རྒྱ་ནག་དང་དབྱི་རན་གྱིས་ཨ་རིས་ཆོས་ལུགས་བེད་སྤྱོད་བཏང་ནས་རྒྱལ་ཁབ་གཞན་གྱི་ནང་སྲིད་ལ་ཐེ་བྱུས་བྱེད་ཀྱི་འདུག་པས་ཨ་རིའི་ཆོས་ལུགས་རང་དབང་གི་ཞིབ་འཇུག་སྙན་ཐོ་ངོས་ལེན་མེད་ལབ་འདུག

ཟླ་འདིའི་ཚེས་༡༥ ཉིན་ཨ་རིའི་འཛམ་གླིང་ཡོངས་ཀྱི་ཆོད་དད་རང་དབང་སྐོར་གྱི་ལོ་འཁོར་སྙན་ཐོ་ཞིག་བཏོན་ཡོད་པ་དང་། ཨ་རིའི་ཕྱི་སྲིད་དྲུང་ཆེ་སྐུ་ཞབས་ཊི་ལིར་སོན་(Rex Tillerson)གྱིས་རྒྱ་ནག་དང་དབྱི་རན།  པ་ཀི་སི་ཐན། སོ་དྷེ་ཨ་རབ། སོ་དྷིན། ཊོར་ཁེ་སོགས་ཀྱི་འགྲོ་བ་མིའི་ཐོབ་ཐང་དང་ཆོས་ལུགས་དད་མོས་གནས་བབ་ཧ་ཅང་སྐྱོ་བོ་ཡིན་པའི་སྐྱོན་བརྗོད་བྱས་ཡོད་པ་དང་། ཁོས་ད་དུང་དབྱི་རན་གྱིས་འདས་པའི་ནང་ཆོས་ལུགས་གྲངས་ཉུང་བའི་མི་ ༢༠ ལྷག་ལ་ནག་ཉེས་ཅི་ཡང་མེད་པར་གདུག་སྦྱོང་མནར་གཅོད་ཀྱི་ཁྲིམས་གཞི་ལག་བལྟར་བྱས་ཡོད་པ་བརྗོད་ཡོད་པ་རེད།

ཟླ་འདིའི་ཚེས་ ༡༦ ཉིན་དབྱི་རན་གྱི་ཕྱི་སྲིད་བློན་ཆེན་གྱི་མགྲིན་ཚབ་པ་སྐུ་ཞབས་(Bahram Ghasemi)ཡིས་ཕྱི་སྲིད་བློན་ཆེན་དྲ་རྒྱའི་ངོས་སུ་སྙན་ཐོ་དེ་ནི་བདེན་པ་མ་ཡིན་པར། སྙན་ཐོ་དེ་ནི་གཞི་འཇོག་ས་གང་ཡང་མེད་པའི་ཆབ་སྲིད་ཀྱི་དགོས་དམིགས་ཁོ་ནའི་ཆེད་དུ་བཏོན་པ་ཞིག་ཡིན་པའི་སྐྱོན་བརྗོད་བྱས་ཡོད་འདུག

ཡང་ཁོས་ཨ་རིའི་ནང་ལོག་ཏུ་ཆོས་ལུགས་དང་མི་རིགས་དཀར་ནག་གི་དབྱེ་འབྱེད་ཡོད་གསལ་བོ་ཡིན་པ་དང་། ཕན་ཚུན་སྡང་འཛིན་དང་དབྱེ་འབྱེད་ལམ་ལུགས་ཀྱི་སྣང་ཚུལ་ཨ་རིའི་ཆབ་སྲིད་པ་ཚོའི་ནང་དུ་རྒྱ་ཁྱབ་ཏུ་ཕྱིན་ནས་ཡོད་པ་རེད། ཅེས་བརྗོད་ཡོད་འདུག

