སྟོབས་ལྡན་རྒྱལ་ཁབ་ལྔ་ཡི་བཟོ་ཚོང་གླེང་སྟེགས་སྟེང་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་རྒྱལ་ཁབ་ཕན་ཚུན་བར་གྱི་ཆབ་སྲིད་དཔལ་འབྱོར་གྱི་ཁྱད་པར་ཙམ་མ་གཏོགས་རྒྱ་དཀར་ནག་གི་མཐའ་ཁུལ་རྩོད་རྙོག་གླེང་སློང་བྱས་མ་སོང་ཟེར།
རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༣ ཉིན་གྱི་ཕྱི་དྲོར་རྒྱ་ནག་ཧྥུ་ཅིན་ཞིང་ཆེན་གྱི་ཞ་མིན་རྒྱལ་སྤྱིའི་འགྲེམས་སྟོན་ལྟེ་གནས་ཁང་དུ་ཉིན་གཉིས་རིང་གི་སྟོབས་ལྡན་རྒྱལ་ཁབ་ལྔ་ཡི་བཟོ་ཚོང་གླེང་སྟེགས་ཚོགས་མགོ་བརྩམས་ཡོད་པ་དང་། ཚོགས་ཆེན་ཐོག་རྒྱལ་ཁབ་ལྔ་ཡི་དབུ་ཁྲིད་དང་ཁེ་ལས་གནད་ཡོད་མི་སྣ་ ༡༠༠༠ ལྷག་མཉམ་ཞུགས་བྱས་ཡོད་འདུག
བཟོ་ཚོང་གླེང་སྟེགས་ཀྱི་དམིགས་འདུན་གཙོ་བོ་ཚོང་འབྲེལ་རྒྱལ་ཁབ་ལྔ་ཡི་དཔལ་འབྱོར་འཕེལ་རྒྱས་གཏོང་ཐབས་དང་མཉམ་ལས་བྱེད་ཕྱོགས་སྐོར་ཡིན་པ་དང་། བཟོ་ཚོང་གླེང་སྟེགས་དེའི་གཙོ་སྐྱོང་བ་རྒྱ་ནག་གི་སྲིད་འཛིན་ཞི་ཅིན་ཕིན་ཡིན་འདུག
ལྷན་ཚོགས་ཐོག་ཞི་ཅིན་ཕིན་གྱིས། རྒྱལ་ཁབ་ལྔ་ཡི་དཔལ་འབྱོར་མཉམ་ལས་ཀྱི་འཕེལ་རྒྱས་ལ་ལྡོག་ཕྱོགས་ཀྱི་སྐྱོན་འཛུགས་ཐེབས་ཀྱི་ཡོད་ཀྱང་། དཔལ་འབྱོར་མཉམ་ལས་ཀྱི་འཕེལ་རིམ་ལ་འགྱུར་ལྡོག་བྱུང་མེད་པ་དེ་ལ་ང་ཚོ་སྤོབས་པས་ཁེངས་ཡོད། བྷར་རྫིལ་དང་ཨུ་རུ་སུ། རྒྱ་གར། རྒྱ་ནག ལྷོ་ཨ་ཧྥི་རི་ཁ་བཅས་རྒྱལ་ཁབ་ལྔ་ཡི་དཔལ་འབྱོར་མཉམ་ལས་ཀྱི་ནུས་ཤུགས་ལ་བརྟེན་ནས་འདས་པའི་ལོ་ངོ་བཅུ་ཕྲག་གཅིག་རིང་རྒྱལ་ཁབ་སོ་སོའི་དཔལ་འབྱོར་ལྡབ་གཉིས་ཀྱིས་འཕེལ་རྒྱས་བྱུང་ཡོད། རྒྱལ་སྤྱིའི་དཔལ་འབྱོར་འཛུགས་སྐྲུན་དང་ཁྲོམ་ར། མ་འཛུགས་བཅས་ལ་དར་རྒུད་ཀྱི་འགྱུར་ལྡོག་བྱུང་ཡོད་ནའང་། དེས་རྒྱལ་ཁབ་ལྔ་ཡི་དཔལ་འབྱོར་མཉམ་ལས་གྱི་འཕེལ་རྒྱས་ལ་ཤན་ཤུགས་ཐེབས་མེད། ཚོང་འབྲེལ་རྒྱལ་ཁབ་ཁག་གིས་རྒྱ་ནག་གི་དཔལ་འབྱོར་འཛུགས་སྐྲན་གྱི་ཁ་ཕྱོགས་དང་བསྟུན་ཏེ་འཕྲུལ་ལས་དང་བཟོ་ལས། ཐུན་མོང་གི་ཁེ་ལས་མཉམ་སྤྱོད་བྱེད་དགོས། ཚོང་འབྲེལ་རྒྱལ་ཁབ་ཁག་གིས་དཔལ་འབྱོར་མཉམ་ལས་ཀྱི་འགན་འཁྲི་དང་ལེན་བྱས་ཏེ་འཛམ་གླིང་ཞི་བདེ་དང་སྤྱི་ཚོགས་བདེ་འཇགས་སྲུང་སྐྱོབ་བྱེད་དགོས། ཅེས་བཤད་ཡོད་འདུག
