རྒྱལ་ཚོགས་ཀྱི་ཁོར་ཡུག་ཚོགས་ཆེན་སྐབས་བོད་ཀྱི་ཁོར་ཡུག་གནས་སྟངས་གླེང་རྒྱུ་མ་བརྗེད་ཅེས་བཙན་བྱོལ་བོད་མི་ཚོས་རེ་སྐུལ་ཞུས་འདུག
འཆར་ཟླའི་ནང་དུ་མཉམ་འབྲེལ་རྒྱལ་ཚོགས་ཀྱི་ཁོར་ཡུག་གི་ཚོགས་ཆེན་དེ་ཌན་མག་གི་རྒྱལ་ས་ཁོ་པེན་ཧ་གྷན་ནས་འཚོགས་རྒྱུ་ཡིན་ལ། སྐབས་དེར་བོད་ཀྱི་ཁོར་ཡུག་གནས་སྟངས་གླེང་རྒྱུ་མ་བརྗེད་ཅེས་བཙན་བྱོལ་བོད་གཞུང་གི་ཁོར་ཡུག་ཉམས་ཞིབ་པ་དོན་གྲུབ་སྒྲོལ་མ་ལགས་ཀྱིས་ཉེ་ཆར་བྷང་ལོར་ནས་རེ་སྐུལ་ཞུས་ཡོད།
དོན་གྲུབ་སྒྲོལ་མ་ལགས་ཀྱི་གཏམ་བཤད་དེ་ནི་ད་ལོར་བཙན་བྱོལ་བོད་མི་ཚོས་རྒྱ་གར་གཞུང་དམངས་གཉིས་ལ་བཙན་བྱོལ་གྱི་མི་ལོ་ ༥༠ རིང་གི་རོགས་སྐྱོར་ཐུགས་ཁུར་ལ་ཐུགས་རྗེ་ཆེ་བའི་དུས་སྟོན་གོ་སྒྲིག་བྱེད་བཞིན་པ་ལྟར། ཉེ་ཆར་བྷང་ལོར་ནས་དུས་སྟོན་དེ་ཚུགས་པའི་སྐབས་ཀྱི་གཏམ་བཤད་ཀྱི་ལས་རིམ་ཁྲོད་ནས་བཤད་པ་རེད།
དོན་གྲུབ་སྒྲོལ་མས་བཤད་དོན། གནམ་གཤིས་ཀྱི་ཚ་དྲོད་རྒྱས་པར་བརྟེན་བོད་ཀྱི་འཁྱགས་ཀླུང་དག་ཞུ་བཞིན་ཡོད་ལ། དེས་རྒྱ་ནག་དང་རྒྱ་གར། པཱ་ཀི་སི་ཐན། འབར་མ། ཐའེ་ལན་ཌི་བཅས་ཨེ་ཤ་ཡའི་རྒྱལ་ཁབ་མང་པོར་ཤུགས་རྐྱེན་ཐེབས་རྒྱུ་ཡིན་ལ། ཡུལ་ལུང་འདི་དག་གི་གཙང་བོའི་བརྒྱ་ཆ་ ༥༠ ནས་ ༦༠ ཡི་མགོ་ཁུངས་བོད་ཡིན་ཟེར་ལ། བོད་ནང་གི་གནམ་གཤིས་འགྱུར་ལྡོག་གི་ཆ་ཤས་ཤིག་ནི་རྒྱ་ནག་གིས་བོད་ནང་བཟུང་བའི་སྲིད་བྱུས་ལས་བྱུང་ཟེར།
མང་ཚོགས་ཀྱི་དྲི་བ་དྲི་ལན་སྐབས་ཕྱི་དྲིལ་བཀའ་བློན་སྟག་ལྷ་སྐལ་བཟང་གཡང་སྐྱིད་ལགས་ཀྱིས་གསུངས་དོན། བོད་ཀྱི་ཁོར་ཡུག་འདི་སྲུང་སྐྱོབ་བྱེད་མ་ཐུབ་ཚེ་ཨེ་ཤ་ཡ་སྤྱི་དང་རྒྱལ་སྤྱིའི་སྤྱི་ཚོགས་ཁྲོད་ཆུ་ཡི་དཀའ་ངལ་ཆེན་པོ་ཞིག་གང་མགྱོགས་ཡོང་རྒྱུ་རེད་ཅེས་དང་། ང་ཚོས་ཁྱེད་རྣམ་པར་བརྗོད་འདོད་པ་ནི། གལ་སྲིད་ང་ཚོས་བོད་ནང་གི་ཁོར་ཡུག་གཏོར་སྐྱོན་གྱི་གནས་སྟངས་དེར་གོ་རྟོགས་མ་ཐུབ་ཚེ་ང་ཚོས་མཐའ་གཅིག་ཏུ་སྡུག་བསྔལ་མྱོང་རྒྱུ་ནི་ཉག་གཅིག་རེད་ཅེས་ཀྱང་གསུངས་འདུག
ཁོར་ཡུག་ལགས།
