ཅང་ཙི་མེན་ཐེངས་ག་ཚོད་ཅིག་ལ་ཤི་དགོས་པ་རེད།

མ་ཡིག་གི་ཁ་བྱང -ཐེངས་མང་ཐོན་པའི་ཅང་ཙི་མེན་ཤི་བའི་གནས་ཚུལ་ལ་གཡོ་འཕྲུལ་ཅི་འདུག

རྩོམ་པ་པོ། ཁྲིན་སི་མིན།  བོད་སྒྱུར་བ། པདྨ་མཚོ།

འདི་ལོའི་ཟླ་ ༥ ཚེས་ ༨ ཉིན་ཡང་བསྐྱར་ཅང་ཙི་མེན་ནད་མནར་གྱིས་ཤི་བའི་གནས་ཚུལ་ཐོན་ཡོད་པ་དང་། རྒྱ་ནག་དམར་ཤོག་ཚོགས་པའི་མགོ་འཁྲིད་རིམ་བྱུང་གི་ལོ་རྒྱུས་ནང་རྒན་ཡོལ་དུ་ཕྱིན་རྗེས། ཅང་ཙི་མེན་ལྟར་མི་འདོད་འཁོན་སེམས་ཆེན་པོས་འབུད་རྒྱག་གསུམ་དང་བཀག་འགོག་བཞི་ཡིས་རུབ་རྒྱག་པ་མ་ཟད། ཐ་ན་འདས་གྲོངས་སུ་ཕྱིན་པའི་གནས་ཚུལ་ཡང་ནས་བསྐྱར་དུ་ཐོན་པ་གཅིག་ཀྱང་ཡོད་པ་མ་རེད།

ཅང་ཙི་མེན་ཤི་བའི་གནས་ཚུལ་རིམ་ཐོན་སྐོར་བཤད་སྐབས། གནས་ཚུལ་གྱི་བྱུང་ཐེངས་གཉིས་མ་གླེང་ཐབས་མེད་དུ་གྱུར་ཡོད་དེ་ཐེངས་ཤིག་གསར་འགྱུར་དངོས་སུ་སྤེལ་ཡོད་པ་དང་། ཐེངས་ཤིག་རྒྱ་ནག་གཞུང་ཕྱོགས་ནས་དེའི་སྐོར་ལ་དངོས་སུ་ལན་འདེབས་བྱས་ཡོད་པ་རེད།

ཕྱི་ལོ་ ༢༠༡༡ ཟླ་ ༧ ཚེས་ ༦ ཉིན་གྱི་ཕྱི་དྲོའི་ཆུ་ཚོད་ ༦ ཐོག ཧོང་ཀོང་གི་ཡ་གླིང་བརྙན་འཕྲིན་ཁང་ནས་ཅང་ཙི་མེན་ནད་མནར་གྱིས་གྲོངས་བའི་གནས་ཚུལ་སྤེལ་ཡོད་པ་དང་། སྐབས་དེར་ཡ་གླིང་བརྙན་འཕྲིན་ཁང་གཅིག་པུ་མིན་པར་ཚེས་ ༦ ཉིན་གྱི་ཉིན་གུང་༼ཧྲན་ཏུང་གསར་འགྱུར་དྲ་བའི༽ཐོག་ཡིག་གཟུགས་ཆེན་པོས་ཅང་ཙི་མེན་ཤི་བའི་གནས་ཚུལ་སྤེལ་ཡོད་ཀྱང་དེ་མ་ཐག་བསུབས་ཡོད་པ་རེད།

