སྐུ་ལུས་མེར་སྲེག་གནང་མཁན་ཞིག་ཀློད་གྲོལ་བཏང་།

འདས་པའི་ལོ་དྲུག་ཙམ་གྱི་རིང་གར་ཡོད་ཅི་བྱུང་མེད་པར་གྱུར་བའི་སྐུ་ལུས་མེར་སྲེག་གནང་མཁན་རྔ་བ་ཀིརྟི་དགོན་གྱི་གྲྭ་བློ་བཟང་སྐལ་བཟང་ལགས་དེ་རིང་བཙོན་གྲོལ་བཏང་ཡོད་འདུག

འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་འཛིན་བཟུང་བཙན་འཁྲིད་བྱས་པའི་བོད་དོན་སྐུ་ལུས་མེར་སྲེག་གནང་མཁན་རྔ་བ་ཀིརྟི་དགོན་པའི་གྲྭ་བློ་བཟང་སྐལ་བཟང་ལགས་དེ་རིང་རྔ་བ་ཏིག་ཡང་ (德阳阿坝监狱) བཙོན་ཁང་ནས་ཀློད་གྲོལ་བཏང་ཡོད་པ་དང་། ད་ལྟའི་ཆར་ཁོང་གི་སྐུ་གཟུགས་གནས་སྟངས་ག་འདྲ་ཡིན་ཤེས་རྟོགས་ཐུབ་ཀྱི་མེད་པ་རེད།

ཕྱི་ལོ་ ༢༠༡༡ ་ཟླ་ ༩ ཚེས་ ༢༦ ཉིན་གྱི་སྔ་དྲོ་བོད་ནང་གི་ཆུ་ཚོད་ ༡༠ ཡས་མས་སུ། རྔ་བ་ཀིརྟི་དགོན་པའི་རང་ལོ་ ༡༨ ཡིན་པའི་གྲྭ་བློ་བཟང་སྐལ་བཟང་ལགས་དང་རང་ལོ་ ༡༨ ཡིན་པའི་གྲྭ་བློ་བཟང་དཀོན་མཆོག་གཉིས་ཀྱིས། རྔ་བ་རྫོང་གི་ཁྲོམ་གཞུང་དུ་ “༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག བོད་ལ་ཆོས་དད་རང་དབང་དགོས།” ཞེས་སྐུ་ལུས་མེར་བསྲེགས་ཀྱིས་ངོ་རྒོལ་སྐད་འབོད་གནང་ཡོད་པ་དང་། ་། ཅུང་ཙམ་ལས་མ་འགོར་བར་ཉེན་རྟོག་པ་དང་དྲག་ཆས་དམག་མི་མང་པོ་ཡོང་སྟེ།  གྲྭ་བློ་བཟང་སྐལ་བཟང་ལགས་ཉེན་རྟོག་པས་བཙན་འཁྲིད་བྱས་རྗེས་ད་ལྟ་བར་གར་སོང་ཅི་བྱུང་མེད་པར་གྱུར་ཡོད་པ་དང་། ཁོང་གི་རོགས་པ་གྲྭ་བློ་བཟང་དཀོན་མཆོག་ལགས་འདི་ལོའིི་ཕྱི་ཟླ་ ༣ ཚེས་ ༢༨ ཉིན་བཙོན་ཁང་ནས་ཀློད་གྲོལ་བཏང་ཡོད་པ་རེད།

གྲྭ་བློ་བཟང་སྐལ་བཟང་ལགས་ནི་རྔ་བ་རྫོང་རྨེའུ་རུ་མ་རུ་ཆེན་གཉིས་པའི་ཇ་རུ་ཚང་གི་ཚེ་རིང་བཀྲ་ཤིས་ཀྱི་བུ་དང་། ཕྱི་ལོ་ ༢༠༡༡ ལོར་སྐུ་ལུས་མེར་སྲེག་གནང་མཁན་གྲྭ་ཕུན་ཚོགས་ལགས་ཀྱི་ཚ་བོ་ཡིན་འདུག

ཕྱི་ལོ་ ༢༠༠༩ ནས་ད་ལྟའི་བར་བོད་ནང་དུ་བོད་མི་ ༡༥༠ མ་ཟིན་ཙམ་གྱིས་སྐུ་ལུས་མེར་བསྲེགས་གནང་སྟེ། རྒྱ་གཞུང་གི་བཙན་གནོན་སྲིད་བྱུས་ལ་ངོ་རྒོལ་གནང་ཡོད་པ་གསལ་པོ་ཆགས་ཡོད་པ་དང་། སྐུ་ལུས་མེར་བསྲེགས་གནང་མ་ཐག་ཉེན་རྟོག་པས་བཙན་འཁྲིད་བྱས་ཏེ་གར་ཡོད་ཅི་བྱུང་མེད་པར་གྱུར་བའི་བོད་མི་ ༢༢ ལྷག་གི་ནང་ནས་གསུམ་ཀློད་གྲོལ་བཏང་ཟིན་པ་ཁ་གསལ་ཆགས་ཡོད་པ་རེད།

གསར་འགོད་པ། པདྨ་མཚོ།

བསྐྱར་བཅོས།: ༢༠༡༧/༠༧/༣༠

Leave a Reply