ཁྱེད་ནི་ང་ཚིའི་རིན་བྲལ་གྱི་ནོར་བུ་སྲོག་ཀྱང་ཡིན།
དེས་ན་ང་ཚོས་ཁྱེད་ཀྱི་ཐོག་བསམ་ཤེས་ཅི་ནས་ཀྱང་བྱེད་དགོས།
དུས་བབ་ཚགས་ཁང་ལགས་སུ།
ཁྱེད་ཉིད་ཀྱིས་”འཆར་ཟླའི་ནང་དུ་མཉམ་འབྲེལ་རྒྱལ་ཚོགས་ཀྱི་ཁོར་ཡུག་གི་ཚོགས་ཆེན་དེ་ཌན་མག་གི་རྒྱལ་ས་ཁོ་པེན་ཧ་གྷན་ནས་འཚོགས་རྒྱུ་ཡིན་ལ།” ཞེས་བཀོད་ཀྱང་ཁོ་པེན་ཧ་གྷན་བྱ་བའི་ཡུལ་ཡིན་པ་མ་གཏོགས་འབྱུང་ཁུངས་མིན་པས། ནས་སྒྲའི་ཚབ་ཏུ་དུ་སྒྲ་བསྣན་དགོས་པ་དང་། ཡང་། “ཡུལ་ལུང་འདི་དག་གི་གཙང་བོའི་བརྒྱ་ཆ་ ༥༠ ནས་ ༦༠ ཡི་མགོ་ཁུངས་བོད་ཡིན་ཟེར་ལ།” ཞེས་པའི་ཐད་གཙང་པོ་དང་། འགོ་ཁུངས་ཞེས་དགོས་སྙམ། ང་ཚོ་ཚང་མས་བརྡ་སྤྲོད་དང་མཐུན་པའི་ཐོག་ནས་བྲིས་ན་ཁ་ཡོད་ལག་ཡོད་ཀྱིས་མ་འོངས་པའི་རྗེས་འཇུག་རྣམས་ལ་ཕན་ངེས། དེ་མིན་སོ་སོའི་རྒྱུ་མཚན་གསར་པ་དང་ཡུལ་སྐད་ལ་གཞིར་བཞག་ནས་བྲིས་ན། ནམ་ཞིག་འབྲུག་ཁུལ་གྱི་རྫོང་ཁ་ཞེས་པའི་སྐད་ལྟར་གྱུར་ཏེ། ཕྱིས་སུ་འགྱོད་པ་སྐྱེ་དགོས་པའི་གཞི་ཆགས་ངེས་རེད། དེ་བཞིན་སྔོན་གྱི་བོད་ཀྱི་མཁས་དབང་རྣམས་ཀྱིས་ཀྱང་ཆོལ་ཁ་དང་ཡུལ་ལུང་གང་ཡིན་མིན་ལ་མ་ལྟོས་པར་བརྡ་སྤྲོད་དང་མཐུན་པའི་གཅིག་འགྱུར་བྲིས་པར་མཛད་འདུག་ན། གཟབ་དགོས་པའི་གནས་ཡིན། ད་དུང་ཁྱེད་ཅག་གིས་སྲུང་བརྩི་ལ་སྲུང་གཙི་དང་། ད་རེས་ལ་ད་རེབ་ཅེས་བྲིས་པ་མང་། དེ་བཞིན་བང་ཆེན་ཚགས་ཁང་ནས་ཁམས་སྐད་བསྲེས་དབང་དུ་བཏང་ན། རྗེས་སོར་ཚད་འཛིན་བྱེད་ས་རག་དཀའ་བས། ངས་གང་བྲིས་པ་རང་གི་སྐད་ཡིག་ལ་ཞེན་ཆེ་བས་ཡིན་མ་གཏོགས། ཁྱེད་རྣམས་ལ་གནག་སེམས་བྱས་པ་དེ་འདྲ་རྩ་བ་ནས་མིན། དེར་བརྟེན་ཕྱིན་ཆད་དེ་དག་རྒྱུན་ལྡན་བཞིན་འབྲི་གནང་ཡོང་བའི་རེ་སྐུལ་གྲངས་མེད་ཞུ་ཡི་ཡོད། ཐུགས་རྗེས་གཟིགས། ཐུགས་རྗེས་གཟིགས། ཐུགས་རྗེས་གཟིགས། ཐུགས་རྗེས་གཟིགས། ཐུགས་རྗེས་གཟིགས།
མཚམས་མཚམས་སུ་བསམ་ཕུལ་ཀྱང་ཡོང་གི་མི་འདུག
མཚམས་མཚམས་སུ་བསམ་ཕུལ་ཀྱང་ཡོང་གི་མི་འདུག