ཨ་རིའི་སྙན་ཐོའི་ནང་དུ་རྒྱ་ནག་གཞུང་གིས་ཡི་ཤུ་བ་དང་ཁ་ཆེ། ཆོས་འཁོར་རྩ་རླུང་སྒོམ་སྒྲུབ་པ་དང་བོད་ཀྱི་ནང་པ་ཚོར་ཉེས་མེད་སྡུག་སྦྱོང་མནར་གཅོད་གཏོང་གི་ཡོད་པ་བསྒྲགས་ཡོད་པར་བརྟེན། རྒྱ་ནག་ཕྱི་འབྲེལ་ལས་ཁུངས་ཀྱི་མགྲིན་ཚབ་མ་ཧྭ་ཁྲིན་ཡེན་(Hua Chunying)གྱིས་གསར་འགོད་གསལ་བསྒྲགས་ཤིག་གི་ཐོག རྒྱ་ནག་མི་སེར་དང་གྲངས་ཉུང་མི་རིགས་ཚང་མས་ཆོས་དད་རང་དབང་ཆ་ཚང་ལོངས་སུ་སྤྱོད་ཀྱི་ཡོད་པས། ཨ་རིའི་སྙན་ཐོ་ཟེར་བ་དེས་དོན་དངོས་གནས་ཚུལ་སྣང་མེད་བཏང་འདུག ཅེས་དང་། ང་ཚོས་ཨ་རིའི་རྒྱལ་ཁབ་དེ་ཉེས་སྐྱོན་བྲལ་བའི་ཡང་དག་གི་རྒྱལ་ཁབ་ཅིག་ཏུ་མཐོང་གི་མེད་ལ། ང་ཚོས་རེ་བར་ཨ་རིའི་རང་ཉིད་ཀྱི་ནང་ལོག་གནད་དོན་ལ་དོ་སྣང་སྤྲད་ན་རེད། ཅེས་བརྗོད་ཡོད་འདུག

ཨ་རིའི་སྙན་ཐོའི་ནང་དུ་ཕྱི་ལོ་ ༢༠༡༦་ལོར་རྒྱ་ནག་གཞུང་གིས་ངོས་ལེན་ཡོད་དང་མེད་སོགས་ཀྱི་ཆོས་ལུགས་མི་སྣ་མང་པོ་ཞིག་འཛིན་བཟུང་བཅར་བརྡུང་དང་། བཙོན་བཅུག་ཁྲིམས་ཐག་གཅོད་པ་དང་མནར་གཅོད་གཏོང་བ་སོགས་བྱས་ཡོད་སྐོར་དང་།  རྒྱ་ནག་རྒྱལ་ཁབ་བདེ་འཇགས་བཅའ་ཁྲིམས་ཟེར་བར་ཁ་གཡར་ཏེ་ཆོས་འཁོར་རྩ་རླུང་སྒོམ་སྒྲུབ་པ་དང་། ནང་ཆོས་ལ་དད་མོས་བྱེད་མཁན། ཡི་ཤུ་ཆོས་ཚོགས་མང་པོ་ཞིག་ལ་བཀག་བསྡོམས་བྱས་ཡོད་པ་མ་ཟད། ཤིན་ཅང་ས་ཁུལ་གྱི་སློབ་གྲྭ་ཁག་ནང་ཆོས་ལུགས་ཀྱི་བྱེད་སྒོ་སྤེལ་བར་བྱིས་པ་ཚོའི་ཕ་མ་དང་དགེ་རྒན་སོགས་ལ་བཙན་བཀའ་བཏང་ནས་བཀག་འགོག་བྱས་ཡོད་སྐོར་བཀོད་འདུག

མགྲིན་ཚབ་པ་ཧྭ་ཁྲིན་ཡེན་གྱིས། ཝ་ཤིན་ཊོན་གྱིས་མ་འོངས་པར་རྒྱལ་ཁབ་གཞན་པའི་ནང་སྲིད་ཆོས་ལུགས་གནད་དོན་ལ་ཁ་གཡར་ནས་ལས་དོན་ནོར་འཁྲུལ་ཅན་གཉེར་བཞིན་པ་ངེས་པར་མཚམས་འཇོག་པ་རེད་ཅེས་བརྗོད་འདུག རྒྱ་ནག་དམར་ཤོག་ཚོགས་པ་ནི་ཆོས་མེད་སྨྲ་བའི་ཚོགས་པ་ཡིན་པ་ལྟར། ཞིབ་འཇུག་པས་བརྗོད་པ་ལྟར་ན་སྲིད་འཛིན་ཞི་ཅིན་ཕིན་སྲིད་སྟེགས་སུ་སླེབས་པ་ནས་བཟུང་རྒྱ་ནག་ནང་ཆོས་ལུགས་ཀྱི་ཆོ་ག་དང་ཆབ་སྲིད་ལས་འགུལ་རིགས་ལ་དམ་དྲག་ཇེ་ཆེར་སོང་ཡོད་པ་བརྗོད་ཡོད་པ་དང་། རྒྱ་ནག་གཞུང་གི་དཔོན་རིགས་ཚོས་རྩ་རླུང་སྒོམ་སྒྲུབ་པ་ཚོར་༡༩༩༩ནས་དམ་དྲག་ཆེན་པོ་བྱས་ཡོད་པ་མ་ཟད། དེའི་ནང་དུ་ཞུགས་མཁན་ཚོར་གདོན་འདྲེར་དད་མོས་བྱེད་མཁན་ཞེས་སྡང་འཛིན་ཆེན་པོ་བྱེད་བཞིན་ཡོད་པ་རེད།

གསར་འགོད་པ། སངས་རྒྱས་དཀོན་མཆོག