རྗེས་སུ་ཕྱི་ཕྱོགས་ཀྱི་བརྒྱུད་ལམ་ཁག་གིས་ཡ་གླིང་བརྙན་འཕྲིན་ཁང་གི་གནས་ཚུལ་དེ་མ་ཐོན་གོང་དུ། རྒྱ་ནག་ཧྲང་ཧེ་རུ་ཅང་ཙི་མེན་ལ་ཚབས་ཆེན་ཞིག་ན་ཡོད་པ་དང་། ན་ཚ་དེ་ཟ་མ་དང་འབྲེལ་བ་ཡོད། རྒན་ཡོལ་ཞུས་རྗེས་ཡུན་རིང་ནས་ཧྲང་ཧེ་རུ་གནས་སྡོད་བྱས་ཡོད་པའི་ཅང་ཙི་མེན་ཧ་ལམ་ལོ་ལྟར་ཡཱང་ཀྲུའུ་རུ་ཐེངས་གཅིག་རེར་ལོག་གི་ཡོད་པ་དང་། ཕྱིར་ལོག་ཐེངས་རེར་ཡུལ་དེར་སྐད་གྲགས་ཡོད་པའི་རུས་སྦལ་ཉ་ལེབ་(甲鱼)ཀྱི་བྲོ་བར་མྱོང་གི་ཡོད་པར་བརྟེན། ས་གནས་གཞུང་གི་ལས་བྱེད་ཚོས་ཆེད་དུ་མི་མངགས་ཏེ་བདག་མེད་ཆུ་ནང་དུ་འཚོ་བའི་ཉ་མོ་དེ་བཟུང་ནས་ཁོ་ལ་འབུལ་གྱི་ཡོད་པ་དང་། ད་ལན་ཅང་གིས་ཟོས་པའི་རུས་སྦལ་ཉ་ལེབ་ཀྱི་ཤ་ཡི་ནང་གནོད་འབུ་ཡོད་རྐྱེན་ནད་མནར་ཆེན་པོ་ཕོག་ཡོད་སྐོར་བརྗོད་ཡོད་པ་རེད།

ཕྱི་ལོ་ ༢༠༡༤ ཟླ་ ༩ ཚེས་ ༩ ཉིན་རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་མ་ཧྭ་ཁྲིན་ཡེན་གྱིས་བསྡུས་པའི་གསར་འགོད་ལྷན་ཚོགས་ཤིག་གི་ཐོག གསར་འགོད་པས་ཅང་ཙི་མེན་ཤི་བའི་གནས་ཚུལ་དེ་བདེན་པ་ཡིན་མིན་འདྲི་སྐབས། མོས་བདེན་དཔང་བྱེད་ཐབས་ཡོད་པ་མ་རེད་ཅེས་གཞུང་འབྲེལ་གྱི་ལན་འདེབས་བྱས་ཡོད་པ་རེད།

ཕྱི་ལོ་ ༢༠༡༤ ལོའི་ཕྱི་ཟླ་ ༨ ཚེས་ ༣༠ ཉིན་ཡང་བསྐྱར་ཉི་ཧོང་གི་ཊོག་ཡོ་གསར་ཁང་གིས་ཅང་ཙི་མེན་ཤི་བའི་གནས་ཚུལ་སྤེལ་ཡོད་པ་རེད། གནས་ཚུལ་དེའི་ནང་དུ་ཟླ་ ༨ པའི་ཟླ་མགོ་ཙམ་ལ་ཅང་ཙི་མེན་གྱི་ནད་རྙིང་ཇེ་སྡུག་ཏུ་ཕྱིན་ཡོད་པ་མ་ཟད། ཛ་དྲག་ཏུ་གྱུར་ཏེ་སྨན་ཁང་དུ་སྨན་བཅོས་བྱེད་བཞིན་པ་དང་། ད་ལན་ན་ཚ་དེ་ཁ་ནང་ནས་ཡར་འཛུལ་བ་མིན་པར་སེམས་ལ་ནད་གཞི་ཆེན་པོ་ཕོག་འདུག ཅང་ཙི་མེན་གྱིས་ཀྲུའུ་ཡོང་ཁང་ལ་ཞིབ་བཤེར་བྱེད་པར་མཐའ་གཅིག་ཏུ་ངོ་རྒོལ་བྱས་ཡོད་ཀྱང་། ཞི་ཅིན་ཕིན་གཞུང་གིས་ལོ་དེའི་ཕྱི་ཟླ་ ༧ ཚེས་ ༢༩ ཉིན་ཀྲུའུ་ཡོང་ཁང་ལ་ཞིབ་བཤེར་གྱི་ཉེས་དོན་ཐོ་འགོད་བྱས་རྗེས། ཅང་ཙི་མེན་གྱི་གཟུགས་པོས་མ་ལྕོགས་པར་སྨན་ཁང་དུ་བསྡད་དགོས་ཁེལ་ཡོད་པ་བརྗོད་ཡོད།

