་དུ་ཡོད། གནས་སྟངས་འདིའི་འོག་ནས་བོད་མི་མང་ཚོགས་ཀྱིས་བོད་ཀྱི་རྩ་དོན་རྩོད་ལེན་ཇི་ལྟར་རྒྱུན་སྐྱོང་བྱེད་མིན་དང་། བོད་དོན་མཐའ་མའི་ཐག་གཅོད་བྱེད་ཇི་ལྟར་བྱེད་མིན་ནི་ང་ཚོའི་མིག་མདུན་གྱི་དྲི་བ་ཆེ་ཤོས་དེ་ཡིན་ལ། འདི་ནི་བཙན་བྱོལ་བོད་གཞུང་མང་གཉིས་ཀྱི་འདས་པའི་མི་ལོ་ལྔ་བཅུའི་རིང་བོད་མིར་བོད་དོན་ཆབ་སྲིད་ཀྱི་གོ་རྟོགས་ཡག་པོ་སྤེལ་མ་ཐུབ་པའི་ལོ་རྒྱུས་ཀྱི་ནག་ཉེས་ཡིན་པར་བརྗོད་ན་མི་འགྲིག་པ་མེད་ལ། ང་ཚོ་འདི་ལྟར་མུ་མཐུད་སོང་ན་རྒྱ་ནག་གི་ཆབ་སྲིད་ཀྱི་གདུག་རྩུབ་འོག་གཞིས་ལུས་བོད་མི་རྣམས་རྒྱ་རིགས་ཀྱི་ནང་སིམ་ཡལ་དུ་འགྲོ་རྒྱུ་དང་། བཙན་བྱོལ་བོད་མི་ཚོ་རང་མགོ་གང་ཐོན་གྱིས་འཐོར་ཞིག་ཏུ་འགྲོ་རྒྱུར་ཐེ་ཚོམ་མེད། ང་ཚོའི་མང་ཚོགས་ལ་རང་གིས་མཐོང་ཆུང་དང་། དམའ་འབེབ་མིན་ནའང་མིག་མདུན་གྱི་དོན་དངོས་ཁས་ལེན་མི་བྱེད་ཐབས་མེད་ཡིན་ལ། རྒྱ་བོད་དབར་གྱི་འཐབ་རྩོད་འདི་དུས་ཡུན་རིང་པོའི་བར་གནས་དགོས་པ་ཆགས་སྲིད་པས་བོད་མི་མང་གི་ངོས་ནས་དེའི་ཐད་ཆབ་སྲིད་གོ་རྟོགས་ཀྱི་ལས་དོན་གནད་སྨིན་སྤེལ་རྒྱུ་སོགས་གྲ་སྒྲིག་ཚགས་ཚུད་ངེས་པར་བྱེད་དགོས་པ་ནི་འདོར་ཐབས་མེད་པའི་ལས་འགན་ཞིག་ཡིན་ལ། མ་འོངས་པའི་ལོ་ཟླའི་ནང་འདས་པའི་ལོ་རྒྱུས་དང་། ད་ལྟའི་གནས་སྟངས་གཞི་ལ་བཞག་པའི་ཐོག་ནས་བོད་མི་མང་ཚོགས་ལ་མང་ཚོགས་ཀྱི་དམིགས་འདུན་ལངས་ཕྱོགས་ཡོད་དགོས་པ་བོད་ཀྱི་རྩ་དོན་མཐའ་མའི་ཐག་གཅོད་བྱེད་པར་མེད་དུ་མི་རུང་བ་ཞིག་ཡིན་པ་ནན་བརྗོད་བྱེད་ཀྱི་ཡོད།
བར་ལམ་རྒྱ་ནག་གཞུང་གིས་རྒྱལ་ཁབ་སོ་སོའི་མི་རིགས་གྲུབ་ཚུལ་མི་འདྲ་ཞིང༌། ལོ་རྒྱུས་དང་རིག་གནས། སྲོལ་རྒྱུན་བཅས་ཀྱང་འདྲ་མཚུངས་མིན་སྟབས། རང་སྐྱོང་གང་རུང་ལག་བསྟར་བྱེད་པའི་རྒྱལ་ཁབ་དག་གི་དོན་དངོས་ཀྱི་རང་སྐྱོང་ཐབས་ལམ་ཡང་གཅིག་མཚུངས་ཡོང་ཐབས་མེད་སྐོར་བརྗོད་འདུག ཡིན་ནའང་རྒྱ་ནག་གི་རྩ་ཁྲིམས་དོན་ཚན་བཞི་པར། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་ཚང་མ་འདྲ་མཉམ་ཡིན་པ་དང༌། རྒྱལ་ཁབ་ཀྱིས་གྲངས་ཉུང་མི་རིགས་སོ་སོའི་ཁྲིམས་མཐུན་དབང་ཆ་དང་ཁེ་ཕན་ཁག་ཐེག་བྱེད་རྒྱུ། མི་རིགས་སོ་སོའི་འདྲ་མཉམ་དང་མཐུན་སྒྲིལ། རོགས་རམ་བཅས་ཀྱི་འབྲེལ་བ་སྲུང་སྐྱོང་དང་གོང་སྤེལ་བྱེད་དགོས། མི་རིགས་གང་ཞིག་ལའམ་མཐོང་ཆུང་དང་གཉའ་གནོན་བྱེད་པའི་རིགས་ལ་བཀག་སྡོམ་བྱེད་དགོས། མི་རིགས་མཐུན་སྒྲིལ་ལ་གཏོར་བརླག་དང་མི་རིགས་ཁ་བྲལ་གཏོང་བའི་བྱ་སྤྱོད་ལ་བཀག་སྡོམ་བྱེད་དགོས། རྒྱལ་ཁབ་ཀྱིས་གྲངས་ཉུང་མི་རིགས་ཁག་གི་ཁྱད་ཆོས་དང་དགོས་མཁོ་གཞིར་བཟུང་ནས་གྲངས་ཉུང་མི་རིགས་ས་ཁུལ་ཁག་གི་དཔལ་འབྱོར་དང་རིག་གནས་འཕེལ་ཚད་ཇེ་འགྱོགས་སུ་གཏོང་རོགས་བྱེད་དགོས། གྲངས་ཉུང་མི་རིགས་འདུས་སྡོད་བྱེད་པའི་ས་གནས་སོ་སོར་ས་ཁོངས་རང་སྐྱོང་ལག་བསྟར་བྱེད་སྟེ་རང་སྐྱོང་ལས་ཁུངས་འཛུགས་རྒྱུ་དང་རང་སྐྱོང་དབང་ཆ་ལག་བསྟར་བྱེད་དུ་འཇུག་དགོས། ཅེས་གསལ་བ་བཞིན་མི་རིགས་ཀྱི་གྲུབ་ཚུལ་དང་། ལོ་རྒྱུས། རིག་གནས། སྲོལ་རྒྱུན་བཅས་ཕྱོགས་གང་ཐད་ནས་འདྲ་མཚུངས་མིན་ཞིང་དམིགས་བསལ་ལོ་རྒྱུས་ཀྱི་གནས་བབ་ལྡན་པའི་བོད་ཁུལ་དུ་བོད་མིར་གཉའ་གནོན་དང་། མཐོང་ཆུང་། རྒྱ་བོད་མི་རིགས་བར་འཁོན་འགྲས་བཟོ་བ་ལ་བརྟེན་ནས་རྒྱ་བོད་མི་རིགས་ཁ་བྲལ་དང་། བོད་རིགས་རྩ་མེད་བཟོ་བའི་ལས་དོན་སྤེལ་བཞིན་པ་རྒྱ་ནག་གཞུང་གིས་བརྗོད་བཞིན་པའི་དོན་དངོས་ཀྱི་རང་སྐྱོང་གི་ཐབས་ལམ་ཡིན་ནམ། རྒྱལ་ཁབ་ཀྱིས་གྲངས་ཉུང་མི་རིགས་སོ་སོའི་ཁྲིམས་མཐུན་དབང་ཆ་དང་ཁེ་ཕན་ཁག་ཐེག་བྱེད་རྒྱུ་ཟེར་བའི་དགོངས་དོན་ཡིན། དེ་བཞིན་རྒྱ་ནག་གཞུང་གིས་༸གོང་ས་ཏཱ་ལའི་བླ་མ་མཆོག་ལ་ཚོད་མེད་བསྙོན་འཛུགས་བྱེད་པ་དང་། བོད་བརྒྱུད་ནང་བསྟན་ཆོས་ལུགས་ཀྱི་སྤྲུལ་སྐུའི་ལམ་ལུགས་ཆབ་སྲིད་ཀྱི་དགོས་མཁོ་ཞིག་ཏུ་བསྒྱུར་བ་གྲངས་ཉུང་མི་རིགས་ཁག་གི་ཁྱད་ཆོས་དང་དགོས་མཁོ་གཞིར་བཟུང་ནས་རང་སྐྱོང་དབང་ཆ་ལག་བསྟར་བྱས་པ་ཡིན། ད་ལྟ་བོད་དང་། ཤིན་ཅང་། སོག་པོ་བཅས་ཀྱི་ས་ཁུལ་དུ་