འོད་ཟེར་གྱིས་བརྩམས། དོན་གོས་བསྒྱུར།
ཉེ་ཆར་ནེའུ་ཡོག་དུས་བབ་ཀྱི་གསར་འགོད་པས་ང་ལ་འཕྲིན་ཡིག་ཞིག་བསྐུར་ཡོང་སྟེ། པེ་ཅིན་གནམ་བདེ་སྒོ་མོ་ཆེའི་དོན་རྐྱེན་བྱུང་སྟེ་མི་ལོ་ ༢༠ འཁོར་བའི་དུས་དྲན་བགྲོ་གླེང་ཞིག་ཏུ་མགྲོན་འབོད་གནང་སོང་ལ། དེའི་སྟེང་བརྗོད་གཞི་གསུམ་གྱི་ཐོག་བགྲོ་གླེང་བྱ་དགོས་ཚུལ་བརྗོད་བྱུང། དང་པོ། འདས་པའི་རྒྱ་གཞུང་གི་སྲིད་བྱུས་ཁ་གཏད་དུ་ལངས་པའི་མི་སྣ་དེ་དག་སྐབས་དེའི་གནས་སྟངས་གང་འདྲ་ཞིག་གི་འོག་འཚོ་གནས་བྱས་ཏེ་རང་ཉིད་ཀྱི་དངོས་ཡོད་ཇི་ལྟར་འགྲེལ་བརྗོད་བྱས་ཡོད་ཚུལ་དང་། གཉིས་པ། ང་ཚོས་ད་ལྟའི་རྒྱ་ནག་གི་སྲིད་བྱུས་འདི་ལས་གུ་ཡངས་ཀྱི་རྣམ་པ་མཐོང་གི་འདུག་ཅེས་བཤད་ཕོད་དམ། གལ་སྲིད་མེད་པ་ཡིན་ན་དཀའ་ངལ་གང་ཞིག་ལ་ཐུག་འདུག་བསམ། གསུམ་པ། རྒྱ་ནག་དབང་འཛིན་པས་རང་ཉིད་ཀྱི་ལྟ་ཚུལ་བཞིན་ལག་བསྟར་བྱས་པའི་སྲིད་བྱུས་དེ་ཁྱེད་རང་གི་རེ་བ་བཞིན་འབྱུང་སྲིད་དམ། ཅེས་དྲི་བ་ཁག་ཅིག་དྲིས་བྱུང།
དོན་དངོས་ཐོག་བཤད་ན། དྲི་བ་འདི་དག་ནི་ནམ་རྒྱུན་ངས་བསམ་བློ་གཏོང་བཞིན་པའི་གནད་དོན་དང་གཅིག་མཚུངས་ཡིན་སྟབས། ངས་འདི་ལྟར་ལན་བསྐུར་བ་ཡིན། སྤྱི་ལོ་ ༡༩༨༩ ལོའི་དུས་སྐབས་དེ་དང་ད་ལྟའི་གུ་ཡངས་ཀྱི་རྣམ་པ་བསྡུར་ཐབས་མི་འདུག ༡༩༨༠ ལོའི་དུས་དེ་ནི་སྤྱི་ཚོགས་ཁྱོན་ཡོངས་སུ་རིག་གནས་ཀྱི་ཚ་རླབས་ཤིག་འཕྱུར་བཞིན་པའི་དུས་སྐབས་ཤིག་ཡིན་པ་དང་། སྐབས་དེའི་མི་རྣམས་ཀྱིས་སྤྲང་བོ་ཟས་ལ་རྔམ་པ་ལྟར་ལོ་ཟླ་དེའི་ནང་རིག་གནས་གསར་བ་དང་བསམ་བློ་གསར་བ་ནང་འདྲེན་བྱས་པ་མ་ཟད། སྨྲ་བརྗོད་ཀྱི་རང་དབང་ཡང་ད་ལྟའི་དུས་དང་བསྡུར་ན་ཚད་མཐོན་པོ་ཡོད། ད་ལྟ་རྒྱ་ནག་དཔལ་འབྱོར་མ་རྩ་རིང་ལུགས་ཀྱི་ལམ་དུ་སྐྱོད་ཀྱིན་ཡོད་ནའང། ཆབ་སྲིད་ཀྱི་ཕྱོགས་ནས་ཏང་གཅིག་གི་སྒེར་གཅོད་ཀྱི་འོག་ཏུ་ལྷག་ཡོད་ལ། མི་མང་གི་སྨྲ་བརྗོད་རང་དབང་དང་ཆོས་ལུགས་དད་མོས་དེ་ཕྱིར་རིག་གསར་གྱི་དུས་སྐབས་སུ་ཕྱིར་ལོག་རྒྱག་བཞིན་པའི་རྣམ་པ་མངོན་ཡོད། དེ་བཞིན། དབང་འཛིན་མི་སྣས་ནང་ཁུལ་དུ་ཁེ་ཕན་ཁོ་ནར་དམིགས་ཏེ་ཚོགས་སྡེ་འདྲ་མིན་གསར་འཛུགས་བྱས་ཡོད་པ་དང་། ཤེས་ལྡན་མི་སྣས་མི་ཆོས་ལ་དོ་ཁུར་མི་བྱེད་པ། མི་རིགས་གཞན་གྱི་འགྲོ་བ་མིའི་རང་དབང་རྡོག་རོལ་དུ་གཏོང་བཞིན་པ། སྤྱི་ཚོགས་ཀྱི་ཀུན་སྤྱོད་ཚད་གཞི་ཉམས་དམས་སུ་འགྲོ་བཞིན་ཡོད་པ། འགྲོ་བ་མིའི་གནས་སྟངས་དེ་འཇིགས་སྣང་གི་གནས་སུ་གྱར་ཡོད་པ་སོགས་གནད་དོན་རིམ་བཞིན་འབྱུང་གི་ཡོད།
དེ་བཞིན། དེང་སྐབས་རྒྱ་ནག་དང་སྲིད་བྱུས་ལངས་ཕྱོགས་མི་མཐུན་པའི་རིགས་ཀྱི་བར་སྟོང་ཆུང་དུ་འགྲོ་བཞིན་ཡོད་ལ། དེ་ནི། རྒྱ་ནག་གི་ཤེས་ཡོན་པ་དག་གིས་གཞུང་གི་སྐྱོན་བརྗོད་པ་དང་ངོ་རྒོལ་གྱི་རྣམ་པ་སྟོན་མི་ཐུབ་པར། དེ་ལས་ལྡོག་ཏེ་རྒྱ་ནག་གཞུང་གི་གཡོག་པོ་ལྟ་བུ་དང་སྨྲ་ལྕེ་གཉིས་པ་ཆགས་ཡོད་ལ། དེ་ལྟར་མ་སྒྲུབ་ཚེ་ཁོང་ཚོའི་འཚོ་གནས་ལ་དཀའ་ངལ་སྤྲོད་བཞིན་ཡོད་འདུག གལ་སྲིད། རྩོམ་པ་པོ་ཞིག་གིས་བརྩམས་ཆོས་སུ་རང་ཉིད་ཀྱི་དངོས་ཡོད་དང་མངོན་སུམ་གྱི་འཚོ་བ་ཞིག་ཞིབ་འབྲེི་བྱས་ཚེ། དེའི་མགོ་ཐོག་ལ་དབང་འཛིན་པའི་དྲག་ཤུགས་དང་ཁྲིམས་ལུགས་ལག་བསྟར་བྱེད་ཀྱིན་པ་མ་ཟད། སྨྲ་བརྗོད་རང་དབང་དང་རྩོམ་ཡིག་འགྲེམས་སྤེལ་གྱི་དབང་ཆ་གཞུང་བཞེས་གཏོང་གི་རེད་ལ། ཆེས་ཚབས་ཆེ་བ་ནི་རྩོམ་པོ་པོ་དེ་དག་གི་རང་དབང་གི་ཐོབ་ཐང་མེད་པ་བཟོ་རྒྱུ་དེ་རེད། ཡིན་ཡང། འདི་དག་གི་རྐྱེན་གྱིས་རྒྱ་ནག་གིས་གུ་ཡངས་ཀྱི་སྲིད་བྱུས་ལག་བསྟར་བྱ་མི་སྲིད་ཅེས་བརྗོད་དཀའ། ལོ་འདི་དག་ཏུ་རྒྱ་ནག་ནང་འགྲོ་བ་མིའི་ཐོབ་ཐང་དང་ཁྲིམས་ལུགས་ལག་བསྟར་ཐད་གླེང་སློང་བྱེད་མཁན་མང་དུ་འགྲོ་བཞིན་ཡོད་པ་དང་བསྟུན་སྤྱི་དམངས་ཀྱི་འདུ་ཤེས་མཐོ་རུ་འགྲོ་བཞིན་ཡོད། འདི་ནི་དྲ་ལམ་དུ་འགྲོ་བ་མིའི་ཐོབ་ཐང་རྒྱབ་སྐྱོར་བ་མང་དུ་འགྲོ་བཞིན་པར་བརྟེན་ཤེས་ལྡན་མི་སྣའི་ལས་དབང་ལ་འཕོ་འགྱུར་བ་བྱུང་ཞིང་། དེ་མཚུངས་མཐའ་འཁོར་གྱི་ཤེས་ལྡན་པ་དག་གི་སྐད་གདངས་ཀྱང་དྲ་ལམ་བརྒྱུད་དེ་ཕྱི་རོལ་གྱི་ཡུལ་གྲུ་ཀུན་ཏུ་ཁྱབ་ཐུབ་ཀྱིན་ཡོད་པས་རེད། ངས་རང་ཉིད་ཀྱི་ཉམས་མྱོང་དང་དངོས་ཡོད་ཀྱི་བྱུང་བ་ལས་དྲ་ལམ་གྱི་གལ་ཆེན་རང་བཞིན་གསལ་བོར་རྟོགས་ཐུབ་ཀྱིན་འདུག