ཊོག་ཡོ་གསར་འགྱུར་ཁང་གིས་ཅང་ཙི་མེན་གྱི་ནད་རྙིང་ཕྱི་ཟླ་ ༨ པའི་ཟླ་མགོར་འཕར་བ་བརྗོད་ཡོད་པ་དང་། ཨ་རིའི་ནེའུ་ཡོག་དུས་བབ་ཀྱིས་ཕྱི་ཟླ་ ༨ ཚེས་ ༡༤ ཉིན་སྤེལ་བའི་ཁ་བྱང་དུ་སྟག་དང་སྦྲང་ནག་གི་རྗེས་སུ་སྡོམ་ཅང་ཙི་མེན་ལ་ཐུག་འདུག “After Tigers and Flies, Now a Spider:Jiang Zemin”ཅེས་པའི་གནས་ཚུལ་དེའི་ནང་། ཞི་ཅིན་ཕིན་གྱི་ལྐོག་ཟ་རུལ་སུངས་ལ་རྒོལ་བའི་ལས་འགུལ་ཇེ་དྲག་ཏུ་ཕྱིན་ཏེ། སྦྲང་ནག་དང་སྟག་རྒན་ཕམ་པར་བརྒྱབ་རྗེས་ད་ལྟ་སྡོམ་ཅང་ཙི་མེན་གྱི་མགོ་ལ་བབ་ཡོད་ལུགས་བརྗོད་ཡོད་པ་རེད།

ནེའུ་ཡོག་དུས་བབ་ཀྱི་གནས་ཚུལ་དེའི་ནང་ཅང་ཙི་མེན་རྒན་ཡོལ་དུ་ཕྱིན་ཏེ་ལོ་མང་ཕྱིན་ཡོད་ཀྱང་། ཏང་གི་ཆབ་སྲིད་དང་དམག་དོན། ཁེ་ལས་བཅས་ཀྱི་ནང་ཤུགས་རྐྱེན་ལྷག་ཡོད་སྐོར་བརྗོད་པ་དེའི་ཐད་གནད་དོན་དབྱེ་ཞིབ་པ་ཚོས། ཞི་ཅིན་ཕིན་གྱིས་གཏིང་ཟབ་ཅིང་སྲ་བརྟན་དུ་གྱུར་བའི་ལྐོག་ཟ་རུལ་སུངས་དང་དཔལ་འབྱོར་ཁེ་ཕན་ཧམ་ལེན་ལེགས་བཅོས་དགོས་ན། ཅང་ཙི་མེན་གྱི་ལོ་ངོ་ ༢༠ ལྷག་རིང་གི་ཞིབ་ཚགས་པའི་མི་འབྲེལ་གསང་རྒྱ་ངེས་པར་དུ་གཙང་བཟོ་དགོས་སྐོར་བརྗོད་ཡོད་པ་རེད།

ཅང་ཙི་མེན་སྔར་དང་མི་འདྲ་སྟེ། ཕྱི་ལོ་ ༢༠༡༡ ལོའི་ནད་མནར་སྐབས་ཧྲང་ཧེ་གྲོང་ཁྱེར་སྲིད་གཞུང་གི་རྒྱུན་ལས་ནས་ཅང་ཙི་མེན་གྱི་གཏན་འཁེལ་བའི་ཚོགས་ཆེན་ ༡༨ པའི་མ་རྐང་འཛིན་ལོར་ཧུའུ་ཅིན་ཐའོ་དང་ཝིན་ཅ་པའོ་ཡིས་འགུལ་སྐྱོད་རྒྱག་ཐུབ་པ་མ་རེད་ཅེས་བརྗོད་ཡོད་ཀྱང་། ད་ལོའི་ཚོགས་ཆེན་ ༡༩ པ་འཚོགས་ལ་ཉེ་སྐབས་ཡང་བསྐྱར་ཅང་ཙི་མེན་ཤི་བའི་གནས་ཚུལ་ཐོན་སྐབས། པེ་ཅིན་གྱི་དམར་ཤོག་མི་རབས་གཉིས་པས་ཅང་ཙི་མེན་ལ་བེད་སྤྱོད་མེད་པས་ཤི་གསོན་གང་ཡིན་གཅིག་པ་རེད་ཅེས་བརྗོད་པ་རེད།

