ལོ་རྒྱུས་དགེ་རྒན་གྲཊ་ཅན་ཞིག་དྲ་ལམ་ནས་ཕུད།

ཟླ་འདིའི་ཕྱི་ཚེས་༡༡ ཉིན་རྒྱ་ནག་གི་སྐད་གྲགས་ཆེ་བའི་ལོ་རྒྱུས་དགེ་རྒན་ཡན་ཐུང་ཧྥེ་རྒྱ་ནག་གི་ཝེ་ཕོ་དྲ་གནས་ནས་ཕྱིར་འཕུད་བཏང་ཡོད་འདུག

ཉིན་འགའི་སྔོན་མའོ་འདས་གྲོངས་སུ་སོང་ནས་ལོ་ངོ་༤༡ འཁོར་བའི་རྗེས་དྲན་ཉིན། རྒྱ་ནག་གི་ལོ་རྒྱུས་དགེ་རྒན་གྲགས་ཅན་ཡན་ཐུང་ཧྥེ་(Yuan Tengfei)ཡིས་ཝེ་པོ་དྲ་བར་དེ་རིང་ནི་ཉི་མ་ཡག་པོ་ཞིག་རེད། གནམ་གཤིས་ཡག་པ་དང་ངའི་སེམས་ཁམས་ཧ་ཅང་སྐྱིད་པོ་འདུག་ཅེས་བྲིས་ཡོད་པ་དང་། ཉིན་གསུམ་གྱི་རྗེས་སུ་གཞུང་ཕྱོགས་ནས་ཁོང་གི་ཝེ་པོ་དྲ་གནས་སྒོ་བརྒྱབ་ཡོད་འདུག  ཁོང་ནི་ནམ་རྒྱུན་རྒྱ་ནག་དམར་ཤོག་གཞུང་ལ་སྐྱོན་བརྗོད་དང་མའོ་རིང་ལུགས་ལ་མི་དགའ་མཁན་ཞིག་ཡིན་འདུག

ད་ཐེངས་ཁོང་གི་ཝེ་པོ་དྲ་གནས་གཏན་འགོག་བྱེད་དོན་གསལ་ཁ་ཅི་ཡང་མེད་ན་ཡང་། ཕལ་ཆེར་ཁོང་གིས་ཉིན་རྒྱུན་དྲ་འབྲེལ་བ་ཚོ་དང་འཆད་འཁྲིད་ཀྱི་བརྗོད་གཞི་རྒྱ་ནག་གི་རིག་གནས་གསར་བརྗེ་དང་མདུན་མཆོངས་ཆེན་མོ་སོགས་ཀྱི་སྐོར་ཡིན་པ་དང་། ཁོང་གི་འཆད་འཁྲིད་མང་པོ་ཞིག་ཏུ་མའོ་ལ་སྐྱོན་བརྗོད་ཤུགས་ཆེར་བྱས་ཡོད་པའི་རྐྱེན་གྱིས་ཡིན་སྲིད་སྐོར་བརྗོད་ཀྱི་འདུག

ངེས་གསལ་བྱུང་བ་ཞིག་ལ་ཁོས་སློབ་ཕྲུག་ཚོར་རྒྱ་ནག་པེ་ཅིང་གི་མའོ་ཡི་དྲན་རྟེན་ཁང་གི་མདུན་གྱི་མའོ་ཡི་འདྲ་སྐུ་ལ་གུས་ཞབས་བྱེད་པའི་ཚབ་ལ་སྡུག་དམོད་བྱེད་དགོས་པ་རེད། ཁོ་ཚོ་ནི་དམག་འཁྲུག་དང་མི་གསོད་ཀྱི་ཉེས་ཅན་པ་རེད་ཅེས་བརྗོད་མྱོང་ཡོད་འདུག

མའོ་འདས་གྲོངས་སུ་སོང་ནས་ལོ་ངོ་བཅུ་ཕྲག་བཞི་ལྷག་འགྲོ་བཞིན་ཡོད་ན་ཡང་། རྒྱ་ནག་ནང་དུ་ད་དུང་མའོ་ལ་དགའ་ཞེན་ཅན་དང་མའོ་ཡི་རིང་ལུགས་གལ་ཆེན་འཛིན་མཁན་ཁག་ཅིག་ཡོད་ན་ཡང་། རྒྱ་ནག་གི་སློབ་གསོ་བ་ཚོའི་ཁྲོད་མའོ་ལ་མི་དགའ་མཁན་མང་པོ་ཞིག་རང་བཞིན་གྱིས་ཡོང་གི་ཡོད་པ་རེད།