རྒྱ་རིགས་ཁྱོན་ཆེ་གནས་སྤོ་བྱས་ཏེ་མི་རིགས་དེ་དག་རང་ས་རུ་གྲངས་ཉུང་མི་རིགས་སུ་གྱུར་དང་འགྱུར་བཞིན་པའི་གནས་བབ་འོག་མི་རིགས་ཁག་གི་ཁྱད་ཆོས་དང་དགོས་མཁོ་རྡོག་རོལ་དུ་གཏོང་བའི་ཁོར་ཡུག་ཁྲོད་མི་རིགས་དེ་དག་གི་ཐུན་མིན་ངོ་བོ་རྩ་བརླག་ཏུ་གཏོང་ཐབས་བྱེད་བཞིན་པ་ཡང་ས་གནས་སོ་སོར་ས་ཁོངས་རང་སྐྱོང་ལག་བསྟར་བྱེད་སྟེ་རང་སྐྱོང་ལས་ཁུངས་འཛུགས་རྒྱུ་དང་རང་སྐྱོང་དབང་ཆ་ལག་བསྟར་བྱེད་དུ་འཇུག་དགོས་ཅེས་གསལ་བའི་རྩ་ཁྲིམས་ཀྱི་ཁེ་དབང་ཁག་ཐེག་ལ་རྒྱ་ནག་གཞུང་ནས་འགན་ཁུར་གྱིས་རྒྱལ་ཁབ་གཞན་དང་མི་མཚུངས་པའི་དོན་དངོས་ཀྱི་རང་སྐྱོང་ཐབས་ལམ་ལག་བསྟར་བྱས་པ་ཡིན་དང། ཡང་ན་མི་རིགས་རང་སྐྱོང་བྱ་བར་མི་རིགས་རང་ཉིད་ཀྱི་ངོ་བོ་དང་། སྐད་ཡིག ཡུལ་གྱི་གོམས་པའི་ལེགས་བྱང་། ཐུན་མིན་རིག་གཞུང་སོགས་མ་བརླག་པ་ཞིག་གི་ཐོག་ནས་རང་ས་རུ་རང་ཁྱིམ་རང་བདག་དང་། རང་སྲིད་རང་སྐྱོང་། རང་སྟོབས་རང་སྤེལ་གྱིས་མི་རིགས་རང་ཉིད་དར་རྒྱས་གོང་འཕེལ་ཡོང་བ་བྱེད་དགོས་རྒྱུ་མི་རིགས་ཁག་གི་ཁྲིམས་མཐུན་གྱི་ཁེ་དབང་དང་། མི་རིགས་མཐུན་སྒྲིལ་ཡོང་བར་རྩ་བའི་རྨང་གཞི་ཡང་ཡིན་པའི་མི་རིགས་རང་སྐྱོང་བྱ་བའི་རྩ་ཁྲིམས་ཀྱི་རྩ་བའི་དམིགས་ཡུལ་ལ་རྒྱ་ནག་གཞུང་གིས་ཁག་ཐེག་བྱེད་ཀྱི་ཡོད་དང་གཏོར་བརླག་གཏོང་གི་ཡོད། ང་ཚོས་གནད་དོན་འདི་དག་གླེང་སློང་བྱེད་པ་ཙམ་མིན་པར་བོད་ནང་ཡོད་པའི་བོད་མི་ཚོར་རྩ་ཁྲིམས་ཀྱི་ཐོག་ནས་ཁག་ཐེག་བྱས་པའི་ཁེ་དབང་དེ་དག་རྩོད་ལེན་བྱེད་དགོས་པའི་སྐུལ་མ་བྱེད་ཀྱི་ཡོད་ལ། འདི་ལོའི་ཕྱི་ཟླ་ ༡༠ ནང་འདི་ག་ཚོགས་པའི་ངོས་ནས་རྒྱ་ནག་གི་རྩ་ཁྲིམས་སོགས་ཁྲིམས་སྒྲིག་གི་འབྲུ་དོན་འོག་བོད་དང་བོད་མིའི་ངོ་བོ་དང་ཁེ་དབང་སྲུང་སྐྱོབ་བྱེད་ཕྱོགས་སྐོར་ཅིག་གི་གཙོས་མ་འོངས་བོད་ཀྱི་འཚེ་མེད་ཞི་བའི་ལས་འགུལ་བྱེད་ཕྱོགས་ཀྱི་ལམ་སྟོན་ཡིག་ཆ་ཞིག་ལེགས་བསྒྲིགས་ཀྱིས་ཡོངས་ཁྱབ་འགྲེམས་སྤེལ་བྱས་ཡོད་པར་ཚང་མས་ཐུགས་སྣང་གནང་དང་འབྲེལ་བོད་དུ་སྐུར་ཐབས་བྱེད་དགོས་པའི་དྲན་སྐུལ་ཞུ་གི་ཡོད།
ཉེ་བའི་དུས་ཡུན་ནང་འཛམ་གླིང་གི་དཔལ་འབྱོར་ལ་འཕོ་འགྱུར་ཤུགས་ཆེ་བྱུང་བ་དང་། གོ་ལའི་ཚ་དྲོད་ཆེ་རུ་ཕྱིན་པའི་མངོན་རྟགས་ཀྱང་ཉིན་རེ་བཞིན་ཇེ་གསལ་དུ་འགྲོ་བཞིན་པའི་གནས་སྐབས་འདིར། རྒྱ་ནག་དང་རྒྱ་གར་གཉིས་རྒྱལ་སྤྱིའི་ཆབ་སྲིད་ཀྱི་ཁོར་ཡུག་ཁྲོད་རིན་ཐང་ཇེ་ཆེར་ཕྱིན་ཡོད་ལ། གནས་བབ་འདི་དག་ལ་བརྟེན་ནས་རྒྱ་ནག་གི་སྨྱོ་ཧམ་ཇེ་ཆེར་ཕྱིན་ཏེ་ཆབ་སྲིད་ཀྱི་དམིགས་ཚད་ངེས་ཅན་ཞིག་གི་གནས་བབ་འོག་རྒྱ་གར་དང་རྒྱ་ནག་གི་བར་གྱི་འབྲེལ་ལམ་སྡུག་ཏུ་ཕྱིན་ཡོད་པས་ཕྱི་ཚུལ་དུ་འདྲ་ཆགས་བརྗོད་མིན་ལ་མ་ལྟོས་པར་ཁ་གཏད་རང་བཞིན་གྱི་ལམ་དུ་འགྲོ་བཞིན་ཡོད། དེ་ལྟར་འཛམ་གླིང་ཁྱོན་ཡོངས་ཀྱི་ཆབ་སྲིད་འཕོ་འགྱུར་འདིའི་ཁྲོད་དུ་བོད་དོན་གྱི་རིན་ཐང་ཡང་འཕར་ཆག་དང་རྒྱལ་ཕམ་གྱི་ཤུགས་རྐྱེན་ཐེབས་བཞིན་ཡོད་པ་བོད་མི་ཚོས་ངེས་པར་ཤེས་རྟོགས་བྱེད་པ་བརྒྱུད་ཁོར་ཡུག་འདིའི་ནང་དུ་བསམ་བློ་གསར་པ་དང་། གྲ་སྒྲིག་གསར་པ་བྱེད་དགོས་པ་དེ་རིང་གི་གོ་སྐབས་འདི་བརྒྱུད་ནས་དྲན་གསོ་ཞུ་གི་ཡོད།
མཐའ་དོན་གཞིས་ལུས་བོད་མི་ཚོས་བོད་འདི་གསོན་ལ་རེ་བའི་མིག་ཟུང་ང་ཚོ་བཙན་བྱོལ་བོད་མི་ཚོར་གཏད་དེ་ཡོད་པ་ང་ཚོའི་སྙིང་ནས་ནམ་ཡང་བརྗེད་མི་སྲིད་ལ་བརྗེད་མི་རུང། དེར་བརྟེན་ང་ཚོ་བཙན་བྱོལ་བོད་མི་ཚོ་ལ་རང་དབང་གི་འཚོ་བ་ཞིག་སྐྱེལ་རྒྱུ་ཡོད་པ་ནམ་ཡང་ཆུད་ཟོས་སུ་མ་སོང་བ་ཞིག་བྱེད་དགོས་པ་བཙན་བྱོལ་བོད་མིའི་ལས་འགན་ཡིན་ལ་ང་ཚོ་ཚང་མའི་རང་དོན་ཡང་ཡིན་སྟབས། ཕ་ཡུལ་བོད་ཀྱི་ཆེད་དུ་ལེགས་སྐྱེས་ཕུལ་ཐུབ་པ་དགོས་རྒྱུ་ཧ་ཅང་གལ་ཆེན་པོ་ཡིན་པ་དྲན་སྐུལ་བྱེད་ཀྱི་ཡོད།
གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་དབུས་རྒྱུན་ལས་ཁང་ནས་ཕྱི་ལོ་ ༢༠༠༩ ཕྱི་ཟླ་ ༡༠ ཚེས་ ༣༡ ལ།
ནོར་བུ་རྒྱལ་མཚན་ལགས་ཕེབས་པར་དགའ་བསུ་ཞུ།
བགྲོ་གླེང་དེའི་རིགས་གང་མང་སྤེལ་ཐུབ་ན།
མི་དམངས་ལ་ཆབས་སྲིད་ཀྱི་གོ་རྟོགས་སད་ངེས་རེད།