གྲགས་པ་རྒྱ་མཚོ་ལགས།་གལ་སྲིད་ང་ཚོས་རང་བཙན་གྱི་ལམ་དུ་བསྐྱོད་ན་ཁྱོད་ལ་ལམ་སྟོན་འདྲ་སྟོན་རྒྱུ་ཡོད་དམ།་དེ་མིན་སྔ་ལོའི་ནང་དུ་བོད་མི་ཇི་ཙམ་གྱི་ཚེ་སྲོག་ལ་རྒྱ་དམར་གྱི་ལག་རྩེད་བྱས་སོང་ངམ།་དེ་བཞིན་བཙོན་བཅུག་དང་ནད་གཅོང་མང་དག་ཞིག་ལས་དེ་མིན་གྱི་འགྲུབ་འབྲས་གང།་་དེ་ལས་བོད་ཕྱི་ནང་གང་དུ་བཞུགས་ཡོད་པའི་བོད་མི་ཚང་མས་རང་རེའི་རླབས་ཆེན་གྱི་དབུ་ཁྲིད་འཛམ་གླིང་ཞི་བདེའི་དེད་དཔོན་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ལམ་སྟོན་འོག་དམ་ཚིག་རྡོག་རྩ་གཅིག་བསྒྲིལ་ངང་མ་འོངས་ཕ་ཡུལ་གསར་པའི་ཆེད་དུ་རང་དགོས་ཕྱི་ནང་གཉིས་ཀྱི་ཤེས་ཡོན་ལ་འབད་བརྩོན་བྱས་ཏེ་རང་འཁྲིའི་ལས་དོན་གང་ཞིག་ཡོད་པ་དེ་ཧུར་ཐག་བྱས་ན།་དེ་ནི་རྒྱལ་བ་དགྱེས་པའི་མཆོད་སྤྲིན་དང་།གང་མགྱོགས་གཞིས་བྱེས་མཉམ་འཛོམས་ཐུབ་པའི་ལམ་ཁ་གཅིག་རང་དེ་ཡིན།
བོད་དེ་རང་བཙན་ཐོབ་ཀྱང་འདྲ། མ་ཐོབ་ཀྱང་འདྲ། རང་བཙན་གྱི་ལམ་དུ་བསྐྱོད་ན་ལེགས་པར་སྙམ། བརྒྱ་ལ་མ་ཐོབ་ཀྱང་མ་འོངས་པར་གཞོན་སྐྱེས་ཚོར་ལམ་ཁ་ཡག་པོ་ཞིག་ལྷག དེ་མིན་ན་གང་ཡང་མེད་པ་ཆགས་གྲབས་འདུག་གོ།
རྒྱ་ནག་སྟོབས་ཤུགས་ཆེ་དྲག་པས་རྒྱལ་ཁབ་གཞན་གྱི་བོད་པའི་སྐོར་བཤད་མི་སྲིད། གལ་སྲིད་བཤད་ཀྱང་ནུས་པ་གང་ཡང་མི་འཐོན་པར་སྙམ།
བོད་ཀྱི་ཁོར་ཡུག་སྲུང་སྐྱོབས་ཡོང་དགོས་པ་ཡིན་ན། བོད་དོན་ཐད་ཀར་ཐག་གཅོད་བྱེད་རྒྱུ་ལས་སྐད་ག་ཚོད་ཅིག་བསྐུར་ཡང་གཙང་བོའི་ནང་དུ་རྡོ་འཕངས་པ་ལས་མེད། དེ་ནི་བདག་གི་བསམ་ཚུལ་ཡིན། ནོར་ཡོད་ན། སུ་ཡིས་ནོར་འཁྲུལ་དུ་གཟིགས་པ་དེར་དགོངས་སེལ་ཞུ་ཆོག
རྒྱ་ནག་དམར་བོའི་སྲིད་སྐྱོང་བ་ཚོས་གནས་སྐབས་ཀྱི་ཧམ་སེམས་ཆེ་དྲག་པའི་བོད་ཀྱི་འཁོར་ཡུལ་གཏོར་བཅོམ་དང་གཏེར་ཁ་བརྔོག་འདོན་བྱས་འབྲས་ནི། མི་རིང་བར་ཤར་གླིང་ཨེ་ཤ་ཡའི་ཕྱིས་འབྱུང་ཁམས་མི་སྙོམས་པར་ཆགས་པའི་ཁར་ཉིན་རེའི་འཚོ་བ་ལ་མེད་དུ་མི་རུང་བའི་བཏུང་ཆུ་སོགས་རྩ་མེད་དུ་འགྲོ་སྲིད་པའི་དེ་ལ་བོད་པ་གཅིག་བུའི་སྐད་རྒྱུ་ཙམ་མིན་པར་ཨེ་ཤ་ཡའི་རྒྱལ་ཁབ་སོ་སོའི་ངོས་ནས་བསམ་གཞིག་བྱ་རན་ཆགས་ཡོད་པ་རེད།