འདས་ལོར་རྒྱ་ནག་ཧྲན་ཏུང་གཙུག་ལག་སློབ་གཉེར་ཁང་(Shandong University)གི་སློབ་དཔོན་ཞིག་གིས། མའོ་ཡི་ལོ་ ༡༢༣ གྱི་སྐྱེས་སྐར་ཉིན་ཚེ་སྲོག་ས་ཡ་མང་པོ་དམར་གསོད་གཏོང་མཁན་ཞེས་སྡུག་དམོད་བྱས་ཡོད་པ་དང་། རྒྱ་ནག་ཧི་པའེ་ཞིང་ཆེན་(Hebei)གྱི་སློབ་དཔོན་ཞིག་གིས་སྤྱི་ཚོགས་དྲ་རྒྱའི་སྒང་དུ་མའོ་ལ་གདོན་འདྲེ་ཞེས་སྡུག་དམོད་བཏང་ཡོད་པ་རེད། དེ་བཞིན་ད་ལོའི་ཟླ་ ༧ པའི་ནང་རྒྱ་ནག་ཆིན་ཧྭ་སློབ་ཆེན་གྱི་རིག་གནས་གསར་བརྗེ་སྐོར་གྱི་སློབ་ཚན་མེད་པ་བཟོས་ཡོད་འདུག

ཡན་ཐུང་ཧྥེ་ནི་རྒྱ་ནག་པེ་ཅིང་དུ་ཡོད་པའི་རྒྱལ་སའི་དགེ་འོས་སློབ་ཆེན་(Capital Normal Universityདུ། རྒྱ་ནག་གི་ལོ་རྒྱུས་ ཐོག་སློབ་མཐར་ཕྱིན་ཡོད་པ་དང་། དེ་ནས་བཟུང་ཁོང་གིས་རྒྱ་ནག་རྒྱལ་ཡོངས་མཐོ་རིམ་སློབ་གྲྭ་ཁག་ཏུ་ལོ་རྒྱུས་སློབ་འཁྲིད་དང་གདན་ཞུའི་འཆད་འཁྲིད་སོགས་གནང་གི་ཡོད་འདུག ༢༠༠༨ ལོར་ཁོང་གི་འཆད་འཁྲིད་བརྙན་རིས་ཁག་ཅིག་པེ་ཅིང་དམའ་འབྲིང་གསབ་འཁྲིད་སློབ་གྲྭ་(cram school)དྲ་ཐོག་ལ་བཞག་པ་ནས་རྒྱ་ནག་གི་མཐོ་རིམ་སློབ་ཆེན་ཁག་ཏུ་ཁོང་སྐད་གྲགས་ཆེན་པོ་ཆགས་ཏེ། སློབ་མ་ཚོས་ཁོང་ལ་ཆེས་ངོ་མཚར་བའི་ལོ་རྒྱུས་དགེ་རྒན་ཞེས་འབོད་ཀྱི་ཡོད་པ་དང་། ཨ་རིའི་ནེའུ་ཡོག་དུས་བབ་ཀྱིས་ཁོང་ལ་དེ་རིང་གི་རྒྱ་ནག་ནང་གི་ཆེས་གྲགས་ཆེ་བའི་དགེ་རྒན་ཞེས་ངོ་སྤྲོད་གནང་ཡོད་འདུག

ཁོང་གིས་སྔ་གཞུག་ཏུ་རྒྱ་ནག་གི་ལོ་རྒྱུས་སྐོར་གྱི་དེབ་དང་ལོ་རྒྱུས་སློབ་འཁྲིད་སྐོར་གྱི་དེབ་མང་པོ་ཞིག་ཕུད་ཡོད་པ་དང་། ཁག་ཅིག་རྒྱ་ནག་ནང་དུ་ཚོང་འགྲེམས་ཡག་ཤོས་ཀྱི་དེབ་ཆགས། ཉེ་སྔོན་ཁོང་གིས་ཝེ་པོ་དྲ་རྒྱ་བརྒྱུད་ནས་ཁོ་རང་གི་དྲ་འབྲེལ་བ་ཚོར་མུ་མཐུད་དུས་ཚོད་ཁོམ་དུས་དང་བསྟུན་ནས་ཁ་བརྡ་དང་འཆད་འཁྲིད་བྱེད་ཀྱི་ཡོད་པ་དང་། ཁོང་ལ་ད་ལྟ་ཝེ་པོ་དྲ་བའི་རྗེས་འཇུག་པ་ས་ཡ་ ༡༦ ལྷག་ཡོད་འདུག

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༧/༠༩/༡༤

Leave a Reply