ཐེངས་མང་པོར་ཅང་ཙི་མེན་ཤི་བའི་གནས་ཚུལ་ཐོན་པ་དེར་གཡོ་འཕྲུལ་ག་རེ་ཡོད་མེད་གལ་ཆེན་པོ་མ་རེད། གནས་ཚུལ་ཐོན་ཐེངས་རེར་དྲ་ལམ་དུ་མི་མང་གིས་བསམ་ཚུལ་མང་པོ་སྤེལ་བ་མ་ཟད། གོ་སྐབས་བཟུང་སྟེ་ཅང་ཙི་མེན་གྱིས་ལོ་རྒྱུས་གཡོ་ཚོང་དང་རྒྱལ་ཁམས་ཕྱིར་འཚོང་བྱས་པ། དྲུག་བཞིའི་སློབ་ཕྲུག་བཙན་གནོན་དང་ཆོས་འཁོར་རྩ་རླུང་སྒོམ་སྒྲུབ་པར་གནོད་འཚེ། ལྐོག་ཇུས་སྲིད་བསྒྱུར། གཞན་ཡང་། ཏང་སྲིད་དམག་གསུམ་གྱི་སྟག་རྒན་ཆེན་མོའི་རྒྱབ་རྟེན་ཡིན་པ་དང་ཅང་ཚང་གི་ཕ་བུ་གཉིས་ནི་ལྐོག་ཟ་རུལ་སུངས་མཁན་ཨང་དང་པོ་ཡིན་པ་སོགས་ཀྱི་ནག་ཉེས་དམར་རྗེན་དུ་བཏོན་ཡོད་པ་རེད།

ཕྱི་ལོ་ ༢༠༡༤ ལོར་དྲ་ལམ་ཏུ་ཅང་ཙི་མེན་འཛིན་བཟུང་བྱས་ཏེ་ཞིབ་བཤེར་བྱེད་བཞིན་ཡོད་སྐོར་བརྗོད་པའི་བརྙན་ཐུང་ཞིག་ཀྱང་ཚ་ཚ་འུར་འུར་གྱིས་སྤེལ་ཏེ། མི་ཚོས་ཅང་ཙི་མེན་ནད་མནར་གྱིས་ཤི་ན་ལས་སླ་ཐག་ཆོད་པས་རྒྱལ་སྤྱིའི་ཁྲིམས་ཁང་ནས་ཁོ་ལ་ཁྲིམས་ཐག་གཅོད་དགོས་པའི་འཁོན་སེམས་མངོན་པར་བྱས་ཡོད་པ་རེད།

སྐམ་ས་ཆེན་མོའི་ད་ལྟའི་ཞུ་གཏུག་ཡི་གེ་ཁྲི་ ༢༡ མ་ཟིན་ཙམ་གྱིས་ཀྱང་ཅང་ཙི་མེན་སྒུག་བསྡད་ཡོད་པ་བརྗོད་མི་དགོས་པར་བརྟེན། མ་འོངས་པར་ད་དུང་ཅང་ཙི་མེན་ཤི་བའི་གནས་ཚུལ་རིམ་པར་འཐོན་ཏེ།  ཅང་ཙི་མེན་ཁོ་རང་གིས་གཅིག་འགྲུབ་ཀུན་འགྲུབ་ཅིག་ཡོང་བའི་རེ་འདོད་ཆེས་ཆེར་བྱེད་སྲིད་ཀྱང་། སྐབས་དེར་གསོན་པར་རེ་ན་མི་ཆོག་ལ། ཤི་བར་སྨོན་ནའང་མི་འགྲིག་པ་རེད།

མ་ཡིག་གི་འབྲེལ་ཐག http://www.epochtimes.com/b5/17/5/14/n9140157.htm

བསྐྱར་བཅོས།: ༢༠༡༧/༠༥/༡༥

Leave a Reply