རྒྱ་ནག་གི་ད་ལོའི་དཔལ་འབྱོར་འཕེལ་ཚད་དེ་ཕྱི་ཟླ་ ༤ བ་ནས་ ༧ པའི་བར་གྱི་ཟླ་གསུམ་རིང་ལ་ ༦.༩ ཟིན་ཡོད་ཅིང་། དེ་ནི་དཔལ་འབྱོར་སྔོན་རྩིས་ཚོད་དཔག་ལས་བརྒལ་ཡོད་འདུག
དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་ད་ལོའི་ལོ་ཕྱེད་རིང་གི་དཔལ་འབྱོར་འཕེལ་ཚད་དེ་རྒྱ་ནག་གཞུང་གི་དཔལ་འབྱོར་དམིགས་ཚད་ལས་བརྒལ་ཡོད་ཀྱང་། ད་ལོའི་ལོ་ཕྱེད་རིང་གི་དཔལ་འབྱོར་འཕེལ་ཚད་དེ་ན་ནིང་གི་ཟླ་གསུམ་གྱི་འཕེལ་ཚད་དང་གཅིག་པ་ཆགས་ཡོད་འདུག
དཔལ་འབྱོར་ཉམས་ཞིབ་པ་པ་ཚོས། སྤྱི་ཡོངས་ཀྱི་ཆ་ནས་རྒྱ་ནག་གི་དཔལ་འབྱོར་འཕེལ་ཚད་དལ་མོ་ཡིན་པའི་རྒྱུ་མཚན་གཙོ་བོ་ད་ལོ་ནས་བཟུང་སྲིད་གཞུང་གིས་གཞུང་གི་རྒྱུ་དངོས་གཡར་འཇོག་དང་ས་ཆ་བག་གཏོང་སོགས་ལ་སྟངས་འཛིན་ཤུགས་ཆེ་རུ་བཏང་ཡོད་པས་ཡིན་སྐོར་བརྗོད་ཡོད།
རྒྱ་ནག་གིས་ ༢༠༡༧ ལོའི་ལོ་ཕྱེད་རིང་གི་དཔལ་འབྱོར་འཕེལ་ཚད་དེ་ ༦.༥ ཡིན་པར་ཚོད་དཔག་བྱས་ཡོད་ཀྱང་། ཉེ་སྔོན་བཏོན་པའི་སྙན་ཐོ་ལྟར་ན། ད་ལོའི་ལོ་ཕྱེད་རིང་གི་དཔལ་འབྱོར་འཕར་ཚད་དེ་སྔའི་ཚོད་དཔག་ལས་བརྒལ་ཏེ་ ༦.༩ ཆགས་ཡོད་འདུག
རྒྱ་ནག་གིས་ཁང་པ་བག་གཏོང་དང་རྒྱུ་ནོར་གཡར་འཇོག་གི་ཁྲོམ་རྭའི་ཚད་གཞི་དམའ་རུ་སོང་ཡོད་ན་ཡང་། ད་ལོའི་ལོ་ཕྱེད་རིང་དངོས་ཟོག་མ་འཛུགས་ཀྱི་དཔལ་འབྱོར་འཕེལ་ཚད་བརྒྱ་ཆ་ ༨།༥ ལ་ཟིན་ཡོད་པ་དང་། དེ་ནི་ ༢༠༡༦ ལོའི་ད་ལྟའི་དུས་ཚོད་འདིའི་འཕེལ་ཚད་དང་གཅིག་པ་ཆགས་ཡོད་འདུག
དཔལ་འབྱོར་ཉམས་ཞིབ་པ་ཁ་ཤས་ཀྱིས་རྒྱ་ནག་གཞུང་གིས་དངོས་ཟོག་གཡར་གཏོང་གི་ལམ་ལུགས་ཇེ་དམ་དུ་གཏོང་གི་ཡོད་པ་དེས་ཤུགས་རྐྱེན་ཆེན་པོ་ཐེབས་བཞིན་ཡོད་པར་བརྗོད་ཡོད། རྒྱ་ནག་གི་དཔལ་འབྱོར་ཉམས་ཞིབ་པ་ལཱ་རེ་སི་ཕིན་(Iris Pang)གྱིས་ “དངོས་ཟོག་བུན་གཡར་དང་བག་གཏོང་གི་གོང་ཚད་འཕར་བ་དང་སྟངས་འཛིན་ཤུགས་ཆེ་རུ་བཏང་བ་དེས་ལོ་གཅིག་གི་དཔལ་འབྱོར་འཕེལ་ཚད་ཀྱི་ལོ་ཕྱེད་ཀའི་ཟླ་རྗེས་མ་དག་ལ་ཤུགས་རྐྱེན་ཐེབས་སྲིད་ན་ཡང་། ཤུགས་རྐྱེན་དེའང་ང་ཚོས་བསམ་པ་ལྟར་རྒྱ་ནག་རྒྱལ་ཡོངས་སུ་ཐེབས་ཐུབ་པ་ཞིག་མིན་པར། དཔལ་འབྱོར་ལྟེ་བའི་གྲོང་ཁྱེར་རིམ་པ་དང་པོ་དག་ཁོ་ནར་ཐེབས་སྲིད་ན་ཡང་། གྲོང་ཁྱེར་རིམ་པ་གསུམ་པ་དང་བཞི་བའི་དག་གི་དཔལ་འབྱོར་འཕེལ་ཚད་ཅུང་ཙམ་ཡར་རྒྱས་ཕྱིན་ཏེ། དཔལ་འབྱོར་འཕེལ་ཚད་མར་ཆགས་པའི་རིམ་པ་དང་པོའི་གྲོང་ཁྱེར་ཁག་གི་རྗེས་ཟིན་ཡོང་དུས་སྤྱིའི་དཔལ་འབྱོར་གནས་བབ་གཅིག་པ་ཆགས་ཡོང་གི་ཡོད་པ་རེད།”ཅེས་བརྗོད་འདུག
རྒྱ་ནག་གི་ལོ་ངོ་ ༢༦ རིང་གི་དཔལ་འབྱོར་འཕེལ་ཚད་དེ་ ༢༠༡༦ ལོ་ནས་ཇེ་ཞན་དུ་ཕྱིན་ཡོད་ན་ཡང་། གཟའ་ཟླ་བའི་ཉིན་རྒྱ་ནག་གི་དཔལ་འབྱོར་འཕེལ་ཚད་དཔྱད་ཞིབ་རེའུ་མིག་ཅིག་བཏོན་པ་ལྟར་ན། རྒྱ་ནག་གི་དཔལ་འབྱོར་འཕེལ་ཚད་དེ་བསྐྱར་དུ་ཡར་རྒྱས་འགྲོ་བཞིན་ཡོད་པ་བསྟན་ཡོད་ལ། དངོས་ཟོག་ཐོན་སྐྱེད་བཟོ་གྲྭ་ཁག་གི་དཔལ་འབྱོར་འཕེལ་ཚད་ཟླ་ ༦ པའི་ནང་བརྒྱ་ཆ་ ༧.༦ ལ་བསླེབས་ཏེ་སྔོན་དཔག་ལས་ ༦.༥ ལས་བརྒལ་ཡོད་འདུག
དེ་བཞིན། ཉེར་མཁོའི་དངོས་ཟག་གི་འཕར་ཚད་དེ་ ༢༠༡༦ ལོའི་ཟླ་ ༦ པའི་ནང་གི་འཕར་ཚད་དང་བསྡུར་ན་བརྒྱ་ཆ་ ༡༡ འཕར་ཡོད་པ་དང་། དངོས་ཟོག་ཕྱིར་གཏོང་ནང་འདྲེན་གྱི་འཕར་ཚད་དུས་རྒྱུན་གྱི་ཚོད་དཔག་ལས་བརྒལ་ཡོད་འདུག
གསར་འགོད་པ། སངས་རྒྱས་དཀོན་མཆོག
རྒྱ་ནག་གི་དཔལ་འབྱོར་ཡར་རྒྱས་ཇི་ཙམ་ཕྱིན་ཀྱང་རྒྱ་ནག་ནང་དཔལ་འབྱོར་གྲལ་རིམ་གྱིྈམཐའ་རུ་ཡོད་པའི་འབྱོར་མེད་གྲལ་རིམ་ས་ཡ་མང་པོ་ཡོད་པ་དེ་ཚོ་ལ་བལྟས་ན་རྒྱ་ནག་གི་དཔལ་འབྱོར་ཇི་ཙམ་ཡར་རྒྱས་ཕྱིན་ཀྱང་ཧང་སང་གི་མི་འདུག་།