ཞི་ཅིན་ཕན་གྱིས་ད་དུང་། འདི་ལོའི་ཕྱི་ཟླ་ ༥ བར་རྒྱ་ནག་གིས་རྒྱུད་གཅིག་ལམ་གཅིག་མཉམ་སྐྲུན་གྱི་གྲོས་མགོ་བཏོན་པ་དེ་འདུ་ཤེས་ནས་འགུལ་སྐྱོད་དང་འཆར་འགོད་ནས་ལག་བསྟར་གྱི་དུས་སྐབས་གསར་བར་སླེབས་པ་མཚོན་ཡོད། རྒྱུད་གཅིག་ལམ་གཅིག་མཉམ་སྐྲུན་གྱི་གྲོས་མགོ་བཏོན་པ་དེ་ནི་ས་གནས་བར་གྱི་ཆབ་སྲིད་ཡོ་བྱད་མིན་པར་དངོས་གཉེར་མཉམ་ལས་ཀྱི་སྟེགས་བུ་ཡིན། དེ་ནི་ཕྱི་ཕྱོགས་རོགས་སྐྱོར་གྱི་འཆར་གཞི་མིན་པར། རྒྱལ་ཁབ་ཕན་ཚུན་བར་མཉམ་གྲོས་དང་མཉམ་སྐྲུན། མཉམ་སྤྱོད་བཅས་མཉམ་འབྲེལ་འཕེལ་རྒྱས་ཀྱི་གྲོས་གཞི་ཡིན། ཞེས་ཀྱང་བཤད་ཡོད་འདུག
ཞི་ཅིན་ཕིན་གྱི་གཏམ་བཤད་དེ་ནི་རྒྱ་ནག་གཞུང་གིས་ཚོང་འབྲེལ་རྒྱལ་ཁབ་ཁག་བར་གྱི་བཟོ་ཚོང་གླེང་སྟེགས་བརྒྱུད་ནས་རྒྱལ་སྤྱིའི་སྟེང་རྒྱ་ནག་ལ་འཕྲད་པའི་ཆབ་སྲིད་དཔལ་འབྱོར་གྱི་གནོན་ཤུགས་ལྡོག་ཐབས་དང་། རྒྱལ་སྤྱིའི་ཆབ་སྲིད་དཔལ་འབྱོར་གྱི་སྡིངས་ཆའི་སྟེང་རྒྱ་ནག་གི་བཟང་ཕྱོགས་ཀྱི་སྣང་བརྙན་བསྐྲུན་ཐབས་ཤིག་ཡིན་སྐོར་རྒྱལ་སྤྱིའི་ཆབ་སྲིད་དབྱེ་ཞིབ་པས་བརྗོད་འདུག
བདུན་ཕྲག་སྔོན་མར་རྒྱ་དཀར་ནག་གཉིས་ཀྱི་ཕྱི་འབྲེལ་མི་སྣ་ཁ་ཅིག་བར་འབྲེལ་མོལ་བྱུང་བ་བརྒྱུད་གནས་སྐབས་རིང་ཕྱོགས་གཉིས་ནས་མཐའ་སྲུང་དམག་དཔུང་ཕྱིར་འཐེན་བྱས་ཡོད་ནའང་། ཐེངས་འདིའི་བཟོ་ཚོང་གླེང་སྟེགས་བརྒྱུད་རྒྱ་དཀར་ནག་གི་གནད་ཡོད་མི་སྣ་ཚོ་ཐུག་འཕྲད་བྱུང་སྐབས། རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཕྱོགས་གཉིས་བར་གྱི་ས་མཚམས་རྩོད་རྙོག་སྐོར་གླེང་སློང་ཙམ་ཡང་བྱས་མེད་པ་རེད།
གསར་འགོད་པ། པདྨ་རྒྱལ།
ལོ་རྒྱུས་ཐོག་བོད་དང་རྒྱ་གར་བར་ས་མཚམས་དང་བོད་དང་རྒྱ་ནག་བར་ས་མཚམས་བོད་དང་བལ་ཡུལ་བར་ས་མཚམས་བོད་དང་འབྲུག་བར་ས་མཚམས་བོད་དང་ཤིང་ཅང་བར་ས་མཚམས་ལས་རྒྱ་དཀར་ནག་བར་ས་མཚམས་ཟེར་བ་གོ་མ་མྱོང་ན་འཛམ་གླིང་གི་ས་ཁྲའི་སྟེང་བོད་འཁོད་པ་དེ་རྒྱ་དཀར་ནག་གཉིས་ནས་ནམ་ཡང་སུབ་མི་ཐུབ་པ་དེ་ལོ་རྒྱུས་ཀྱི་ཁ་གྲགས་སྲིད་པ་མ་རེད་དམ་?
་་་་མེད་འདུག་་་་ཟེར་ན་གང་ཡིན་ནམ་་་་་་་་་ཧཧཧཧ་་་་་་་་དེ་བཞིན་ཡིག་ནོར་་་་་་་་