དྲ་ལམ་འདིས་གཞུང་དང་ལངས་ཕྱོགས་མི་མཐུན་པ་ཚོར་མཁའ་དབྱིངས་གཞན་ཞིག་བཟོ་སྐྲུན་བྱས་ཡོད་ལ། དེ་ལས། རྫུན་བཟོ་དང་དངོས་ཡོད་ཀྱི་ལམ་ནས་འཚོ་ལམ་གྱི་བར་སྟོང་ལ་ཤུགས་རྐྱེན་ངེས་ཅན་ཞིག་ཐེབས་ཀྱིན་ཡོད་པ་རེད། དྲ་ལམ་གྱི་ནུས་སྟོབས་འདིར་དབང་འཛིན་མི་སྣ་ཇི་འདྲ་ཞིག་གིས་ཀྱང་གནམ་འོག་ལ་ཁྱབ་པའི་གནས་ཚུལ་འགེབས་སྲུང་བྱ་མི་ཐུབ་པའི་ནུས་པ་ཞིག་ཡོད་པ་རེད།
ང་རང་བོད་མི་ཞིག་ཡིན་ལ། ངས་རང་ཉིད་ཀྱི་སྐད་གདངས་འདི་བོད་ཀྱི་ཆེད་དུ་གྱེར་བཞིན་ཡོད། ངས་དེབ་རྩོམ་པ་དང་དྲ་ལམ་གྱི་ཟིན་བྲིས་སྒོ་འབྱེད། གསར་ལམ་སོགས་བརྒྱུད་དེ་ནང་སེམས་ཀྱི་སྐད་གདངས་ཕྱི་རུ་གྱེར་བ་ནི། ང་རང་གཞུང་དང་ལྟ་བ་མི་མཐུན་པའི་རྩོམ་པ་པོ་ཞིག་འཚོ་སྟངས་ཤིག་ཏུ་གྱུར་ཡོད་སྟབས། ༢༠༠༥ ལོ་ནས་རྒྱ་གཞུང་གིས། ངའི་ཟིན་བྲིས་ཐེངས་གསུམ་ལ་སྒོ་བརྒྱབས་པ་མ་ཟད། ཕྱི་རོལ་གྱི་ཟིན་བྲིས་ཀྱང་སྒོ་བརྒྱབས་པ་རེད། ད་ལྟ་ངས་བེད་སྤྱོད་བྱེད་བཞིན་པ་འདི་ནི་ཐེངས་ལྔ་བའི་ཟིན་བྲིས་ཡིན། དྲ་རྒྱ་ནི་རལ་གྲི་ཁ་གཉིས་མ་ཞིག་དང་འདྲ་ལ།
སྲིད་དབང་སྒེར་གཅོད་པ་དག་གིས་འདི་རང་གི་དམིགས་ཡུལ་སྒྲུབ་ཐབས་སུ་བེད་སྤྱོད་གཏོང་སྲིད་པ་དང་། མཐར་རང་དབང་གི་སྐད་སྒྲ་སྒྲོག་མཁན་རྣམས་བཙོན་རྭ་ཞིག་ཏུ་འཇུག་ངེས་པ་ཡིན། དུས་རབས་ཕྱེད་ཀའི་རིང་འདིར། རྒྱ་ནག་གཞུང་འཛིན་པས་བོད་ཐོག་བཀོལ་བའི་དབང་ཤུགས་དང་གནས་ཚུལ་ཞིབ་བརྗོད་བཅས་ལ་བལྟས་ཚེ། ཁོང་ཚོས་བོད་རྒྱལ་ཁབ་དང་མི་རིགས་འདི་ཉིད་ཡུན་རིང་དབང་བསྒྱུར་དང་ལོ་རྒྱུས་དང་དངོས་ཡོད་སྤྱི་ཚོགས་ཁྲོད་ནས་མེད་པར་བཟོ་བཞིན་པ་དང་དྲག་སྤྱོད་ཀྱི་བྱེད་ལས་དེ་དག་འགེབས་སྲུང་བྱས་ཏེ། བོད་ཀྱི་རང་དབང་གི་ནུས་པ་ཡོད་ཚད་ཁོང་ཚོ་རང་ལག་ཏུ་ཡོད་པར་འདོད་ཀྱིན་ཡོད། ཡིན་ཡང། འཛམ་གླིང་རྒྱ་ཆེ་ཞིང་བར་སྟོང་གང་མང་ཞིག་ཀྱང་རིམ་གྱིས་ཆེ་རུ་འགྲོ་བཞིན་ཡོད་སྟབས། གདུག་རྩུབ་དང་དྲག་གནོན་གྱི་ལོ་རྒྱུས་མུན་ནག་ཁྲོད་ཇི་ལྟར་སྤས་སྐུང་བྱས་ཀྱང་། བོད་མི་གང་མང་ཞིག་གི་སྙིང་སྟོབས་དང་རྣམ་དཔྱོད་ཀྱིས་དངོས་ཡོད་ཀྱི་ཁུངས་གསལ་བོར་བརྟོལ་ཐུབ་ཡོད། གནས་སྟངས་འདི་དག་ལ་བལྟས་ཚེ་ང་ཚོར་རྒྱུན་འཁྱོངས་དང་བཟོད་སྲན་དགོས་པ་རེད། སྤུན་ཟླ་གྲངས་མེད་ཅིག་དམར་གསོད་དང་མནར་གཅོད་ཁྲོད་གནས་ཡོད་ཀྱང་། ང་ཚོ་ད་དུང་གྲགས་མེད་དུ་འདུག་དགོས་བྱུང་ཡོད། ཡིན་ཡང། དྲ་ལམ་གྱིས་སྐད་གདངས་དབྱངས་སུ་གྱེར་མི་ཐུབ་པ་ཚོར་སླར་གསོན་གྱི་མཁའ་དབྱིངས་ཞིག་སྐྲུན་ཡོད་པ་མ་ཟད། མ་འོངས་པར་འདིས་རྒྱ་ནག་བསྒྱུར་བཅོས་གཏོང་ཐུབ་ཀྱི་རེད་ལ་བོད་མི་རིགས་ཀྱང་བསྒྱུར་བཅོས་གཏོང་ཐུབ་སྟབས། འདི་ནི་ང་ཚོའི་བར་ཀྱི་དཀྱོགས་མཚམས་གལ་ཆེན་ཞིག་རེད་བསམ་ལ། གྲགས་འགུལ་ཅི་ཡང་མེད་པ་དེ་ལའང་སྐད་ཤུགས་ཆེན་པོ་ལྟ་བུའི་ནུས་པ་འདུག་སྙམ།།
གྲགས་འགུལ་ཅི་ཡང་མེད་པ་དེའང་སྐད་ཤུགས་ཆེན་པོ་ལྟ་བུའི་ནུས་པ་འདུག་ཞེས་པ་འདི་ག་རེའི་དོན་ཡིན་ན། གྲགས་འགུལ་ཅི་ཡང་མེད་ཚེ་ཤི་སོང་བ་དང་གཅིག་པ་མ་རེད་དམ། འདི་བསྒྱུར་སྐྱོན་ཡིན་ནམ།
གྲགས་འགུལ་མེད་ན་གཉིད་ཁུག་པའམ་ཡང་ན་ཤི་བ་དང་གཅིག་མཚུངས་མ་རེད་པས། གྲགས་འགུལ་ཅི་ཡང་མེད་ན་ཕྱི་རོལ་ཡུལ་ནས་བོད་ཀྱི་བདེ་སྡུག་དང་གནས་སྟངས་ངོ་མ་ག་ལ་རྟོགས། རྟོགས་ཐུབ་ལེ་མ་རེད་གོ
འོད་ཟེར་ལགས་འཚམ་འདྲི་བསུ་མ་དངོས་ལ་བཏང་ནི།
ཞིབ་ཕྲ་བཀླག་རྗེས་བསམ་འཆར་འདོན་གི་ཡིན།
༼ཁོང་ཚོས་བོད་རྒྱལ་ཁབ་དང་མི་རིགས་འདི་ཉིད་ཡུན་རིང་དབང་བསྒྱུར་དང་༽ཞེས་པའི་ནང་གི༼བོད་རྒྱལ་ཁབ༽ཅེས་པ་བསྒྱུར་སྐྱོན་རེད། གལ་སྲིད་འོད་ཟེར་བཙོན་ཁང་དུ་འཇུག་རྒྱུར་དམིགས་མེད་ན་བསྒྱུར་བཅོས་གནང་རོགས། དེ་ལས་ལྡོག་ན། རྒྱ་གཞུང་གིས༼བདག་དབང༽སྒང་ནས་སོར་གང་ལའང་དམིགས་བསལ་སྤྲད་མི་སྲིད་པ་གསལ་བོ་ཡིན།